Read Lamnso Lim Aŋgàa Ntum 1 Bible Online

Lim Aŋgàa Ntum 1 - Lamnso bible

Lim Aŋgàa Ntum 1

¹Teefilor, fo ŋwàʼ wo mò‑oò saŋen e wò fo mbìy, mò‑oò fèr vinyo vidzə̀m ve Jesus‑eè yii, kfə̀n yéʼey wíri shó, e kèʼ fo ghan se wù‑uù kèʼèn lim rə́,

²e meé e ghan se wù‑uù koʼon é yuv. Bo wù wáa koʼ e yuv, wù‑uù beè Kiyoy ke Ranén kí, e tìr aŋgàa ntum və́ ve wù‑uù shoʼtin.

³Wù‑uù lo yiì, áwune kiíy là méŋnín ji wun dzə̀ rú á sho e tin, bìʼ fo wù‑uù fəən fó kpu, e dzə̀ʼtì e nsay kishiíy mkweè, a dìn kitú kfə́ aáwune akàŋ anín, a fèr kinyo kee kùm sáʼ Nyùy.

⁴Wùn áwune wáa dzə bèy, wù nèn fò nsər aáwune jii, «Vèn wíy siiy, lá vèn yòʼ lò fo Jerusalem. Vèn wáa shìy ŋkàʼme Nyùy Tàr wo mò‑oò suuyin e vèn.

⁵A wù dzə̀ jii, mo Joon‑eè wáy wíri é ndzəv, bèr ne vishiíy vishàr, é Nyùy wáy ven a dzə̀ e Kiyoy ke Ranén kí kiwo.»

⁶Wùn à Jesus kfən lòo dzə, á dzə́r shó jii, «Tàr, à sí wìy siìr vifon ve wìr veé Isray e ghan fen à?»

⁷Wù bìnèr jii, «Tàr wor sìysì ne fo wùn vitaáví ghán se kinyo kee shooy ki wíy koóy, e kfə̀n sìysì fìʼ, a bó yòʼ dzə̀ kirə́ʼ kén fóo kiíy.

⁸Ke vèn wáa kiíy ki dzə̀ jii, Kiyoy ke Ranén kí wíy wìy fo vèn, é wù fó ven vitaáví, é vèn wáa fìʼtì mo m dzəə̀n. A vèn wíy a fìʼtì e Jerusalem, e kfə̀n a fìʼtì woŋ wìr veé Juda e dzə̀m, a fìʼtì sa e wòŋ *Samaria, e dù, e meé fo nsay jòʼsìn.»

⁹Wù suúy bey, Nyùy ku nèn lì wun e yuv, aáwune yéné. Wù kóʼ, e làynìn e mvə̀m mbàʼ.

¹⁰Áwune ku nèn a tiy, a kiy yúv fo wù kóʼó, e lòo sìn, a wíri tíy aáwuné ghaŋ abaà, aá máʼ ndzə̀y se fəvír sí.

¹¹Á yòŋ jii, «Wír veé Galeli vìn, vèn tíy, kíy ka fó yuv? Jesus və̀n wo wù màʼtìn ven lán, e kòʼ é yuv kù wíy kfən réŋréŋ mo vèn yenen, a wù kóʼó.»

¹²Aŋgàa ntum Jesus vìyi nèn lò fo Gwan Vicì vé Oliv foo fèy, a kfən e Jerusalem, a ntàm dzə̀ moo kintoʼnìn ke may bèy.

¹³Á wìy, e nə̀ə́ e lav, e nèn tòsín, e kòʼ e yee fó yuv fo áwune‑eè bee. A vé‑eè dzə̀ jii, Pita, Joon, Jeem wùn Andru, Filiv wùn Tomar, Batolome wùn Matio, Jeem woo wan Afiyur, à Simon wo vé‑eè yoŋ ji ntom wòŋ, wùn à Judar woo wan Jeem.

¹⁴Áwune ku nèn a baʼtí fo wùn à vikìy ve vé‑eè jumrì sa Jesuse, à Maria woo yìy à Jesus, aàfə́r Jesuse, a bùnrì amòʼón.

¹⁵Wìy lòo dzə e kishiíy kímóʼ kí, wír Jesuse báʼtí kishóv mbaà é wiì. Pita nèn nànèn, a suúy jii,

¹⁶«Afə̀r vem, kinyo ke Ŋwàʼ Nyùyi‑iì suuyin kí kù‑uù wíy gheén. A dzə̀ kinyo ke Kiyoy ke Ranén kí‑iì yiìn, Fòn Davir tóʼ fó ghan kùm Judar wo yì‑iì dzəə̀n ŋgaà ŋgoo wòsən, a vèsən áwune yii lim e mòʼón, bo wù kfən lò, e shèm mbìy ji á koó Jesus.»

¹⁸Pita wáa suúy bèy, a Judar‑iì yiì joonè və́ vəy, e sə̀ mbàm sə́ sé menàŋ, e yùn kirə́ʼ shó, a dzə̀ fo wù‑uù gbuùn tsə̀ə́tsəŋ, bvə́me waám, vitó vi fəə́ vidzə̀m.

¹⁹Wír veé Jerusalem adzə̀me yú, e nèn a yòŋ kirə́ʼ kee shooy aáwuné làm ji Akedama, a dzə̀ ji súm mensəə.

²⁰ Pita kfə́n a suúy jii, «Ke Fòn Davir‑iì saŋen é Ŋwàʼ Nsùyrì Nyùy Nyùy ki dzə̀ jii: « ‹Lav rə kú a tiy e vifə̀m, é la wìr yòʼ a shiíy sho.› Wù kfən sàŋ jii: ‹Wìr wùmòʼ kér fó lì kirə́ʼ kfə́ ké lìm.›

²¹Mo kí dzəə̀n ben, bo wìr wùmòʼ kù kér fó kfə̀n tatí vèsən, aá wáa fìʼtì mo Tàr wòsən Jesus fəən fó kpu. A ŋgaàŋ kù kér fó a dzə wír fo vèsən ve vé‑eè ghán wùn à Jesus, e kèʼ fo ghan se Joon‑eè wáy wíri é ndzəv, e meé e ghan se Nyùy‑iì səən wun woo Jesus fo vèsən, wù kóʼ é yuv.»

²³Á nèn shù wír abaà, wùmòʼ Joosev wo vé‑eè yoŋ ji Basabar, kfə̀n yoŋ sa ji Justur, wùmòʼ Matiar.

²⁴Á nèn a bùnrì, a suúy jii, «Tàr, kù kì wò melív me wìr dzə̀m. Ku dìn wír wo à shoʼon

²⁵ji wáa dzə ŋgaà ntum Jesus, é wù li kirə́ʼ ké lìm ke Judar‑iì leʼen, e màʼtì, e dù fo wù duùn.»

²⁶Á bùnrì bèy, e shwèŋ, kí koó Matiar. Á nèn wày wun aàŋgàa ntum Jesus vee nshòv mòʼón e ghvə̀mé ŋgoo.