Read Lamnso Lim Aŋgàa Ntum 10 Bible Online

Lim Aŋgàa Ntum 10 - Lamnso bible

Lim Aŋgàa Ntum 10

¹Wìr wùmòʼ wáa dzə e mvə̀mlaʼ Sisaria, aá yoŋ ji Konelur, a dzə̀ mfòómé rə̀r woó *Rom. Wù‑uù sáʼ shúu rər wo á yoŋ ji woó Itali,

²a wùn à wír vee wùn laʼ adzə̀me ghvə́m Nyùy. Wù‑uù bunrì Nyùy ghán sidzə̀m, sə́ wír veé Juda vee aŋgàa kitàn e ŋàŋ.

³Wìy lòo dzə e kishiíy kímóʼ kí shúy sitaár e ŋkuùr, kinjeenjèm ki wìy e wun si, wù yén nshìylav Nyùy feyì kijuŋ, a yì nəə́, e yòŋ wun jii, «Konelur.»

⁴Wù nèn a fàn, e tùy sí e wùn wó, e dzə̀r jii, «Dzə̀ ká, Tàr?» Yì bìnèr jii, «Nyùy yù ne bunrì yé, e kfə̀n yèn lim yé ye juŋe, e kuùmé wò.

⁵Túm ri wíri é Joppa, aá du, e jàŋ wír wo á yoŋ ji Simon, kfə̀n yoŋ ji Pita.

⁶Wù wìy, a shiíy wùn Simon wo wù yii tám júv, a lav rə dzə̀ é ghaa rìbà ndzəv.»

⁷Yì suúy bey, e nèn lò. Konelur siíy, e jàŋ və́ vé lìme abaà, e kfə̀n jàŋ sa ŋgaà rə̀r wo wù yii shiy wun, a wù ghvə́m sa Nyùy.

⁸Á wìy, wù fèr kinyo ke kí kooyin, e nèn tùm áwune é Joppa.

⁹Áwune bvəə́shí, e dù, a meé e mvə̀mlaʼ foo fèy, a sì e ntìntìn shùy, a Pita kì kòʼ é kitu ke lav, aá náŋsín moo nsaàlav, a bùnrì fo.

¹⁰Jìŋ nèn lò, a yar wun, wù wáa kòŋ e yikír, aá dzəə́ fer vifá ve yi férin. Kinjeenjèm ki nèn lò, a wìy e wùn si.

¹¹Wù yén, a shúu yuví mvə́ʼə́m, kifá ki wáa səʼə́y fo fo, a kí dzə̀ moo kintsə̀m ké ndzə̀y kikuʼùn, aá ghár buú sikweè.

¹²Kfəə́ se nyàm se koʼoyín sí‑iì dzə̀ shó sinín, seé kwaʼ wùn à seé ndzəv sí, à menə́n mè.

¹³Wù yú, a jì wìr yóŋ wun jii, «Pita, nànène, a seerí, a kfər.»

¹⁴Pita bìnèr jii, «Nyaa mǒ Tàr, bó yòʼ dzə̀ m mùm. Bó m yòʼ‑oo yíi ne yì kifá ke kí kóʼoyì, ke kí kér *kifàn.»

¹⁵Jì rə̀y nèn kfə̀n sùúy sho jii, «Lá à yòʼ a nyaŋsí kifá ji kí kóʼoyì, a Nyùy suúy ne ji kí dzə̀ kijuŋ.»

¹⁶Kinyo kìy ki koóy bey akàŋ ataár, kifá kìy ki nèn kfə̀n é yuv.

¹⁷Pita ku nèn a dzə, a rə̀m ji kinyo ke wun yenen kin ki sà din a dzə̀ ka á? A wír ve Konelur kì tumen víyi siíy ne, e dzə̀r lav Simon, e wìy, a tiy e shuù lav.

¹⁸Áwune yòŋ lav, e dzə̀r jii, «Ŋgaà kiŋgàn wùmòʼ dzə̀ fen, a yírí dzə̀ Simon Pita a?»

¹⁹A Pita kù dzəə́ dzə́, kwaʼtì kinyo kìy. Kiyoy ke Ranén kí nèn sùúy sho jii, «Leéy, wíri wìy, a tàʼ wò ataár.

²⁰Sə́ʼə́y, é vèn áwune wáa dù fo á du. À lóo dù, lá à yòʼ a rə̀m ntéŋ, tùm mo wír vee shooy.»

²¹Pita nèn sə̀ʼə́y, e sùúy e wír vìyi jii, «Dzə̀ mo wo vèn taʼà. Vèn wìy ji ka?»

²²Á bìnèr jii, «Tùm Konelur woo mfòóme rə̀r woó Rom ver. Wù dzə̀ wír wo juŋ, ghvə́m Nyùy, a wír veé Judàa búri wun adzə̀m. A nshìylav Nyùy sìíy, e wìy, e sùúy sho jii, wù jaŋ wò e wùn lav, e yù á kinyo ke à yíi suúy e wun.»

²³Pita nèn lì wír vee shooy, wùn áwune shiíy. Yì rán kibvəə́shí, wùn áwune nèn lò, a dù. Aŋgàa biimé veé Joppa ámóʼó wáa dù sa wùn áwune.

²⁴Á ghán, e shìíy, e kfə̀n bvəə̀shí, e ghàn, e bóo nəə́ e Sisaria. A Konelur siíy ne bèy, e jàŋrì kfə́ə rə́ wùn à ŋkar sə́ se ru sí, wùn áwune wáa dzə, a shìy Pita.

²⁵Pita wìy, e lòo nəə́ e lav, Konelur tsə́m é si wo, a fo ghvə́m sho.

²⁶Pita ghár, e sùúy sho jii, «Lò é yuv, m dzə̀ sá wír moo wò.»

²⁷Wù nèn lò, wùn Pita wáa suŋnín, a nəə́ e lav. Pita yén, a wíri báʼtí fó anín,

²⁸wù suúy aáwune jii, «Vèn kì sá kijuŋ ji dzə̀ nsər fo wìr woó Juda tátí wùn wìr kitum ke sən kí, bo taaka ji wù nəə́ e ŋgaàŋ lav. Yii bèy, a Nyùy dìn ne e mò ji lá m yòʼ a nyaŋsí wír wùmòʼ ji ŋgaà *kifàn.

²⁹M nen wìy fèn mo vé‑ee jàŋèn mo, là kinyo. A m dzə́r e vèn jii, vèn sà‑aa jaŋ mo ji ka á?»

³⁰Konelur bìnèr jii, «Yì‑iì dzə̀ moo lèn, shúy sitaár, e bǎm vishiíy vitaár, a m bunrì e mǒ lav. M sàsìn, e yèn wír, a wù tíy e mǒ si, a ndzə̀y sə́ sí njaʼkìr njàʼkìn.

³¹Wù yòŋ mo jii, ‹Konelur, Nyùy yù ne bunrì yé, e kfə̀n kuùmé mo à rə́si sə́ vé kitàne.

³²Túm wír e Joppa, é wù du, e jàŋ wír wo á yoŋ ji Simon, kfə̀n yoŋ ji Pita. Wù wìy fo, a shiíy wùn wìr wo á yoŋ ji Simon wo wù yii tám júv, a lav rə dzə̀ é ghaa rìbà ndzə̀v.›

³³M yú bey, e kù nèn tsə̀nsí ntum ji à wiy. À wíy ben, kí bóŋ féyì. Vèr nén a dzə fèn lèn adzə̀m e Nyùy si, a shìy ji á yú kinyo ke Nyùy Tàr tiisin ji à wiy, e fèr e vèr.»

³⁴Pita nèn kèʼ, a suŋnín, a suúy jii, «M yèn ne rú lèn ji bó Nyùy yòʼ nyaʼ wír.

³⁵A wìr ghvə́m Nyùy, yii réŋ, a ŋgaàŋ fə̀m dzə̀ wír woó kitum kiné kí, bo wù ghèén fo Nyùy.

³⁶Vèn kù‑uù lo yù sá ntum ye Nyùy‑iì tsənsin fo wír veé Israyi ye yì dzəə̀n ji Jesus Kristu‑uù wìy ji wíri fiʼ kòóy nyaáŋ wùn à Nyùy. A Jesus Kristu və̀n dzə̀ Tàr à wíri adzə̀m.

³⁷A ntum rə̀n‑eè jumrì ye Joon‑eè fiʼtì, wáy wíri é ndzəv. Yì‑iì kèʼ fó Galeli, e sàmèr woŋ Juda e dzə̀m.

³⁸Vèn kù‑uù lo yù ji Nyùy‑iì fò Kiyoy ke Ranén kí e Jesus woó Naasarer woo shooy, e kfə̀n fò wun vitaáví, a shìy wun, wù wáa ghan virə́ʼ vidzə̀m, a yiì vinyo ve juŋ vi, a fèr wír ve vé‑eè yén ŋgeʼ e Satan wo.

³⁹A vèr‑iì lo yèn vinyo vee shooy e sí yérí. Vèr‑iì yèn ve wù‑uù yii e Jerusalem, kfə̀n yii e wír veé Judàá wòŋ foo fèy vidzə̀m. Wír veé Judàa nèn lò, e yùyrí wun móo tam e kintam.

⁴⁰Yii bèy, vishiíy ví lòo meé vitaár, Nyùy fəə́r wun fo kpu, e dìn, wíri yén.

⁴¹A bó yòʼ‑oò yèn wir dzə̀m. Kù‑uù yèn ver ve Nyùy‑iì shoʼon fó mbìy ji á wáa fìʼtì kinyo ke Jesus. Vèr à Jesus‑eè ló a yinín, a nonín, a Nyùy fəə́r ne wun fo kpu,

⁴²wù wáa suúy e vèr ji á wáa fìʼtì kinyo ke Nyùy e wíri, a suúy a jii, Nyùy‑iì lèm a dzə̀ wun woo Jesus ji wír wo wù wíy saʼ nsaʼ wìr ve tine wùn aàŋkfəə.

⁴³A dzə̀ Jesus və̀n wo aŋgàa ntum Nyùyi‑iì fiʼtì ji a wìr wày shilív é wùn wó, bo Nyùy kù wíy làysìn ajay ŋgaàŋ bìʼ wun.»

⁴⁴Pita kú a suŋnín bèy, Kiyoy ke Ranén kí nèn wìy, e nə̀ə́ e wír ve vé‑eè yuúri kinyo kfəə́ meliv adzə̀m.

⁴⁵Aŋgàa biimé vee wír veé Juda ve wùn à Pita kì wìyìn fó Joppàa yú, a wír vìyi ló ne, a súŋnin kfəə́ se làm símóʼ sí jeéy jeéy, a burí vikuʼùy vé Nyùy, á wáa ker gháʼ mo Nyùy foon sá fómo və wo dzəə̀n Kiyoy ke Ranén kí e wír ve bó yòʼ dzəə̀n veé Juda vìyi. Pita nèn dzə̀r jii,

⁴⁶

⁴⁷«Mo Kiyoy ke Ranén kí wìyìn fo wír vìne réŋréŋ mo kí‑iì wìyìn sá fo vèsən vee wír veé Juda, a dzə̀ wìr kfə̀n shèm fo á wáy wír vìn e ndzəv á?»

⁴⁸Wù nèn sùúy, á wáy wír vìy e ndzəv e Jesus Kristu yir. Á nèn yiì lò, a lon ji Pita ku dzə̀ʼə̀m a wùn áwune vishiíy vishàr, e bó a lò.