Read Lamnso Lim Aŋgàa Ntum 11 Bible Online

Lim Aŋgàa Ntum 11 - Lamnso bible

Lim Aŋgàa Ntum 11

¹Aŋgàa ntum Jesus wùn aàŋgàa biimé veé wòŋ woo Juda adzə̀me nèn yù ji wír ve bó yòʼ dzəə̀n veé Judàa biìmé ne saa kinyo ke Nyùy.

²A wír ámóʼó dzə̀ áàŋgàa biimée mvəm, aá kù yii tíy kév ji á kér fó saŋ *mbèʼ se wìr wo bó yòʼ dzəə̀n woó Juda mo liì woó Juda dzəə̀n, é bo ŋgaàŋ gheén ji wir Nyùy. Pita wìy kfə̀n é Jerusalem, wír vìne nèn a roòmè,

³a suúy jii, «À du, ghán wír ve bó yòʼ dzəə̀n veé Juda, kfə̀n maysì, yíkir vèn áwune.»

⁴Pita nèn a naàrì kinyo ke kí‑ii kooyin é naáy naáy, a suúy jii,

⁵«Mò‑oò dzə́ e Joppa, bunrì, kinjeenjèm ki nèn lò, e shì mo, m yén, a kifá ki sə́ʼəy fo yuv, a kí dzə̀ moo kintsə̀m ké ndzə̀y kikuʼùn, aá ghár buú sikweè. Kí sə́ʼə́y, e tìím e mǒ si.

⁶M leéy mvə́m, e yèn, a nyám se koʼoyín sí dzə̀ shó kfəə́ si, kfəə́ si. A símóʼ sí dzə̀ see fó laʼ, símóʼ sí seé kwaʼ, símóʼ sí seé ndzəv, wùn à menə́n mè.

⁷M lòo yu, jì wìr yòŋ mo jii, ‹Pita, lò é yuv, a seerí, a kfər.›

⁸M bìnèr jii, nyaa mǒ Tàr, bó yòʼ dzə̀ m mùm. Bó m yòʼ‑oo yií ne wày kifá e mǒ shuù ke kí kóʼoyì, kér *kifàn.

⁹Jì rə̀y nèn kfə̀n sùŋnín fo yuv jii, ‹Lá à yòʼ a nyaŋsí kifá ji kí kóʼoyì, a Nyùy suúy ne ji kí dzə̀ kijuŋ.›

¹⁰Kí koóy bey akàŋ ataár, kifá kee shooy ki nèn kfə̀n é yuv.

¹¹«Wíri ku nèn meè é shuù lav ye mò‑oò shiiy sho ataár. A vé‑eè tùm fó Sisaria ji á wiy, e jàŋ mo.

¹²Kiyoy ke Ranén kí suúy e mò jii, lá m yòʼ a nyàʼ fó dù a vèr à wír vìne. Aàŋgàa biimé veé Joppa vee ntuùfú víne‑eè lo dù sa vèr áwune, á dù, e nə̀ə́ e wìr və̀y lav adzə̀m.

¹³Mo vèr nəən, wù wáa fèr jii, wun‑eè yèn nshìylav Nyùy e wùn lav, yì suúy á ji wun tsə́nsí wír e Joppa, é wù jaŋ wír wo á yoŋ ji Simon Pita.

¹⁴Wù yíi wìy, é wù fiʼti á kinyo ke wùn à wír vee wùn laʼa wíy lùŋ fo fo.

¹⁵M ku nèn kèʼ, a fìʼtì kinyo, e lòo suŋnín, Kiyoy ke Ranén kí nèn wìy, e nə̀ə́ e wír vee shooyí meliv réŋréŋ mo kí‑iì nəən e vèsə́n meliv fó mbìy.

¹⁶M yén, e nèn kuùmé kinyo ke Tàr wòsən Jesus‑eè suuyin jii, ‹Joon‑eè wáy wíri é ndzəv, aá wíy a way ven a dzə̀ e Kiyoy ke Ranén kí kiwo.›

¹⁷Mo Nyùy‑iì bùʼùn wír vee shooy e fómo, a dzə̀ wùwun wo wù‑uù bùʼùn sá vèsən shó e ghan se vèsən‑eè wayin shilív e Tàr wòsən Jesus Kristu wùn, bo m dzə̀ kém la, e bó a shaʼnín kinyo ke yii Nyùy?»

¹⁸Wíri yú kinyo ke Pita kìn, kí gheén áwune. Á nèn a burí Nyùy, a suúy jii, «Bo Nyùy fò ne sa kilíŋ e wír ve bó yòʼ dzəə̀n veé Judàa ji á wáa bìnèr melív mev, e fíʼ wìy lùŋ.»

¹⁹Mo á kù‑uù sí rə́si fó ŋgeʼ e wír Jesuse, e kèʼ fo ghan se vé‑eè yuyrin Tefan, á nèn a nyeŋkír, a taʼrí. Wír ámóʼó dù e wòŋ Fənisia, ámóʼó dù kév é wòŋ woo Saypur, ámóʼó kfən dù sa e mvə̀mlaʼ yee Antiyok. Á du bèy, á kù a fìʼtì kinyo ke Jesus a dzə̀ e wír veé Judàa cáʼcáʼ.

²⁰Aŋgàa biimé ámóʼó nèn dù wìy sa e Antiyok, a dzə̀ wír veé Saypur, ámóʼó veé Serina. Wír vìne nèn a ghan sa wír ve bó yòʼ dzəə̀n veé Juda, a fìʼtì sáʼka woo kùm Jesus aáwune.

²¹Nyùy nèn sə̀, áwune wáa bìnèr wír anín, á wáa way shilív e Jesus wùn.

²²Kinyo kee shooy ki tó áàŋgàa biimé veé Jerusalemé kitùʼùr. Á nèn tùm Banabar e Antiyok fèy.

²³Wù dù, e mèé fo, e yèn mo Nyùy bùʼùn wír vìy e vijuŋ vi, wù wáa sheʼrí, a tir áwune ji á kú a tiy a wùn à Taàtá Jesus shilív shimòʼón.

²⁴Banabar və̀n‑eè dzə̀ wír woo nyaáŋ, a wù biímé Nyùy e ŋàŋ, Kiyoy ke Ranén kí wáa run e wun shiliv. Wír aníne nèn kfə̀n a biimé kinyo ke Jesus e Antiyok foo fèy, kintatì kfə́ kí wáa kùʼ.

²⁵Banabar nèn wìy lò, e dù, a tàʼ Saul fo Tasor.

²⁶Wù tàʼ, e yèn, e lì, wùn wun kfə́n é Antiyok. Áwune dzə̀ʼə̀m wùn à kintatì kee fó ki kiyá kifur, a yeʼéy wír aneénín. Kí nèn kèʼ a dzə̀ é Antiyok foo fèy, bo á wáa yòŋ aŋgàa biimé ji wír Kristu.

²⁷Wáa dzə e ghan fóo fèy, wír ámóʼó lò fo Jerusalem, e wìy e Antiyok, a dzə̀ ve vé‑eè lo, á wàa yu vinyo fo Nyùy, a tiisí e wíri.

²⁸Kiyoy ke Ranén kí nèn yiì, wùmòʼ woo wír nànèn, aá yoŋ ji Agabur, a tiisí jii, «Jìŋ ye ghaʼán wíy koo a woŋ dzə̀m.» Yì nèn wìy sìíy, a koo a dzə̀ é ghan se Kiladiyur‑iì dzəə̀n Fon woó *Rom.

²⁹Aàŋgàa biimé veé Antiyoki‑iì yù ne fú Agabur rə̀y, e sìysì ji wìr dzə̀m suʼti á mbàm, aá sə́ afə́r vév ve á dzəə̀n é wòŋ woo Juda sho. Á lóo fo, wìr wàa fo a mo wù kérí.

³⁰Áwune nèn sùʼ mbàm, e tùm Banabar wùn Saul sho ji á du, e wày áàtǎr kintatìí kiwo.