Read Lamnso Lim Aŋgàa Ntum 12 Bible Online

Lim Aŋgàa Ntum 12 - Lamnso bible

Lim Aŋgàa Ntum 12

¹Wáa dzə e ghan see shooy, Fòn Heror nèn kèʼ sa, a fo ŋgeʼ e wír veé kintatì ámóʼó.

²Wù suúy, á gwàr Jeem woo fər Joon.

³Wù lòo yen, a kí bóŋ wún wìr veé Juda, e nèn kfə̀n sùúy, á koó sá Pita. A vé‑eè koò é vishiíy ve vé‑eè yí *kibán kee là nyaà, rə́si *Ŋkǎʼ Yáʼayshaà.

⁴Á koó Pita, e fìn e lav, e lèm vé rərí viŋkàŋ vikweè, wír akweè akweè, á wáa shìy wun, a Heror‑iì wày wáyín ji Ŋkǎʼ Yáʼayshaà wíy shaà, é wun kóʼór Pita e wírí si, aá wàá sáʼ.

⁵Pita ku nèn a dzə e lav sháŋ, kintatì ki wáa bùnrì fo wun kitávín.

⁶Wìy lòo dzə vitsə́ʼ ve Heror kì bvəə́shi, e fəə́r Pita kijàvndzə ji á sáʼ, Pita wáa buuné e vé rərí nsàn abaà, aá kúr wun asháŋ abaà. Vé rər ámóʼó kfə́n a shìy sa shúu lav.

⁷Nshìylav Nyùy Tàr nèn sàsìn, e bvə̀y fó, lav rán. Wù sə̀ʼsì Pita fo mbèʼ, wù yìmèn. Wù suúy shó jii, «Lò é yuv cér.» Sháŋ ku nèn bvə̀rkìr fo Pita koy.

⁸Nshìylav Nyùy kfən sùúy sho jii, «Kúr ndzə̀y sé si, e wày alábáʼá.» Pita wáy, wù kfən sùúy sho jii, «Màʼ kikúm ké ki, a wìy e mǒ bàm.»

⁹Pita ku nèn a jùmrì wun, a fəə, e làa yòʼ a kiíy ji kinyo ke nshìylav yii ki sà dzə̀ rú mo shí njèm wun a.

¹⁰Mo vé‑eè lèmèn vé rərí e virə̌ʼ virə̀ʼ, wùn Pita shaà vé mbìyi, e dù, e shaà vé bàmé, e mèé e shùu lav wúmóʼó wo dzəə̀n kisha, wo wú fəə́sin fo ndzə, wú nèn mvə̀ʼə̀m, wùn Pita fəə́. Á lòo səytí e dzəə, nshìylav Nyùy rə̀y nèn màʼtì Pita fo, a dù.

¹¹Pita siíy, kinyo kìy ki wìy e wùn vifii, wù suúy jii, «M kìíy ne rúrú lèn ji kì tùm Nyùy nshìylav rə, yì wíy, e shòʼ mo fo Heror kitam, m bóy fó kinyò ke wír veé Judàa kì kwaʼtì ji á wíy yiì e mò.»

¹²Mo Pita kiiyin kinyo ke kí kooyin wun, e nèn dù e Maria woo yìy à Joon Maak lav, a wíri kì bàʼtí fó anín, a bùnrì.

¹³Wù kùmrì shúu kày, wánlè wiíy wìy, aá yoŋ ji Roda, a wù lim e lav foo fèy.

¹⁴Wù yú, a súŋnin Pita fo ndzə, kishéʼrì ki wáa yuy wun yúyín, wù nèn nyèŋ, e kfə̀n é bàm, e làysìn fó mvə̀ʼ shúu kày, e dù, e bì e wíri ji Pita tíy a e shùu kày.

¹⁵Á bìnèr jii, «À baá baán.» Wù kú a suúy ji dzə̀ á Pita. Á nèn sùúy jii, «Bo dzə̀ nshìylav Nyùy ye yì shiy wun.»

¹⁶A Pita kù tíy, kumrì shúu lav. Á lòo mvə̀ʼ, e yèn rú, a kì dzə̀ Pita, a ker gháʼ.

¹⁷Wù nəə́, e sə̀r áwune e kiwó ki, a fèr mo Nyùy kì yiìn, e bóo fəə́r wun fo sháŋ. Wù màysì, e sùúy jii, á fiʼti á kinyo kee shooy e Jeem, e kfə̀n fìʼtì aàŋgàa biimée adzə̀m, e nèn lò, a dù fomóʼó.

¹⁸Yì rán kibvəə́shí, vé rər víyi lòo leéy, e tàʼ Pita ntéŋ, a fàn, vifií vév ví wáa bvəərí ji sà kòóy ka Pita a?

¹⁹Fòn Heror yú, e fə̀ə́r wíri, á wáa ghan, a tàʼ. Á tàʼ ntéŋ, wù nèn kòʼór vé rər viy, a dzətí vinyo aáwune, e yiì lò, e sùúy ji á wàá li, e dù yùyrí. Mo kee shooy ki shaàn, Heror nèn lò fo mbìv wòŋ yee Juda foo fèy, e sə̀y é mvə̀mlaʼ Sisaria, a dzə fo.

²⁰Wáa dzə e ghan see shooy, a Fòn Heror shwiiy kilòŋ fo wír veé Taya wùn à veé Sidone. Áwune nèn bàʼtí, a dù ji á yén a wun. Á dù, e tòmbìy koò Blatur woo taà ntoʼ e viŋkar, a lon nyaáŋ fo fòn, bìʼ fo woŋ wóví‑iì kér vifá ve yi a dzə̀ fo Fòn Heror wòŋ.

²¹Kishiíy kí gheén, Fòn Heror wáyrí vifá ve wòŋ, e kòʼ e wùn kàvàʼ, a suŋnín e wír vee shooyi.

²²Á nèn lò, a buʼ a dzə̀ rəə́ jii, «Súŋnin Nyùy, bó yòʼ súŋnin wír.»

²³Nshìylav Nyùy Tàr ku nèn màʼ yàsí e fòn wùn, bìʼ fo wù yòʼ‑oò lo siìr búrí yee shooy a dzə̀ e Nyùy. Menshun mè kèʼ, a kfər vitó fo fo, wù kpú.

²⁴A kinyo ke Nyùy ki kù‑uù sí samèr, dù duùn fó mbìy, a wíri biíme.

²⁵Mo vé‑eè tumen Banabar wùn Saul e Jerusalem, á màysì fo fo, e nèn a kfən e Antiyok. Á lòo kfən, e lì sa Joon Maak.