Read Lamnso Lim Aŋgàa Ntum 13 Bible Online

Lim Aŋgàa Ntum 13 - Lamnso bible

Lim Aŋgàa Ntum 13

¹Wír ámóʼó wáa dzə e kintatì keé Antiyok a dzə̀ ve vé‑eè lo, á wàa yu kinyo fo Nyùy, a tiisí e kintatì, ámóʼó aŋgàa yeʼéy. Aáwune dzə̀ jii, Banabar wùn Simon wo vé‑eè yoŋ ji wo sənér, à Lushor woó Serina, à Manen wo vé‑eè lìyìn wùn ŋgaà saʼ woo Heror, e lì Saul.

²Wìy lòo dzə e ghan símóʼ sí, áwune wáa lèm jíŋ, a bùnrì. Kiyoy ke Ranén kí wìy lò, e sùúy aáwune jii, «Vèn bay Banabar wùn Saul fo věn ŋgoo, e lèm, aá wáa yiì lim ye mò‑oò liìn áwune shó.»

³Áwune yú bey, e nèn kfə̀n a lèm jíŋ, a bùnrì, e yiì lò, e neèr wó yév aáwuné vitu, e tsə̀nsí, á wáa dù ntum yev.

⁴Mo Kiyoy ke Ranén kí tumen áwune, á nèn lò, e dù e ntèʼ yee Selusia, e nə̀ə́ e kikoŋ, a tumsín e wòŋ Saypur.

⁵Áwune meé fó, e fəə̀ fó kikoŋ e ntèʼ ye á yoŋ ji Salamir, e nèn a ghan, a fìʼtì kinyo ke Nyùy e wír veé Judàá ŋgày se bùnrì. Joon Maak wáa ghan wùn áwune, a sə áwune.

⁶Áwune ghán, e tùmsín woŋ woo shooy, e mèé e ntèʼ yee Pafor, e yèn ŋgaà səm wùmòʼ fó, aá yoŋ ji Bar‑Jesus, a dzə̀ wír woó Juda, a wù bóʼti ji wun dzə̀ á *ŋgaà ntum Nyùy.

⁷Wù‑uù rə́si wùn Seyur Paalur wo wù‑uù sáʼ woŋ woo shooy. Ŋgaà saʼ və̀n‑eè kì vinyo e ŋàŋ. Wù nèn lò, e tòóy Banabar wùn Saul, bìʼ fo wù‑uù taʼ fó yu sa kinyo ke Nyùy.

⁸Á wìy, ŋgaà səm və̀y, wo yír rəə́‑əə̀ dzəə̀n é Lǎm Grik ji Elimar nèn a kìnèn vinyo vév, a shaʼnín fo ŋgaà saʼ və̀y wáy shilív e Jesus wùn.

⁹Kiyoy ke Ranén kí rún e Saul wo á kfə̀n‑eè yoŋ ji Por shiliv, wù túy sí e ŋgaà səm və̀y wùn,

¹⁰e sùúy sho jii, «À dzə̀ wan Satan. À ban vinyo ve juŋ vi vidzə̀m, bóʼti wíri, yii vinyo ve bi ví. Bó yòʼ dzə̀ à yàr fó a bìnèr kinyo ke Nyùy ke ru kí ji kimboʼtì à?

¹¹Kú a kiíy ji lǒn Nyùyi koò ne wò, aà kù lo lèn, e fìr, e làa yòʼ dzə́ə a yen virə́ʼ fó ghan símóʼ sí.» Elimar ku nèn yù, a kifá ki sə́tí sí rə́ moo mbàʼ ye sənér, wù wáa kar, a ghaà wír wo dzə̀ wù ghàr wun, a caàcà.

¹²Ŋgaà saʼ yén kinyo ke kí kooyin, e nèn wày shilív e Jesus wùn, a ker gháʼ fo vinyò ve wù yéʼey kùm Jesus feyì.

¹³Por wùn aàŋgaà və́ ŋgoo nèn nə̀ə́ e kikoŋ fo Pafor, a ghan e rìbà ndzə̀v, e dù, e fəə̀ é ntèʼ yee Pega, aá sì é wòŋ woo Pamfilia. Joon Maak nèn màʼtì áwune fó, a kfən e Jerusalem.

¹⁴Áwune tósín, e dù, e mèé e mvə̀mlaʼ yee Antiyok ye yì dzəə̀n é wòŋ Pisidia. Kishiíy ké bam ke wìr veé Juda ki gheén, áwune dù e ŋgày bùnrì, e dzə̀ʼə̀m fo.

¹⁵Á yòŋ kinyo fo ŋwàʼ Mooser wùn à wó aŋgàa ntum Nyùyi, kí mày, atǎr ŋgày bùnrì rə̀yi nèn tùm wír, wù dù, e dzə̀r aáwune jii, «Afə̀r ver, a vèn kér kinyo kée tir wíri shó, vèn sùúy.»

¹⁶Por nèn nànèn, e sə̀r kiwó e wíri, a suúy jii, «Wír veé Israyi yuúrí, é wír ve bó yòʼ dzəə̀n veé Isray ve á ghvə́m sa Nyùyi yuúrí.

¹⁷Nyùy wìr veé Isray‑iì shòʼ atǎr rám Isray, e yiì, áwune kùʼ, a dzə kitúm ke kuʼùn kí e ghan se vé‑eè dzəə̀n viŋgwìy e wòŋ Ejiv. Wù nèn wìy fə̀ə́r áwune fó fo e vitaáví və́ ve ghaʼán ví,

¹⁸e kù kfə̀mén, a leéy fo áwune e kirə̀ʼ ké woʼ kí kiyá mkweè.

¹⁹Áwune wìy lòo nəə́ e Kanan, wù laàr kitúm saàmbà fo fo, e fò woŋ woo shooy ji wóv,

²⁰a sì kiyá kishóv mtàn e ghii kweè (450) mo Nyùy‑iì shoʼon áwune. Wù kfən fò áwune vé saʼa, á sáʼ, e dù mèé e ghan sé ŋgaà ntum Nyùy woo Samuel.

²¹Áwune wìy lò, a lon fon, Nyùy nèn fò Saul woo wan Kish, a dzə̀ rám Benjamin. Wù sáʼ vifon kiyá mkweè,

²² Nyùy sù wun, e kòʼór Davir ji Fon wov. A Nyùy‑iì sùúy kùm Davir və̀n jii, ‹M yèn ji Davir woo wan Jessi dzə̀ kfə́ə wìr wo wù gheenen mo. Wù wíy a yiì kinyo ke m suuy kidzə̀m.›

²³Nyùy ku nèn fò wán woo Fòn Davir və̀n ram e wír veé Israyi ji wù wíy lùŋèr áwune mo wù‑uù kàʼàn, a ŋgaàŋ dzə̀ Jesus.

²⁴Bo Jesus və̀n wáa kèʼ lim rə́, a Joon‑eè sí fiʼtì e wír veé Israyi adzə̀m jii, á biner á melív mev, é wun wáy áwune é ndzəv.

²⁵Joon wìy lòo màysì kinyo kfə́, e dzə̀r e wíri jii, ‹Vèn kwaʼtì ji m dzə̀ la? Bó m yòʼ dzə̀ wír wo vèn shiy və̀y. Yii bèy, ŋgaàŋ wiy fo mǒ bàm, a bó m yoʼ fə̀m ghèén fó gvəʼtí, e bvə̀tì alábáʼ və́.› »

²⁶Por kfən yòŋ áwune jii, «Afə̀r vem, ven vee rám Abraham, e lì wír ve á ghvə́m sa Nyùy adzə̀m, Nyùy‑iì tiìsí ntum yee mo á wíy lùŋ rə̀n a dzə̀ e vèsən.

²⁷A bó wír veé Jerusalem wùn à vév vé wòŋe yòʼ‑oò ló a kiíy ji Jesus dzə̀ Ŋgaà Lùŋèr woo shooy. Á kfən mèŋ kinyo ke aŋgàa ntum Nyùyi dinè, kinyo ke á rə́si yoŋ fo ŋwàʼ vishiíy vé bam vidzə̀m. Ku nèn yiì áwune, kinyo kee shooy ki gheén mo vé‑eè bìnèn nsaʼ Jesus ji á yúy.

²⁸A bó á yòʼ fə̀m‑eè lo yèn jay wo dzə̀ á yùy, á ku shàʼnín, a lon fo Payler ji á yúy.

²⁹Áwune rúnér vinyo ve Ŋwàʼ Nyùyi‑iì suuy kùm Jesus vidzə̀m, ví mày, á nèn sə̀ʼə́r fo kintam, e wày é sày ye vé‑eè tòʼòn é wǔn kilan.

³⁰Yii bèy, Nyùy fəə́r wun fo kpu,

³¹wù wáa ghan vishiíy vinín, a dìn kitú kfə́ e wír ve wùn áwune‑eè loòn fó Galeli, e wìy e Jerusaleme. A dzə̀ áwune ve á fiʼtì wun lèn e wír veé Israyi.

³²«Vèr nen wìy sa lèn ji vèr fiʼti ven sáʼka Nyùy wo juŋ və̀n. A wù dzə̀ jii, kinyo ke Nyùy‑iì kàʼàn atǎr ram Isray sho,

³³ wù yiì ne lèn, kí gheén a dzə̀ e vèsə́n kiwo, vèsən ve siìn wón wìr vee shooy. A kí ghèén a dzə̀ mo Nyùy‑iì fəərin Jesus fo kpu. Vé‑eè lo sàŋ kinyo kìn e Ŋwàʼ Nsùyrì Nyùy Nyùy, vintsə̀m vibaà ji Nyùy suuy a jii, ‹À dzə̀ Wán wom, a m sì Tàr won lán.›

³⁴ Kee kùm fəə́r ye Nyùy‑iì fəərin Jesus fo kpu, a wù yòʼ dzəə́ wìy kpu, wù suúy e wír vəə́ jii, ‹M wíy fo ven vijuŋ ve mò‑oò kàʼàn Davir sho, e kfə̀n lìʼ.›

³⁵ A dzə̀ vijuŋ ve á yoŋ e kirə̀ʼ kímóʼ kí é Ŋwàʼ Nsùyrì Nyùy Nyùy jii, ‹Bó Nyùy yòʼ wíy màʼtì Ŋgaà və Lìm wo juŋ, é wù foy é sày.›

³⁶Ké Fòn Davir ki wáa dzə kfə́, a wù‑uù yiì vinyo və́ e wun ghan mo Nyùy‑iì sìysìn, e kpù, á dzəə̀mè aàtàr vəə́ ghaŋ, wù fòy e sày.

³⁷A bó wìr wo Nyùy‑iì fəərin fó kpu və̀n yòʼ‑oò lo fòy.

³⁸«Afə̀r vem, vèn ku nèn a kiíy kijuŋ jii, sáʼka wo vèn yú lèn ji Nyùy wíy làysìn ajay wíri, wù kù wíy làysìn a dzə̀ bìʼ Jesus və̀n.

³⁹Wìr wo wù wáy shilív e Jesus wùn bòy ne fo wùn vinyò ve bi ví, a bó yòʼ dzə̀ *Nsər Mooser yiì, wìr bòy.

⁴⁰Kí nén a dzə jii, vèn wáa yen rì a fo kinyo ke á saŋen é Ŋwàʼ Aŋgàa Ntum Nyùy ki koóy ven. Á tiìsí fo jii:

⁴¹ « ‹Ven ve á shéʼ Nyùyi yuúrí. Vèn wíy a ker gháʼ, a kpukír. M wíy yiì kinyo e věn ghan, é vèn wáa yu, e làa yòʼ a biimé.› »

⁴²Por wùn Banabar yiì lòo fəə fo ŋgày bùnrì foo fèy, wíri wáa lon jii, áwune ku kfə̀n wìy fìʼtì a vinyo vee shooy e kishiíy ké bam kee fó ŋgàm.

⁴³Wíri lòo fəə fo ŋgày, wír veé Juda wùn à vitúm ve vé‑eè bìnkìn bínkin ji wír veé Judàa wáa jùmrì Por wùn Banabar anín. Áwune wáa suŋnín e wír vee shooyi, a tir áwune ji á kú a yu vinyo vidzə̀m a dzə̀ fo Nyùy, é wù wáa leéy a fo áwune.

⁴⁴Kishiíy ké bam kee fó ŋgàm kìy ki gheén, mvə̀mlaʼ yee shooy báʼtí, a tàʼ ké mày ji á yú kinyo ke Nyùy.

⁴⁵Wír veé Juda ámóʼó yén mo màŋgòŋ baʼtin bey, e nèn a ghèʼ Por wùn Banabar, a kìnèn kinyo ke Por fiʼtì, a kuùrì wun.

⁴⁶Wùn Banabar kú a suŋnín tèéter, a suúy jii, «Vèr kù‑uù kér fó tòmbìy fìʼtì kinyo ke Nyùy a dzə̀ e vèn vee wír veé Juda. Mo vèn tenen, e màʼày vitú vén ji bó á yoʼ ghèén fó wìy nəə́ e dzə̀ʼə̀m yee là may, bo vèr sí binkìr, a fìʼtì a dzə̀ e wír ve bó yòʼ dzəə̀n veé Judàa.

⁴⁷ A Nyùy Tàr‑iì lo sùúy ji dzə̀ mo vèr ku fìʼtì, bìʼ fo wù‑uù suuyin kùm Jesus jii: « ‹M nàn ne wò ji kikaʼày fo wír ve bó yòʼ dzəə̀n veé Judàa ji à fíʼ yiì, é wír veé nsay adzə̀me luŋ.› »

⁴⁸Wír ve bó yòʼ dzəə̀n veé Judàa yú kee shooy, e nèn a sheʼrí, a burí Nyùy. Wír aníne nèn biìmé kinyo kee kùm Jesus. A kù‑uù biìmé vee shó ve Nyùy‑iì shoʼon ji á wìy nə̀ə́ e dzə̀ʼə̀m yee là may.

⁴⁹Kinyo ke Nyùy ki nèn a sàmèr mbìv wòŋ yee shooy e dzə̀m.

⁵⁰Yii bèy, wír veé Judàa nèn lò, e bàyír vikǐy wìr ve kuʼkìn ámóʼó ve vé‑eè wiy sa e ŋgày bùnrì, e ŋàʼár melív me atǎr ntèʼ, á wáa bàn Por wùn Banabar, a jùmjùm fo áwuné ntèʼ.

⁵¹Áwune nèn lò, e lòo lò, e tèr nsay fo bàm ji wáa dzə a kisəəm ké kinyò ke wír vee shooyi yiìn, e nèn dù a dzə̀ é mvə̀mlaʼ yee Ikoniyum.

⁵²Aŋgàa biimé vìyi ku sìíy, a dzə, Kiyoy ke Ranén kí wáa run aáwuné meliv, á wáa ker kishéʼrì ke kuʼùn kí.