Read Lamnso Lim Aŋgàa Ntum 14 Bible Online

Lim Aŋgàa Ntum 14 - Lamnso bible

Lim Aŋgàa Ntum 14

¹Mo Por wùn Banabar duùn é Ikoniyum, kinyo ki ku kfə̀n kòóy áwune fó réŋréŋ mo kí‑iì kooyin é Antiyok. Wùn wun dù e ŋgày bùnrì yee fó, a fìʼtì kinyo kee kùm Jesus e dzəə ye wír veé Juda wùn à vitúm vi wáa biimé nyanyày.

²Yii bèy, wír veé Juda ve vé‑eè tenené nèn lò kév, e bayír wír ve bó yòʼ dzəə̀n veé Juda ámóʼó, e bìvír vifií vév, á wáa bàn aŋgàa biimé.

³Por wùn Banabar ku yòʼ a dzə fo ntàmda, a fìʼtì kinyo ke Taàtá Jesus tèéter, a naàrì mo wù bùʼùn wíri, a fo áwune vitaáví, á wáa yiì viŋgaʼnìn ve vinyò, ví wáa dìn ji kinyo ke áwune fiʼtì ki dzə̀ á rú.

⁴Á wáa fìʼtì bèy, wír veé ntèʼ fóo fèyi nèn jàvsìn. Ámóʼó kfə́n e wír veé Juda ve vé‑eè tenené mbìv, ámóʼó kfə́n áàŋgàa ntum Jesusé mbìv.

⁵Wír veé Juda vìyi nèn tàtí wùn à ámóʼó ve bó yòʼ dzəə̀n veé Judàa, e dù, e yèn atǎr ntèʼ, wùn áwune táŋ ji á wáa nyàvrì a aàŋgàa ntum Jesuse, a yuyrí e tíy sí.

⁶Áwune kiíy, e nyèŋ, e dù e wòŋ woo Likonia, a ghan e mvə̀mlaʼ yee Lista wùn à yee Derbe, e kfə̀n a ghan e ntèʼ see fó ghaŋ,

⁷a fìʼtì sáʼka Nyùy wo juŋ fo.

⁸Wìr wùmòʼ wáa dzə e Lista foo fèy, a vé‑eè dzəə wun, a sì ndzə́m, a bó yòʼ dzə̀ wù ghàn. Wìy lòo dzə e kishiíy kímóʼ kí, wù wáa dzə,

⁹a yuurí kinyo ke Por fiʼtì. Por yén, a wìr və̀y biímé ji dzə̀ Nyùy fèr á wun,

¹⁰wù nèn yòŋ kitávín jii, «Nànèn, e tìím e yuv.» Wù ku nèn lìy é yuv, a ghan.

¹¹Màŋgòŋ yén kinyo ke Por mùmèn, e nèn a buʼ rəə́, a suúy aáwuné làm jii, «Anyùyi sə̀ʼə́y ne e nsay, aá shwínin wíri, e wìy fo vèsən.»

¹²Á nèn shù ji Banabar dzə̀ á nyùy wo kuʼùn wo á yoŋ ji Siyur, a Por, mo kù yám súŋnin wun, dzə̀ á nyùy woo Hemar.[2]

¹³Lav ye áwune‑eè cu nyùy woo Siyur və̀y sho‑oò dzə̀ é ghaa laʼ foo fèy. Taà cù woo fó nèn lì lúm se nàʼ wùn à vibuushì vé vifa vi, a wìy sho e shùu kibùʼ ji wùn à wíri cu Banabar wùn Por sho.

¹⁴Áwune yú kinyo ke wír vìyi taʼ, e yiì, kí nyár áwune, á sàr ndzə̀y fó wùn, e tò fó ntìntìn, a waamé jii,

¹⁵«Wír vìn, vèn yii kin a dzə̀ ka? Vèr kù dzə̀ kér cáʼ ji wíri réŋréŋ moo ven. A vèr wìy fèn ji á fiʼti ven sáʼka Nyùy wo juŋ, é vèn fiʼ màʼtì anyùy kisaŋ vìn, e kfə̀n fo Nyùy wo wù dzəə̀n e tin. A dzə̀ Nyùy woo shooy wo wù‑uù bomen yúv wùn à nsay, à ndzə́ví, à vifá ve ví dzəə̀n shó vi vidzə̀m.

¹⁶Wù‑uù màʼtì wíri fó ŋgùʼ, á wáa yiì mo á koŋè.

¹⁷Yii bèy, wù kú a yiì vinyo ve juŋ vi e wíri, aá fíʼ a kiíy ji wun dzə̀ á sho. Wù fó ven wuú é ghan se gheenén sí, a vifá vi kúyí, a vèn kér vifá ve yi, yí, shéʼri.»

¹⁸Por wùn Banabar suúy bey, la wír vìyi yòʼ fə̀m a tàʼ, e yàr fó cù áwune gheéy.

¹⁹Wír veé Juda ámóʼó nèn dù wìy fo Antiyok wùn à fó Ikoniyum, e sə̀ŋrì wír anín aáwuné mbìv. Á tsə́mrí Por e tíyí, e sə̀ŋ, e fəə̀sín mvəmlaʼ sho, e màʼày, a ki ji wù kpù á ne.

²⁰Wír Jesuse wìy, e bànén e kitu wo, wù nèn yiì lò, e kòʼór, e kfə̀n é mvə̀mlaʼ foo fèy. Yì rán kibvəə́shí, wùn Banabar nèn lò, e dù e mvə̀mlaʼ yee Derbe.

²¹Áwune fìʼtì sáʼka Nyùy wo juŋ e Derbe, e kòóy aŋgàa biimé anín, e nèn lò, e kfə̀n, a ghan e mvə̀m sé laʼ see Lista wùn à Ikoniyum, à Antiyok e wòŋ Pisidia foo fèy.

²²Á wáa ghan bèy, a lùmèr melív me aŋgàa biimé, a tir áwune ji á kú a ghar kinyo ke Jesus kijuŋ, a kiíy a ji wùn áwune kér fó wìy yen ŋgeʼ sinín, e bóo wìy nəə́ e Nyùy mvə̀m saʼ.

²³Áwune kfə́n a lèm atǎr vintatì virə́ʼ vidzə̀m. Lóo lèm, á wàa lèm jíŋ, a bùnrì, a way áwune e Taàtá Jesus wo áwune biimén kiwo.

²⁴Áwune shaà woŋ Pisidia, e tòsín, e dù e wòŋ woo Pamfilia,

²⁵a fìʼtì kinyo ke Nyùy e mvə̀mlaʼ yee Pega. Á màysì fo fo, e sə̀y é mvə̀mlaʼ yee Ataliya.

²⁶Áwune nəə́ é kikoŋ fo fo, a ghan e rìbà ndzə̀v, a kfən e Antiyok, a dzə̀ fo vé‑eè wayin áwune e Nyùy kiwo, bo á wáa ghan, a yiì lim ye á màysìn rən.

²⁷Á meé fó, e bàʼtí wír veé kintatì, a fìʼtì mo áwune ghán, a Nyùy sə́ áwune, mvəʼtì melív me wìr ve bó yòʼ dzəə̀n veé Juda, aá wáy shilív e Jesus wùn.

²⁸Áwune nèn kfə̀n dzə̀ʼə̀m wùn aàŋgàa biimée fó ntàmda.