Read Lamnso Lim Aŋgàa Ntum 15 Bible Online

Lim Aŋgàa Ntum 15 - Lamnso bible

Lim Aŋgàa Ntum 15

¹Wír ámóʼó nèn wìy lò fo wòŋ woo Juda, e wìy e Antiyok, a yeʼéy aŋgàa biimé jii, bó yòʼ dzə̀ Nyùy lùŋèr áwune, a bó á sáŋ á *mbèʼ sév mo *Nsər Mooser dzəə̀n.

²Wùn à Por à Banabar rə́sí bìʼ sho, e bvəə̀rí. Kí gháʼ, á nèn sìysì jii, Por wùn à Banabar, à wír ámóʼó du é Jerusalem, e yèn aŋgàa ntum Jesus wùn aàtǎr vintatìi, aá tar á kinyo kee shooy.

³Mo kintatì ki tumen áwune, á nèn lò, a shaà dzə́ə fó wòŋ Fənisia wùn à woó Samariàa, a ghan aŋgàa biimé vee fó, a fìʼtì mo wír ve bó yòʼ dzəə̀n veé Judàa biimen ne sa kinyo ke Jesus. Wìr dzə̀m wáa yu, a sheʼrí feyì.

⁴Áwune dù, e mèé e Jerusalem, kintatì ki báʼtí wùn aàŋgàa ntum Jesuse, aàtǎr vintatìi, e səə̀sí áwune, Por wùn Banabar wáa fèr vinyo ve Nyùy‑iì sə́ áwune, aá yii vidzə̀m.

⁵Aŋgàa biimé ámóʼó wáa dzə fo a dzə̀ ve vé‑eè lem sa nsər se wìr veé mbìv *Farasi. Áwune nèn sàyín jii, á kù kér fó a saŋ mbèʼ se wìr ve bó yòʼ dzəə̀n veé Juda, e way wayín ji á wáa lèm a nsər se Mooser sidzə̀m.

⁶Mo á suuyin bey, aŋgàa ntum Jesus wùn aàtǎr vintatìi nèn kfə̀n dzə̀ʼə̀m ji á tar a kinyo kee shooy.

⁷Á rə́sí e sùŋnín, e dù kwaʼda. Pita nèn nànèn, a suúy jii, «Afə̀r vem, vèn kì sá ji Nyùy‑iì shòʼ a dzə̀ mo fo věn mvəm fó mbìy ji m wáa fìʼtì sáʼka və wo juŋ e wír ve bó yòʼ dzəə̀n veé Judàa, aá wáa yu, a biimé sa.

⁸A Nyùy wo wù kiìn melív me wìr dzə̀m‑eè lo bìnsí áwune ji wír və́. Wù‑uù fò áwune Kiyoy ke Ranén kí, réŋréŋ mo wù‑uù foon e vèsən fó mbìy.

⁹Wù kfən làysìn ajay vév, bìʼ fo áwune‑eè wayin shilív e Jesus wùn, e làa yòʼ a dìn jeéyjeéy fo vèsən à wír vee shooyi gheéy.

¹⁰Mo kí dzəə̀n bey, kfən yiì ka, bo vèn wáa tàʼ ji á wáa tinsín Nyùy, a neèr kibeʼèy áàŋgàa biimé vìné mbèʼ? Kibeʼèy kee shooy ki dzə̀, a vèsən aàtàr vesəné‑eè mùm ne ntéŋ.

¹¹Ke vèsən biíme ki dzə̀ ji Nyùy luŋèr vèsən, a dzə̀ bìʼ koŋ ye Tàr wòsən Jesus‑eè kòŋèn vèsən, a wù kù luŋèr sa vee shooy vee wír réŋréŋ bey.»

¹²Pita fèr bèy, wìr dzə̀m nèn sə̀sín, a yuurí ji Banabar wùn Por wàá súŋnín. Áwune nèn a fèr mo áwune‑eè ghán fo wír ve bó yòʼ dzəə̀n veé Judàa, a Nyùy fó vitaáví, aá yii viŋgaʼnìn ve vinyò ve ví din vitaáví vé Nyùy.

¹³Áwune fèr vinyo vidzə̀m, ví mày, Jeem nèn a suŋnín, a suúy jii, «Afə̀r vem, vèn yuúrí kém kí.

¹⁴Simon[3] kì sùúy ne mo Nyùy‑iì kèʼèn, e dìn ji wun koŋ sa wír ve bó yòʼ dzəə̀n veé Juda, e shòʼtí ámóʼó fo áwuné mvəm ji və́ vee wír.

¹⁵A vinyo ve aŋgàa ntum Nyùyi‑iì sí suuy vi kù shémsin wùn à kee shooy ki. Vé‑eè sàŋ jii:

¹⁶ « ‹Wíy lòo dzə fo bàm, é m kfən wìy, e nàŋsín lav Davir ye yì‑iì gbuùn. M wíy siìr kinsàʼ ke lav kee shooy fo, é yì kfə́n fó ji ŋkǐŋ.

¹⁷Wír ve bó yòʼ dzəə̀n veé Judàa wíy yen, e nèn a tàʼ sa Nyùy Tàr. A kù wíy a tàʼ wír ve m liìn ji vém adzə̀m.

¹⁸Sùúy Nyùy wo wù‑uù yiìn, wíri kiíy kinyo kee shooy fo ŋgùʼ.›

¹⁹«M nén a yen kém jii, lá vèsən yòʼ kfə̀n dzə́ə a jivír wír ve bó yòʼ dzəə̀n veé Juda ve á wayin shilív e Jesus wùn.

²⁰Á ku sàŋ fo áwune cáʼcáʼ jii, á wáa leʼ vifá ve á cuùn anyùy sho. Vee shooy vi kóʼoy kòʼòyín, e kfə̀n a leʼ liì woo kùm kinjàŋ, a leʼ nyám yee là seé, a leʼ mensə́.

²¹Aá kù sàŋ bey, bìʼ fo vé‑eè sí fiʼtì vinyo ve Mooser vìn virə́ʼ vidzə̀m, e kèʼ fo ŋgùʼ, a wíri yú. Aá kù dzəə́ yoŋ fo ŋwàʼ lèn e ŋgày se bùnrì vishiíy vé bam vidzə̀m.»

²²Aŋgàa ntum Jesus wùn aàtǎr vintatìi, aàŋgàa biimé adzə̀me nèn biìmé kee shooy, e sìysì jii, á shóʼ á wír ámóʼó fo áwuné mvəm, e tùm, é wùn à Banabar à Por du é Antiyok. Á nèn shòʼ Judar wo vé‑eè yoŋ sa ji Basabar, e kfə̀n shòʼ Silar, a dzə̀ vilìmbìy veé kintatì.

²³Á sáŋ ŋwàʼ wo á kì yíi tum áwune shó, a wú dzə̀ jii: «Ver vee afə́r vén vee aŋgàa ntum Jesus wùn aàtǎr vintatìi shaʼtì ven vee afə́r vér ve bó yòʼ dzəə̀n wír veé Juda, ve á dzəə̀n é Antiyok wùn à ve á dzəə̀n é wòŋ woo Siiriàa, à veé wòŋ woo Silisiàa adzə̀m.

²⁴Vèr‑iì lo yù ji wír ámóʼó lò fo věr mvəm, e wìy, a taà vinyo, a jivír ven shó, a bvəə́r vifíi vén, a bó yòʼ‑oò tùm ver wír vee shooy.

²⁵Vèr nen dzə̀ʼə̀m wir dzə̀m, e biìmé ji bòŋ aá shóʼ wír ámóʼó, e tùm fo věn wùn, aá wiy wùn à ŋkar sesən see Por wùn Banabar,

²⁶ve dzəə̀n wír ve vé‑eè sùmèn kpú bìʼ kinyo ke Tàr wòsən Jesus Kristu.

²⁷Vèr nen tùm Judar wùn Silar wùn áwune, aá yíi wìy, e kù suúy a dzə̀ kinyo ke vèr saŋen é ŋwàʼ fèn.

²⁸A kí dzə̀ jii, Kiyoy ke Ranén kí‑iì lo yiì, vèr yén ji bó yòʼ dzə̀ vèr wàa rəʼə́y ven ve bó yòʼ dzəə̀n wír veé Juda e kibeʼèy kímóʼ kí, e shaà vinyo ve ví dzəə̀n é shií jii,

²⁹vèn kú a leʼ vifá ve á cuùn anyùy sho, a leʼ nyám yee là seé, a leʼ mensə́, e kfə̀n a leʼ liì woo kùm kinjàŋ. A vèn lò, a baàmè vinyo vìn, bo vèn yii réŋ. Á bèr ne.»

³⁰Á sáŋ bey, e nèn tùm wír vìy sho. Á dù e Antiyok, e bàʼtí aŋgàa biimé adzə̀m, e fò ŋwàʼ və̀y.

³¹Áwune yòŋ, wú rəə̀r melív mev, á wáa sheʼrí feyì.

³²Mo Judar wùn Silar‑iì dzəə̀n sá wír ve á lo, á wàa tiisí ntum Nyùy, á nèn kfə̀n a suúy vinyo vímóʼ ví vinín, a tir áwune shó, a tavír melív mev.

³³Áwune bónén, e dzə̀ʼə̀m fo wùn áwune. Á wìy lòo lò, aŋgàa biimée shàʼtì áwune ji á ghán á kijuŋ, e kfə̀n fo wír ve vé‑eè tumen áwuneé wùn. [

³⁴Yii bèy, Silar nèn yèn ji wun‑éè goʼ á kfə́ é Antiyok foo fèy.]

³⁵Por wùn Banabar ku nèn a dzə e Antiyok, a fìʼtì kinyo ke Jesus wùn à wír ámóʼó anín, a yeʼéy wíri.

³⁶Ghán sí lòo koʼtí, Por suúy e Banabar jii, «Wòsò kfən dù e ntèʼ se wòsò‑oò fiʼtì kinyo ke Nyùy sho sidzə̀m, a ghan fo aŋgàa biimée, a leéy mo áwune dzəə̀n.»

³⁷Banabar nèn a kòŋ fó lì Joon Maak, é wùn áwune wáa ghan,

³⁸yii bèy, la Por yòʼ a kòŋ gheéy, bìʼ fo Maak‑iì leʼen, e màʼtì áwune é wòŋ woo Pamfilia, e làa yòʼ màysì ghán ye wùn áwune‑eè kérí.

³⁹Wùn Banabar rə́sí, e kìŋnìn ŋkóŋkóŋ, e nèn jàvsìn. Banabar lì Maak, wùn wun dù, e nə̀ə́ e kikoŋ, a dù e wòŋ woo Saypur.

⁴⁰Por shóʼ kfə́ a dzə̀ Silar. Wùn wun lòo lò, aŋgàa biimée bùnrì, e wày áwune e Nyùy kiwo.

⁴¹Por nèn lì Silar, a dù, a shaà dzə́ə fó wòŋ woo Siiria wùn à woo Silisiàa, a ghan, a tavír aŋgàa biimé vee fó.