Read Lamnso Lim Aŋgàa Ntum 16 Bible Online

Lim Aŋgàa Ntum 16 - Lamnso bible

Lim Aŋgàa Ntum 16

¹Por dù, e mèé e mvə̀mlaʼ yee Derbe, e wìy lò, e dù e Lista. Ŋgaà biìmé wùmòʼ wáa dzə fo, a yírí dzə̀ Timoti. Yè wov‑iì dzə̀ sá ŋgaà biìmé, a dzə̀ wír woó Juda, tàr wov wáa dzə wir Grik.

²Timoti kfə́n a dzə wír, aàŋgàa biimé veé Lista wùn à veé Ikoniyume búri wun adzə̀m.

³Por lòo tàʼ ji wùn à Timoti wáa ghan, e nèn sàŋ *mbèʼ sə́ mo liì woó Juda dzəə̀n, bìʼ fo wír veé Juda veé kiliŋ foo fèyi‑iì kiiyin ne ji tàr à Timoti dzə̀ á wir Grik.

⁴Wùn à Por nèn a dù, a ghan aŋgàa biimé e ntèʼ sí ntèʼ sí, a dìn nsər se aŋgàa ntum Jesus wùn aàtǎr kintatì keé Jerusaleme foon, aá din bèy, suuy ji á wáa lèm a kijuŋ.

⁵Vintatì ve aŋgàa biimé vìy vi ku nèn a way shilív e Jesus wùn, a dù duùn fó mbìy. Wír ámóʼó kfə́n a tatí áwune vishiíy vidzə̀m.

⁶Wùn à Por ku nèn a ghan, e lò ji á du, a fìʼtì sa kinyo ke Nyùy e wòŋ Asia, la Kiyoy ke Ranén kí yòʼ biìmé. Áwune nèn a shaà a dzə̀ é mvə̀m wòŋ woo Firigia wùn à woo Galatiàa.

⁷Á lòo meesín e wòŋ Misia, a tàʼ ji bo á kì dù dzə́ə á fo wòŋ woo Bitinia, Kiyoy ke Jesus ki kfən shàʼnín.

⁸Áwune nèn nə̀ə́ e wòŋ Misia, e tòsín, e dù e mvə̀mlaʼ yee Towar.

⁹Yiì lòo dzə vitsə́ʼ, kinjeenjèm ki wìy fo Por ji wìr woó Masedonia kì tíy e ndzən wùmòʼ, lar wun a jii, «Ku tùmsín e Masedonia fèn, e sə̀ ver.»

¹⁰Mo Por yenen kinjeenjèm kìn, vèr áwune[4] nèn yèn ji Nyùy taʼ a ji vèr du, e fìʼtì a sáʼka və é wòŋ Masedonia. Vèr ku nèn bàʼtí, a dù fo.

¹¹Vèr áwune nəə́ é kikoŋ fo Towar, e shèr dzə́ə tìítiy, a ghan e rìbà ndzə̀v, e mèé e ntèʼ yee Samotira, e bóo bvəəshí, e fəə́ e ntèʼ yee Neapolir.

¹²Vèr nèn lì dzə́ə, a dù e Filipi, a dzə̀ mvəmlaʼ ye kuʼùn é mbìv wòŋ yee Masedonia foo fèy, kfə́n a dzə sa láʼ bàràʼ wìr veé *Rom. Vèr shiíy fó vishiíy vímóʼ ví.

¹³Kishiíy ké bam ke wìr veé Juda ki gheén, vèr fəə́sín ntèʼ, a dù e ghaa ndzəv fo vèr kù‑uù kwaʼtì ji wír veé Judàa yíi a ker a bunrì. Vèr meé fó, e yèn, a vikìy ámóʼó báʼtí fó, vèr nèn dzə̀ʼə̀m, a suŋnín aáwune.

¹⁴Wiíy kitum wùmòʼ wáa dzə fo, a wù ghvə́m sa Nyùy, a yír rəə́ dzə̀ ji Lidia. Wù‑uù dzə̀ wír woó Tiyatira, a wù yii fiinè kfə́ə ndzə̀y símóʼ sí, a sí yii dzə́ e kilùm. Wù lòo yuurí kinyo kér, Nyùy nèn mvə̀ʼ shilív sə́, wù biímé kinyo ke Por ferì.

¹⁵Á yiì wày wùn à wír vee wùn laʼa é ndzəv, wù wáa lon jii, a vèr fen yèn rú ji wun wày ne shilív e Jesus wùn, vèr kù wìy, e beè a dzə̀ á e wùn laʼ. Wù boòrì bèy, vèr ku nèn dù.

¹⁶Wìy lòo dzə e kishiíy kímóʼ kí, vèr wáa dù e kirə̀ʼ ké bùnrì, e tàrnín vèr à wánlè wiíy wùmòʼ, a dzə̀ kwàn. Wù‑uù kér *nyùy wùmòʼ wo wù‑uù yii, a wù tiísi fú, aàtàr vəə́ kooy mbàm sinín fo vinyò ve wù‑uù táŋé.

¹⁷Wan woo shooy yén vèr à Por, e nèn a jùmrì fo bàm, a waamé, a suúy e wíri jii, «Wír vìne dzə̀ aŋgàa lìm Nyùy woo Taà Vitu, aá fiʼtì mo dzə̀ vèn ghàn, e bóo lùŋ.»

¹⁸Wù kú a rəsí, a yiì bèy vishiíy vinín, Por wáa yu nyár. Wù wìy lò, e bìnkìr, e wàm nyùy woo shooy jii, «M suuy e wò, e Jesus Kristu yir jii, fəə́, e màʼtì wán və̀n.» Wù ku nèn màʼtì e ghan see shó.

¹⁹Atǎr wané yén ji séʼ wo áwune rə́si kér fo wan və̀n lày a ne, á nèn bàm Por wùn Silar, e sə̀ŋ, e dù, e yèn vé wòŋe shó e kirə̀ʼ ké nsaʼ.

²⁰Á dù, e kòʼór áwune áàŋgàa saʼ bàràʼ veé Romé si, a suúy jii, «Wír vìne dzə̀ veé Juda, aá fó ŋgeʼ e věr ntèʼ é ŋàŋ.

²¹Áwune yéʼey liì wo bó nsər yèsən yoʼ biìmé. Vèr dzə̀ kér wír veé Rom, a bó yòʼ dzə̀ vèr wàa jùmrì liì wìr vìn.»

²²Màŋgòŋ wo wù‑uù dzəə̀n fó ku nèn ŋàʼáy sa aáwuné wùn. Vé saʼa yú kinyo kìy, e sàtì ndzə̀y fo Por wùn Silar wùn, e sùúy ji á wàá tám.

²³Á bónén, e tàm áwune kijuŋ, e lì, e fìn e lav sháŋ, e sùúy e wìr wo wù‑uù leey fo lav sháŋ ji wù wáa shìy a kijuŋ.

²⁴Wù yú bey, e nèn lì áwune, e nə̀ə́ sho e lav yee fó mvəə́mvəm, e wày é kibuʼ.

²⁵Yiì lòo dzə e ntìntìn vitsə̀ʼ, Por wùn Silar wáa bùnrì, a yòv luŋ, a burí Nyùy, vé sháŋé wáa yuurí.

²⁶Nsay nèn lò, e sàsìn, a sə̀ʼ, lav sháŋ sə̀ʼ, e dù mèé e kinsə̀ŋ, shuu se lav si mvə̀ʼkìr, asháŋé tiíné fo vé sháŋé wùn adzə̀m.

²⁷Wìr wo wù‑uù shiy lav sháŋ rə̀y yìmèn, e yèn, a shuu se lav si tíynin sirə́, a kwàʼtì ji vé sháŋé nyèŋkír a ne adzə̀m. Wù nèn shòʼ nyùy fó kiburúʼ ji wun sí yúyri a kitú kfə́ shó.

²⁸Por waámé kitávín jii, «Lá à yòʼ yùyrí kitú ké. Vèr dzə̀ fó adzə̀m.»

²⁹Wù nèn jàŋ ji wìr ku wìy a e kikaʼày kí. Á wìy sho, wù tó é lav, e dù, e tsə̀m e Por wùn Silar si, a wù sí yaʼ yàʼàn.

³⁰Wù yiì lò, e fə̀ə́r áwune fó ndzə, e dzə̀r jii, «Atàr vem, a dzə̀ m yèe, e bóo wìy lùŋ?»

³¹Áwune bìnèr jii, «Wáy shilív shí e Jesus wùn, é vèn à kfə́ə yée wìy lùŋ.»

³²Á nèn fìʼtì kinyo kee kùm Jesus e wùn à wír veé wùn laʼa adzə̀m.

³³Wù yìi lò, e lì áwune vitsə́ʼ vee shooy, e sù vileémé vév. Por wùn Silar yiì wày wùn à kfə́ə rəə́ e dzə̀m e ndzəv.

³⁴Wù lì áwune, e dù sho e wùn lav, e fò vifá ve yi, á yí. Mo wùn à kfə́ə rəə́ wayin shilív e Nyùy wùn, e nèn a dzə, a ker kishéʼrì ke kuʼùn kí.

³⁵Yì rán kibvəə́shí, aŋgàa saʼ bàràʼ veé Rome tsənsí vé nsəri fo ŋgaà lav sháŋ və̀y ji wù fəə́r á wír vìy, aá wáa dù.

³⁶Wù nèn dù, e sùúy e Por jii, «Vé saʼa tsə̀nsí ne ntum ji m fəə́r á ven. A dzə̀ vèn wàa dù lèn. Vèn du ri kijuŋ.»

³⁷Por suúy e vé nsər vìyi jii, «Vé‑eè tàm ver e wírí si, a bó á yóʼ ne sàʼ nsaʼ yer, a vèr dzə̀ sá wír bàràʼ woó *Rom. Á kfən fìn ver é lav, e woòné lèn, e wìy, a suúy ji vèr wáa dù. Bó yòʼ dzə̀ kee shooy ki kòóy. Kù wiy vé saʼa ŋkuŋén, e bóo fəə́r ver.»

³⁸Vé nsər vìyi kfə́n é bàm, e fìʼtì e vé saʼ bàràʼ vìyi mo Por suuyin. Áwune yú ji Por wùn Silar dzə̀ sáa wír bàràʼ woó Rom, e nèn a fàn.

³⁹Á ku nèn wìy, a buʼ wó fo áwune, e fə̀ə́r fo sháŋ, a lon ji áwune ku lò a fo mvə̀mlaʼ fèn.

⁴⁰Áwune fəə́ fó lav sháŋ fey, e dù e Lidia lav, wùn aàŋgàa biimé adzə̀me tárnín fó, Por wùn Silar tír áwune, e bó a lò.