Read Lamnso Lim Aŋgàa Ntum 17 Bible Online

Lim Aŋgàa Ntum 17 - Lamnso bible

Lim Aŋgàa Ntum 17

¹Por wùn Silar nèn a dù, a shaà e mvə̀mlaʼ yee Amfipolir wùn à yee Apolonia, e tòsín, e mèé e Tesalonika fo ŋgày bùnrì wìr veé Juda yìmòʼ‑oò dzəə̀n.

²Por nèn a dù e ŋgày bunrì foo fèy mo wù kù yii yii, a suŋnín wùn à wíri fó vishiíy vé bam vitaár, a toʼtí Ŋwàʼ Nyùy aáwune.

³Wù‑uù din fo fo ji *Mfə̀ə́r wo vé‑eè shiyì kù‑uù waà wíy yen a ŋgeʼ, e kfə̀n fəə fo kpu, a suúy jii, Jesus wo wun fiʼtì aáwune lèn dzə̀ á Mfə̀ə́r woo shooy.

⁴Ámóʼó yú, e biìmé, e tàtí Por wùn Silar. Wír veé Grik ve vé‑eè sí ghvə́m Nyùy, wùn à vikǐy wìr ve kuʼkìn ámóʼó tátí sá áwune anín.

⁵Wír veé Juda ve vé‑eè tenené nèn a ghèʼ Por wùn Silar, e bàʼtí wír ámóʼó ve vé‑eè ghán, sev kisáŋ, wùn áwune kèʼ melaà. Ntèʼ nèn tàtí e dzə̀m, e keèmè, e dù, e kìv lav Jason ji á taʼ a Por wùn Silar, e fəə́r, e fo e wír vee fó ndzəə.

⁶Á tàʼ ntéŋ, e nèn sə̀ŋ Jason wùn aàŋgàa biimé ámóʼó, e dù sho fo atǎr ntèʼé, a waamé jii, «Wír vìne ghán, binèr woŋ, a wú kfə́n tsə̀ə́tsəŋ. Aá wìy ne sa lèn e ntèʼ fen,

⁷Jason səə́sí, e wày e wùn lav. Áwune shóʼor nsər se Fòn woó *Rom, suuy jii, ‹Wo sən woo fon dzə̀ shó, aá yoŋ ji Jesus.› »

⁸Atǎr ntèʼ wùn à wíri yú bey, kindzə́m kí gwàr áwune.

⁹Á nèn kàn Jason wùn aŋgàa biimé vìyi, á sòŋ kishóv fó kfə̀n wìy mùm kímóʼ kí, é bo á maʼti áwune, aá wáa dù.

¹⁰Ndzə yiì sə̀n, aŋgàa biimée lì Por wùn Silar, e tsə̀nsí, á wáa dù e ntèʼ yee Beria. Á dù, e mèé fo, e kfə̀n dù e wír veé Judàá ŋgày bùnrì.

¹¹Wír veé Juda vee fóo wáa dzə wír, aá yii kwaʼtì kinyo, e shaà veé Tesalonika. Á nèn a ker shií fó a yuurí kinyo ke Por wùn Silar. Lóo yuurí, á wàa yòŋ Ŋwàʼ Nyùy vishiíy vidzə̀m, a leéy fo fo ji kinyo ke áwune suuy ki sà kù yòʼ dzə̀ réŋ á?

¹²Á nèn lò, e biìmé anín. Fo mbìv wìr veé Grik, vikǐy wìr ve kuʼkìné biímé sá anín, vilum ámóʼó wáa biimé sa.

¹³Wír veé Juda ve vé‑eè dzəə̀n é Tesalonikàa siíy, e yù jii, Por sí fiʼtì a kinyo ke Jesus e Beria, e nèn wìy, e bàyír wíri, á wáa tàʼ melaà.

¹⁴Aŋgàa biimée ku nèn tsə̀nsí Por, wù wáa dù dzə́ə fó shùu rìbà ndzə̀v. Silar wùn Timoti siíy, e gòʼ kév é Beria.

¹⁵Wír ve vé‑eè tsəənen Pori dù, e mèé e Aten, e nèn màʼtì wun fo. Áwune lòo kfən e bàm, Por tiísí ji Silar wùn Timoti ku wìy a cér.

¹⁶Por ku nèn a shìy Silar wùn Timoti e Aten, e lòo ghan fo, e yèn, a ntèʼ dzə̀ anyùy anyùy, a shèŋ kitú, a rə̀m.

¹⁷Wù nèn dù e wír veé Judàá ŋgày bùnrì, a suŋnín wùn áwune, à wír veé Grik ve vé‑eè wiy sa, bunrì foo. Wù kfə́n a dù sa e virə̀ʼ vé way vishiíy vidzə̀m, a suŋnín wùn à wíri fó.

¹⁸Aŋgàa yeʼéy ámóʼó yén wun fo, a dzə̀ ve vé‑eè yéʼey kinyo ke *Epikurur wùn à ké Shitoy ki. Por wáa yeʼéy áwune kinyo kee kùm Jesus, a fèr mo wíri wíy fəə fo kpu. Wùn áwune nèn a bìʼ kinyo kee shooy, ámóʼó wáa sày jii, «Kiyúŋ kísə ki táŋri a dzə̀ ka?» Aámóʼó suuy kév jii, «Kí shwínin mo wù súŋnin kùm anyùy ve fíyi.»

¹⁹Áwune nèn lì Por, e dù sho fo dzə̀ʼə̀m atǎr ntèʼ ye á yoŋ ji *Aropagur, e sùúy jii, «Vèr koŋ fó kfə̀n yu yéʼéy yé ye fíy rə̀yi lèn kijuŋ.

²⁰Vinyo ve à yéʼey vímóʼ ví dzə̀ jeéy, a vèr taʼ ji á kiíy mo ví dzəə̀n.»

²¹A vé‑eè dzə́r bèy, bìʼ fo áwune vee wír veé Aten wùn à viŋgwìy ve ví dzəə̀n fó vi kù‑uù koŋ, a rəsí, a yuurí vinyo ve fíy vi, a bìʼ mbìʼ sho.

²²Por nèn nànèn aàtǎr ntèʼ víyí ntìntìn, a suŋnín, a suúy jii, «Ven vee wír veé Aten, m yén ji vèn dzə́ bèn, a vèn ghvə́m anyùy e ŋàŋ.

²³Mò‑oo lóo ghan e věn ntèʼ, a leéy virə́ʼ vén vé cù, e dù, e mèé fomóʼó, e yèn, aá sáŋ fó jii, ‹Kirə́ʼ ké nyùy wo bó á yòʼ kiìn.› Nyùy wo vèn sí ghvə́m, a bó á yòʼ kì və̀n, dzə̀ woo shó wo m suuy e vèn lèn.

²⁴«Dzə̀ wun wo dzəə̀n Tàr à yùv wùn à nsay, bìʼ fo yì‑iì bomen wun ndzə wùn à vifá ve ví dzəə̀n shó vi vidzə̀m. A bó wù yòʼ yii dzə́ e lav se bomen wíri,

²⁵a bó yòʼ dzə̀ sá wù wàa leéy ji wìr lim fo wun mo wun woo Nyùy kì búŋ kifá. Yii wun, bo wìr dzə̀m wáa yòy, a ŋèʼ, a ker vifá ve á kér shií shó vidzə̀m.

²⁶Wù‑uù tòmbìy bòm wír e mòʼón, e nèn fèr vitúm vidzə̀m fo fo, e lèm kitú ke nsay kidzə̀m. Bo wù wáa fèr, a wù‑uù sìysì ne ghán se á wíy a dzə, e kfə̀n sìysì virə́ʼ jeéy jeéy ve á wíy a dzə sho.

²⁷A wù‑uù yii bèy ji wíri fíʼ a tàʼ wun, lóo ghaà, e ghan símóʼ sí, aá wàá yén. Yii bèy, a bó Nyùy yòʼ yii dzə́ kwaʼda fo vèsən gheéy.

²⁸A dzə̀ réŋréŋ mo wìr wùmòʼ‑oò suuyin jii: « ‹Yii Nyùy, bo vèsən wáa ŋèʼ, a ghan, a dzə mo á dzəə̀n.› Kfə́n a dzə sa mo aŋgàa kimfèr vén ámóʼó‑oò suuyin jii: ‹Vèsən adzə̀m dzə̀ sá wón Nyùy.›

²⁹«Mo vèsən dzəə̀n wón wun woo Nyùy, lá vèsən yòʼ a kwàʼtì ji mbom rə dzə̀ moo kibámmbó ke naŋsin wír e vifií və́ ví, kìn wù tòn a dzə̀ kisha, kìn wù sèm a dzə̀ tíy.

³⁰Yì‑iì dzə̀ fó ŋgùʼ, a bó Nyùy yòʼ‑oò ló a nəə́ e mvə̀m vinyò ve wíri‑iì yii, a bó á yóʼ ne kìíy wun. Yii bèy, a wù suuy lèn ji wír adzə̀me biner á melív mev fó vinyò ve kisaŋ vi.

³¹A wù suuy bèy, bìʼ fo wù‑uù sìysìn ne kishiíy ke á wíy a saʼ nsaʼ wìr dzə̀m, a tinén réŋréŋ mo yì dzəə̀n. Wù‑uù shòʼ ne wír wo wù wíy tinén nsaʼ yee shooy, e lòo fəə́r ŋgaàŋ fo kpu, e dìn, wìr dzə̀m yén ji kinyo kee shooy ki wíy koóy rú.»

³²Áwune yú, a Por suuy ji wìr wùmòʼ‑oò fəə̀ ne a fo kpu, á nèn a sheʼ sheʼén. Ámóʼó wáa suúy kév jii, «Vèr koŋ, e kfə̀n wìy yu kinyo ké kìn e ghan símóʼ sí.»

³³Por nèn màʼtì áwune, e fəə̀.

³⁴Wír ámóʼó ku yòʼ biìmé kinyo kfə́, e tàtí áwune. Wùmòʼ‑oò dzə̀ Dionisiyur wo dzəə̀n sá ŋgàŋ dzə̀ʼə̀m yee Aropagur rə̀n. Wùmòʼ wiíy, a yír rəə́ dzə̀ Damarir, à wír ámóʼó sá.