Read Lamnso Lim Aŋgàa Ntum 19 Bible Online

Lim Aŋgàa Ntum 19 - Lamnso bible

Lim Aŋgàa Ntum 19

¹Wáa dzə e ghan se Apolor‑iì dzəə̀n é Korin sìn, a Por sí ghán e mvə̀m wòŋ woo Asia. Wù lòo meesín e Efesor, e yèn aŋgàa biimé ámóʼó fó,

²e dzə̀r aáwune jii, «Kiyoy ke Ranén kí‑iì lo wìy fo vèn é ghan se vèn‑eè wayin shilív e Nyùy wùn á?» Áwune bìnèr jii, «Vèr yòʼ‑oo yií ne yù ji kímóʼ kí dzə̀ á Kiyoy ke Ranén kí.»

³Por dzə́r jii, «Bo vé‑eè wày ven é ndzəv ji ka lèn?» Á bìnèr jii, «Vé‑eè wày bìʼ kinyo ke Joon.»

⁴Por nèn a naàrì aáwune jii, «Joon‑eè wáy wíri é ndzəv fó dìn ji á bìnèr ne a melív mev. A wù‑uù ló a suúy e wìr dzə̀m jii, wìr wùmòʼ wiy fo wùn bàm, á wáy á shilív e ŋgaàŋ wùn, a wù yoŋ a dzə̀ Jesus.

⁵Wír vìyi yú kee shooy, e biìmé, á nèn wày áwune é ndzəv lèn e Taàtá Jesus yir.»

⁶Por yiì lò, e neèr wó aáwuné vitu, Kiyoy ke Ranén kí wìy, e nə̀ə́ aáwuné meliv. Á nèn a suŋnín kfəə́ se làm símóʼ sí jeéy jeéy, e kfə̀n a tiisí vinyo ve á yú fo Nyùy.

⁷A wír vìne‑eè du wír nshòv sibaà e ghvə̀m.

⁸Por ku nèn a dzə e Efesor foo fèy, a dù e wír veé Judàá ŋgày bùnrì, a suŋnín fo tèéter, e meé ŋwee e taár. Wùn áwune wáa bìʼ vinyo ve Nyùy, wù wáa dìn áwune mo sáʼ Nyùyi dzəə̀n.

⁹Ámóʼó wáa yu, a nyaŋ nyaŋén, e làa yòʼ a biimé, e nèn a nyàysì dzə́ə yee kùm Jesus rə̀n e wírí mvəm. Por nèn lì wír ve vé‑eè biimen, wùn áwune dù lèn a dzə e Tiranur lav ŋwàʼ, a suŋnín fo vishiíy vidzə̀m.

¹⁰Wù ku nèn a yiì bèy, e meé viyá vibaà, wír veé wòŋ Asia foo fèy adzə̀me wáa yu kinyo kee kùm Jesus, wír veé Juda ve vé‑eè dzəə̀n fóo kfə́n a yu sa.

¹¹Por wáa yeʼéy wíri bey, Nyùy wáa yiì, wù wáa yiì viŋgaʼnìn ve vinyò ve bó wìr yòʼ‑oò yiì ne yèn.

¹²A fə̀m‑eè dzə̀ vifá ve wù‑uù sí maʼ e wùn, ví kù a fèr wír. Wíri nèn a tàʼ vinsàʼ və́ vé ndzə̀y, kìn dzə̀ sé lìm, a dù, a neèr e vé yàsií wùn, á wáa bonén, anyùy ve vé‑eè jívir wírií wáa màʼtì sa áwune.

¹³Wír veé Juda ámóʼó wáa dzə fo, a vé‑eè sí ghán, jum anyùy. Áwune nèn lò, a mùm sa ji á wáa yòŋ yír Jesus, e bó a jùm anyùy. Wìr lo, wù nèn a suúy aànyùyi jii, «M jum ven e Jesus wo Por fiʼtì və̀y yir.»

¹⁴Wír ve vé‑eè yii kinyo kìne‑eè dzə̀ wír saàmbà, a dzə̀ wón Seva woo taà cù wo kuʼùn wo wìr veé Juda.

¹⁵Á suuy bèy, nyùy woo shooy nèn dzə̀r jii, «M kì Jesus, e kfə̀n kìíy Por. Vèn dzə̀ kén ala?»

¹⁶Ŋgaà nyùy və̀y nèn ŋàʼáy e wír vìyí wùn, e kùŋrí kuŋrín adzə̀m, á wàa meekír fo lav kinshóʼ, aá lémkír ne.

¹⁷Wír veé Efesor wùn à wír veé Juda vee fó adzə̀me yú kinyo kee shooy, a fàn. Wíri ku nèn a ghvəm yír Taàtá Jesus, a shaàsìn.

¹⁸Wír ve vé‑eè biimen kinyo ke Jesuse wáa wìy anín, a toyrí mo vé‑eè rə́si yii shív.

¹⁹A ve vé‑eè din sə́me wiy aàŋwàʼ vév səme, báʼti, ton e wírí si. Á táŋ káv ŋwàʼ woo shooy, wáa dzə mbàm see kisha ke mbàm ke fəvír kí nsə̀kì mtàn (50,000), a sí mbàm mòʼóne dzə̀ mbàm sinín.[5]

²⁰Kinyo ke Nyùy ki ku nèn a nəə́ e wírí meliv bey kitávín, a kuy, a dù duùn fó mbìy.

²¹Por nèn wìy lò, e wày ji wun du e Jerusalem, lóo dù, é wun wáa shaà dzə́ə fó wòŋ Masedonia wùn à woo Akayàa. Wù kfən sùúy jii, «M wíy dù, e meé fo, é m ku dù sa, e yèn Rom.»

²²Wù nèn tsə̀nsí Timoti wùn Eratur ve vé‑eè sə́ wun, á wáa dù fo mbìy e wòŋ woo Masedonia. Wù kfən sìíy, e dzə̀ʼtì e wòŋ woo Asia shishàr.

²³Kú a dzə e ghan fóo fèy, melaà me tavín mè nèn kèʼ e Efesor bìʼ kinyo ke Jesus.

²⁴Taà kilàm wùmòʼ wáa dzə fo, aá yoŋ ji Demetiyur. Wù‑uù ton vifá ve ví sə́nin lav nyùy wo á yoŋ ji Atemer, a lim yee shooyi fó séʼ wo kuʼùn e vé kilàme.

²⁵Wù nèn wìy lò, e jàŋrì áwune, e kfə̀n jàŋrì sa aŋgàa lìm ámóʼó ve vé‑eè lim sa vifá vee bey, a suúy jii, «Vèn kì ji vèsən kùʼkìr e mbàm adzə̀m bèn, a dzə̀ bìʼ lim rə̀n.

²⁶A vèn yén, kfə̀n yú sa kinyo ke jwè woo Por və̀y yii e Efesor fèn, kfə̀n yii woŋ Asia e dzə̀m. Wù ghán, suuy ji anyùy ve á fer e wóo víne yòʼ dzə̀ á anyùy gheéy, binèr wír anín.

²⁷M nén a yen ji tàm kí wìy yiì, lim yesəné bìr, e kfə̀n yiì, é lav nyùy woo Atemer və̀n lay. A kí kòóy bèy, bo á shòór ne nyùy wo kuʼùn və̀n, wo wír veé Asiàa ghvə́mé, a kitú ke nsay ki ghvə́m kidzə̀m.»

²⁸Áwune yú bey, kí gaár melív mev, á wáa waamé jii, «Atemer woó Efesor dzə̀ nyùy wo kuʼùn.»

²⁹Ntèʼ nèn lò, e bvəə̀rí e dzə̀m. Wíri báʼtí, e bàm Gayur wùn Aritakur ve vé‑eè ghán wùn à Por, a dzə̀ wír veé Masedonia, a sə̀ŋ, a dù sho e kirə̀ʼ ké kileèy.[6]

³⁰Por wáa tàʼ ji wun du, e sùŋnín e wír vìyi, aŋgàa biimée sháʼnín.

³¹Atǎr ntèʼ ámóʼó ve yì‑iì dzəə̀n ŋkar sə́ sí tsə́nsí sá ntum, a lon jii, lá wù yòʼ mùm, e tìír a kiwuú kfə́ é kirə̀ʼ ké kileèy foo fèy.

³²A wír vìyi kù bvəər virə́ʼ, waáme waàmén. Aámóʼó waáme kinyo ke sən kí, ámóʼó ke sən kí, bìʼ fo kùʼùn wìr yòʼ‑oò kiìn kinyo ke vé‑eè baʼtin fó, a yiì.

³³Ámóʼó yén mo wír veé Judàa cuur Aleŋsanda fo mbìy, e nèn a kwàʼtì ji kinyo ki kooy a dzə̀ á bìʼ wun. Wù nèn a sə̀tì wíri e kiwó ki ji wun túner a kitú kfə́.

³⁴Áwune yén, a kì dzə̀ wír woó Juda, e nèn kfə̀n màysì, a waamé waamén jii, «Atemer woó Efesor dzə̀ nyùy wo kuʼùn.» Á ku nèn rə̀sí, a yiì bèy ntàmda.

³⁵Wìr wo wù‑uù sáŋ vinyo ve wòŋ yiì lò, e sə̀r wír vìy, e yòŋ áwune jii, «Ven vee wír veé Efesor, wìr wùmòʼ dzə̀ shó wo wù méŋ ji bó yòʼ kér Efesor və̀n lav nyùy woo Atemer wùn à tíy nyùy ye yí‑iì gbuùn fó yuví a?

³⁶Mo vèn kiìn ji bó yòʼ dzə̀ wìr shàʼnín kee shooy, bo vèn kì dzə́ nyaáŋ, e làa yòʼ a yuŋsí.

³⁷Vèn wìy e wír vìne fen, a bó á yoʼ shòŋ kifá fo lav se anyùy, a bó á yoʼ kuù nyùy wòsən woo wiíy woo shooy.

³⁸A Demetiyur wùn à wír vəə́ kì kér kinyo kímóʼ kí wùn à wír vìne, bo vishiíy vé nsaʼ vi dzə̀ ve dzə̀ áwune dù, e yèn vé saʼa, é wùn áwune sáʼ fó.

³⁹A kinyo kímóʼ kí kfə̀n dzə̀ shó, e shaà kin, bo á wíy saʼ e kishiíy ke atǎr ntèʼé yii dzəʼə̀mè.

⁴⁰M suuy bèn, bìʼ fo m fan ji a tàm bo vèsən yíi koóy kinyo bìʼ melaà mee lán mèn. A bó kí yòʼ kòóy, wìr wàa ker kinyo kée bìnèr.»

⁴¹Wù suúy bey, e nèn siìr màŋgòŋ və̀y e bàm.