Read Lamnso Lim Aŋgàa Ntum 2 Bible Online

Lim Aŋgàa Ntum 2 - Lamnso bible

Lim Aŋgàa Ntum 2

¹Kishiíy ké kiŋkàʼ kímóʼ kí nèn wìy ghèén, aá yoŋ ji *Pentikor. A wír Jesuse kì bàʼtí kirə́ʼ kimòʼón adzə̀m.

²Áwune sàsìn, e yù, a kifá ki yór fó yuv moo kinsəm. Kí wìy, e nə̀ə́, e rùn é lav ye áwune‑eè dzəə̀n shó.

³Áwune lòo leéy, e yèn kifá, a kí shwínin viliímé ve və̀y, a ví sáʼti, du, tiim e wìr mòʼón mòʼón kitu.

⁴Kiyoy ke Ranén kí ku nèn wìy, e rùn aáwuné meliv, e yiì, áwune kèʼ, a suŋnín lám sé vitum jeéy jeéy.

⁵Wáa dzə e ghan see shooy, a wír veé Juda ve vé‑eè ghvə́m Nyùyi kì lòkìr vitúm vidzə̀m, e wìy, e bàʼtí e Jerusalem foo fèy.

⁶Á yú mo kifá kìy ki yor bèy, á nèn wìy, e bàʼtí e wír Jesus vìyí ghaŋ nyanyày. Á yú, aá fiʼtì kinyo, a wìr mòʼón mòʼón yú aáwuné làm sé vitum jeéy jeéy, kí tárír áwune.

⁷Á wáa ker gháʼ, a ghaynín jii, «Wír ve á súŋnin vìne yòʼ dzə̀ wír veé Galeli à?

⁸Kí ghàn é le, bo áwune wáa suúy vinyo, é vèsən wáa yu e vèsə́n làm sí jeéy jeéy?

⁹Vèsən ámóʼó lò fo Patia, ámóʼó fó Media wùn à fó Elam. Aámóʼó ló fó Mesopotamia wùn à fó Juda, à fó Kapadosia, ámóʼó fó Pontur wùn à fó Asia.

¹⁰Ámóʼó ló fó Firigia, wùn à fó Pamfilia. Ámóʼó ló fó Ejiv wùn à fó ntèʼ seé Serina se sí dzəə̀n é wòŋ Libiya. Ámóʼó fó Rom, a dzə̀ wír veé Juda wùn à ve á bìnkìn bínkin ji wír veé Juda.

¹¹Ámóʼó ló fó Kiret wùn à fó Arabia, a vèsən áwune adzə̀m yú e vèsə́n làm sí jeéy jeéy mo wír vìne fiʼtì viŋgaʼnìn ve vinyò ve Nyùy yii.»

¹²Á wáa ker gháʼ bèy, kí kfə́n a tarír áwune, á wáa ghaynín jii, «Kee ben ki dzə̀ ka?»

¹³Aámóʼó nèn shéʼ kév sheʼén jii, «Koò meluʼ wír veé Galeli vìn.»

¹⁴Pita wùn à kibér ke aŋgàa ntum Jesus vee nshòv mòʼón e ghvə̀me nèn nànèn. Wù wáa suúy e màŋgòŋ və̀y jii, «Ven vee wír veé Juda wùn à veé Jerusaleme adzə̀m, vèn yuúrí, é m suúy mo kí dzəə̀n.

¹⁵Mo dzə̀ə́ lèn shúy bvə̀ʼə̀ kijàvndzə, bó wír vìne yóʼ ne nò kifá, mo vèn kwaʼtì.

¹⁶Kinyo ke kí kooy lèn kìn ki dzə̀ ke Joel woo ŋgaà ntum Nyùy‑iì suuyin fó ŋgùʼ jii:

¹⁷ « ‹Nyùy suuy jii, wíy lòo dzə e ghan sé bàm sí, é m fó Kiyoy kém e wìr dzə̀m, é wón vén vee vilum wùn à vee vikìyí wáa yu vinyo fo mò, a tiisí, é wón vén vee wónlě nsùme wáa yen vinyo e njà vinjeenjèm, é ŋgày sén sé wìr si wáa yen vinyo e njèm.

¹⁸A wíy lòo dzə e kishiíy foo fèy, é m kfən fò sá Kiyoy kém áàŋgaà vém lìme adzə̀m, kìn dzə̀ woo lumèn, kìn dzə̀ woo wiíy, aá wáa yu sa vinyo fo mò, a tiisí.

¹⁹M wíy yiì vinyo ve ghaʼtín ví é mbàʼ, e kfə̀n dìn visəəm ve beemén ví é nsay. Mensə́ wùn à və́yí, à kindzə́ʼ ke ghaʼtín kí wíy a dzə.

²⁰A shùy wíy ndzəmén, lóo sən sənén, ŋwee lóo bàŋ moo mensə́, é bo kishiíy ké Tàr ke ghaʼán kí gheén.

²¹A wír ve á wíy a lon fo wun woo Tàr adzə̀me wíy lùŋ.› »

²²Pita nèn kfə̀n yòŋ jii, «Ven vee wír veé Isray, vèn kfən yuùrí. Jesus woó Naasarer dzə̀ wír, a Nyùy‑iì lo dìn e vèn kiránén ji tùm á wun mo wù‑uù fó vitaáví shó, a wù yii viŋgaʼnìn ve vinyò ve ví din vitaáví vé Nyùy, a wíri leey, kér gháʼ. Vèn kì bey, bìʼ fo vinyo vee shooy vi‑iì kooy a dzə̀ e věn mvəm.

²³Jesus və̀n dzə̀ wo vèn‑eè yuyrin e fó ye vèn‑eè foon e wír ve bií, á tá é kici. A kù‑uù sìysì Nyùy fo ŋgùʼ, kí wáa koóy, a wù kiíy ne.

²⁴Wù nèn fə̀ə́r Jesus fo kpu, wù bòy fo sày, bìʼ fo bó yòʼ‑oò dzə̀ kpúu ghàtí wun, a ker fo moo wir sháŋ.

²⁵ A Fòn Davir‑iì lo yòŋ kinyo ke Jesus və̀n jii: « ‹Mò‑oò yèn Nyùy Tàr, a wù dzə́ vèr wun ghán sidzə̀m. Wù dzə́ e mǒ koy yìyí, fo kifá ki səʼ mo.

²⁶Bìʼ bey, m nén a ker kishéʼrì e mǒ shiliv, a leŋ shéʼ. Fə̀m mo m dzəə̀n wír fo wìr, m kù leey a dzə̀ fó mbìy,

²⁷bìʼ fo wò woo Nyùy yòʼ wíy màʼtì kiyoy kém áàŋkfəə́ wòŋ, a bó à yòʼ wíy màʼtì é ŋgaà wò lìm wo juŋ foy é sày.

²⁸À dìn ne mo dzə́ə ye dzə̀ m shaà shó, e bóo lùŋ, a m wíy a dzə e wò si, a ker kishéʼrì ke kuʼùn kí.› »

²⁹Pita nèn kfə̀n yòŋ jii, «Afə̀r vem, a dzə̀ m wàa suúy e vèn là méŋnín jii, tàr à ràm yesən woo Davir və̀n‑eè lo kpù, á dzəə̀mè, a say rəə́ dzə̀ə́ fèn, e shem lèn.

³⁰Wù‑uù dzə̀ *ŋgaà ntum Nyùy, a wù‑uù kìíy ne ŋkàʼmé wo Nyùy‑iì kàʼàn wun sho, e kfə̀n lìʼ ji wun wíy fo kàvàʼ və e wan woo wùn ram.

³¹Wù nèn tàv yèn kinyo ke Nyùy‑iì wíy yiì, a fèr ji *Mfə̀ə́r wo Nyùy‑iì kàʼàn və̀n wíy fəə fo kpu. A dzə̀ kíwun ke wù‑uù suuyin jii, ‹wù yòʼ‑oò lo gòʼ aàŋkfəə́ wòŋ, a bó jàv rə wùn yòʼ‑oò lo fòy.›

³²Ŋgaàŋ dzə̀ Jesus, a Nyùy‑iì lo fə̀ə́r wun fo kpu, ver vee aŋgàa ŋgoo vəə́ yén wír adzə̀m.

³³Nyùy nèn kfə̀n kòʼór wun, e dzə̀ʼə̀r e wùn koy yìyí, e fò Kiyoy ke Ranén kí shó mo wù‑uù kàʼàn. A vinyo ve vèn yén lèn, kfə̀n yú vìn vi dzə̀ Kiyoy kee shooy mo Jesus foon sá e wír vəə́.

³⁴ Davir dzə̀ kfə́, a bó wù yòʼ‑oò lo kòʼ é yuv. Yii bèy, a wù‑uù lo sùúy kee kùm Mfə̀ə́r jii: « ‹Nyùy Tàr‑iì sùúy e Tàr wor jii, «Dzə̀ʼə̀m e mǒ koy yìyí,

³⁵a shìy ghán se m wíy neèr aŋgaà vé vibàn ji kibur, áà tiír wuú yé sho.»›

³⁶«Wír veé Isray adzə̀me ku nèn a kiíy kijuŋ jii, Jesus wo vèn‑eè taan é kintam və̀y dzə̀ á wùwun wo Nyùy lèmèn ne ji Mfə̀ə́r wo wù‑uù kàʼàn, e kfə̀n lèm ji Tàr à vifa vidzə̀m.»

³⁷Wír vìyi yú kinyo kìn, shilív shév shí seèm. Á dzə́r e Pita wùn aàŋgàa ntum Jesuse adzə̀m jii, «Afə̀r ver, a dzə̀ vèr yèe le lèn?»

³⁸Pita bìnèr jii, «Wìr mòʼón mòʼón biner shiliv sə́, aá wáy ven é ndzəv e Jesus Kristu yir, é Nyùy laysin vinyo vén ve bi ví, e kfə̀n fò ven fómo və wo dzəə̀n Kiyoy ke Ranén kí.

³⁹Nyùy‑iì lo kàʼ vèn à wón véné é kinyò fèn, e kfə̀n kàʼ sa vitúm ve ví yòʼ sí kiiy wun vidzə̀m. Ŋkàʼmé woo shoon dzə̀ fo wíri adzə̀m ve Nyùy Tàr woo Nyùy wòsən jaŋ ji á wiy, e yèn wun.»

⁴⁰Pita nèn kfə̀n a suúy vinyo vímóʼ ví vinín, a tir áwune jii, «Vèn ku sə̀ vitú vén fó ŋgeʼ ye Nyùy wíy màʼ e ŋgwàʼ ye bi rə̀n kitu.»

⁴¹Wíri yú kisúŋnìn ke Pita kìn, ámóʼó biímé anín, á wáy áwune é ndzəv. Wáa dzə e kishiíy fóo fèy, wíri tátí ŋgoo wìr Jesus ansə̀kì ataár.

⁴²Á ku nèn a yu kinyo kimòʼón a dzə̀ ke aŋgàa ntum Jesuse yéʼeyì, wùn áwune wáa ghanén, a yinín kikóŋ, a bùnrì amòʼón.

⁴³Aŋgàa ntum Jesuse nèn a yiì vinyo ve ghaʼtín ví, ví wáa dìn vitaáví vé Nyùy, wíri wáa yen, a ker gháʼ.

⁴⁴Wír Jesus adzə̀me ku nèn a ghanén amòʼón, a ker kifá kév kimòʼón.

⁴⁵Áwune lo, á wàa fiìnè kéŋ yév, a jàv mbàm e wìr dzə̀m mo kíghàʼ wìr dzəə̀n.

⁴⁶Á kfə́n a lò, a tarnín sa e *lav cù yeé Jerusalem foo fèy vishiíy vidzə̀m, a bùnrì, e kfə̀n a yikír e melav, a fonín e kishéʼrì ki,

⁴⁷a burí Nyùy ghán sidzə̀m. Wìr dzə̀m wáa yen kinyo ke áwune yii, a kòŋ liì wov. Nyùy ku nèn a lùŋèr wíri vishiíy vidzə̀m, a dzə̀sì kintatì ke wìr Jesus sho.