Read Lamnso Lim Aŋgàa Ntum 20 Bible Online

Lim Aŋgàa Ntum 20 - Lamnso bible

Lim Aŋgàa Ntum 20

¹Melaà meé Efesor mèy mè lòo kpurín, Por jàŋrì aŋgàa biimé, e tìr áwune, e shàʼtì, e nèn lò, a dù e wòŋ Masedonia.

²Wù wáa dù, a ghan e mvə̀m wòŋ foo fèy, a tavír melív me aŋgàa biimé, a tosín, a dù e wòŋ Akaya.

³Wù dù, e dzə̀ʼə̀m fo ŋwee e taár, e wìy lò ji wun sí du, e nəə́ e kikoŋ, a dù e wòŋ Siiria, e yù ji wír veé Judàa téʼ a wun e dzəə. Wù nèn yèn ji kí bòŋ a ji wun kfə́n dzə́ə fó wòŋ Masedonia.

⁴Wù nèn a dù. Wù‑uù ghán wùn à Sopatar woo wan Pirur, a dzə̀ wír woó Beria, à Aritakur, à Sekundur ve dzəə̀n wír veé Tesalonika, à Gayur wo yì‑iì dzəə̀n wír woó Derbe, à Timoti, à Ticikur wùn à Toofimur ve dzəə̀n wír veé Asia.

⁵Áwune nèn wìy lò, e dù fo mbìy, a shìy vèr à Por e Towar.

⁶Vèr siíy, e nə̀ə́ e kikoŋ fo Filipi, a jùmrì áwune, a vishiíy vé kiŋkàʼ ke wír veé Judàa yii yí *kibán kee là nyaà ví shaá ne. Vèr ghán é ndzəv vishiíy vitàn, e bóo koóy áwune é Towar, e dzə̀ʼə̀m fo ŋgàm fur.

⁷Wìy lòo dzə e kishiíy ké mbìy ki fó ŋgàm, vèr à kintatì ki báʼtí ji á yínin kikóŋ. Mo Por kì sí bvəə́shi, a lò kijàvndzə, wù nèn kèʼ, a suŋnín, e yiì sùŋnín, e mèé e ntìntìn vitsə̀ʼ.

⁸Vèr áwune‑eè dzə́ e mvə̀m lav yee fó yuv yìmòʼ, a lam si bán fo sinín.

⁹A Yutikur woo wánlè nsùm wùmòʼ kì dzə̀ʼə̀m kfə́ a dzə̀ é shùu wundu. Por yiì sùŋnín ŋkóŋkóŋ, wù nèn lò, e yèʼ, e gbù fo fo, a fóo dzə̀ ŋkèʼ se lav sitaár e yuv. Á sə́ʼə́y, a lì, a wù kpú ne.

¹⁰Por sə́ʼə́y fó bàm, e gvə̀ʼə́m e kitu wo, e kòytí, e sùúy jii, «Lá vèn yòʼ dzə́ə a toŋ, a bvəə́r virə́ʼ, wù dzə̀ə́ e tin.»

¹¹Por nèn kfə̀n kòʼ é lav fèy, wùn áwune yínín kikóŋ, bo wù kfən kèʼ, a suŋnín, e dù, e mèé kijàvndzə, e bó a lò.

¹²Wíri siíy, a kfənkír fo laʼ wùn à wan və̀y, a wù dzə̀ e tin, melív mev mè nèn rə̀sìn.

¹³Vèr aàŋgàa ŋgoo Por ámóʼó nèn nə̀ə́ e kikoŋ, a dù e ntèʼ yee Asor, bìʼ fo Por kì sìysìn ne ji vèr wáa dù fo mbìy, é wun wáa ghan kfə́ e kiwuú kí, e wìy, e koóy ver fó.

¹⁴Wù siíy, e wìy, e kòóy ver é Asor, e nə̀ə́ sa e kikoŋ, vèr áwune dù, e mèé é Mitilen, e nèn shìíy fo.

¹⁵Vèr bvəə́shí, e kfə̀n nə̀ə́ e kikoŋ, e dù, e mèé e ghaa Kior, e tòsín, e bvəə̀shí, e mèé e Samor, e kfə̀n tòsín, e bóo bvəəshí, e meé e Melita.

¹⁶A vèr áwune ghán bèy, gwam Efesor gwámen, bìʼ fo Por‑iì wayin ji wun ghán á cércér, e làa yòʼ jivír ghán é wòŋ woo Asia, e fíʼ meé e Jerusalem e kishiíy ké ŋkǎʼ *Pentikor.

¹⁷Mo vèr meen é Melita, Por nèn tsə̀nsí ntum fo atǎr kintatì keé Efesori ji á wiy, e yèn á wun fo.

¹⁸Áwune wìy, wù wáa suúy jii, «Vèn kì mo vèsən‑eè dzəə̀n, e kèʼ fo kishiíy ké mbìy ke mò‑oò nəən é wòŋ woo Asia fèn.

¹⁹Mò‑oò neèr kitú kém, a lìm fo Nyùy, a səʼə́r mensíy. M kfə́n a yen ŋgeʼ símóʼ sí sinín, bìʼ fo wír veé Judàa‑aà rə́si dzə wúu yém.

²⁰A vèn kfə̀n kì sá kijuŋ ji mò‑oò rə́si yéʼey ven kinyo ke Nyùy e virə̀ʼ vé kintatì, kfə̀n ghán, yéʼey e melav, e làa yòʼ a lìtì kinyo ke dzə̀ kí sə̀ ven gheéy.

²¹Mò‑oò fiʼtì kinyo kimòʼón e wíri adzə̀m, kìn dzə̀ wír veé Juda, kìn bó yòʼ dzə̀ veé Juda jii, á biner melív mev, e kfə̀n fo Nyùy, e wày shilív e Tàr wòsən Jesus Kristu wùn.

²²M sí du lèn e Jerusalem, a bànrí Kiyoy ke Ranén kí mo, a bó m yòʼ kì kinyo ke kí du, e koóy mo fó.

²³Kinyo ke m kiìn cáʼ ki dzə̀ jii, virə́ʼ ve m shaa sho vidzə̀m, Kiyoy ke Ranén kí kù yii, a wíri tiísi e mò ji m wíy meé e Jerusalem, a ker a ŋgeʼ, aá wáy mo é sháŋ.

²⁴Yii bèy, a bó m yòʼ yén kitú kém, a kí mee e kifa, e shaà ji m maysi lim ye Tàr wòsən Jesus‑eè wayin e mǒ kiwo ji m wáa fìʼtì sáʼka Nyùy wo juŋ, a naàrì mo wù bùʼùn wíri.

²⁵«Ke m kiìn lèn ki dzə̀ jii, vèn yòʼ dzəə́ wìy yen sí yém, mo və̀n wo mò‑oò ghán e věn mvəm, fiʼtì mo sáʼ Nyùyi dzəə̀n.

²⁶M nén a suúy e vèn lèn kiránén jii, a wìr sìíy, e lày, kù kìíy a ŋgaàŋ, bo bó m yòʼ kì kinyo fo fo.

²⁷Mò‑oò ló a fìʼtì ven vinyo vidzə̀m ve Nyùy sìysìn ji wun wíy yiì, e làa yòʼ lìtì kímóʼ kí gheéy.

²⁸Vèn siiy, vèn wàa leéy fo věn vitu, e kfə̀n a leéy fo kintatì ke Nyùy ke Kiyoy ke Ranén kí wayin e věn kiwo. Vèn wáa leéy fo fo réŋréŋ mo nshìy lèéy fo wùn njiì, a kuumé ji Nyùy‑iì tìn kintatì kìn a dzə̀ e mensə́ me Wan və Jesus mè ji wáa dzə wír və́.

²⁹M suuy bèn, a m kì ji m wíy bìn ndzə̀m, é nyám se bi sí nəə́ é mvə̀m ŋgoo njiì fèn, e làa yòʼ a nyàʼ wóo lemér.

³⁰A wír ámóʼó kù wíy fəə sa a dzə̀ fo věn mvəm, a boʼtí aŋgàa biimé, a sə̀ŋrì ámóʼó, aá wáa kfən aáwuné mbìv.

³¹Vèn wáa tiy rì, a kiíy, a kuumé mo mò‑oò tír ven amòʼón amòʼón, sə́ʼər mensíy, tír e shùy, tír vitsə́ʼ, e dù, e meé viyá vitaár.

³²A m wáy ven lèn a dzə̀ e Nyùy kiwo, suuy jii, vèn kú a yu a dzə̀ fo sáʼka Nyùy wo wù din mo Nyùy koŋ vèsən, é wù wáa yiì, é vèn wáa dzə wír və́ ŋkuuŋkùŋ, e wìy nəə́ e vijùŋ ve wù‑uù lèmèn e wír vəə́ adzə̀m.

³³«Vèn kì sá mo mò‑oò dzəə̀n. Bó m yòʼ‑oò ló a siimé mbàm, kìn ndzə̀y sé wìr wùmòʼ gheéy. Mò‑oò lim lim a dzə̀ e wó yém rə́ne, bo vèr aàŋgaà vém ŋgoo wáa yikír.

³⁵Vinyo ve mò‑oò yii vidzə̀m vi kù‑uù din e vèn ji wìr wáa lìm e wó rəə́, e fíʼ a sə vé kitàne, a kuumé kinyo ke Tàr wòsən Jesus‑eè suuyin jii, wìr wo wù kér kishéʼrì dzə̀ wo wù jav vifá, e shaà wo wù shiy shìyìn ji á fó.»

³⁶Por súŋnín, e màysì, wùn áwune nèn tsə̀m fó nsay adzə̀m, a bùnrì.

³⁷Áwune yiì lò, e dìy adzə̀m, a baamé wun, a shàʼtì ji wù du ri a kijuŋ.

³⁸A vé‑eè dìy é ŋàŋ bey, bìʼ fo wù kì suuyin ji bó á yòʼ dzəə́ wìy yen a sí rə́. Wù lòo lò, á tsəə́né wun, e mèé e shùu kikoŋ.