Read Lamnso Lim Aŋgàa Ntum 22 Bible Online

Lim Aŋgàa Ntum 22 - Lamnso bible

Lim Aŋgàa Ntum 22

¹«Atàr vém wùn aàfə́r vémé, vèn yuúrí mo m túner kitú kém e věn si.»

²Áwune yú, a wù suuy kinyo a dzə̀ é Lǎm *Hibru wo dzəə̀n lám nsayi, á nèn màysì, e sə̀sín. Wù wáa suúy jii,

³«M dzə̀ wír woó Juda, aá dzə̀ə́ mo é Tasor, e wòŋ woo Silisia, e lìy e Jerusalem fèn. Mò‑oò yèʼéy ŋwàʼ fo Gamalia, a wù‑uù yèʼéy mo ji m wáa lèm a nsər se atàr vesən vee fó mbìy kijuujùŋ. M nèn wày vifií é kinyò ke Nyùy réŋréŋ moo ven ve á dzəə̀n fen lèn.

⁴A mò‑oò ló a ròn sa wuú wìr ve vé‑eè jumrì dzəə Jesus, a fə̀m‑eè dzə̀ ji á yúyrí yuyrín. Mò‑oò koóri vilum, koóri vikìy, fin e lav.

⁵A taà cù wo kuʼùn wùn à vé saʼ adzə̀me kì ji mò‑oò ló a yiì bèy. Yì‑iì sàŋ áwune aŋwàʼ fo afə́r vesən ve á dzəə̀n é Damaskusi, bo m du fó ji m koórí á wír ve vé‑eè jumrì dzəə Jesus, e kur, e kfən sho e Jerusalem, aá maʼ ŋgeʼ sho.

⁶«Mo m liìn dzə́ə, a dù, e lòo meé e Damaskus, a sì e ntìntìn shùy, kifá ki sàsìn, e njàʼàm fo yuv, a njàʼkìr, a kaarí mo, a tar.

⁷M gbù fo nsay, e yù, a jì wìr yoŋ mo jii, ‹Saul, Saul, à ron wúu yém bìʼ ka?›

⁸M dzə́r jii, ‹Dzə̀ wò lá Tàr?› Wù bìnèr jii, ‹Dzə̀ mo Jesus woó Naasarer wo à rə́si ron wuú yém.›

⁹Wír ve vèr áwune‑eè ghánée wáa yen rán yee shooy, e làa yòʼ a yu jí wìr wo vèr wun súŋninè.

¹⁰M nèn kfə̀n dzə̀r jii, ‹Tàr, a dzə̀ m yèe le?› Wù bìnèr jii, ‹Lò é yuv, a dù e Damaskus. À yíi meé fo, aá suúy wò vinyo vidzə̀m ve Nyùy‑iì sìysìn ji à wáa yiì.›

¹¹M lò ji m lo, a rán rə̀yi yií ne, sí yémé fìr, aŋgaà vém ŋgoo nèn ghàr mo é kiwo, a caàcà, a dù sho e Damaskus.

¹²«Wìr wùmòʼ wáa dzə fo, a yír rəə́ dzə̀ Ananiar, a wù ghvə́m Nyùy, lem nsər se Mooser, a wír veé Juda vee fóo búri wun adzə̀m.

¹³Wù nèn wìy, e yèn mo, e tìím e mǒ ghaŋ, e sùúy jii, ‹Fə̀r woo Saul, sí yée mvəʼəm.› M ku nèn yèn virə́ʼ, e yèn wun woo Ananiar.

¹⁴Wù suúy e mò jii, ‹Nyùy atǎr ram yesən shòʼ ne wò ji à kiíy kinyo ke wun woo Nyùy sìysìn ji wun wíy yiì. Wù nen yiì, à yén Ŋgaà və Lìm woo rú e sí yée, e kfə̀n yù, a wù súŋnin fo wùn shuù.

¹⁵Aà wíy a fìʼtì mo wù dzəə̀n e wìr dzə̀m, a fèr kinyo ke à yenen, e kfə̀n yù kin aáwune.

¹⁶Mo kí siìn ben, à kfə̀n shiy ka lèn? Lò é yuv, yiì, aá wáy wò e ndzəv, é wun woo Tàr su vinyo vé ve bi ví, kù mo à tóŋ, yoŋ yír rə́.›

¹⁷«M nèn wìy kfə̀n é Jerusalem, e nə̀ə́, e lòo bùnrì e lav cù, vinjeenjèm vi wìy e mǒ si,

¹⁸m yén Jesus, a wù suuy e mò jii, ‹Lò cér fo Jerusalem fèn, bìʼ fo wír vee féne yòʼ wíy biimé kinyo ke à fiʼtì kùm mo.›

¹⁹M bìnèr jii, ‹Tàr, áwune kì kijuŋ ji mò‑oò ló a ghan e ŋgày se bùnrì, a koorí wír ve á wáy shilív e wò wùn, a dzə̀v.

²⁰Á wáa yuyrí Tefan wo wù‑uù fiʼtì wò e wíri, a m tíy sa fo, shiy vikúm vé wìr ve vé‑eè tsə́mri, bínsi ji á yúyrí.›

²¹Jesus bìnèr jii, ‹Ku lò loòn fó Jerusalem. M wíy tsənsí wò kwaʼda, áà du fo wír ve bó yòʼ dzəə̀n veé Judàa.› »

²²Mo wír vee shooyi yuúri kinyo ke Por, wù yiì lò, e fə̀ə́r kin fo shuù, á nèn lò, a waamé jii, «Á ku yùyrí wír woo ben yúyrín. Wù yoʼ ghèén feyì, a dzə sho.»

²³Á ku nèn a waamé bèy, a yàsì vikúm vév, a ŋèʼ kibvər, a waŋ e yuv, aá shóv wun shovín.

²⁴Kitú ke vé rər kí yén bey, e sùúy e wír vəə́ ji á li Por lèn, a dù a sho e vé rərí laʼ. Á du, á tàm, e dzə̀tí a kinyo ke kí kì yiìn, bo wír veé Judàa wáa waamé vinyo e wun bàm.

²⁵Á nèn dù, e kùr, e lò ji á waà sí támé, a kilìmbìy ke vé rər kímóʼ kí tíy fo, Por dzə́r shó jii, «M dzə̀ wír bàràʼ woó *Rom, nsər biímé ji dzə̀ á tàm mo, a bó á yóʼ ne sàʼ nsaʼ yem á?»

²⁶Kilìmbìy kìy ki yú bey, e nèn dù, e dzə̀r e kitú kév kí jii, «À kì ji à sí nəə e kinyò a? Wìr və̀y dzə̀ wir bàràʼ woó Rom.»

²⁷Wù yú bey, e dù, e dzə̀r e Por jii, «À dzə̀ rú wir bàràʼ woó Rom à?» Por biímé.

²⁸Wù suúy jii, «Mò‑oò yùn mbàm sikuʼùn féyì, e bó a dzə wir bàràʼ woó Rom.» Por bìnèr jii, «M dzə̀ kém wo dzəə́n féyì feyì.»

²⁹Wír ve á kì yíi a tam Por, a dzətí vinyo sho vìyi nèn tsə̀ʼtì wún é bàm. Kitú kév kí wáa fàn sa, bìʼ fo wù kì kurin ne Por e sháŋ, a dzə̀ wir bàràʼ woó Rom.

³⁰Yii bèy, wù kú a tàʼ ji wun kiíy rú á kinyo ke wír veé Judàa tóy Por sho. Wù nèn bvəə̀shí, e bvə̀tì fo sháŋ, e jàŋrì vitú ve atàá cù wùn à vé wòŋe adzə̀m, á dzə̀ʼə̀m, wù kóʼór Por fo si.