Read Lamnso Lim Aŋgàa Ntum 23 Bible Online

Lim Aŋgàa Ntum 23 - Lamnso bible

Lim Aŋgàa Ntum 23

¹Por tiím e vé wòŋé si, e tùy sí aáwuné wùn, a suúy jii, «Afə̀r vem, m kù‑uù dzə́ e Nyùy si ghán sidzə̀m, e shem lán, a bó shilív shém shí yòʼ sáʼ mo fó kinyò kímóʼ kí gheéy.»

²Ananiar woo taà cù wo kuʼùn nèn sùúy e wír ve vé‑eè tíy e Por ghaŋe ji á fun á shuu fo fo.

³Por bìnèr sho jii, «Nyùy yíi fùn sa wó woo shuu. À shwínin kirə́v ké lav ke á yoʼon e fém si. À dzə́ fèy ji à sáʼ mo mo nsər suuyì, kfə̀n shóʼor nsər, suuy ji á dzəv mo.»

⁴Wír ve vé‑eè tíy e Por ghaŋe dzə́r shó jii, «Á mo à kuurì taà cù wo kuʼùn ben, a lém Nyùy wun à?»

⁵ Por bìnèr jii, «Afə̀r vem, m kì kì ji dzə̀ taà cù wo kuʼùn a? M kì ji Ŋwàʼ Nyùyi suuy a jii, ‹Lá wìr yòʼ a kuù wír wo wù sáʼ woŋ wóv.› »

⁶Por lòo leéy, e yèn, a wíri dzə̀ fó mbìv sibaà, aámóʼó dzə̀ veé mbìv *Sadusi, ámóʼó veé mbìv *Farasi. Wù nèn waàmé e vé wòŋ vìyí mvəm jii, «Afə̀r vem, m dzə̀ wír woó mbìv Farasi, aàtàr vémé‑eè dzə̀ sá e mbìv fóo fèy. Kinyo ke kí yiìn, é bo m wáa ker nsaʼ fèn, ki dzə̀ bìʼ fo m leey fó mbìy ji aŋkfəə wíy fəəkír a fo kpu.»

⁷Wù suúy bey, wír veé mbìv Sadusi wùn à veé mbìv Farasii nèn kèʼ, a taŋnín, dzəʼə̀me bvəə́rí.

⁸A vé‑eè táŋnin bèy, bìʼ fo wír ve á dzəə̀n kév é mbìv Sadusii yii suuy ji wíri yòʼ wíy fəəkír a fo kpu, kfə̀n suuy jii, bó kifá kímóʼ kí yòʼ dzə̀ shó a ji nshìylav Nyùy, kìn kifá kímóʼ kí ke kí wáa ghan ji kiyoy. A wír veé mbìv Farasii biíme kév vinyo vìn vidzə̀m.

⁹Fóo nèn kfə̀n màysì, e bvəə̀rí bvəərín. Aŋgàa yeʼéy veé mbìv Farasi ámóʼó túm é yuv, a shaʼnín kitávín jii, «Vèr yoʼ yèn kinyo ke wìr və̀n jayin gheéy. Ghanmóʼ rú, bo nshìylav Nyùy kìn kiyoy kímóʼ kí‑iì lo sùŋnín sho.»

¹⁰Mbìʼ və̀y nèn a tàʼ, e fəə́r a dzə̀ vindzəʼ, kitú ke vé rər kí wáa fàn ji tàm wír vìyi yiì sàtì a Por. Wù nèn sùúy e vé rərí ji á fəə́r Por fo fo, e kfə̀n á sho e vé rərí laʼ.

¹¹Yiì lòo dzə vitsə́ʼ, Jesus wìy, e tìím e Por ghaŋ, e sùúy sho jii, «Kúr shilív shí, mo à suuyin mo é Jerusalem fèn, à kù kfə̀n wíy suúy e Rom.»

¹²Yì rán kibvəə́shí, wír veé Juda ámóʼó táŋ ntaŋ, e yiì kilìʼ jii, bó yòʼ dzə̀ áwune yì kifá, kìn dzə̀ ke noón kí, a bó á yúyrí á Por.

¹³Vé kilìʼ víne‑eè shaà wír mkweè.

¹⁴Áwune nèn dù, e yèn vitú ve atàá cù wùn à vé wòŋe, e sùúy jii, «Vèr lìʼ ne feyì ji bó yòʼ dzə̀ vèr yì kifá, kìn dzə̀ ke noón kí, a bó á yúyrí á Por.

¹⁵Kí nén a dzə jii, vèn à vé wòŋ adzə̀me ku tsə̀nsí ntum fo kitú ke vé rər kí, a wovrí ji vèn kfə̀n taʼ ji á tar á kinyo ke Por kijuŋ. Wù ku kfə̀n kòʼór a Por e věn si. Vèr siiyì, é vèr nèn tèʼ é dzəə, á lóo wìy sho, é vèr yúyrí.»

¹⁶Á táŋ bey, wàn jèmèr Por woo lumèn yú ntaŋ və̀y, e nèn dù, e yèn Por e vé rərí laʼ, e fèr sho.

¹⁷Por jàŋ kilìmbìy ke vé rər kímóʼ kí, e sùúy sho jii, «Ku lì wán və̀n, e dù sho fo kitú kén kí. Wù kér kinyo kée fìʼtì sho.»

¹⁸Wù nèn lì, e dù sho fo, e sùúy jii, «Por woo ŋgaà sháŋ sùúy ji m li wán və̀n, e wìy sho, é wù fer á kinyo e wò.»

¹⁹Kitú ke vé rər kí ghár wán və̀y e kiwo, wùn wun bàr wún, wù dzə́r shó jii, «Kì dzə̀ ka?»

²⁰Wàn bìnèr jii, «Vé wòŋe sìysì ne ji á bvəə́shi, e lon fo wò ji à tsə́nsí Por, aá kóʼór aáwuné si. Lóo lon, aá wáa wovrí a jii, á kfə̀n taʼ, e bonén, e tàr kinyo ke Por kijuŋ.

²¹Á bvəə́shi wiyì, lá à yòʼ biìmé, bìʼ fo wíri wíy lìr, a teʼ Por e dzəə, e shaà wír mkweè. Aá lìʼ ne ji bó yòʼ dzə̀ áwune yì kifá, kìn dzə̀ ke noón kí, a bó á yúyrí á Por. Á bàʼtí ne, a yuurí a dzə̀ shúu wó lèn.»

²²Kitú ke vé rər kí nèn sùúy e wan və̀y jii, «Kú a dù rì. À lóo dù, à wàa yen fó suúy kinyo e wìr.»

²³Kitú ke vé rər kí siíy, e jàŋrì vilìmbìy və́ vibaà, e sùúy jii, «Vèn shóʼtí vé rərí ghii baà, e kfə̀n shòʼtí vé nyàm se ŋkoʼo msaàmbà, e shòʼtí vé kòŋé sá ghii baà, aá báʼtí fó lì Por vitsə́ʼ, shúy bvə̀ʼə̀, a dù sho e Sisaria.

²⁴Vèn kfən tàʼ nyám símóʼ sí sá se Por wìy a ghan, a koʼ, é vèn li wun ji nyaáŋ, e dù sho fo Feliy woo ŋgaà saʼ.»

²⁵Wù suúy bey, e nèn kfə̀n sàŋ sá ŋwàʼ, a wú dzə̀ jii:

²⁶«Ŋwàʼ və̀ne sàŋ mo woo Kiladiyur Lisiar fo wò woo Feliy woo ŋgaà saʼ, a shàʼtì wò.

²⁷Wìr wo kuʼùn, wír veé Judàa‑aà koò wír və̀n, a tàʼ ji á yúyrí. M yú ji dzə̀ wir bàràʼ woó Rom, vèr à wír vémé nèn tò fó, e faàsì.

²⁸M wáa tàʼ ji m kiíy kinyo ke á tóy wír və̀n sho, e nèn kòʼór wun e vév vé wòŋé si.

²⁹Á tàr, m yén ji á tóy wun a dzə̀ é mbìʼ woo kùm nsər sév. A bó wù yòʼ‑oò lo jày kinyo kímóʼ kí ke dzə̀ á yùyrí, kìn ke dzə̀ á wày é sháŋ.

³⁰Wìr nyáʼtí, e sùúy e mò ji wír veé Judàa tàŋ ne menàŋ á ji á wíy yuyrí Por və̀n. M ku nèn tsə̀nsí wun fo wò wùn. M sùúy ne aàŋgaà və́ nsaʼa ji á wiy, e yèn a dzə̀ á wò, e bóo fìʼtì kinyo ke á tóy wun sho.»

³¹Vé rərí ku nèn yiì mo kitú kév kí suuyin, e lì Por vitsə́ʼ, e dù sho, e mèé e Antipatir.

³²Ndzə rán, vé rər ve á kì ghán e kiwuú kií nèn a kfən e bàm, Por wùn à vé nyàm se ŋkoʼo wáa dù.

³³Á dù, e mèé e Sisaria, e fò ŋwàʼ və̀y e ŋgaà saʼ, e kfə̀n wày Por e wùn kiwo.

³⁴Wù yòŋ ŋwàʼ, e lò, e dzə̀r e Por jii, «À dzə̀ wír woó wòŋ fèé?» Por bìnèr jii, «M dzə̀ wír woó Silisia.» Wù yú bey,

³⁵e nèn sùúy sho jii, «Aŋgaà vé nsaʼa wíy wìy, é bo m yú kinyo ké.» Wù nèn sùúy ji á lem á Por e Fòn Heror ntoʼ, é wìr rə̀r wùmòʼ wáa shìy.