Read Lamnso Lim Aŋgàa Ntum 24 Bible Online

Lim Aŋgàa Ntum 24 - Lamnso bible

Lim Aŋgàa Ntum 24

¹Vishiíy ví shaà vitàn, Ananiar woo taà cù wo kuʼùn wùn à vé wòŋ ámóʼó wìy e Sisaria. A vé‑eè wiy wùn à wìr wùmòʼ wo wù‑uù yeʼeyin ne nsər se bàràʼ, a yír rəə́ dzə̀ ji Tetulur. Áwune nèn dù, e yèn Feliy woo ŋgaà saʼ ji á wáy á nsaʼ Por.

²Á jàŋ Por, wù wìy, Tetulur kèʼ ji wun sí neer ajay Por, e nèn a suúy jii, «Wìr wo kuʼùn, nyaáŋ dzə̀ é wòŋàn, e kèʼ fo ŋgùʼ, e wìy meé lèn, a dzə̀ bìʼ sáʼ yé ye juŋe. Woŋe kfən mvə̀ʼkìr e wò kiwo, e dù fo mbìy,

³a wíri shéʼri sáʼ yé ye juŋe virə́ʼ vidzə̀m, ghán sidzə̀m.

⁴Bó m yòʼ taʼ, a jivír ghán sé, e shaà fó a lon fo wò jii, à ku yuùrí kintsə̀m ké kinyò ke m yíi a suúy.

⁵Vèr yén ji wìr və̀n ghán e lòné. Wù ghán woŋ e dzə̀m, báyir wír ve dzəə̀n veé Juda, aá taʼ melaà. Wù kfə́n a dzə sa kilìmbìy ke wìr ve á tíy e mbìv ye á yoŋ ji ye wìr veé Naasarer.

⁶A wù kfə̀n‑eè sí taʼ, e bivír lav yer cù, é bo vèr koó. [Vèr‑iì yíi saʼ wun mo nsər yer dzəə̀n,

⁷é bo Lisiar woo kitú ke vé rərí tó fó, e faàsì fo věr wo,

⁸e sùúy ji vèr wiy fen, e sàʼ nsaʼ Por a dzə̀ e wò si.] Aà lò, a dzətí e wìr və̀n, à kù yù vinyo ve vèr suuy e wùn wó vìn vidzə̀m.»

⁹Tetulur súŋnín bey, wír veé Judàa bínsí jii, «Dzə̀ mo kí dzəə̀n féyì.»

¹⁰Ŋgaà saʼ və̀y nèn làr Por ji wù wàá súŋnín. Por wáa suúy jii, «M kì ji à tìnén ne nsaʼ si é wòŋàn viyá vinín. M nén a sheʼrí fó tiím e wò si, a tunér kitú kém.

¹¹Aà lò, a dzətí, à kù yù jii, kí yóʼ ne shaà kishiíy nshòv sibaà e ghvə̀m mo mò‑oò wìyìn é Jerusalem ji m bunrì Nyùy.

¹²A bó wír veé Judàa yòʼ‑oò lo yèn, a m biʼ mbìʼ vèr wìr wùmòʼ, a bó á yòʼ‑oò lo yèn sá, a m báyir wíri é lav cù, kìn é ŋgày se bùnrì, kìn é kirə̀ʼ kímóʼ kí é mvə̀mlaʼ.

¹³A bó yòʼ dzə̀ sá, áwune dìn kisəəm ké vinyò ve á tóy mo shó vìn.

¹⁴M biìmé kinyo kimòʼón a dzə̀ ke áwune suuyin ji m bunrì Nyùy atǎr ram yér, jumrì dzə́ə ye áwune yoŋ ji ye bi. A m kù biìmé a dzə̀ vinyo ve *Nsər Mooser din vidzə̀m, e kfə̀n biìmé vinyo ve aŋgàa ntum Nyùyi‑iì saŋen vidzə̀m.

¹⁵A m leey fó mbìy réŋréŋ mo áwune leey sa ji Nyùy wíy fəə́r wir dzə̀m fo kpu, kìn dzə̀ wo juŋ, kìn dzə̀ wo bi.

¹⁶M nén a mùm fó a dzə e Nyùy wùn à wírí si, é la shilív shém shí yòʼ a saʼ mo.

¹⁷«Dzə̀ lèn viyá vinín a bó m yoʼ dzəə wìy e Jerusalem. M siíy, e wìy lán e mbàm se vé‑eè sùʼtìn ji á sə́ wír veé Juda sho, e kfə̀n a wìy ji m yii cu.

¹⁸Á kinyo ke mò‑oò wìyìn, a yiì e lav cù, é bo á yén mo fó. M wáa dzə fo bèy, a m *kfə́mrí ne kitú e màysì. Bó m yòʼ‑oò ló a dzə fo vèr à ŋgoo wìr yìmòʼ gheéy, a bó kiyor kímóʼ kí yòʼ‑oò ló a dzə sa. Wír ve vé‑eè yenen mo fóo dzə̀ wír veé Juda ámóʼó ve vé‑eè wìyìn fó wòŋ woo Asia.

¹⁹A vé‑eè yèn, a m jáy kinyo kímóʼ kí fó, bo á ku lò a dzə fèn e wò si, e neèr kinyo kee shooy.

²⁰Là bey, vin vee wíri sùúy ri jay wo vé‑eè koʼorin mo e vér vee atǎr wòŋé si, e yèn, a m jáy.

²¹Vèr áwune kù bvəə̀rí kinyo kimòʼón a dzə̀ ke mò‑oò suuyin aáwuné mvəm jii, m kér nsaʼ, bìʼ fo m biimen ji aŋkfəə wíy fəə fo kpu.»

²²Feliy yuúrí, a wù‑uù kìíy ne dzə́ə yee kùm Jesus rə̀y kijuŋ, e nèn tìír nsaʼ, e sùúy e wír vìyi jii, «Lisiar woo kitú ke vé rər wíy wìy, é bo m tínén nsaʼ rə̀n.»

²³Wù nèn yòŋ kilìmbìy ke vé rər kímóʼ kí, e sùúy sho ji wù wáy á Por e lav, a shìy. Yii bèy, lá wù yòʼ a nyàvrì sho a moo wir sháŋ. Wù maʼti, é ŋkar sə́ sí wáa wìy, a sə a wun.

²⁴Vishiíy ví lòo koʼtí, Feliy wùn wiiy və Duusila wìy ji á yén a Por, a wiíy dzə̀ wír woó Juda. Á jàŋ Por, wù wìy, á wáa yuurí, wù wáa fèr mo dzə̀ wìr wày shilív e Jesus Kristu wùn.

²⁵Wù yiì lò, a naàrì mo dzə̀ wìr wàa dzə kijuŋ, a kuʼtí wún fó jay kinyo, e kfə̀n a suúy ji Nyùy wíy tinén a nsaʼ wìr dzə̀m. Feliy nèn fàn, e sùúy jii, a dzə̀ à wàa dù lèn, m wíy koóy ghán, é m kfən jàŋ wò, e yù kinyo ké.

²⁶A wù suuy bèy, kfə̀n kér kwaʼtì yímóʼó ji tàm Por yiì fò wun mbàm. Wù nèn a ŋèʼrì, a toóy Por, wùn wun wáa fèr kimfèr.

²⁷Kù bey, kù bey, viyá vi shaà vibaà. Á lòo dzə̀ʼə̀r Pokur Fetur e Feliy ntaʼ, Feliy wáa tàʼ ji wun sə́ʼnín wír veé Juda, e nèn màʼtì Por e sháŋ.