Read Lamnso Lim Aŋgàa Ntum 25 Bible Online

Lim Aŋgàa Ntum 25 - Lamnso bible

Lim Aŋgàa Ntum 25

¹Vishiíy ví shaà vitaár mo Fetur‑iì yiin ntaʼ e wòŋ woo Juda, wù lò fo Sisaria, e dù kiŋgàn é Jerusalem.

²Vitú ve atàá cù wùn à vé wòŋe nèn wìy, a bi kinyo ke Por sho, a fatír ji

³wù ku yiì kinyo ke á lóné, e tsə̀nsí a Por e Jerusalem. A vé‑eè tàŋ ne ji á yíi teʼ Por e dzəə, e yuyrí.

⁴Fetur bìnèr jii, «Por dzə̀ é sháŋ é Sisaria, a m kù sí yíi a kfən fo lèn lèn.

⁵A wù jáy kinyo, vilìmbìy vén ví wàa jùmrì mo é Sisaria, e neèr kinyo kee shooy fo.»

⁶Fetur nèn kfə̀n shìíy wùn áwune moo kishiíy waamé, kìn kishiíy e ghvə̀m bèy, e bóo kfən e Sisaria. Yì rán kibvəə́shí, wù dzə̀ʼə̀m e lav nsaʼ, e sùúy, á wìy e Por.

⁷Á wìy sho, wír veé Juda ve vé‑eè wìyìn fó Jerusaleme tiím, e kaàrí wun, e tàr, a toy vinyo ve tavkín ví é bàm wó vinín. A bó yòʼ‑oò dzə̀ áwune dìn kisəəm gheéy.

⁸Por wáa tunér kitú kfə́, a suúy jii, «M yoʼ jày nsər yeé Juda gheéy, a bó m yoʼ jày yeé lav cù, a bó m yoʼ jày sá ye Fòn woó Rom gheéy.»

⁹Fetur nèn a tàʼ, e sheʼér wír veé Juda, e dzə̀r e Por jii, «A dzə̀ à dù é Jerusalem, é m sáʼ nsaʼ yè fo a?»

¹⁰Por bìnèr jii, «M sí tíy fèn e kibàʼ ke nsaʼ a dzə̀ ké Fòn woó Rom fo dzə̀ á kù tìnén nsaʼ yem. Aà kì sá kijuŋ ji bó m yoʼ jày kinyo e wír veé Judàa.

¹¹A m ben shòʼór nsər, e kfə̀n jày ye dzə̀ á yùyrí mo, é la m yòʼ a tun fó kpu. Yii bey, a bèn dzə̀ ji vinyo ve á tóy mo shó vìn vi dzə̀ kisáŋ, bo bó yòʼ dzə̀ à fò mo e wír veé Juda vìne. M kù li nsaʼ yem fó mbìy fo Fòn woó Rom.»

¹²Fetur yú bey, wùn à və́ vé nsaʼa nèn sə̀mnìn, wù suúy e Por jii, «Mo à liìn ne nsaʼ yè fo mbìy ji wíy saʼ Fon woó Rom, bo à kù wíy dù fo.»

¹³Wìy lòo dzə e ghan símóʼ sí, Fòn Agripa wùn Bener wìy ji á shaʼti á Fetur e Sisaria.

¹⁴Áwune dzə̀ʼə̀m fo vishiíy vinín. Fetur nèn wìy lò, e neèr kinyo ke Por e fòn si, a suúy jii, «Wìr wùmòʼ dzə̀ fen wo Feliy‑iì lóo lò, e màʼtì e sháŋ.

¹⁵M wìy dù e Jerusalem, vitú ve atàá cù wùn aàtǎr wìr veé Judàa wáa toy vinyo e bàm wó vinín, a lon ji m tínén nsaʼ, é wù gbu.

¹⁶M suúy aáwune jii, liì wìr veé Rom yòʼ dzə̀ á ji á tínén nsaʼ é wìr gbu, a bó wùn à və́ vé nsaʼa tiím é kibàʼ, wù túnér sá kitú kfə́ fó kinyò ke á tóy wun sho.

¹⁷Áwune nèn wìy wìy fèn, la m yòʼ dzəə sìʼsíʼ. M ku nèn bvəə̀shí, e dzə̀ʼə̀m e kirə̀ʼ ké nsaʼ, e kòʼór wír woo shooy fo si.

¹⁸Və́ vé nsaʼa nànèn, e làa yòʼ dìn jay wùmòʼ wo mò‑oò kí ji tàm, aá wáa toy wun sho.

¹⁹Á kù‑uù tóy wun a dzə̀ é mbìʼ woo kùm kinyo kév ké Nyùy wùn à wír wùmòʼ wo á yoŋ ji Jesus, a wù‑uù kpù ne, a Por kù suuy kfə́ ji wù dzə̀ e tin.

²⁰Mo bó yòʼ‑oò dzə̀ m kìíy móo nəə́ e mvə̀m vinyò vee bey, m nèn dzə̀r e Por ji a sà dzə̀ wù dù é Jerusalem, aá sáʼ nsaʼ rə fó a?

²¹Wù bìnèr ji bo wun goʼ a e sháŋ, e meé e ghan se Fòn woó Rom wíy saʼ a nsaʼ rə. M nèn sùúy ji á maʼti ri e lav, e meé e ghan se m wíy koóy kintóʼ kée tsənsí wun fo Fòn woó Rom.»

²²Agripa yuúrí vinyo vìn, e sùúy e Fetur jii, «M koŋ, e yu kinyo ke wìr woo shooy e vituʼùr vém ví.» Fetur bìnèr jii, «Bo à bvəə́shi, e yu kibvəə́shí.»

²³Yì rán kibvəə́shí, Agripa wùn Bener nyèŋ e viwìr ve tavín ví, wùn à vitú ve rər ví, aàtǎr ntèʼé tár é ŋgày. Fetur nèn kòʼór Por,

²⁴a suúy jii, «Fòn Agripa wùn à wír ve á dzəə̀n fen adzə̀m, vèn yén wír və̀n. Dzə̀ wo wír veé Juda adzə̀me rə́si wiy, ghíʼ mo fen, kfə̀n ghíʼ e Jerusalem, lo, á wàa waamé ji á ku yùyrí yuyrín.

²⁵A bó m yòʼ yén kinyo ke wù jayin ke dzə̀ á yùy. Wù‑uù lì ne nsaʼ rə fó mbìy fo Fòn woó Rom, m nèn yèn sá ji bòŋ ji m tsə́nsí wun fo.

²⁶Yii bèy, a bó m yòʼ sí kér kinyo ke dzə̀ m sàŋ fo Fòn woo kitú kém kùm wír və̀n gheéy. M nen kòʼór wun e věn si lèn, bo taaka wò woo Fòn Agripa ji vèn tar nsaʼ rə, é bo m wáa ker kinyo kée saŋ.

²⁷Kí yoʼ ghèén ji m tsə́nsí wir sháŋ fo fòn, e làa yòʼ naàrì jay wo á tóy wun sho.»