Read Lamnso Lim Aŋgàa Ntum 26 Bible Online

Lim Aŋgàa Ntum 26 - Lamnso bible

Lim Aŋgàa Ntum 26

¹Agripa yuúrí, e yòŋ Por jii, «Dzə̀ kirə́ʼ ké lèn fó tunér kitú ké.» Por nèn a màʼ wó, a tunér kitú kfə́, a suúy jii,

²«Nyàr, m yén ji vishí vém ví bòŋ lán, m tiím e Fòn si, a tunér kitú kém fó vinyò vidzə̀m ve wír veé Judàa rə́si tóy mo shó.

³M suuy bèn, bìʼ fo m kiìn ji Fòn kì á liì wìr veé Juda kijuŋ, e kfə̀n kìíy mbìʼ wov. M nén a lon jii, Fòn ku yuùrí a kinyo kém ji nyaáŋ.

⁴«Mò‑oò kùy a dzə̀ e věr wòŋ wùn ǎ Jerusalem, a wír veé Juda adzə̀me kì dzəʼə̀m yém, e kèʼ fo meterí.

⁵Áwune kì mo kijuŋ, e kèʼ fo ŋgùʼ. Aá kì koŋ, e fèr mo m dzəə̀n, á kù a fèr a dzə̀ ji m kù‑uù sì á ji wír woó mbìv *Farasi, a dzə̀ mbìv ye yì ghvə́m Nyùy, e shaà wír vér adzə̀m.

⁶M nén a ker nsaʼ lèn a dzə̀ bìʼ fo m shiy ŋkàʼmé wo Nyùy‑iì kàʼàn atǎr ram yér shó.

⁷A dzə̀ ŋkàʼmé woo shooy wo rám yer áwune yee nshòv sibaà e ghvə̀me shiyì, bunrì Nyùy e shùy, bunrì vitsə́ʼ. Nyàr, vèr à wír veé Judàa nén a ker nsaʼ a dzə̀ bìʼ fo m shiy sa ŋkàʼmé woo shooy.

⁸A m dzə́r e Fòn wùn à wíri adzə̀m jii, á sà yén, a kí gháʼ Nyùy fo wù fəə́r wíri fó kpu bìʼ ka á?

⁹«A mo woo Por‑iì lo wày sá feyì ji m ku mùm ke dzə̀ m mùm, e fíʼ laàr yír Jesus woó Naasarer.

¹⁰Mò‑oò ló a yiì bèy e Jerusalem. Mò‑oò sə́ vitaáví fo vitú ve atàá cù vi, wáyri wír Nyùy e sháŋ nyanyày. Á lóo tinén nsaʼ ji á yúy wír, m wàa tomrí sa.

¹¹Mò‑oò fó áwune ŋgeʼ ye tavín ŋgày se bùnrì sidzə̀m, kan ji á wáa shaʼnín Jesus. Mò‑oò shwiiy kilòŋ fo áwune ŋkóŋkóŋ, ron wúu yév, du, mee e ntèʼ seé wòŋ símóʼ sí.

¹²«M nèn wìy lò, a dù sa e Damaskus, a ker ŋwàʼ wo wú‑uù din ji m sə̀ vitaáví fo vitú ve atàá cù vi.

¹³Nyàr, m lòo dù, a sì e ntìntìn shùy, e yèn, a kifá ki njáʼkír fó yuv, e shaà shúy, a kaarí vèr à wír ve vèr áwune‑eè gháné, a tar.

¹⁴Vèr áwune gbùkìr fo nsay adzə̀m, m yú, a jì wìr yoŋ mo é Lǎm Hibru jii, ‹Saul, Saul, à ron wúu yém bìʼ ka? À lémer kitú ké moo nyám ye á domsì e kishóʼ ki, a yì té kishóʼ.›

¹⁵M nèn dzə̀r jii, ‹Dzə̀ wò lá Tàr?› Wù bìnèr jii, ‹Dzə̀ mo Jesus wo à rə́si ron wúu yém.

¹⁶Ku lò, e tìím e yuv. M kì wiy, e yen wò bèn, e lèm wò ji ŋgaà wom lìm, áà wáa fìʼtì kinyo ke à yenen lán kùm mo wùn à vinyo ve m dzəə́ wìy a dìn e wò vi.

¹⁷M wíy a shìy wò fo wír veé Judàa, e kfə̀n a shìy sa fo ve bó yòʼ dzəə̀n veé Judàa, a dzə̀ fo m sí túm wò lèn.

¹⁸À wíy dù, e mvə̀ʼtì sí yév, e fəə́r áwune fó ndzə vitsə̀ʼ, e tiír fo meranén. A dzə̀ jii, à wíy fəə́r áwune fo Satan wo, e siìr e Nyùy mbìv, aá wáy shilív e mǒ wùn, é Nyùy laysin vinyo vév ve bi ví, aá wáa ker sa kilíŋ e wír ve Nyùy‑iì liìn ji və́ adzə̀mé mvəm.›

¹⁹«Nyàr, mo Jesus‑eè wìyìn, e yèn mo, m ku nèn a yiì mo wù‑uù suuyin,

²⁰e kèʼ fo Damaskus, a fìʼtì kinyo kfə́, e bóo wìy dù e Jerusalem. Mò‑oò ghán woŋ woo Juda və̀n e dzə̀m, kfə̀n ghán e wòŋ se wìr ve bó yòʼ dzəə̀n veé Juda, fiʼtì ji wíri biner melív mev, e kfə̀n fo Nyùy, a yiì a vinyo ve ví din ji áwune bìnkìr ne.

²¹Á kinyo ke kí‑iì yiìn, é bo wír veé Judàa koó mo é lav cù, a tàʼ ji á yúyrí.

²²Yii bèy, Nyùy kú a sə mo ghán sidzə̀m, e meé lán. M nén a tiy sa fèn lèn, a fìʼtì ntum yem, e wír ve kuʼkìné wùn à wír vee viyi. A m kù fiʼtì a dzə̀ kinyo ke Mooser wùn aàŋgàa ntum Nyùyi‑iì tiísi ji kí wíy koóy.

²³Vé‑eè suuy jii, *Mfə̀ə́r wo Nyùy‑iì kàʼàn kù‑uù kér fó wìy yen ŋgeʼ, a dzə wír mbìy wóo fəə fo kpu, e fo rán e wír veé Juda wùn à ve bó yòʼ dzəə̀n veé Judàa.»

²⁴Por kú a tunér kitú kfə́ bey, Fetur nèn lò, e waàmé jii, «Por, à baá baán. À yèʼéy ne vinyo e ŋàŋ, ví baár wò.»

²⁵Por bìnèr e Fetur jii, «Éè tàr wor, bó m yòʼ waà baá. M suuy kinyo a dzə̀ á ke kí dzəə̀n.

²⁶Fòn Agripa dzə́ bèn, a Fòn kì sá vinyo vìn vidzə̀m, bìʼ fo ví yòʼ‑oò kooy e kilìtì. A dzə̀ m kù a suŋnín e Fòn bèn tèéter.

²⁷Nyàr, bó Fòn yoʼ biìmé sa vinyo ve *aŋgàa ntum Nyùy à? M kì ji Fòn biìmé.»

²⁸Fòn Agripa dzə́r e Por jii, «À kwaʼtì ji dzə̀ à nèn bìnèr vifií vém, m wàa dzə wir Kristu cér bèn à?»

²⁹Por bìnèr jii, «Kìn mbìʼ dàr, kìn wù tsə̀mér, bo m lón kém fo Nyùy ji Fòn wùn à wìr dzə̀m wo wù yú kinyo ke m suuy lán wáa dzə moo mo. Yii bèy, é la á yòʼ kùr ŋgaàŋ aàsháŋé mo á kúr mo ben.»

³⁰Fòn wùn à Fetur, à Bener nèn nànèn, a fəə, wíri wáa fəəkír sa.

³¹Áwune fəə́, e dù, a kfə̀ynìn jii, «Wìr və̀n yoʼ jày kinyo kímóʼ kí ke dzə̀ á yùyrí, kìn ke dzə̀ á wày é sháŋ gheéy.»

³²Agripa suúy e Fetur jii, «A là fo wìr və̀n kì liìn ne nsaʼ rə fó mbìy fo Fòn woó Rom, bo á kì yíi màʼtì wun.»