Read Lamnso Lim Aŋgàa Ntum 27 Bible Online

Lim Aŋgàa Ntum 27 - Lamnso bible

Lim Aŋgàa Ntum 27

¹Á wìy lò, e sìysì ji vèr à Por nəə́ é kikoŋ lèn, a dù e wòŋ woo Itali. Á nèn wày Por wùn à vé sháŋ ámóʼó e kilìmbìy ke rər kímóʼ kí kiwo, aá yoŋ ji Juliyur, a dzə̀ wír fo kiŋkàŋ ké vé rər ke kí yii shiy Fon woó Rom.

²Vèr áwune nèn nə̀ə́ e kikoŋ fo Adamitum, a kí sí du e shuù se ndzəv seé wòŋ woo Asia. Aritakur woo wír woó Tesalonika e wòŋ Masedonia wáa dù sa vèr áwune. Á nèn a dù.

³Yì rán kibvəə́shí, vèr meé é Sidon, Juliyur wáa ker shilív she juŋ shi fo Por, e màʼtì, wù dù e mvə̀mlaʼ, a ghan ŋkar sə́, á wáa sə wun.

⁴Vèr kfən wìy nə̀ə́ e kikoŋ, e lòo dù, shwéri wáa tsəy kikóŋ fo mbìy, á nèn a gwaàmè, a shaà woŋ woo Saypur wo wú dzəə̀n é rìbà ndzə̀v fey, a dzə̀ fó mbìv ye yì wáa teʼtín shwér.

⁵Vèr dù, e tùmsín mbìv rìbà ndzə̀v yeé ghaa wòŋ woo Silisia, e tùmsín yeé ghaa wòŋ woo Pamfilia, e mèé e shùu ndzəv yee Mira e wòŋ woo Lisia.

⁶Kilìmbìy ke rər kiy ki yén kikóŋ kímóʼ kí fó, a kí ló fó Aleŋsandria, a dù e wòŋ woo Itali, e wày ver shó.

⁷Vèr nèn lò, e ghàn é ndzəv ntéŋ ntéŋ vishiíy vinín, e shaà shúu ndzəv woó Sinaydar. Mo bó shwéri yòʼ‑oò dzəə́ biíme ji vèr du fó mbìy tìítiy, vèr nèn a gwaàmè ji á shaa fó wòŋ woo Kiret wo wú dzəə̀n é mvə̀m ndzə̀v fóo fèy a dzə̀ fó mbìv ye yì wáa teʼtín shwér. Vèr shaà Salmone wo dzəə̀n kún wòŋ woo shooy,

⁸e kù nèn a gwàm a dzə̀ é ghaa kwaʼ, e bóo wìy senín, e meé e shùu ndzəv wo á yoŋ ji woo nyaáŋ wo wú dzəə̀n é mentsə̀m me mvə̀mlaʼ yee Lasia.

⁹Vèr wáa meé fo, aá jívír ne ghán é ndzəv ŋkóŋkóŋ, kishiíy ké cù ke kuʼùn kí shaà, a sì ghán sé kinsəm se bi sí. Por nèn a tir vé kikoŋe jii,

¹⁰«Kii vèn, aá lò, a dù duùn fó mbìy, bo m yén ji ghán yesəné wíy a dzə e bí, é kikóŋ wùn à vifá vi bír, é wír ámóʼó kfən làykìr e ndzəv.»

¹¹Yii bèy, la kilìmbìy ke rər kí yòʼ yù kinyo ke Por. Wù kú a yu a dzə̀ ké ŋgaà kikoŋ wùn wìr wo wù‑uù səŋ kikóŋ.

¹²Mo bó shúu ndzəv woo shooyi yòʼ‑oò dzəə̀n e juŋ fo wíri meeme, a shìy ghán se juŋ si, kùʼùn wìr nèn a kòŋ ji bo á kì mum, du a fo mbìy, e fíʼ meé e shùu ndzəv wo á yoŋ ji Fəniy. A Fəniy və̀n dzə̀ ntèʼ é wòŋ woo Kiret foo fèy, e mbìv ye yì tóʼnin ndzə́v mbìv sibaà.

¹³Shishwér shi yiì lò, e wìy fo ndzəv ji weè, vé kikoŋe wáa kwàʼ ji vishí vév ví bòŋ a ne. Á nèn shòʼ ŋgòvìr ye yì yii ghár kikóŋ e ndzəv, a dù, a gwaàmè a dzə̀ é ghaa kwaʼ.

¹⁴Kinsəm ke tavín kí nèn sàsìn, a səy fo wòŋ foo fèy, a dzə̀ ke kí yii wiy fo koy ŋkoòvìi mo wìr leey mbìv ye shùy yii tó fo fo.

¹⁵Kí wìy, a tsəy kikóŋ, á wáa mùm ntéŋ fó bìnèr, é kí kfə́n é ghaa kwaʼ. Á nèn màʼtì, kinsəm ki wáa lì, a dù sho.

¹⁶Á ku nèn a dù, e shaà shiwoŋ shímóʼ shí é mvə̀m ndzə̀v, aá yoŋ ji Klauda. Woŋ woo shooyi nèn a kìŋ kinsəm shishàr, á wáa kàtìr fó sə̀ŋ kikóŋ ke terí kí, e siìr e ke kuʼùn kí mvəm.

¹⁷Á siìr, e nèn ghàtí ke kuʼùn kí áàkfə̀ə́ fo kí wáa sàʼkìr. Kikóŋ ki ku nèn a dù, á wáa fàn ji ghanmóʼ, é kí du, e mèé e ghaa wòŋ woo Libiya, e sòv shuu e vikfər ve siy ve ví yii kóʼ e ndzəv fóo fèy. Á nèn kaàrí ndzə̀y se shwéri yii nəə sho, dom kikóŋ, e màʼtì, kikóŋ ki wáa leŋ e wúné.

¹⁸Kinsəm kìy ki kú a shaà. Á bvəə́shí, e fə̀ə́r vifá ve kikóŋ ki‑iì béʼé, e màʼ e ndzəv.

¹⁹Ndzə kfən bvəə̀shí, e ràn, vé kikoŋe wáa bvə̀tì vifá ve kikoŋ, a màʼ e ndzəv e wó yéví.

²⁰Vishiíy ví nèn a dù vinín, a bó vèr yoʼ yèn shúy, kìn mejiy, a kinsəm ki kù kar kikóŋ, a vèr fan ji á kù lày ne a e ndzəv.

²¹Wíri dzə̀ʼə̀m e jìŋ vishiíy vinín, Por wìy lò, e kòʼtí fo mvəm, e yòŋ jii, «Ŋkàr sem, a vé‑eè yuùrí ntir yem, e gòʼ e Kiret, bo bó kikóŋ ki yoʼ bìr, vifá vi kfən lày.

²²M nén a lon ji vèn kúr á shilív. Wìr fo vèsən yòʼ wíy lày, wíy lày kikóŋ.

²³M suuy bèn, bìʼ fo Nyùy wo m bunrì, Nyùy wo wù kér mo kì tumen nshìylav rə vitsə́ʼ, yì wíy, e tìím e mǒ ghaŋ,

²⁴e yòŋ mo jii, ‹Por, lá à yòʼ a fàn. À kér fó wìy tiím e Fòn woó Rom si, a Nyùy bùʼ ne wò jii, wìr fo ve vèn áwune dzəə̀n é kikoŋe yòʼ wíy lày.›

²⁵Mo nshìylav Nyùy tiisin bey, vèn kúr ri shilív. M wáy shilív e Nyùy wùn féyì ji wù kù wíy yiì mo wù suuyin.

²⁶Kí nén a dzə jii, kikóŋ ki kér fó wìy dù, e sòv shuu e ghaa wòŋ wúmóʼó é mvə̀m ndzə̀v fen.»

²⁷Kishiíy kí meé nshòv sikweè e ghvə̀m mo kikóŋ ki‑iì léŋ e rìbà ndzə̀v wo á yoŋ ji Adria fèy, wáa dzə e ntìntìn vitsə̀ʼ, vé kikoŋe səə̀m ji á sí meésin a e shùu kwaʼ.

²⁸Á nèn fìʼ ndzə́v e kfəə̀ wo vé‑eè səəyin kifá sho, e yèn, a yí shoórí ne, a dzə kóy mbaà. Á lòo koʼtí shishàr, e kfə̀n fìʼ, yí wáa dzə kóy nshòv tàn e ghvə̀m.

²⁹Á wáa fàn fo kikóŋ ki du, e tsə̀y kilán, e nèn sə̀yír ŋgòvìr fo bǎm kikoŋ sikweè se sí yii ghár kikóŋ e ndzəv, a lon ji ndzə ku ràn á cér.

³⁰Vé kikoŋe nèn lò, a tàʼ ké nyeŋkír, e sə̀yír wan kikoŋ, a wovrí ji á kì du, e səʼə́r a ŋgòvìr símóʼ sí sá fo mbìy.

³¹Por kiíy, e sùúy e kilìmbìy ke rər kí wùn à wír vəə́ jii, «A vé kikoŋe dzə̀ là fó gòʼ sa e kikoŋ, bo bó wìr yòʼ wíy lùŋ.»

³²Vé rərí nèn tiìné akfəə̀ ve vé‑eè tsəə̀rìn wan kikoŋ və̀y sho, wù wáa leŋ.

³³Ndzə lòo kaʼ, Por wáa lon ji wìr dzə̀m ku yì á kifá, a suúy jii, «Lán dzə̀ kishiíy nshòv sikweè e ghvə̀m mo vèn shiy ji kinsəm ki tiím, a bó vèn yoʼ wày kifá e shuù.

³⁴M nén a lon ji vèn ku yì á kifá, é wún wóné kfə́n fó. Bó ŋgay nəŋ e mòʼón yòʼ yíi lày fo wìr kitu.»

³⁵Wù suúy bey, e lì kibán, e beèrì Nyùy, a beʼtí, a yi, a wìr dzə̀m yéné.

³⁶Áwune nèn kùr sá shilív adzə̀m, e yìkír.

³⁷A wír ve vé‑eè dzəə̀n é kikoŋ vìne‑eè dzə̀ wír nshòv ntuùfú e msaàmbà e ghiì baà (276).

³⁸Wìr dzə̀m yíkír, e kùr. Á nèn fə̀ə́r kibér ke saŋ ye kikóŋ ki‑iì béʼé, e màʼ e ndzəv, kikóŋ ki caár.

³⁹Ndzə rán, shúu kwaʼa yénsín, vé kikoŋe méŋ. Yii bèy, á wáa yen kirə́ʼ, a ndzə́ví nəə fo e meshavtí, e nèn a yen ji bo á kì mùm, e sòv kikóŋ fo e ghaa kwaʼ.

⁴⁰Á nèn tiìné akfəə̀ fó ŋgòvìr si fey, sí gòʼ e ndzəv. Á kfən bvə̀tì akfəə̀ ve vé‑eè gháti mbàŋ ye yì yii binèr kikóŋ, e sàŋrì ndzə̀y sé kikoŋ see fó mbìy. Shwéri nəə́ shó, a dòm kikóŋ, kí wáa dù tìítiy e meshavtí fey.

⁴¹Kí lòo dù, e nèn sòv shuu e kikfər ke siy ke kí‑iì dzəə̀n é sar ndzəv fey. Shúu kikoŋe táv fó, e làa yòʼ dzə́ə a wàʼ. A ndzə́ví kù tsə́y kikóŋ fo bàm, a kí saʼkìrì.

⁴²Vé rərí nèn a tàʼ, e yuyrí vé sháŋé adzə̀m fo wùmòʼ láʼ ndzə́v, e fəə̀sín, e nyèŋ.

⁴³Kilìmbìy kév kí wáa tàʼ, e bavtí Por, e nèn shèm, e sùúy jii, wìr wo dzə̀ wù làʼ ndzə́v tómbìy gbù e ndzəv, a mùm, a fəəsín e shùu kwaʼ.

⁴⁴Kibér ki ghár á vimbéʼ ve kikoŋ, a jùmrì áwune. Á mo wìr dzə̀m‑eè yiìn, e bóo fəəsín e shùu kwaʼ kijuŋ.