Read Lamnso Lim Aŋgàa Ntum 28 Bible Online

Lim Aŋgàa Ntum 28 - Lamnso bible

Lim Aŋgàa Ntum 28

¹Mo vèr fəəkin é shùu kwaʼ kijuŋ bèy, e nèn yù ji á yoŋ kirə́ʼ kee shooy a ji Malta, a dzə̀ shiwoŋ e mvə̀m ndzə̀v.

²Wír vee fóo shám ver, e səə̀sí kijuujùŋ, e tòn və́y, vèr wáa yor, bìʼ fo wuú‑uù kèʼèn ne, a lo, kidzə́r kí wáa dzə̀r.

³Por yiì tàm meŋkaʼ ji wun neer e kiy, və́yí lùm, búv meé fó fo, e lùm kiwó kfə́, a njeŋ sho.

⁴Wír vee fóo yén mo búv və̀y njéŋ e Por kiwo, e nèn a sə̀mnìn jii, «Wìr və̀n dzə̀ wír wo wù‑uù yuyrin ne wír. Wù bòy fo ndzəv, a lòn vəə́ kù dzəə́ ghán e wun bàm, wù yíi kpu.»

⁵Yii bèy, Por nə̀r búv və̀y nə́rin fo wùn kiwo, wù gbù e və̀y, la wù yòʼ lèm gheéy.

⁶A wír vìyi kù leey ji Por keʼ ri, a run, kìn ji wù lo ri, e gbù, e kpù. Á lòo yen, a bó kinyo ki yoʼ kòóy, e nèn kùvsín lám, a suúy jii, wìr və̀n dzə́ bèn, a dzə̀ á nyùy wùmòʼ.

⁷Wìr wo wù‑uù sáʼ woŋ woo shooy‑iì kér láʼ wùn à súm símóʼ sí é ghaa kirə̀ʼ fóo fèy, a yír rəə́ dzə̀ ji Publiyur. Wù səə́sí ver kijuujùŋ, vèr shiíy e wùn laʼ vishiíy vitaár.

⁸A tàr à Publiyur kì néŋ, joy kinjàʼ wùn à ntoòmbùn. Por yú, e dù, e lèéy, e bùnrì, e neèr wó rə́ é kitu wo, wù bónén.

⁹Kí koóy bey, aŋgàa yàsí ve vé‑eè dzəə̀n é wòŋ foo fèy adzə̀me nèn a wìykìr, Por wáa fèr áwune.

¹⁰Wíri nèn a fo ver vifá nyanyày. Vèr wìy lòo lò, áwune kfən wìy e vifá ve vèr‑iì kér shií shó e kwaʼ ghan vi vidzə̀m, e bàʼtí e kikoŋ.

¹¹Vèr nèn nə̀ə́ e kikoŋ, a dù, aá shiíy ne e Malta ŋwee taár, a dzə̀ kikóŋ ke kí‑iì wìyìn fó Aleŋsandria, a shìy sán é Malta, a yírí dzə̀ anyùy nsane.

¹²Vèr meé é shùu ndzəv wo á yoŋ ji Sirakur, e dzə̀ʼə̀m fo vishiíy vitaár,

¹³e nèn kfə̀n lò, e dù, e mèé e shùu ndzəv wo á yoŋ ji Regiyum, e shìíy fo. Shwéri bvəə́shí, a wìy fo věr bàm, vèr nèn kfə̀n lò, e ghàn vishiíy vibaà, e fəə̀ fó kikoŋ e shùu ndzəv wo á yoŋ ji Putioli.

¹⁴Vèr aàŋgàa biimé ámóʼó tárnín fó, á wáa lon ji vèr áwune ku shìíy a ŋgàm fur. Vèr biímé, a shiíy fo, e bóo wìy lò, e dù, e meé e Rom.

¹⁵A vèr‑iì lóo dù, aŋgàa biimé vee fóo yú ji vèr waà sí wiyì, e nèn fəə̀kír, a wìy. Vèr à ámóʼó tárnín é way wo wú dzəə̀n é Apiyur, vèr à ámóʼó kfən tàrnín fo lav se meèmè símóʼ sí‑iì dzəə̀n sitaár. Por yén áwune, e beèrì Nyùy, shilív sə́ shí rə̀sìn.

¹⁶Vèr meé é Rom, á nèn màʼtì Por, wù dù, a shiíy fo wù koŋè, e fò wir rə̀r e mòʼón ji wù wáa shìy a fo wù nyéŋ.

¹⁷Vishiíy ví shaà vitaár, Por jàŋrì vilìmbìy ve wìr veé Juda vee fó. Á wìy, wù yòŋ jii, «Afə̀r vem, m dzə̀ ji wir sháŋ ben, a vé‑eè koò mo é Jerusalem, e wày e wír veé Romé wo. A bó m yòʼ‑oò lo jày kinyo e wír vesəné, a bó m yòʼ‑oò lo jày sá liì atàr vesən vee fó mbìy.

¹⁸Wír veé Rome dzə́tí vinyo e mò, e làa yòʼ yen jay wo dzə̀ á yùyrí mo, a tàʼ ji á maʼti á mo,

¹⁹wír veé Judàa sháʼnín. M nèn yèn ji m kù li nsaʼ yem fó mbìy, é sáʼ á fon woó Rom. A bó m yòʼ‑oò yii bèy ji m taʼ, e toy wír vér é kinyò.

²⁰Á kinyo ke kí yiìn, é bo m wáa jàŋ ven ji vèsən dzəʼəm, e sùŋnín. Sháŋ wo á kurin mo shó və̀n dzə̀ bìʼ wír wo vèsən vee wír veé Isray adzə̀me shiyì.»

²¹Wír vìyi bìnèr jii, «Bó vèr yòʼ‑oò ló a ker ŋwàʼ fo wòŋ woo Juda kùm wò. Afə́r vesən ve á wiy fo foo yoʼ tiìsí kinyo kímóʼ kí, a bó á yoʼ fèr kinyo ke bi kímóʼ kí kùm wò gheéy, fə̀m wir mòʼón.

²²Yii bèy, a vèr yíi a kòŋ fó yu kinyo ké. Ke vèr kiìn kí dzə̀ ji wíri tún a kintatì ke à dzəə̀n shó kìn virə́ʼ vidzə̀m.»

²³Wùn à Por nèn kfə̀n sìysì kishiíy ke á wíy dzə̀ʼə̀m. Kishiíy kiy ki gheén, wíri báʼtí e Por lav aneénín, wù wáa sanrí kinyo ke Nyùy aáwune, e kèʼ fo kijàvndzə, e meé vitsə́ʼ, a fìʼtì mo sáʼ Nyùyi dzəə̀n. Wù wáa yòŋ vinyo fo Ŋwàʼ Nsər Mooser, e kfə̀n a yòŋ fo Ŋwàʼ Aŋgàa Ntum Nyùy, a mùm fó bìnèr áwune, aá biímé Jesus.

²⁴Ámóʼó biímé kinyo kfə́, ámóʼó tén,

²⁵e nèn lò, e kèʼ a dzə̀ mbìʼ, e bvəə̀rí. Á lòo fəəkír, Por màʼ jí yìmòʼ jii, «Kiyoy ke Ranén kí‑iì lo sùúy kinyo ke rú kí áàtàr véné féyì mo kí‑iì tumen Aysaya woo *ŋgaà ntum Nyùy jii:

²⁶ « ‹Ku dù, e sùúy e wír vìne jii, «Vèn kù wíy a yuurí yuurín, yii bèy, e laà yòʼ a yu. Vèn kù wíy a leéy leeyín, yii bèy, e laà yòʼ a yen.»

²⁷A yiì melív me wìr vìn me mè lùrìn ne. Áwune kfən sə̀mrì vituʼùr vév, e kfə̀vtí sí yév. Aá yii bèy, fo sí yéví wáa yen, é vituʼùr vév ví wáa yu, é melív mev mè wáa səə̀m kinyo, aá kfə́n fo mò woo Nyùy, é m fer áwune.› »

²⁸Por nèn màysì jii, «Vèn wáa kiíy ji sáʼka woo mo Nyùy luŋèr wíri və̀n sí du lèn a dzə̀ á e wír ve bó yòʼ dzəə̀n veé Judàa, aáwune wíy a yuúri.» [

²⁹Wù suúy bey, wír veé Juda vìyi nèn a fəə, a bìʼ kinyo kee shooy, a taŋnín.]

³⁰Por ku nèn a dzə e wun lav ye wù‑uù laʼ, shiiy sho viyá vibaà, a səəsí wir dzə̀m wo wù wiy, ghán wun.

³¹Wù wáa dzə fo, a fìʼtì mo sáʼ Nyùyi dzəə̀n, e kfə̀n a yeʼéy wíri kinyo kee kùm Taàtá Jesus Kristu, a suŋnín tèéter, la wìr yòʼ a jivír wun gheéy.