Read Lamnso Lim Aŋgàa Ntum 4 Bible Online

Lim Aŋgàa Ntum 4 - Lamnso bible

Lim Aŋgàa Ntum 4

¹Kù mo Pita wùn Joon súŋnin e wíri bey, atàá cù ámóʼó wìy, e tò fó wùn à kitú ke vé rər ve vé‑eè shiy lav cù, à wír veé mbìv *Sadusi ámóʼó.

²A vé‑eè shwiiy kilòŋ, bìʼ fo Pita wùn Joon‑eè yéʼey wíri jii, mo Jesus‑eè fəən fó kpu, wìr dzə̀m wo wù tatin wùn Jesus waà wíy fəə sa.

³Á nèn bàm áwune, a dù sho. Mo yì‑iì siìn e ŋkuùr, a ghán sí báŋrín ne, á nèn fìn e lav ji á bvəə́shi, a yen a kibvəə́shí.

⁴Yii bèy, wír anín ve vé‑eè yuun kinyo ke Pita wùn Jooné biímé, e tàtí wír Jesus, á wáa dzə lèn moo ansə̀kì atàn bèy.

⁵Yì rán kibvəə́shí, vé saʼa wùn à vé wòŋe, à wír ve á yii duŋrì nsər Nyùyi tár é Jerusalem.

⁶Anar wo yì‑iì dzəə̀n taà cù wo kuʼùn wáa dzə fo wùn à Kayfar, à Joon, à Aleŋsanda, à wír ámóʼó adzə̀m ve dzəə̀n sá kfə́ə taà cù wo kuʼùn.

⁷Á nèn kòʼór Pita wùn Joon fó si, e dzə̀r aáwune jii, «Vèn sìíy ghàn é le, e bóo yiì kinyo kìy? Vitaáví vén ví lo fo feé? Vèn‑ee yii bèy, yoŋ yír a dzə̀ yé la?»

⁸Kiyoy ke Ranén kí rún e Pita shiliv, wù nèn bìnèr jii, «Ven vee vé saʼa wùn à vé wòŋe,

⁹kinyo ke vèr‑ii yiìn e ndzə́m və̀n ki dzə̀ kinyo ke juŋ ki. Yii bèy, a vèn lò, a dzətí ji á kiíy kinyo ke kí yiìn, bo wù wáa ghan,

¹⁰vèn à wír veé Israyi wàa kiíy adzə̀m jii, yiì vitaáví vé Jesus Kristu woó Naasarer, bo wìr və̀n wáa tiy lèn e věn si, a wù bónén ne, e tàv kijuŋ. A dzə̀ Jesus woo shó wo vèn‑eè taan é kintam, bo Nyùy fəə́r wun fo kpu.

¹¹ Dzə̀ wun tíy ye á yoŋ e Ŋwàʼ Nyùy jii: « ‹Tíy ye ven vee aŋgàa kimbome leeyin ntéŋé sì yíwun ye yí loòn ne, e tòm kór lav.›

¹²A wíri kù luŋ a dzə̀ fo Jesus və̀n cáʼcáʼ, bìʼ fo wìr wùmòʼ yòʼ kfə̀n dzəə̀n shó e ndzə fèn wo Nyùy‑iì lèmèn ji vèsən wíy lùŋ fo fo.»

¹³Vé saʼa yú, a Pita wùn Joon bínér vinyo tèéter, là fan, e kfə̀n yèn ji dzə̀ wíri fó tèr, a bó á yoʼ yèʼéy ŋwàʼ e ŋàŋ, sí yéví sə́n. Á nèn səə̀m ji kí dzə̀ bey, bì fo vé‑eè ghán a wùn à Jesus.

¹⁴A bó yòʼ‑oò dzə̀ áwune kfə̀n a meŋnín kinyo ke Pita wùn Joon yiìn, bìʼ fo vé‑eè yén, a tíy wùn à wìr wo áwune fèrìn və̀y.

¹⁵Vé wòŋe nèn lò, e fə̀ə́r Pita wùn Joon fó ndzə, e sìíy a kfə̀ynìn jii,

¹⁶«A dzə̀ vèsən yèe e wír vìne? Wír veé Jerusalem adzə̀me kìíy ne kiŋgaʼnìn ke kinyò ke áwune yiìn kin, a bó yòʼ dzə̀ sá vèsən wàa kìnèn.

¹⁷Yii bèy, fó sə̀r kinyo kee shoon fo kí kfə́n a sàmèr, vèsən ku kàntì wír vìn kántin ji lá á yòʼ dzəə mùm, e sùúy a kinyo e wìr kùm Jesus.»

¹⁸Á nèn kfə̀n jàŋ Pita wùn Joon, a kàntì ji áwune wáa yen a fó kfə̀n a suúy kinyo e wìr kùm Jesus, a yeʼéy wír kinyo kfə́.

¹⁹Pita wùn Joon nèn bìnèr jii, «Vèn ku kwàʼtì kinyo ke Nyùy koŋ ji wìr yii. Wù koŋ ji wìr yú kinyo a dzə̀ ké wìr moo ké wun woo Nyùy a?

²⁰A dzə̀ vèr kù a suúy kinyo ke vèr‑iì yenen, e kfə̀n yù.»

²¹Vé saʼa nèn kfə̀n kàntì áwune kitávín, e bóo màʼtì, aá wáa dù. A vé‑eè tàn a dzə̀ dzə́ə ye dzə̀ á wày áwune shó e ŋgeʼ, bìʼ fo wìr dzə̀m‑eè sí búrí Nyùy fo kiŋgaʼnìn ke kinyò ke kí‑iì kooyin kin.

²²Bo taaka mo ndzə́m wo vé‑eè fèrìn və̀n‑eè shaàn ne kiyá mkweè.

²³Mo á màʼtìn Pita wùn Joon, áwune nèn dù, e yèn wír vee áwuné kintatì, e fìʼtì mo vitú ve atàá cù wùn à vé wòŋe suuyin.

²⁴Áwune yú, e nèn tàtí, a lon a dzə̀ fo Nyùy, a bùnrì jii, «Nyùy woo Taà Vitu, yì‑iì bòm wò yúv wùn à nsay, à ndzə́ví, à vifá ve ví dzəə̀n shó vi vidzə̀m.

²⁵ Wò‑oò yiì, tàr wor Davir, wo yì‑iì dzəə̀n ŋgaà lìm wò, suúy fó vitaaví vé Kiyòy ke Ranén kí jii: « ‹Vitúm vi shwiiy kilòŋ bìʼ ka? Á bá antaŋ ve bó yòʼ dzə̀ á tìím ji ka?

²⁶Afon veé nsayi báʼti rə́r, aàtǎr wòŋe dzəʼə̀m, táŋ sáʼ Nyùy Tàr, táŋ sáʼ ŋgaà wo wù yoʼon ji *Mfə̀ə́r.›

²⁷Davir wáa yòŋ bèy, a kù dzə̀ kinyo ke kí‑iì kooyin é ntèʼ fen e ghan sin. Fòn Heror‑iì tàtí wùn à Poshur Payler, à wír ve bó yòʼ dzəə̀n veé Isray ámóʼó, à veé Israyi, a taŋ menàŋ e Jesus bàm. Jesus, wo dzəə̀n Ŋgaà wò Lìm wo juŋ wo wò‑oò yoʼon ji Mfə̀ə́r.

²⁸A vé‑eè táŋ vinyo ve vé‑eè táŋé, a kù dzə̀ ve wò woo Nyùy‑iì sìysìn ne fo ŋgùʼ ji á mo ví wíy koóy.

²⁹Tàr, ku yèn ri mo wír vìne bémer ver. Ku yiì, é ver vee aŋgàa lìm vée wáa fìʼtì kinyo ké là fan.

³⁰Ku yiì, é vèr wáa fèr wíri, a yiì viŋgaʼnìn ve vinyò e Jesus woo Ŋgaà wò Lìm wo juŋ yir, é wíri wáa yen vitaáví vé.»

³¹Áwune lòo màysì bunrì, nsay sə̀ʼ fo áwune kì dzəə̀n. Kiyoy ke Ranén kí rún aáwuné meliv, e yiì, á wáa fìʼtì kinyo ke Nyùy là fan.

³²Kintatì ke wìr Jesus ki wáa dzə, a ker shuu e mòʼón, e kfə̀n a ker shilív shimòʼón, la wìr yòʼ a yòŋ kifá kímóʼ kí ji kfə́. Kifá ke wìr ki kù‑uù dzə̀ ké wìr dzə̀m.

³³Aŋgàa ntum Jesuse nèn a fìʼtì feyì mo Tàr wov Jesus‑eè fəən fó kpu e dzəə ye dzə̀ wíri yù. Wír veé kintatì adzə̀me kú a suusín kitávín,

³⁴la wìr yòʼ a dzə sho aáwuné mvəm wo wù kfə̀n búŋ kifá gheéy. Wíri lo, á wàa fiìnè súm sév, kìn dzə̀ lav,

³⁵a fo mbàm aàŋgàa ntum Jesuse, á wàa jàvtì e wìr dzə̀m mo kíghàʼ wìr dzəə̀n.

³⁶Wìr wùmòʼ wáa dzə sa fo, aá yoŋ ji Joosev, a dzə̀ wír woó ram Levi, a vé‑eè dzə̀ə́ wun e wòŋ Saypur, aàŋgàa ntum Jesuse kfə̀n yoŋ wun ji Banabar, a dzə̀ ji ŋgaà tàvír.

³⁷Wù nèn fiìnè sa súm və́ wúmóʼó, e lì mbàm, e dù, e fò áàŋgàa ntum Jesuse.