Read Lamnso Lim Aŋgàa Ntum 5 Bible Online

Lim Aŋgàa Ntum 5 - Lamnso bible

Lim Aŋgàa Ntum 5

¹Wìr wùmòʼ wáa dzə sa fo, a yír rəə́ dzə̀ Ananiar, yé wiiy və Safira. Wù nèn fiìnè sa kibvəə̀ kfə́ ké sum kímóʼ kí,

²wùn wiíy súŋnín, e bàr mbàm. Wù lì kibér, e wìy, e fò áàŋgàa ntum Jesuse.

³Pita nèn dzə̀r shó jii, «Ananiar, à biìmé, Satan nəə́ e wò shiliv, à wíy, a boʼtí Kiyoy ke Ranén kí ji ka?

⁴À fiìnè súm a dzə̀ wó, a mbàm si dzə̀ sé. Yií ka, bo à yii kinyo kee ben? À yén ké ji à bóʼti wír, aà bóʼti a dzə̀ Nyùy.»

⁵Ananiar yú bey, e kù nèn gbù fo nsay, e kpù. Wónlě vilume tàʼ ndzə̀y, e boò dzə́n rə́ shó, e dù, a dzəə̀mè. Wíri yú kinyo kee shooy, e fàn feyì.

⁷Shintàm shi lòo koʼtí, wiiy və nəə́, a bó wù yóʼ ne kìíy kinyo ke kí kooyin lúm və.

⁸Pita dzə́r shó jii, «Ku sùúy kinyo ke ru kí, mbàm sìn si dzə̀ se vèn lum wò kì fiìnèn súm shó sidzə̀m à?» Wù biímé ji dzə̀ á síwun sidzə̀m.

⁹Pita nèn kfə̀n dzə̀r jii, «Vèn lum wò yòʼ kì kwàʼ ji ka féyì, e bóo wìy, a mùm Kiyoy ke Nyùy Tàr? Yú mo wíri giv nsən e shùu lav. Dzə̀ nsən se wìr ve á duùn ne, e dzəə̀mè lum wò, a kfən, aá kù beʼèy sa wò lèn, e dù, e dzəə̀mè.»

¹⁰Mo Pita suuy bèy, Safira ku nèn gbù fo nsay e si wo, e kpù. Wónlě vilum vìyi nəə́, e yèn, a wù kpú ne sa, á nèn bèʼèy, e dù, e dzəə̀mè e lum və́ ghaŋ.

¹¹Wír Jesus adzə̀me yú kinyo kee shooy, e fàn feyì. A kù dzə̀ mo wír ámóʼó‑oò yú sa, fanè.

¹²Aŋgàa ntum Jesuse wáa yiì viŋgaʼnìn ve vinyò vinín e wírí mvəm, á wáa yen vitaáví vé Nyùy. Wùn aŋgàa biimé adzə̀me kfə́n a tarnín e lav cù, a dzə̀ʼə̀m e ŋgày ye á yoŋ ji ye Solomon.

¹³Wíri wáa leéy, a fàn fó a tatí wùn áwune. Yii bèy, a wìr dzə̀m búri áwune féyì,

¹⁴a wíri wáy shilív e Tàr wov Jesus wùn nyanyày nyanyày, nəə aáwuné kintatì, à vikìy, à vilum.

¹⁵Wíri lo, á wàa fətí aŋgàa yàsí, a dù, a neèr e ghaŋ se dzəə. Á wàa neŋ fo e vikun, kìn é ghàm si, a shìy ji Pita yíi lòo shaà, a fə̀m dzə̀ kindzə̀ə́ndzəm kfə́, é kí ku gbù aáwuné wùn.

¹⁶Wíri kfə́n a wìykìr sa fo ntèʼ seé ghaa Jerusalem anín, a ker aŋgàa yàsí, e kfə̀n a ker wír ve *anyùyi jívir áwune, a yen aŋgàa ntum Jesus sho, á wáa bonén adzə̀m.

¹⁷Taà cù wo kuʼùn wùn à ŋgoo rə ye dzəə̀n wír veé mbìv *Sadusii nèn kèʼ, a ghèʼ aŋgàa ntum Jesus,

¹⁸e nèn tùm wíri, á dù, e koò aŋgàa ntum Jesus, e fìn e lav.

¹⁹Yii bèy, yiì lòo dzə vitsə́ʼ, nshìylav Nyùy Tàr wìy, e mvə̀ʼtì shuu se lav sháŋ, e fə̀ə́r áwune. Á lòo fəə, wù suúy jii,

²⁰«Vèn du é lav cù, a fìʼtì dzəʼə̀m ye fíy rə̀ne e wíri.»

²¹Áwune ku nèn a dù mo wù suuyin. Ndzə jàv, á nəə́ é lav cù, a yeʼéy wíri fó. Taà cù wo kuʼùn və̀y wùn aàŋgaà və́ ŋgoo nèn sìíy, e jàŋrì atǎr wìr veé Isray adzə̀m, wùn áwune dzə̀ʼə̀m, e tsə̀nsí vé rərí ji á du, e lì a wír vìy fo sháŋ, e wìy sho.

²²Áwune dù, e mèé fo, e tàʼ ntéŋ, e nèn kfə̀n, e fìʼtì jii,

²³«Vèr dù, e mèé e shùu lav sháŋ, e yèn, a wú dzə̀ e finèn, a vé rərí tíy, shiy shúu lav. Á mvə́ʼ lav, e làa yòʼ yen wír sho.»

²⁴Kitú ke vé rər ve vé‑eè shiy lav cù wùn à vitú ve atàá cùu yú bey, kí tárír áwune. Á wáa ghaynín jii, sà kòóy ka wír vìy a?

²⁵Wìr ku nèn tò fó ndzə, e sùúy jii, «Wír ve vèn‑ee fìnèn é lav vìyi vìsə lèn, aá tíy e lav cù, yéʼey wíri.»

²⁶Kitú ke vé rər kiy ki nèn dù wùn à wír vəə́, e lì áwune. Yii bèy, e làa yòʼ a kàn kànèn, bìʼ fo wíri‑iì baʼtin fó anín, a vé rərí fan fo wíri wáa tsəmrí áwune e tíyí.

²⁷Á wìy sho, e kòʼór e vé wòŋ vìyí si. Taà cù wo kuʼùn wáa dzətí aáwune jii,

²⁸«Bó vèr yòʼ‑oo lo kàntì ji lá vèn yòʼ dzə́ə a yeʼéy wír kinyo ke Jesus à? Vèn yén ri kinyo ke vèn yiìn kí. Vèn sàmèr ne yéʼéy yén Jerusalem e dzə̀m, a tàʼ ji wíri wáa bashí ver ji vèr kì fo Jesus kpu.»

²⁹Pita wùn aàŋgàa ntum Jesuse nèn bìnèr adzə̀m jii, «Vèr kér fó a yu a dzə̀ kinyo ke Nyùy, e shaà ké wìr.

³⁰Nyùy atàr vesən‑eè lo fə̀ə́r Jesus fo kpu, Jesus, wo vèn‑eè yuyrin é kintam.

³¹Nyùy kóʼór wun, e dzə̀ʼə̀r e wùn koy yìyí ji wáa dzə wun Taà Vitu, e kfə̀n a dzə Ŋgaà Lùŋèr. A wù yii bèy ji wír veé Israyi fíʼ bìnèr melív mev, é wù laysin vinyo vév ve bi ví.

³²Vèr ku nèn a fìʼtì vinyo vee shooy. A fiʼtì vèr à Kiyoy ke Ranén kí ke Nyùy fó e wír ve á yú wune adzə̀m.»

³³Vé wòŋe yú kinyo kìy, wún wóví kìn, á wáa tàʼ, e yuyrí áwune.

³⁴Yii bèy, Gamalia woo ŋgaà saʼ wùmòʼ nànèn, a dzə̀ wír woó mbìv *Farasi, kfə́n a dzə wír wo wù duŋrì nsər Nyùy, a wíri ghvə́m wun e ŋàŋ. Wù suúy, á fəə́r wír vìy fo ndzə shishàr.

³⁵Wù siíy, a tir vé wòŋe jii, «Wìr veé Isray, vèn kwaʼti kinyo ke á taʼ, e yiì e wír vìne kijuŋ.

³⁶Vèn wáa kuumé ji kù‑uù dzə̀ é ghan símóʼ sí fen, wìr wùmòʼ nànèn, aá yoŋ ji Tudar, a suúy ji wun dzə̀ wír wo kuʼùn wùmòʼ. Wíri tátí wun moo ghii kweè bèy. Á wìy yùyrí wun, wír vəə́ táʼrí, kinyo kfə́ kí lày.

³⁷Wùmòʼ nèn kfə̀n nànèn sa e ghan se vé‑eè táŋ wír veé wòŋ, a dzə̀ wír woó Galeli, a yír rəə́ dzə̀ ji Judar. Wù‑uù sə̀ŋrì sá wír anín e wùn bàm, á wìy yùy, wír vəə́ táʼrí, kinyo kfə́ kí lày.

³⁸Fo kin ki, m nén a tir ven ji vèn maʼti á wír vìn, e làa yòʼ yiì kinyo sho. A bèn dzə̀ ji vinyo ve áwune yii, kfə̀n yéʼey vìn vi lò a dzə̀ fo wìr, bo ví wíy ŋeemé, e lày.

³⁹Wáa dzə ji ví lò a dzə̀ fo Nyùy, bo bó yòʼ dzə̀ vèn ghàʼ wír vìn. A tàm vèn nèn lò, a tsəy kóy a dzə̀ vèn à Nyùy.»

⁴⁰Vé wòŋe yú ntir Gamalia rə̀n, e nèn biìmé, e jàŋ aŋgàa ntum Jesus vìy. Áwune wìy, á tám, e kàntì ji áwune wáa yen a fó kfə̀n a suúy kinyo kímóʼ kí e wìr ji Jesus, e nèn màʼtì, á wáa dù.

⁴¹Áwune lò fo vé wòŋé si, a dù, a sheʼrí ji áwune ghèén a e wìr ve dzə̀ á wàa shoór bìʼ Jesus.

⁴²Áwune dù bèy, e kù nèn a yeʼéy wíri vishiíy vidzə̀m e lav cù, e kfə̀n a yeʼéy e melaʼ, a fìʼtì sáʼka wo juŋ ji Jesus dzə̀ á *Mfə̀ə́r.