Read Lamnso Lim Aŋgàa Ntum 6 Bible Online

Lim Aŋgàa Ntum 6 - Lamnso bible

Lim Aŋgàa Ntum 6

¹Wáa dzə e ghan fóo fèy, kintatì ke wìr Jesus ki kú a kùʼ, a dù duùn fó mbìy, a wír ámóʼó súŋnin lám woo fó laʼ, ámóʼó wó Grik. Ve vé‑eè súŋnin Lám Griki nèn lò, a ghvə̀vrì vee fó laʼ jii, á jav vifá e vikǐy ŋkfəə, bóʼ a vee áwuné mbìv.

²Aŋgàa ntum Jesus vee nshòv sibaà e ghvə̀me nèn kùm wír veé kintatì adzə̀m, e sùúy jii, «Kí yoʼ ghèén ji ver vee aŋgàa ntume shaa fó a fìʼtì kinyo ke Nyùy, a leéy a dzə̀ fó vifa ve yi.

³Afə̀r ver, mo kí dzəə̀n ben, kí bòŋ ji vèn shóʼtí wír saàmbà fo věn mvəm, aá wáa lìm vinyo vee shooy. Vèn lóo shoʼtí, vèn lèéy a dzə̀ wír ve wìr dzə̀m biíme ji dzə̀ vee là kiloʼ, e kfə̀n a dzə wír ve á kiìn vinyo, Kiyoy ke Ranén kí rún aáwuné meliv.

⁴Ver vee aŋgàa ntume sí yiì a yu kér a dzə̀ fó bùnrì, a fìʼtì kinyo ke Nyùy.»

⁵Wíri yú kinyo kee shooy, kí bòŋ áwune adzə̀m. Á nèn shòʼtí wíri, a wùmòʼ‑oò dzə̀ Tefan wo wù‑uù biimen Nyùy e ŋàŋ, Kiyoy ke Ranén kí kfən rùn e wùn shiliv. Ámóʼó Filiv wùn à Pokarur, à Nikanor, à Timon, à Pamenar, à Nikolar woó Antiyok wo wù‑uù bìnkìn bínkin ji wír woó Juda.

⁶Á nèn lì wír vìn, e dù, e dìn aàŋgàa ntum Jesuse. Áwune neèr wó yév aáwuné vitu, e bùnrì fo áwune.

⁷Kinyo ke Nyùy ki nèn a sàmèr, kintatì keé Jerusalem ki wáa kùʼ kùʼùn, a dù fo mbìy. Atàá cùu wáa way sa shilív e Jesus wùn anín.

⁸Tefan wo vé‑eè shoʼon və̀n‑eè dzə̀ wír, a Nyùy leey fo wun e ŋàŋ, fó wun vitaáví, a wù yii vinyo ve ghaʼtín ví e wírí mvəm, a ví din vitaáví vé Nyùy.

⁹Wír ámóʼó nèn wìy, e kèʼ mbìʼ wùn à Tefan, a dzə̀ wír ve vé‑eè kér ŋgày bùnrì ye á yoŋ ji ye wìr ve á bòyìn ne. A kù dzə̀ sá wír veé Juda ve á wiy fo vitum vee Serina wùn à Aleŋsandria, à Silisia, à Asia.

¹⁰Wùn à Tefan wáa bìʼ bèy, a bó yòʼ‑oò dzə̀ áwune bìnèr kinyo kfə́ gheéy, bìʼ fo Kiyoy ke Ranén kí‑iì fó wun vifií é ŋàŋ.

¹¹Kí gháʼ, á nèn bàyír wír ámóʼó, á wáa boʼtí jii, vé‑eè yù, a Tefan kuurì a Mooser wùn Nyùy.

¹²Á bèy kí ku nèn ŋàʼár melív me wíri, e kfə̀n ŋàʼár me atǎr wòŋ wùn à me wìr ve á duŋrì nsər Nyùyi. Á nèn koò Tefan, e dù sho fo vé wòŋé si.

¹³Wír vìyi kfən wìy e vé kimboʼtì ámóʼó, á wáa toy vinyo e Tefan bàm, a suúy jii, «Bó wìr və̀n yòʼ yii dzə́ là fó kù a kuùrì *lav cù rə̀n wùn à *Nsər Mooser.

¹⁴Vèr‑iì yù, a wù suuy jii, Jesus woó Naasarer və̀y wíy kèr lav cù rə̀n, e kfə̀n kuvsín liì wòsən wòŋ wo Mooser‑iì lèmèn e dzə̀m.»

¹⁵Wír ve vé‑eè dzəə̀n é lav nsaʼ foo fèy adzə̀me nèn tùy sí e Tefan wùn, e lòo yen, a vishí və́ ví bínkír ne, a kìʼ moo vé nshìylav Nyùy.