Read Lamnso Lim Aŋgàa Ntum 7 Bible Online

Lim Aŋgàa Ntum 7 - Lamnso bible

Lim Aŋgàa Ntum 7

¹Taà cù wo kuʼùn dzə́r e Tefan jii, «Kinyo ke wír vìne suuy kìn ki kù yòʼ dzə̀ rú á?»

²Tefan yòŋ áwune jii, «Atàr vém wùn aàfə́r vémé, vèn yuúrí. Yì‑iì dzə̀, a tàr wòsən Abraham dzə̀ə́ e Mesopotamia, e bóo wìy lò, a dù e Haran, Nyùy woo Ŋgaà Ran dìn kitú kfə́ shó.

³ Wù‑uù sùúy shó jii, ‹Màʼtì woŋ wóo wùn aàfə́r vée, e dù e wòŋ wo m wíy dìn e wò.›

⁴«Abraham ku nèn lò fo wòŋ Kaldea foo fèy, e dù, a dzə e Haran. Tàr wov wìy kpù, Nyùy nèn yiì, wù lò, e wìy, a dzə e wòŋàn fo vèsən dzə́ lèn fèn.

⁵Wù wáa dzə fèn bèy, la Nyùy yòʼ fə̀m fò shintsə̀mén shé kirə̀ʼ shó shishàr gheéy. Yii bèy, wù‑uù lo kàʼ ji wun wíy fo a woŋ və̀n sho, é wáa dzə və́ wùn a rám rəə́. Nyùy wáa kàʼ bèy, a bó Abraham yòʼ fə̀m sí kér wán gheéy.

⁶Nyùy nèn kfə̀n sùúy sho jii, ‹Rám yée wíy a dzə viŋgwìy e wòŋ wo səné, a dzə akwàn, aá nəʼsi áwune fó kiyá ghii kweè.

⁷A m wíy màʼ ŋgeʼ e wír veé wòŋ foo fèyi, é rám yée fəə́ fó fo, e wìy, a bùnrì mo fen.›

⁸Nyùy nèn kfə̀n fò Abraham kisəəm ké *mensàŋ mee shooy, a dzə̀ *mbèʼ se saŋén sí. Abraham wìy dzə̀ə́ Aysi, kishiíy kí meé waamé, wù nèn nàŋsín. Aysi wìy nàŋsín sa wán və woo Jakov, é bo Jakov wìy nàŋsín wón və́ vee nshòv sibaà e ghvə̀m ve dzəə̀n atǎr ram yesən.

⁹«Atàr vesən víyi nèn wìy ghèʼ fər wov Joosev, e fiìnè, wù wáa dzə kwàn é wòŋ Ejiv. Yii bèy, Nyùy kú a leéy fo wun,

¹⁰a sə wun fo ŋgeʼ se wù‑uù yén sidzə̀m. Wù kfən fò wun vifií, Farao woo Fon woó Ejiv wáa kòŋ wun, e fò sáʼ sho, wù wáa leéy fo wòŋ wùn à kfə́ə fòne.

¹¹«Jìŋ nèn wìy koò woŋ Ejiv e dzə̀m, e kfə̀n koò sá e wòŋ Kanan fèn, wíri wáa yen ŋgeʼ ye tavín, la atǎr ram yesəné yòʼ a ker kifá ke yi.

¹²Jakov lòo yu, e yù ji vifá ve yi vi dzə̀ á e wòŋ Ejiv, wù nèn tùm wón və́ ve dzəə̀n atàr vesən fó. Á dù fo e ghan sé mbìy si,

¹³e wìy lòo kfən fo akàŋ vee abaà, Joosev nèn yiì, afə́r və́ víyi kiíy wun, é bo Farao kiíy sá kfə́ə Joosev.

¹⁴Joosev nèn tsə̀nsí ntum e tàr wov Jakov ji wùn à kfə́ə rə́ e dzə̀me lo, e wìy a Ejiv. A kfə́ə Jakov rə̀ne‑eè dzə̀ wír nshòv tàn e msaàmbà e ghan fóo fèy.

¹⁵Jakov yú, e lì kfə́ə rə́, wùn áwune sə́y é Ejiv. Wùn à wón və́ ve yì‑iì dzəə̀n atàr vesən víyi nèn a dzə fo, e wìy kpùkír fo adzə̀m.

¹⁶Á wìy sìíy, e lì dzə́n sév, e dù sho e Shekem, e wày é mbvə̀ʼ ye Abraham‑eè yunen fo kfə́ə Hamori, e làʼ e *kisha ke mbàm ke fəvír kí.

¹⁷«Ghán sí lòo gheén se Nyùy‑iì wíy yiì kinyo ke wù‑uù kàʼàn Abraham sho, a wír vesəné kúʼ ne e wòŋ Ejiv, a dzə nyanyày.

¹⁸Á nèn wìy kòʼór fon wo sən, a bó wù yòʼ kì Joosev.

¹⁹Fòn woo shooy nèn a lovtí e wír vesəné lóvtín, a nə̀ʼsì áwune, a kàn atàr vesən viy ji á wáa màʼày wón fó ndzə, aá wáa kpukír.

²⁰A dzə̀ ghán see shooy se vé‑eè dzəən Mooser, wáa dzə wán, a wù‑uù bòŋ é ŋàŋ. Á keérí fó laʼ ŋwee taár,

²¹e dù, e lèm fo ndzə, é bo wàn Farao woo wiíy bóŋrí, a lìy ji və́ə woo wán.

²²Á nèn yèʼéy Mooser vifií vé wìr veé Ejiv vidzə̀m. Wù wìy kùy, a dzə wir jì ye juŋ, e kfə̀n a dzə wír njiì kinyò.

²³«Wù wìy mèé kiyá mkweè, e kwàʼtì ji wun‑éè du, e ghàn á afə́r və́ vee wír veé Isray.

²⁴Wù nèn lòo dù, e yèn, a wìr woó Ejiv nyer wír woó Isray wùmòʼ, wù kaáy, e yùyrí wír woó Ejiv və̀y.

²⁵A wù‑uù kwaʼtì ji dzə̀ afə́r vəə́ kù kìíy a ji tùm Nyùy wun ji wun fəə́r áwune fó ŋgeʼ, a bó á yòʼ kì.

²⁶Yì rán kibvəə́shí, wù kfən lòo dù, e yèn, a kfən lò wír veé Isray abaà, a fùnèn. Wù wáa jàvsìn jii, ‹Ŋkàr sem, vèn yú, vèn dzə́ afə́r afə́r, funèn ji ka?›

²⁷Wìr wo wù kì taʼ melaà nèn dòm Mooser dómen, e dzə̀r shó jii, ‹Lèm la wò ji à wáa saʼ ver, a tinén nsaʼ sér?

²⁸ À taʼ e yuyrí mo mo wò‑oo yuyrin wír woó Ejiv və̀y e yooné a?›

²⁹Mooser yú bey, e nèn fàn, e nyèŋ fó wòŋ Ejiv, e dù e wòŋ Midian, a dzə fo, e wìy dzə̀ə́ wón fó abaà.

³⁰«Wìy lòo dzə e bǎm kiya mkweè, Mooser yén nshìylav Nyùy, a yì dzə̀ é mvə̀m və̀y wo wú‑uù shwí e kici é woʼ yeé ghaa Gwan Sinay.

³¹Mooser yén və́y, kí tárír wun. Wù kóʼtí fó mentsə̀m ji wun leeyì, Nyùy Tàr súŋnín fó fo jii,

³² ‹Dzə̀ mo woo Nyùy atàr vé, Nyùy Abraham, à wo Aysi, à wo Jakov.› Mooser yú, e nèn a yàʼ, e làa yòʼ dzə́ə a tàʼ, e leéy fó gheéy.

³³ Nyùy Tàr nèn kfə̀n sùúy sho jii, ‹Shóʼtí alábáʼ vée, bìʼ fo à sí tíy a dzə̀ e Nyùy kirə̀ʼ ke ranén kí.

³⁴M kù yén mo á táy wír vém é wòŋ Ejiv, kfə̀n yú mo áwune dzəmè, a m sə̀y ne lèn ji m fəə́r áwune fó ŋgeʼ foo fèy. Ku yù, m túm wò e Ejiv.›

³⁵«Nyùy nèn tùm a dzə̀ Mooser və̀n ji wù fəə́r wír veé Isray fo ŋgeʼ foo fèy, a fo sáʼ aáwune. A kù dzə̀ wun wo áwune‑eè káy kayín, dzə́r sho jii, ‹Lèm la wò ji à wáa saʼ ver, a tinén nsaʼ sér?› A Nyùy‑iì tsə̀nsí a dzə̀ nshìylav rə, yì wìy e mvə̀m kicì fey, e tiìsí ntum rə̀n sho.

³⁶Mooser nèn dù, a yiì viŋgaʼnìn ve vinyò vinín e wòŋ Ejiv, ví wáa dìn vitaáví vé Nyùy, e bóo wìy fəə́r wír veé Isray fo fo. Wù kfə́n a yiì vímóʼ ví é Rìbà Ndzə̀v wo Baar, à vímóʼ ví sá vinín e ghan se wùn áwune‑eè ghán e kirə̀ʼ ké woʼ kí kiyá mkweè.

³⁷Kfə́n a dzə Mooser woo shooy wo wù‑uù suuyin e wír veé Israyi jii, ‹Nyùy wíy tum ŋgaà ntum və wùmòʼ fo věn wùn moo mo, a wíy a dzə̀ wír fo věn mvəm.›

³⁸A kù kfə̀n dzə̀ wun woo Mooser wo wù‑uù suŋnin wùn nshìylav Nyùy e Gwan Sinay e ghan se wùn aàtǎr ram yesəné‑eè baʼtin é woʼ yee fó, yì fó nsər se Nyùy sho ji wù fó e vèsən.

³⁹«Atàr vesən víyi nèn lò, e mèŋ Mooser, e bàʼ wun e bàm, a kòŋ ji bo á kì kfə́n e Ejiv.

⁴⁰ Á nèn sùúy e Aaron jii, ‹Fèr anyùyi, e fò e vèr, aá wáa dànèr ver. Ké Mooser və̀y wo wù‑uù fəərin ver fó wòŋ Ejiv, bó vèr yòʼ kì kinyo ke kí kooyin wun.›

⁴¹Á ku nèn fèr kibámmbó, a kí shwínin wan nàʼ, a seerí nyám si, a cù sho, a sheʼrí kifá ke á fèrìn e wó yéví.

⁴² Nyùy nèn bìn ndzə̀m aáwune, á wáa ghvəm shúy wùn à ŋwee, à mejiy mè réŋréŋ mo vé‑eè saŋen é ŋwàʼ *aŋgàa ntum Nyùy ji Nyùy suuy jii: « ‹Wír veé Isray, vèn‑eè ghán e kirə̀ʼ ké woʼ kí kiyá mkweè, seéri nyám si, cu a dzə̀ mo shó à?

⁴³Àáy, vèn‑eè ghvə́m a dzə̀ anyùy ve fer ven, béʼ kibàn ké cù a dzə̀ ké nyùy wo á yoŋ ji Molok, kfə̀n béʼ shijiy she á fèrìn ji shé nyùy woo Refan. Bìʼ bey, m wíy tsənsí ven é kwaʼ nsàm, aá shaa Babilon sháan.›

⁴⁴«Aàtàr vesən víne‑eè dzə́ e kirə̀ʼ ké woʼ kí, kér *kibàn ké ntàsín ke kí‑iì din ji Nyùy dzə̀ wùn áwune. A yì‑iì fèr Mooser kibàn kee shooy réŋréŋ moo ke Nyùy‑iì dìnèn shó, e sùúy ji wù fer á kímóʼ kí bey.

⁴⁵Wón véví nèn wìy sìíy, e sə̀ fo atàr vesən víyi, a beʼ, a wìy sho fèn. A ghán sin si‑iì dzə̀ se wùn à Joshua‑aà faasì nsay fo vitúm ve ví‑iì dzə́ fèn vi, a ghán Nyùy fo mbìy, jum vitúm vee shooy. Kibàn kee shooy ki nèn a dzə fèn, e meé e ghan se Fòn Davir‑iì sáʼ woŋ və̀n.

⁴⁶Wù‑uù dzə̀ wír, a wù bóŋ fo Nyùy e ŋàŋ, wù nèn a lon ji Nyùy ku biìmé, é wun bóm á lav wun woo Nyùy Jakov.

⁴⁷Nèn ghàn sìíy, e bòm wán və woo Solomon lav Nyùy yee shooy.

⁴⁸«A bó yòʼ dzə̀ ji Nyùy woo Taà Vitu yii dzə́ e lav ye bomen wíri, réŋréŋ mo *ŋgaà ntum Nyùy wùmòʼ‑oò suuyin ji Nyùy suuy jii:

⁴⁹ « ‹Yúví dzə̀ kàvàʼ wom, nsay wáa dzə kibur ke m tiir wúu yém shó. A dzə̀ wìr bàʼrì lav ji yéem, a yìwun dzə̀ moó le? Kirə́ʼ kí dzə̀ shó ke dzə̀ m dzə̀ʼə̀m shó a?

⁵⁰Bó yòʼ‑oò fèr mo vifá vìn vidzə̀m à?› »

⁵¹Tefan fèr bèy, e sùúy jii, «Vèn tàv kitú e ŋàŋ, a melív men wùn à vituʼùr vén ví dzə̀ vé wìr ve bó á yòʼ kiìn Nyùy. Vèn kfə̀n tén fó a yu Kiyoy ke Ranén kí, yii kinyo, a kù dzə̀ ke atàr véné‑eè yii.

⁵²Ŋgaà ntum Nyùy wùmòʼ dzə̀ shó wo atàr véné yòʼ‑oò ló a ròn wúu rə́ á? Áwune kù‑uù yúyri aŋgàa ntum Nyùy yúyrín, a vé‑eè fiʼtì ji Ŋgaà Lìm Nyùy woo rú waà wíy wìy. A dzə̀ wùwun woo shooy mo wù‑uù wìyìn ne, vèn sháʼnín, e yùyrí.

⁵³Ku kfə̀n a dzə ven vin ve Nyùy‑iì tumen nshèelav sə́, sí fó nsər sə́ e vèn, é bo vèn tén fó a lèm.»

⁵⁴Vé wòŋe yú kinyo ke Tefan suuyin kin, kí nəə́ aáwuné vighìy, á ŋéytí sóŋ, e kuùmé Tefan sho.

⁵⁵A Tefan kù leey kfə́ a dzə̀ yúv, Kiyoy ke Ranén kí rún e wùn shiliv, wù yén rán ye dzəə̀n yé Nyùy, e kfə̀n yèn Jesus, a wù tíy e Nyùy koy yìyí.

⁵⁶Tefan nèn sàsìn jii, «Vèn leéy, e yèn, m yén yúv e rə́, a ŋgaà wo yírí dzəə̀n *Wanwìr tíy e Nyùy koy yìyí.»

⁵⁷Áwune yú kee shooy, e nèn fə̀mrì wó e vitùʼùr, e bùʼ rəə́, e tò, e kùúy Tefan,

⁵⁸e fəə̀ shó fo ŋkàlaʼ, e dù, a tsəmrí e tíyí ji á yúyrí. A wír ve á kì tiimen, a suúy vinyo e Tefan bàmé kì shòʼtí vikúm vév, e fò e wánlè nsùm wùmòʼ, aá yoŋ ji Saul, e bó a tsəmrí.

⁵⁹Á wáa tsəmrí, wù wáa bùnrì jii, «Tàr wor Jesus, ku lì kiyoy kém kí é yuv.»

⁶⁰Wù nèn lò, e tsə̀m fó nsay, e tòŋ kitávín jii, «Tàr, lá à yòʼ a leéy kinyo ke bi ke wír vìne yii kìn.» Wù rəə́mé bey, e nèn kònsí, e kpù,