Read Lamnso Lim Aŋgàa Ntum 8 Bible Online

Lim Aŋgàa Ntum 8 - Lamnso bible

Lim Aŋgàa Ntum 8

¹a Saul tíy fo, bínsi. Kèʼ fo kishiíy fóo fèy, á ku nèn a fo ŋgeʼ ye biibí e kintatì ke wìr Jesus keé Jerusalem ki, á wáa nyeŋkír adzə̀m, a taʼrí e wòŋ woo Juda. Ámóʼó dùkìr e wòŋ *Samaria, ku bèr aŋgàa ntum Jesus e Jerusalem cáʼcáʼ.

²Wír ámóʼó ve vé‑eè ghvə́m Nyùyi ku yòʼ lì dzə́n Tefan, e dzəə̀mè, a dìy kpú rə́ féyì, a shèŋ kitú.

³A Saul kù taʼ kfə́ e laàr kintatì ke wìr Jesus láarin. Wù lo, wù wàa ghan e melav, a fətí aŋgàa biimé, kìn dzə̀ woo wiíy, kìn dzə̀ woo lumèn, a dòm, a dù sho e lav sháŋ.

⁴Aŋgàa biimé ve vé‑eè taʼrin víyi nèn a ghan virə́ʼ vidzə̀m, a fìʼtì kinyo ke Nyùy.

⁵Filiv dù kfə́ a dzə̀ é mvə̀mlaʼ Samaria, a fìʼtì kinyo kee kùm *Mfə̀ə́r wo Nyùy‑iì kàʼàn fó.

⁶Wír aníne wáa yu, e kfə̀n a yen viŋgaʼnìn ve vinyò ve wù yii, a kòŋ fó a yuurí kinyo ke wù fiʼtì.

⁷*Anyùy ve á jívir wírií lo, á wàa rəəmé, a fəəkír fo wírí wùn, á wàa bonén anín, aàŋkivkìr wùn aàntèŋe bónen sa nyanyày.

⁸Kishéʼrì ke kuʼùn kí nèn a dzə e mvə̀mlaʼ foo fèy.

⁹Wìr wùmòʼ wáa dzə e mvə̀mlaʼ fèn, a yírí dzə̀ Simon, a wù‑uù sí din sə́m rə́, e kèʼ fo ŋgùʼ, yoŋ kitú kfə́ ji wír wo ghaʼán wùmòʼ, a wír veé Samaria adzə̀me leey, kér gháʼ.

¹⁰Wìr dzə̀m ku nèn a yuurí shúu və́, à wír ve kuʼkìné shó, a suúy jii, «Simon və̀n dzə̀ nyùy wùmòʼ wo á yoŋ ji Vitaáví ve Ghaʼán ví.»

¹¹A vé‑eè yuúri kinyo kfə́ bey, bìʼ fo wù‑uù sí din sə́m rə́, e kèʼ fo ŋgùʼ, a wíri yén, kér gháʼ.

¹²Mo Filiv wìyìn, a fìʼtì sáʼka Nyùy wo juŋ woo kùm Jesus Kristu, a naàrì mo sáʼ Nyùyi dzəə̀n, wìri nèn a biimé, à vikìy, à vilum, á wáa way áwune é ndzəv.

¹³Wúnwun woo Simon biímé sá, á wáy wun e ndzəv. Wù ku nèn a dzə e Filiv ghaŋ, a yen vinyo ve ghaʼtín ve wù‑uù yii, a ví din vitaáví vé Nyùy, a ker gháʼ.

¹⁴Aŋgàa ntum Jesus ve vé‑eè gòʼòn é Jerusaleme wìy yù ji wír veé Samariàa biìmé ne saa kinyo ke Nyùy, e nèn tùm Pita wùn Joon fó.

¹⁵Áwune dù, e yèn aŋgàa biimé vee shooy, e nèn a bùnrì ji Nyùy ku tùm á Kiyoy kfə́ ke Ranén kí fo áwune,

¹⁶bìʼ fo kí yòʼ‑oò ló ne wìy fo áwune. Á kù‑uù wày áwune é ndzəv a dzə̀ e Taàtá Jesus yir cáʼ.

¹⁷Pita wùn Joon bùnrì, e nèn neèr wó yév aáwuné vitu, Kiyoy ke Ranén kí wìy fo áwune.

¹⁸Simon yén mo aŋgàa ntum Jesuse neèrìn wó e wírí vitu, Kiyoy ke Ranén kí wìy fo áwune, wù nèn a fo mbàm aáwune,

¹⁹a suúy jii, «Vèn ku fò mo vitaáví sá, m lóo neèr wó e wìr kitu, é Kiyoy ke Ranén kí wáa wìy fo ŋgaàŋ.»

²⁰Pita bìnèr sho jii, «Vèn à mbàm sé see shooy si ku dù duùn é və̀y. À kwaʼ ké ji dzə̀ wìr yùn fómo Nyùy e mbàm si a?

²¹Bó yòʼ dzə̀ féyì à wàa ker kilíŋ e mvə̀m kinyò fèn, bìʼ fo shilív shé shi yòʼ dzə̀ shigheénén fo Nyùy.

²²Ku bìnèr shilív shé shi fó kwàʼtì ye bi ye à kér rə̀n, a lon fo Nyùy Tàr ji wù laysin kinyo ke bi ke à kì taʼ, e yiì kìn.

²³M yén ji kighèʼ ki bìvír ne shilív shé, aà sì kwǎn vinyò ve bi ví.»

²⁴Simon nèn a lon Pita wùn Joon jii, «Vèn kú a bùnrì fo Nyùy Tàr ji lá kinyo kímóʼ kí fo ve vèn suuy vìn ki yòʼ kòóy mo.»

²⁵Áwune màysì, e fìʼtì kinyo ke Jesus, e naàrì mo wù dzəə̀n, e nèn lò, a kfən e Jerusalem. Á lòo kfən, a ghan e ntèʼ seé wòŋ Samaria símóʼ sí sinín, a fìʼtì sáʼka Nyùy wo juŋ fo.

²⁶Nshìylav Nyùy Tàr siíy, e wìy, e yèn Filiv, e sùúy sho jii, «Ku lò, a səy səyín é mbìv ròŋ, mee fo, à wàa jùmrì dzə́ə ye yì lo fo Jerusalem, tósin wóʼ, du e Gasa.»

²⁷Filiv nèn a səy fo. A wìr woó Etiopia[1] wùmòʼ kì dù, e bùnrì Nyùy e Jerusalem, a kfən fo laʼ, a wù ghán a dzə̀ é kar ye səŋ nyám si. Wù‑uù dzə̀ wír wo kuʼùn é wòŋ Etiopia, a kér wun kitáv ké Yaà Kandar wo wù sáʼ fó. Wù wáa dzə e wùn kar, a yòŋ kinyo fo ŋwàʼ wo Aysaya woo ŋgaà ntum Nyùy‑iì saŋen.

²⁹Kiyoy ke Ranén kí nèn sùúy e Filiv jii, «Kóʼtí, a ghan e ghaa kar fèy.»

³⁰Filiv nyéŋrí, e dù e ghaŋ wo, e yù, a wù yoŋ ŋwàʼ Aysaya. Wù nèn dzə̀r shó jii, «À kù yòʼ yoŋ bèn, yú kinyo ke ŋwàʼa suuyì a?»

³¹Wù bìnèr jii, «A dzə̀ m yù é le, a bó wìr yoʼ tòʼtí e mò?» Wù nèn sùúy ji Filiv kóʼ, é wùn wun wàá dzəʼəm é kar.

³² A kinyo ke wù‑uù yoŋ fo ŋwàʼ fèy ki dzə̀ jii: «Wù‑uù dzə̀ moo njiì wo á li, e dù, e see. Kfə̀n a dzə moo wan njiì wo á lóo kom wuy, la wù yòʼ a toŋ. Kù dzə̀ mo wù yòʼ‑oò ló a ghay sa kinyo.

³³Vé‑eè shoor wun, la wìr wo wù bin kinyo kfə́ réŋ yòʼ a dzə. Kfə̀n wíy a yòŋ la wón və́, a vé‑eè tìn ne dzəʼə̀m rə́?»

³⁴Wìr wo kuʼùn və̀y nèn dzə̀r e Filiv jii, «Ku sùúy mo, *ŋgaà ntum Nyùy və̀n‑eè suuy kinyo kìn kùm la? Wù suuy a dzə̀ kitú kfə́ moo ké wìr wo sən á?»

³⁵Filiv nèn kèʼ fo kinyò ke ŋwàʼ fèy, a naàrì sáʼka wo juŋ woo kùm Jesus sho.

³⁶Wùn wun kú a dù e dzəə. Á meé é kirə̀ʼ kímóʼ kí, a ndzə́ví dzə̀ fó, wìr wo kuʼùn və̀y suúy jii, «Ndzə́ví rə̀ne, a dzə̀ kfə̀n jìvír ka fo à wáy mo é ndzəv?» [

³⁷Filiv bìnèr jii, «Aà fèn wày ne shilív shé shidzə̀m e Jesus wùn, bo dzə̀ m wày wò e ndzəv.» Wù bìnèr jii, «M biìmé ne ji Jesus dzə̀ á Wan Nyùy.»]

³⁸Wù nèn sùúy jii, á tiír á kár. Á tiír, wùn Filiv sə́ʼə́y, e nə̀ə́ e ndzəv, Filiv wáy wun sho.

³⁹Á fəə́ fó ndzəv, Kiyoy ke Ranén kí nèn lì Filiv fo fo, la wìr wo kuʼùn və̀y yòʼ dzəə yèn wun gheéy. Yii bèy, wù kú a dù dzə́ə rə, a sheʼrí.

⁴⁰Filiv lòo sìn, a wù sì é ntèʼ yee Asotur. Wù nèn a shaà, a fìʼtì sáʼka Nyùy wo juŋ ntèʼ sidzə̀m, e dù, e mèé e mvə̀mlaʼ Sisaria.