Read Lamnso Rom 11 Bible Online

Rom 11 - Lamnso bible

Rom 11

¹M nen kfə̀n a ghay kímóʼ kí jii, mo Nyùy yiìn ne bèy, sà dzə̀ ji wù màʼày ne wír və́ veé Isray a? Àáy, wù yoʼ màʼày gheéy. Vèn wáa kuumé ji m dzə̀ wir Kristu bèn, a m dzə̀ sáa wír woó Isray feyì. M lò fo Abraham ram, a kfə́ə yérí dzə̀ yé Benjamin.

²Nyùy yoʼ màʼày wír və́ ve wù‑uù yiìn ne shòʼ fó ŋgùʼ gheéy. A kinyo ke kí‑iì kooyin Elija ki dzə̀ mfìʼ kinyò kìn. Vèn kì sá kinyo ke vé‑eè saŋen é Ŋwàʼ Nyùy mo wù‑uù tóŋ, bí Nyùy mo wír veé Israyi lóvti e wun.

³ Wù‑uù suuy jii, «Tàr, á kètì ne kíy sé se cù, e yùyrí aŋgàa ntum vé. Bèr ne mo vèr mòʼón, aá kfə̀n sí taʼ ji á yúyrí sá mo.»

⁴ Wù‑uù bì bey, Nyùy bìnèr ji ka? Wù‑uù bìnèr jii, «M kér sa wír ámóʼó nsə̀kì saàmbà a dzə̀ wír ve á yòʼ‑oò yiì ne tsə̀m ndzəə́ e nyùy woo Baal.»

⁵Kù dzə̀ réŋréŋ mo Nyùy kér sa ámóʼó vee wír fo veé Israyí mvəm é ghan see lèn sìn. A dzə̀ wír ve wù‑uù shoʼon ji və́ mo wù‑uù rərin mendzən fo fo, e bùʼ.

⁶Mo wù‑uù bùʼùn áwune búʼun ji wír və́, bo bó yòʼ dzə̀ bìʼ lim yímóʼó ye vé‑eè yiìn. A dzə̀ ji wù bùʼ wír bìʼ kinyo ke ŋgaàŋ yiìn, bo bó kee shooy ki yòʼ dzə̀ə́ mbùʼmé.

⁷Kinyo ke kí dzəə̀n kí nén a dzə jii, kùʼùn wìr veé Isray yòʼ‑oò lo yèn á kifá ke vé‑eè taʼà, nèn yèn ashàr wìr mo dzə̀ á ghàn, e bóo gheén fo Nyùy. A dzə̀ áwune vee shooy ve Nyùy‑iì yiìn ne shòʼ ji wír və́. Wù nèn yiì, melív me kùʼùn wìr mè màysì, a taaví

⁸ mo vé‑eè saŋen é Ŋwàʼ Nyùy jii, «Nyùy màʼ ne mbuùné aáwuné si, e sə̀tí vifií vév, á nén a dzə, e meé lèn, a bó sí yéví yòʼ yén vinyo, a bó vituʼùr vév ví yòʼ yú.»

⁹ A Fòn Davir‑iì lo sùúy sa jii: «Nyùy ku yiì, é ŋkàʼ sév sí binkir ji alíŋ, a dzə ji vitám ve á li sho. Ku yiì, aá gbu, e tùr lòn mo kì dzə̀ á tùr.

¹⁰Ku sə̀tí sí yéví aá fir, e yiì, é kibeʼèy kí kív ndzə̀m yev.»

¹¹Ke m gháy ki nén a dzə jii, wír veé Israyi sà bàyrìn e Jesus Kristu kitu bèy, e gbù, e kù nèn gòʼ fo, a bó á yòʼ dzəə́ wìy nànèn a? Bó yòʼ dzə̀ bey. Ke kí dzəə̀n kí dzə̀ jii, áwune jày, e tèn kinyo ke Kristu, kí nen dù a dzə̀ fo wír ve bó yòʼ dzəə̀n veé Israyi. A Nyùy‑iì yiì bey, ji wír vee shooyi wáy shilív shó, é veé Israyi lóo yen, aá kfə́n a siimé.

¹²Mo wír veé Israyi jayin, e tèn Kristu, wìr dzə̀m wáa yu vijuŋ lèn, wír ve bó yòʼ dzəə̀n veé Israyi lúŋ, bo a kí kòóy ji wír veé Israyi biímé Kristu adzə̀m, vijuŋ ve wìr dzə̀m wàa yu vi wàa dzə e le?

¹³Kinyo ke m yíi a suúy lèn ki dzə̀ fo vèn ve bó yòʼ dzəə̀n wír veé Isray. Nyùy‑iì shòʼ mo ji m wáa dzə ŋgaà ntum Kristu a dzə̀ fo vèn. M nén a tiisí ntum yee shooy, a sàvnìn, a suúy kitú kém ji

¹⁴afə́r vém veé Israyi fíʼ yú mo Nyùy yii e wír ámóʼó, lóo siimé, é m koóy á wír ámóʼó fo áwuné mvəm, aá wáy shilív e Kristu wùn, e lùŋ.

¹⁵A dzə̀ m kù a yiì bèy, bìʼ fo, mo wír veé Israyi jayin, Nyùy máʼtí áwune, e bàʼtí wír veé ndzə lèn ji ŋkar sə́, bo Nyùy kfə̀n wíy lì áwune é bàm, é vijuŋ vi wáa dzə e le? Bo ví wíy a dzə moo wír ve á fəən fó kpu, e kfə̀n a dzə atin.

¹⁶Vèn kì sá jii, a wìr bèʼ kibán, e màʼ Nyùy sho, bo kíŋ kibane kù dzə̀ yé Nyùy e dzə̀m. A wìr bìy kicí ji kicí ké Nyùy, kí kúy, bo kù kér Nyùy gháŋ, a kér wun tám si.

¹⁷Wír veé Israyi nén a dzə moo kicí ke Nyùy bìyìn, kí kúy, a koóm. A ven ve bó yòʼ dzəə̀n wír veé Israyi dzə̀ kén moo kicí ke kí kúy kuyín é kwaʼ, a bó á yòʼ yii kfə́rí. Nyùy nen faàrì símóʼ see tám fo wǔn kici fey, e lì ven, e bàrír fo, vèn wáa nyoŋ mendzə́v fo kicí kee shooy kí wùn, a koóm.

¹⁸Kí nén a dzə jii, lá vèn yòʼ a ŋàʼ, a nyàysì a tám se á faàrìn siy. Vèn wáa kuumé jii, tám see shooy si lò fo kici fóo fèy, a yiì gháŋ kici kee shooy, bo vèn wáa koóm, bó yòʼ yiì yén yee gháŋ.

¹⁹A tàm vèn wàa gaám ji sì á kén kee kirə́ʼ, vé‑eè faàrì tám see shooy a bìʼ fo sí yòʼ‑oò koomè.

²⁰Dzə̀ rú, vé‑eè faarì bìʼ fo vé‑eè tenen kinyo ke Kristu. Yii bèy, vèn ku yòʼ a kuumé jii, vèn kòóy kilíŋ kìn lèn, a yiì a Kristu wo vèn wayin shilív é wùn wó. Lá vèn yòʼ a sùmrì wún ji yiì a ven. Vèn wáa ghan ji nyaáŋ, a tiír kiwuú kén, a fìʼ,

²¹a kiíy ji Nyùy yòʼ‑oò ló a bavtí a tám se kici se kí‑iì loòn shó fo nsay. A bó yòʼ dzə̀ sá wù bàvtí ven, ven ve á bóŋ kilíŋ bóŋén.

²²Vèn wáa yen rì mo Nyùy yii yii vinyo və́. Wìr jáy, wù màʼ ŋgeʼ sho, e rə̀r mendzən fo wo wù tóŋ fo wun. Vèn ku nèn a yu a dzə̀ fo wun fo wù faari sá ven, e màʼày.

²³A ké wìr veé Isray ki dzə̀ jii, aáwune kùvsín kwaʼtì yév, e wày shilív e Kristu wùn, Nyùy kù siìr áwune é kici fóo fèy. Wù kér vitaáví ve dzə̀ wù yiì bey.

²⁴Vèn kuúmé ji vé‑eè faàrì ven fó kici keé kwaʼ, ke bó á yòʼ yii kfə́rí, e bàrír e kicí ke kí koom kijuŋ kìn kí wùn, a bó yòʼ dzə̀ mo vèn‑eè dzəə̀n. Mo wír veé Israyi dzəə̀n kév tám se sí kuyin é kici foo fèy, a dzə̀ Nyùy kù siìr áwune féyì fo vé‑eè loòn.

²⁵Afə̀r vem, m nén a tàʼ ji vèn kiíy á kilìtì ke kinyò ke kí dzəə̀n é bǎm kinyò fèn. Vèn kiiyì, é la á yòʼ a sùmrì wún ji vèn kòóy kilíŋ bèn, a sì á vifií. A kí dzə̀ jii, kùʼùn wìr veé Israyi tàv kitú, tèn kinyo ke Kristu lèn, a bó á yòʼ waà wíy ten ŋkuuŋkùŋ. Ghán sí wíy gheén, a wír ve Nyùy‑iì shoʼon fo vèn ve bó yòʼ dzəə̀n veé Israyi biímé ne adzə̀m, aáwune vee wír veé Israyi nèn gbù sa sho.

²⁶ A sì ghán sin se Nyùy wíy lì áwune é bàm, aáwune luŋ. A dzə̀ kíwun ke vé‑eè saŋen ji Nyùy suuy a jii: «Mfə̀ə́r wíy lò fo *Sion, e bìnèr wír veé ram Jakov adzə̀m, aá maʼti liì kisaŋ,

²⁷é wáa dzə *mensaŋ me m wíy gwàr vèr áwune e ghan se m wíy a man vinyo vév ve bi ví.»

²⁸Wír veé Israyi kù dzə̀ə́ aŋgàa vibàn fo Nyùy lèn, bìʼ fo á kù dzəə́ tén sáʼka Nyùy woo kùm Kristu. Aá tén bèy, fó kilíŋ a dzə̀ e vèn, vèn à Nyùy nén a suusín. Yii bèy, mo Nyùy‑iì shoʼon ne áwune, bo bó wù yoʼ màʼày áwune. Wù kù dzəə́ koŋ áwune mo wù‑uù kàʼàn atǎr ram yév ji wón véví wíy a dzə ŋkar sə́.

²⁹A kí dzə̀ bey bìʼ fo Nyùy yii li wír, la wù yòʼ kfə̀n màʼày. Wù kaʼ wír e kinyò, wù kù yiì kíwun.

³⁰Vèn‑eè dzə́ fo ŋgùʼ, táv kitú fo Nyùy. A vèn kòóy kilíŋ lèn, wù wáa sham ven, bìʼ fo wír veé Israyi loòn ne, e màʼày wun.

³¹Mo áwune táv kitú lèn, sì ghán se dzə̀ Nyùy shàm ven. A wù yii bèy ji wun fiʼ wìy shàm sá áwune.

³²A kù dzə̀ mo Nyùy yii e wìr dzə̀m. Mo wìr dzə̀m sí táv kitú fo wun, wù nen yiì, á wáa dzə moo vé sháŋé ji á yú ntéŋ, lóo toŋ fo wun, é wun shám á áwune.

³³Vèn ku yèn búʼú mo Nyùy koŋ wíri, rə́r mendzən mev é ŋàŋ. Vifií və́ ví dzə̀ vigháʼán, a wù kì vinyo vidzə̀m. A bó yòʼ dzə̀ wìr kìíy mo wù lo, wù kwàŋ kinyo kfə́, a bó yòʼ dzə̀ wír wù kìíy sá mo wù yii vinyo ve wù yii.

³⁴ A dzə̀ mo vé‑eè saŋen é Ŋwàʼ Nyùy jii: «Wìr wo dzə̀ wù kìíy kinyo ke Nyùy kwaʼtì dzə̀ la? A dzə̀ tìr la wun mo wù wáa yiì vinyo?

³⁵ Wìr wo wù‑uù yiìn ne fò kifá e Nyùy, é bo wù laʼ ŋgaàŋ, dzə̀ la?»

³⁶Vifá vidzə̀m vi‑iì fèr wun woo Nyùy, a yiì wun, bo ví wáa dzə, a kér wun vifá vee shooy. Vèsən kú a burí Nyùy ghán sidzə̀m. Amen.