Read Lamnso Rom 14 Bible Online

Rom 14 - Lamnso bible

Rom 14

¹Afə̀r vem, vèn kì sá jii, wír ámóʼó dzə̀ é vèsə́n mvəm, aá nyaʼ vinyo vímóʼ ví ve melív mev mè tún ji bó yòʼ dzə̀ áwune moo wír Nyùy, á wàa yiì. Vèn kú a lì wír vee shooyi líin e věn wùn mo á dzəə̀n, e làa yòʼ a sòv vinyo vév, é vèn áwune wáa rəsí, a bìʼ mbìʼ.

²Shilív shé wìr wùmòʼ shí biìmé ji wù wáa yi a vifá vidzə̀m. Shé wùmòʼ shí nen shàʼnín fo wù wáa yi nyám, wù nén a yi kfə́ a dzə̀ nyóo see siy.

³Kí nén a dzə jii, a wìr dzə̀ kfə́, a wù yí vifá là nyaʼ, lá wù yòʼ a kay ŋgaà kinyàʼ. Lá wun woo ŋgaà kinyàʼ yòʼ a dìn sa jay və̀y woo wír, bìʼ fo wù yí bèy, a bó Nyùy yòʼ sáʼ wun fo wùn shiliv.

⁴A bó yòʼ dzə̀ wìr wàa tàr kinyo ke wánlè wìr wo sən. Kìn wù jày, kìn bó wù jáy, bo dzə̀ kù sùúy Tàr wov. A dzə̀ Tàr wov sùúy ji wù yoʼ jày á kinyo.

⁵Kímóʼ kí nén a dzə jii, wír ámóʼó lem vishiíy vímóʼ ví jeéy ji vé Nyùy, aámóʼó yén kév ji vishiíy vidzə̀m vi dzə̀ réŋréŋ. Mo wíri sí yén vinyo vìn jeéy jeéy ben, wìr kú a yiì kfə́ ke shilív sə́ shí biimen.

⁶Wìr wo wù lem kishiíy kímóʼ kí jeéy, lem bèy, a wù kù ghvə́m a dzə̀ Nyùy. A wìr wo wù yí nyám wùn à wìr wo wù yí a dzə̀ nyóo see siy, yí bèy, ghvə́m sa Nyùy. A dzə̀ bìʼ fo áwune lóo yi, á kù a bùnrì, a beèrì Nyùy fo vifa foo fèy.

⁷Vèsən wáa kuumé jii, kìn wìr dzə̀ shó, kìn wù kpù, bo bó yòʼ yiì a ŋgaàŋ.

⁸Ke kí dzəə̀n kí dzə̀ jii, kìn vèsən dzə̀ shó, kìn á kpùkír, bo vèsən kù yú a dzə̀ fo Nyùy. Kí nén a dzə jii, kìn á dzə̀ shó, kìn á kpùkír, bo á kù dzə̀ a dzə̀ e Nyùy kiwo.

⁹A Jesus Kristu‑uù kpù fo wíri, e kfə̀n fəə̀ fó kpu ji wáa ker wun wír vee shooy adzə̀m, kìn dzə̀ ve á kpukin ne, kìn ve á dzə̀ə́ sho.

¹⁰Mo vèn kiìn sá vinyo vìn, yií ka, bo wìr kfə́n a dìn jay fər və, é wùmòʼ wáa kay wùmòʼ ji wù nyaʼ kinyàʼ, a bó wù yòʼ kì vinyo? Vèn wáa kiíy jii, vèsən adzə̀m kù wíy tiím a dzə̀ e Nyùy si, é sáʼ wun vèsən.

¹¹ A dzə̀ kinyo ke vé‑eè saŋen jii: «Nyùy Tàr suuy jii, ‹Mo m dzəə̀n shó, wìr dzə̀m kù wíy tsəm e mǒ si, a binsí mo woo Nyùy e shuu wóví.› »

¹²Kí nén a dzə jii, wìr mòʼón mòʼón fo vèsən kù wíy tiím e Nyùy si, a fèr a mo wù‑uù yii.

¹³Mo vinyo vìn vi dzəə̀n ben, vèsən ku bèr fo wìr wáa dìn jay wùmòʼ woo wír. Ke vèsən kú a yiì ki dzə̀ jii, vèsən lóo yiì kinyo ke kiìn vèsən, á wàa yen a fo kí yii, é fər wòsən wùmòʼ jáy kinyo ke shilív sə́ shí téné.

¹⁴Fo kém kí, mo moo wír wo wù tatin ne wùn Tàr wòsən Jesus Kristu, m kì kém jii, vifá ve yi vímóʼ ví yòʼ dzə̀ shó ve dzə̀ wìr wàa leʼ ji vé *kifàn. Yii bèy, a shilív shé wìr shi shàʼnín fo wù yí, wù yàr, bìʼ fo, a wù yì, bo wù jày ne fo wùn shiliv.

¹⁵A ké wìr wo wù kiìn kfə́ ji dzə̀ wun yì kí dzə̀ jii, a wù yí, kù yòʼ kiiy ji dzə̀ kí yiì, fər və tò é kinyò, wù kú a yi, bo bó wù yòʼ dzəə́ koŋ fə́r və woo shooy gheéy. Lá vèn yòʼ a yiì, é kifá ke wìr yí ki wáa bivír shilív shé fər və wùmòʼ, a Jesus Kristu‑uù lo kpù fo ŋgaàŋ ji shilív sə́ shí fíʼ a dzə nyaáŋ.

¹⁶Kí nén a dzə jii, wìr wáa yen a fo kinyo ke wù yii, yén ji dzə̀ ke juŋ ki kfə́n fo wùmòʼ woo wír ji ke bi kí.

¹⁷A bó wír ve á dzəə̀n e Nyùy mvə̀m saʼa yòʼ dzə̀ ji á wáa nonín, a yinín. Ké saʼ Nyùy ki dzə̀ jii, á wáa yiì kinyo a dzə̀ ke kí gheenen Nyùy, é melív mev mè wáa dzə nyaáŋ, é Kiyoy ke Ranén kí kfə́n a yiì, aá wáa yu vijuŋ.

¹⁸A wìr fò kitú kfə́ e Kristu, a yiì vinyo e dzəə foo fèn, Nyùy nèn a sheʼrí ŋgaàŋ, wíri kfə̀n a binsí sa wun.

¹⁹Vèsən ku nèn a yiì vinyo, a dzə̀ á ve ví wáa yiì, é vèsən aàfə́r vesəné wáa dzə kijuŋ, e kfə̀n yiì, é vèsən áwune maysi, e tùúy e Kristu kinyò.

²⁰Wìr wáa yen fó bivír fə́r və wo naŋsin Nyùy ji wír və, e vifá ve ŋgaàŋ yí vi. A dzə̀ wìr yì vifá vidzə̀m. Yii bèy, a wù yí, yii, a fər və jáy kinyo, bo wù sí yii a dzə̀ kinyo ke bi kí.

²¹Kí nen ghèén ji vèsən léʼ á vifá vidzə̀m ve dzə̀ ví yiì, fər wòsən jày kinyo. Kìn dzə̀ meluʼ, lá wìr yòʼ dzə́ə a no, kìn dzə̀ nyám, lá wìr yòʼ dzə́ə a yi.

²²Kinyo ke wìr kiìn fo wùn shiliv ji dzə̀ wun wàa yiì, wù màʼtì kee shooy, é wáa kiíy wùn Nyùy abaà. A bòŋ ké wìr wo wù yii kinyo a dzə̀ ke shilív sə́ shí biimen, a bó shí yòʼ sáʼ wun fo fo.

²³Yii bèy, a wìr wo wù yí kifá, kér méŋnín, kì ji wun jáy a kinyo, bìʼ fo wù yòʼ yii mo shilív sə́ shí biimen ji Nyùy koŋ ji wù wáa yiì. Kinyo kidzə̀m ke wìr yii, a shilív sə́ shí túné ki dzə̀ kinyo ke bi kí.