Read Lamnso Rom 3 Bible Online

Rom 3 - Lamnso bible

Rom 3

¹Mo kí dzəə̀n bey, a dzə̀ wír woó Juda, wù wàa ker rú vijuŋ vímóʼ ví, e shaà wír woo və̀y a? A náŋsín ye á náŋsin áwune ji wír Nyùyi kér séʼ wùmòʼ á?

²Vinyo vìn vi dzə̀, a ví fó rú vijuŋ. A ke kuʼùn kí dzə̀ jii, Nyùy‑iì wày kinyo kfə́ a dzə̀ aáwuné kiwo.

³Yii bèy, a bó ámóʼó yòʼ‑oò ló a way shilív shó. Mo áwune‑eè màʼàyìn kinyo ke Nyùy foon aáwune, a dzə̀ wù màʼày sá áwune, e làa yòʼ dzə́ə yiì kinyo ke wù‑uù kàʼàn áwune shó a?

⁴ Bó yòʼ dzə̀ wù yiì bey. Mo wír adzə̀me fə̀m dzəə̀n aŋgàa kimboʼtì, Nyùy kù yii tíy a dzə̀ e wùn jì réŋréŋ mo vé‑eè saŋen jii: «Nyùy, à lóo suŋnín, á kù a yu, aà suuy a dzə̀ kinyo ke ru kí. A bó yòʼ dzə̀ wìr tàr kinyo ké, e dìn jay.»

⁵Yii bèy, a tàm wír, wù nèn lò, a wovrí jii, «Yiì a liì kisaŋ wo vèsən kérí, bo liì Nyùy wo juŋ və̀n wáa yensín e ŋàŋ. Kí wáa dzə bèy, a dzə̀ vèsən sùúy jii, a Nyùy kfə̀n màʼ ŋgeʼ e vèsən fó liì kisaŋ foo fèy, bo bó wù yoʼ dzəə yiì réŋ a?»

⁶Bó yòʼ dzə̀ bey gheéy. A Nyùy dzə̀ là fóo yen kinyo ke bi kí, e saʼ ji jay, bo wù kfə̀n wíy a saʼ wír veé ndzə adzə̀m fo gha?

⁷Yii bèy, a tàm wìr kù a kìnèn jii, «Mo liì wom kisaŋ yii, a wíri maysì búri liì Nyùy wo juŋ, a dzə̀ Nyùy kfə̀n a saʼ mo fó jay ji m jày ka?»

⁸A wìr lò, a suúy kfə́ bey, wù kù yiì bvə̀ysín a dzə̀ jii, «Á kú a yiì a dzə̀ vinyo ve bi ví, é ve juŋ vi fíʼ a yensín, a shaà bèy.» A dzə̀ kinyo ke wír ámóʼó lór mo shó ji dzə̀ mo m yéʼey wíri. Aáwune kù wíy nəə́ e lòn wo dzə̀ á nə̀ə́ shó.

⁹Mo Nyùy kù wíy a saʼ sa ver vee wír veé Juda fo věr ajay, bo vèr ghèén fo Nyùy e gha, e shaà wír ve bó yòʼ dzəə̀n veé Juda? Bó yòʼ dzə̀ vèr ghèén gheéy. A dzə̀ mo m kì dìnèn ne e vèn jii, kìn wìr dzə̀ wír woó Juda, kìn bó yòʼ dzə̀ wír woó Juda, bo melív mev mè kù sí tíy a dzə̀ é vinyò ve bi ví, a bó yòʼ dzə̀ á bùʼ, e sòr fo fo.

¹⁰ A dzə̀ kíwun ke vé‑eè saŋen jii: «Wìr wo wù gheenen Nyùy yòʼ dzə̀ shó gheéy fə̀m, e mòʼón.

¹¹A bó wìr yòʼ dzə̀ wo wù kiìn vinyo ve dzəə̀n ve ru ví, kìn wo wù taʼ, e kiíy Nyùy.

¹²Wìr dzə̀m bìn ne ndzə̀m e Nyùy, e lày kisáŋ. Wìr wo wù yii kinyo ke ru kí yòʼ dzə̀ shó gheéy, e mòʼón.

¹³ Shuu wóví dzə̀ wú wày wír e sày, a kiliímé kév kí kù fer a dzə̀ kimboʼtì. Jí se sí fəə́ fo áwuné kilayláy sí dzə̀ ndzəʼ, ndzəʼ, wo dzə̀ wù yùyrí wír mo tè búv.

¹⁴ Kinyo ke kí fəə́ fo áwuné shuù ki kù dzə̀ ji lòné shóv wír, aá kù fəər a dzə̀ jí se bi sí.

¹⁵Áwune ŋeʼrì gheéy, á yùy wír.

¹⁶Á nəə e kirə̀ʼ, bo fóo fòy ne, wíri wàa tuŋ akwiiròn.

¹⁷ Bó áwune yòʼ dzə̀ wír kimane gheéy,

¹⁸ a bó á yòʼ yén Nyùy, a wù rún sí yév.»

¹⁹Á mo vé‑eè saŋen é Ŋwàʼ Nyùy, a vèsən kì jii, vinyo ve vé‑eè saŋen shó vidzə̀m vi dzə̀ á fo wír ve á kér ŋwàʼ woo shooy ji á wáa yu fo fo. Mo Nyùy din ajay wíri shó, bo bó yòʼ dzə̀ wìr kfə̀n a ker kinyo kée wovrí gheéy, aá kér fó wìy tiím e wùn si adzə̀m, é wù sáʼ nsaʼ yev.

²⁰Wìr wo dzə̀ Nyùy wàa yen ji woo là jay ji bìʼ fo wun kì lim a mo nsər suuyì yòʼ dzə̀. Ke nsər yii ki dzə̀ jii, yì din, é wìr kiíy ji wun jày ne kinyo.

²¹Á bèy, Nyùy dìn ne lèn kiránén mo dzə̀ yiì wun, e bóo lì wír ji woo là jay. A bó wù yòʼ li bèy ji bìʼ fo ŋgaàŋ kì lim mo nsər Nyùy suuyì. A nsər Nyùy wùn à kinyo ke aŋgàa ntum və́ kí‑iì ló a fìʼtì sa dzə́ə rə̀n.

²²Yì dzə̀ jii, wír ve á wáy shilív e Jesus Kristu wùn lèn adzə̀me dzə̀ á ve Nyùy li ji wír vee là jay. A bó yòʼ dzə̀ Nyùy kfə̀n lì wír e dzəə yìmòʼ jeéy,

²³bìʼ fo wìr dzə̀m kù‑uù jayin ne, la liì wov yòʼ mèé e wo Nyùy taʼà gheéy.

²⁴Yii bèy, mo Jesus Kristu wìyìn ne, e tìn wíri fó lǒn vinyò ve bi ví, a dzə̀ Nyùy lì áwune lèn adzə̀m ji wír vee là jay, é wáa dzə fómo wo wù buʼ áwune shó kisáŋ.

²⁵Wù‑uù tùm Jesus Kristu ji wù kpú fo wíri, e tàŋrí áwune, é wun fíʼ làysìn ajay wìr ve á biimen ntàŋrí woo shooy. A Nyùy‑iì yii bèy, fó dìn ji wun kù yii sáʼ ajay ve wíri jáy adzə̀m. Yii bèy, mo wíri kù‑uù jáy fo ŋgùʼ, la wù yòʼ a saʼ, wù‑uù kfə̀mén, e tìír nsaʼ yev.

²⁶Wù nen dìn a dzə̀ lèn wo Jesus kpuun ji wun kù yòʼ sáʼ rú ajay wìr dzə̀m, aá wáa yen ji wù kù yii yii vinyo və́ tìítiy, là jay, e kfə̀n a yen mo wù li wír líin ji woo là jay, a dzə̀ woo shó wo wù wáy shilív e Jesus wùn.

²⁷Mo kí dzəə̀n bey, bo kinyo ke dzə̀ wìr wàa sùmrì wún shó ki dzə̀ ka? Kí yòʼ dzə̀ gheéy shishàr. A shèm ka? Shèm nsər ye wìr lo, wù wàa dzə ji wun lèm ne à? Àáy, shèm ké ŋgaà wo wù wáy kfə́ a dzə̀ shilív e Kristu wùn.

²⁸Kù dzə̀ mo kí dzəə̀n, bìʼ fo vèsən kiìn kijuŋ jii, a dzə̀ Nyùy lì wír ji woo là jay cáʼ bìʼ fo ŋgaàŋ wáy shilív e Kristu wùn, a bó yòʼ dzə̀ ji wù kì yii mo nsər wìr veé Juda suuyì.

²⁹Mo dzə̀ ji Nyùy dzə̀ wo wír veé Juda cáʼ a? Bó yòʼ dzə̀ sá wo wìr ve bó yòʼ dzəə̀n veé Juda à? Dzə̀ sá wo wìr vee shooy.

³⁰A kù dzə̀ wun Nyùy woo shó e mòʼón. Wù li wir dzə̀m líin ji woo là jay, a kù dzə̀ mo wìr wayin shilív e Jesus Kristu wùn, kìn ŋgaàŋ dzə̀ wír woó Juda, kìn bó yòʼ dzə̀ woó Juda.

³¹Mo kí dzəə̀n bey, bo dzə̀ ji nsər ye Nyùy‑iì foon yòʼ dzəə́ kér kilíŋ à? Bó yòʼ dzə̀ bey gheéy. Ke kí dzəə̀n kí dzə̀ jii, nsər kù tíy a fo, a vèsən tiir lèn a dzə̀ é kiliŋ ke Nyùy‑iì lèmèn ji yì wáa tiy sho.