Read Lamnso Rom 4 Bible Online

Rom 4 - Lamnso bible

Rom 4

¹A dzə̀ vèsən lì mfìʼ vinyò vìn fo ke kí‑iì kooyin Abraham woo tàr à ràm yér yeé Juda.

²A fèn dzə̀ ji Nyùy‑iì yèn wun ji wír woo là jay ji bìʼ fo wù‑uù lim mo Nyùy taʼà, bo yì‑iì dzə̀ wù wàa sùmrì wún. A bó yòʼ‑oò dzə̀ wù wàa ker kinyo ké a sùmrì wún shó e Nyùy si gheéy,

³ bìʼ fo Ŋwàʼ Nyùyi suuy jii, «Abraham‑eè biìmé kinyo ke Nyùy, Nyùy nèn lì wun ji wír woo là jay bìʼ shilív she wù‑uù wayin e wun wùn.»

⁴A bó ké Abraham kìn ki yòʼ dzə̀ moo ké wìr wo wù lìmèn lim, á láʼ, bìʼ fo dzə̀ á kù làʼ ŋgaàŋ láʼan, a bó kee shooy ki yòʼ dzə̀ mbùʼmé.

⁵Ké Abraham ki nén a dzə moo ké wìr wo bó wù yòʼ leey ji wun lim kifá ke dzə̀ á làʼ wun fo fo. Wù wáy kfə́ shilív a dzə̀ e Nyùy wùn ji dzə̀ kù yiì Nyùy, bo wun woo ŋgaà vinyò ve bi ví rán fó nsaʼ. Nyùy nèn lì wun líin ji wír və woo là jay.

⁶A Fòn Davir‑iì lo fèr mo wìr wo Nyùy liìn ji wír woo là jay yii shéʼri, a bó yòʼ dzə̀ ji wù kì lìm lim yímóʼó, bo Nyùy li wun bèy. Wù‑uù suuy jii:

⁷ «Bòŋ ké wìr ve Nyùy laysìn ajay vév, téʼ vinyo vév ve bi ví téʼén.

⁸Bòŋ ké wìr wo bó Nyùy yòʼ kív njò se wù jáyí.»

⁹Mo yòŋèn Fòn Davir vijuŋ vìn, m nén a ghay jii, wù sà‑aà yoŋ a dzə̀ e wír ve á saŋen mbèʼ sév ji wír Nyùy, mo wù‑uù yoŋ sa vee là sáŋ a? Ke vèsən kiìn kí dzə̀ jii, Nyùy‑iì lì Abraham ji wír woo là jay a dzə̀ bìʼ fo wù‑uù wayin shilív e wun wùn.

¹⁰Vèsən nén a leéy jii, wù sà‑aà li bèy, aá náŋsín ne Abraham ji wir Nyùy, mo wù‑uù li, a bó á yóʼ ne kìíy ké *mbèʼ se saŋen sí á? Vèsən kì jii, wù‑uù li, a bó á yóʼ ne kìíy.

¹¹Á nèn wìy a naŋsín a dzə̀ fó bàm ji wáa dzə kisəəm ké kinyò ke Nyùy‑iì yiìn, a wù dzə̀ə́ là náŋsín. A kí dzə̀ jii, Nyùy kù‑uù lì á wun líin ji wír və, bìʼ fo wù‑uù wayin shilív e wun wùn. Abraham nén a dzə ji tàr à wìr dzə̀m e kinyò ke Nyùy. Wù dzə̀ wo wìr ve á wáy shilív e Nyùy wùn, a wù li áwune ji wír və́, a bó á yoʼ fə̀m nàŋsín.

¹²Wù kfə́n a dzə wo wìr ve naŋsíné, a kù dzə̀ vee shó ve á wáy shilív e Nyùy wùn réŋréŋ mo tàr wòsən woo Abraham‑eè wayin, é bo á wìy a naŋsín wun, a bó yòʼ dzə̀ ve á kù náŋsin nàŋsín cáʼcáʼ.

¹³Kímóʼ kí nen kfə̀n a dzə jii, Nyùy‑iì lo kàʼ Abraham wùn à rám rəə́ ji áwune wíy yòv a ndzə. A bó wù yòʼ‑oò kaʼ bèy, bìʼ fo Abraham‑eè gheenen fo wun ji wù kì lem nsər. Wù‑uù kaʼ a dzə̀ bìʼ fo Abraham‑eè wayin shilív e wun wùn, wù lì wun líin ji wír woo là jay.

¹⁴A bèn dzə̀ ji Nyùy yii yii kinyo ke wù kàʼàn a dzə̀ e wìr wo wù gheen fo wun ji bìʼ fo wù lem nsər, bo wìr wo wù wáy kfə́ shilív e Nyùy wùn moo Abraham ji dzə̀ kù yiì Nyùy bo wun gheén, wáy bèy kisáŋ. A bó yòʼ dzə̀ Nyùy yiì kinyo ke wù kàʼàn ŋgaàŋ sho.

¹⁵Kinyo ke dzə̀ nsər kù yiì ki dzə̀ jii, Nyùy lóo sayrí wír fo nsər, shilív shí kù a nyar wun a nyárín. Kù mày cáʼ jii, a nsər‑iì bùŋ, bo bó wíri yòʼ jáy a vinyo e kúmé, tínsin shilív shé Nyùy.

¹⁶Kinyo ke kí yii, bo Nyùy wáa kàʼ wír e kifa a dzə̀ wo wù wáy shilív e wun wùn, kí dzə̀ jii, wun din á ji ŋkàʼmé və kù dzə̀ mbùʼmé, a wun buʼ wír sho kisáŋ, e kfə̀n a dìn sa jii, wù dzə̀ á fo wìr dzə̀m wo wù wáy shilív e wun wùn réŋréŋ mo Abraham‑eè wayin. A bó yòʼ dzə̀ fo wír ve á kér nsər se Mooseri cáʼcáʼ. A dzə̀ wun woo Abraham wo dzəə̀n tàr wòsən vee wír Nyùy adzə̀m

¹⁷ réŋréŋ mo vé‑eè saŋen ji Nyùy‑iì yòŋ e wun a jii, «M lèm ne wò ji tàr à vitum vinín.» Abraham nén a dzə tàr wòsən fo Nyùy si. A dzə̀ wun woo Nyùy wo Abraham‑eè wayin shilív é wùn wó, kfə́n a dzə wun wo wù yii, a wìr wo wù kpuun ne kfə́n e tin, kfə̀n yii, a vinyo ve ví yòʼ siìn ví kooy mo wù‑uù kàʼàn.

¹⁸ Nyùy‑iì lo kàʼ Abraham e kinyò, a bó yòʼ‑oò dzə̀ wù wàa ker kwaʼtì ji dzə̀ á kí kòóy bey. Yii bèy, wù ku yòʼ wày shilív e Nyùy wùn, a shìy ŋkàʼmé woo shooy. Wù nèn wìy lò, a dzə tàr à vitum vinín réŋréŋ mo Nyùy‑iì yiìn ne kàʼ sho jii, «Rám yée wíy a dzə nyanyày moo mejiy meé yuv.»

¹⁹Wáa dzə e ghan se Nyùy‑iì kaʼ wun e kinyò fèn, a wù sí mee kiyá wií, a bó wù yòʼ kér wán. Yii bèy, mo wù fə̀m‑eè sènmèn ne, a Sara woo yeè lav və dzə̀ kár, la wù yòʼ a moònìn gheéy.

²⁰Wù ku wày shilív a dzə̀ e Nyùy wùn, a shìy kinyo ke wù‑uù kàʼàn, kí wáa lùm e wùn shiliv, wù wáa burí Nyùy ghán sidzə̀m,

²¹a wù‑uù biìmé féyì ji dzə̀ Nyùy kù yiì a kinyo ke wù kàʼàn wun sho.

²²Mo Abraham kù‑uù wáy shilív a dzə̀ e Nyùy wùn, kí nèn yiì, wù gheén fo Nyùy, wù lì wun ji wír woo là jay

²³réŋréŋ mo vé‑eè saŋen é Ŋwàʼ Nyùy. A kinyo ke vé‑eè saŋen fó ji Nyùy‑iì lì Abraham líin ji wír və kin ki yòʼ dzə̀ kfə́ wùn mòʼón gheéy.

²⁴Vé‑eè sàŋ sá fo vèsən adzə̀m ve Nyùy li lèn sa ji və́ vee wír, bìʼ fo vèsən wáy shilív a dzə̀ e wun wùn, wun woo Nyùy wo wù‑uù fəərin Tàr wòsən Jesus Kristu fo kpu.

²⁵Kù‑uù sìysì wun ji Kristu kpú fo vèsə́n vinyò ve bi ví, e kfə̀n fə̀ə́r fo kpu ji wun mán ajay vesən, e fíʼ lì ji wír vee là jay.