Read Lamnso Rom 6 Bible Online

Rom 6 - Lamnso bible

Rom 6

¹Mo Nyùy sí laysìn ajay wíri ben, vèsən yee késən lèn? Dzə̀ ji vèsən ku nèn a bùʼtì vinyo ve bi ví, a tonén, aá fíʼ màysì, a yen mo Nyùy buʼ wíri, laysìn ajay vév a?

²Bó yòʼ dzə̀ vèsən kfə̀n a yiì bèy. Vèsən kpù ne fo mbìv vinyò ve bi ví, a bó yòʼ dzə̀ vèsən kfə̀n a dzə, a yiì vinyo vee shooy.

³A vèn kì sá kijuŋ jii, mo vé‑eè wayin vèsən é ndzəv ji vèsən à Jesus Kristu tàtí ne, bo vèsən áwune tàtí sa e kpu ye wù‑uù kpuun fó vinyò ve bi ví.

⁴Mo vé‑eè wayin bey, bo vé‑eè dzəə̀mè vèsən à liì wòsən wo mvə dzə́əmen. A kí dzə̀ jii, vèsən à Kristu tàtí, e kpù, e dù e sày wír adzə̀m, vèsən kfən fəə̀ fó kpu foo fèy réŋréŋ mo Tàr wòsən Nyùy‑iì fəərin Kristu e vitaáví və́ ve ghaʼán ví. A vèsən fəə̀ bey ji vèsən fíʼ a dzə lèn, a ker liì a dzə̀ woó dzə̀ʼə̀m ye fíyi.

⁵A dzə̀ vèsən kìíy bey bìʼ jii, mo vèsən tatin ne Kristu, wáa dzə mo vèsən kpù kpú ye wù‑uù kpuun, bo dzə̀ sá mo Nyùy wíy tatí vèsən áwune, e fəə́r fo kpu.

⁶Vèsən kì ji ké liì wòsən wo mvə kí dzə̀ á jii, mo vèsən à Kristu tatin ne, bo dzə̀ ji vèsən à liì woo shoon kpù ne vèsən à Kristu e kici ké kintam. A vèsən kpù bey ji mensə́ me mè‑eè lim e vèsə́n wùn, aá yii vinyo ve bi ví mè may, é vèsən boy fó vikwàn ve vèsən‑eè reŋ fo vinyò foo fèy.

⁷Vèn kì kijuŋ ji wìr yii kpú, bo bó yòʼ dzə̀ wù dzəə yiì a kinyo. Wù bòy ne fo mensə me mè dom wun, a wù yii vinyo ve bi ví.

⁸Mo kí dzəə̀n ji vèsən tàtí ne Kristu e kpu ye wù‑uù kpuun, bo vèsən áwune dzə̀ sá lèn, aá kfə̀n wíy a dzə sa e dzə̀ʼə̀m yee ŋkuuŋkùŋ.

⁹Vèsən kì jii, Nyùy‑iì fə̀ə́r Kristu fo kpu, a bó wù yòʼ kfə̀n dzəə́ wìy kpu. Kpúu yòʼ dzəə́ kér kinyo fo wun gheéy.

¹⁰Wù‑uù kpù fo wíri bey, e kù nèn laàr vitaáví vé vinyò ve bi ví fo áwuné kitu ŋkuuŋkùŋ, e nèn dù, a dzə lèn a dzə̀ wùn Nyùy.

¹¹Kí nén a dzə jii, mo vèn à Jesus Kristu tatin ne, vèn ku lì vitú vén ji vèn kpu ne vèn áwune, a bó vèn yòʼ dzəə́ yú fo vinyo ve bi ví, vèn sí dzə́ lèn vèn à Nyùy, yú a dzə̀ á fo fo.

¹²Vèn ku nèn lì rì vitú vén ví bey, é la vèn yòʼ dzəə màʼtì, é vinyo ve bi ví wáa dànèr viŋgà vé wùn wo vèn dzəə́ kér lèn, é vèn wáa yiì vinyo ve mensə́ me mè lim sho mè taʼà.

¹³A wìr fə̀m yii ka, lá wù yòʼ biìmé, é kinyo ke bi kí nəə́ shó, é vèn binkir ji wír ve á tómri vinyo ve bi ví. Vèn ku tàtí kitú kén kidzə̀m, e fò a dzə̀ e Nyùy ji wír ve á kpuun ne fo mbìv vinyò ve bi ví, wù fəə́r ven fó kpu foo fèy, vèn wáa dzə lèn, a yu a dzə̀ fo Nyùy ji vèn fíʼ a tomrí vinyo a dzə̀ á ve ví gheenen wun woo Nyùy.

¹⁴Lá vèn yòʼ dzəə fò kitú e mensə́ me mè lim a dzə̀ kinyo ke bi kí. Vèn yòʼ dzəə́ yú a dzə̀ fo nsər yee ji wìr wáa tùr, e bóo fíʼ gheén fo Nyùy. Vèn sí yú a dzə̀ fo Nyùy wo wù bùʼùn ven ji wír və́.

¹⁵Mo wù liìn ne vèsən líin ji wír ve á gheenen fo wun, bo dzə̀ lèn, vèsən wàa yiì vinyo ve bi ví ji bó á yòʼ dzəə́ fan nsər à? Bó yòʼ dzə̀ vèsən wàa yiì bèy.

¹⁶Vèn kì sá jii, a wìr fò kitú kfə́ e wìr ji kwǎn ŋgaàŋ, wù kù a yu a dzə̀ fó fo. Dzə̀ sá réŋréŋ mo wìr fó kitú kfə́ é vinyò ve bi ví, wù kfə̀n ji kwǎn vinyò ve bi ví, a ví kù danèr wun a dzə̀ é kpu ye dzəə̀n yee ŋkuuŋkùŋ. Wìr wo wù foon kfə́ kee kitú ji wun kú a yu a dzə̀ fo Nyùy nén a dzə wo Nyùy li ji və́ə woo wír.

¹⁷A m beerì Nyùy feyì, bìʼ fo vèn‑eè dzə́ fo mbìy, reŋ vikwàn fó vinyò ve bi ví. Á wìy yèʼéy ven kinyo ke dzəə̀n ke ru kí, vèn biímé, e wày é shiliv, a yiì mo kí dzəə̀n.

¹⁸Vèn nén a dzə lèn, a vèn bóy ne fo vikwàn vé vinyò ve bi ví, e fò vitú vén a dzə̀ e Nyùy ji vèn wáa dzə akwǎn vinyò ve ru ví.

¹⁹A m fiʼsìn vinyo ve Nyùy yii vìn e ve vèn kiìn ví ben, é ví fíʼ nəə́ e věn vifii. A kí dzə̀ jii, yì‑iì dzə̀ fó mbìy, vèn tátí kitú kén adzə̀m, e bìnèr ji akwǎn vinyò ve bi ví, a yiì kfəə́ se joònè sidzə̀m, a way vifií a dzə̀ shó. Dzə̀ sá réŋréŋ mo vèn ku tàtí kitú kén kidzə̀m lèn, e fò a dzə̀ e Nyùy, e fíʼ a yiì vinyo a dzə̀ ve ví wáa gheén wun.

²⁰Yì‑iì dzə̀, a vèn dzə̀ə́ akwǎn vinyò ve bi ví, bó vèn yòʼ‑oò kér fó a yu fo Nyùy, bìʼ fo wù yòʼ‑oò siìn tàr won.

²¹Vèn‑eè yii vinyo a dzə̀ ve ví gheenen ven, a dzə̀ víwun ve vèn lo, kuúme lèn, á wàa woomé fo fo. Vèn‑eè yii bèy, kooy ka fó fo? Ví kù‑uù danèr ven, wáy a dzə̀ é kpu yee ŋkuuŋkùŋ.

²²Vèn dzə́ lèn, a Nyùy tín ne ven fó vikwàn vé vinyò ve bi ví. Vèn sì akwàn a dzə̀ vé wun woo Nyùy. Séʼ won woo lèn nén a dzə wo Nyùy sə́ ven, a vèn kér liì a dzə̀ wo wìr və́, du, e nəə́ e dzə̀ʼə̀m yee là may.

²³Vinyo vìn vidzə̀m vi nén a dzə jii, vilaʼày vé vinyò ve bi ví kù dzə̀ á kpú yee ŋkuuŋkùŋ. A ke Nyùy buʼ wír sho búʼun ji fómo woo kisáŋ ki dzə̀ dzəʼə̀m yee là may, ye ŋgaàŋ kooyin bìʼ fo wù tatin wùn Tàr wòsən Jesus Kristu.