Read Lamnso Rom 7 Bible Online

Rom 7 - Lamnso bible

Rom 7

¹Afə̀r vem, vèn kì sá mo kinyo ke nsər ki yii dzə́. Yì kù yii kúr wír, a dzə̀ é ghan se wù dzə̀ə́ e tin. Wù kpú, bo wùn à nsər jàvsìn ne.

²A kù dzə̀ sá mo kinyo ke wiíy wùn lum ki yii dzə́. Nsər dzə̀ jii, wiíy kù kér a fó a dzə wùn lum və, e dù, e meé e ghan se lum wíy kpu. A lum kpù, bo nsər yee ji wù kú a dzə e lum laʼ yòʼ kfə̀n dzə̀ə́.

³A wù kòŋ lèn, wù dù, e yèn lúm wo sən, a bó yòʼ dzə̀ wù yèn, a və́ə woo lúm dzə̀ə́ sho, bo sì kinyo ke bi kí. A lum kpù ŋkuŋ, bo bó yòʼ dzə̀ə́ kinyo ke bi kí.

⁴Afə̀r vem, kù dzə̀ sá mo kén kí dzəə̀n. Vèn‑eè dzə́ fo mbìy, tur dzə́ə a dzə̀ fó nsər ji á fíʼ gheén fo Nyùy. Yii bèy, mo vèn tatin ne lèn vèn à Kristu, wáa dzə mo vèn kpù kpú ye wù‑uù kpuun, bo vèn à nsər jàvsìn ne, a vèn sì wír wun woo Kristu wo Nyùy‑iì fəərin fó kpu. Vèsən adzə̀m nén a dzə sa lèn a dzə̀ bìʼ wun, wù wáa dànèr vèsən, á wáa yiì vinyo ve ví gheenen fo Nyùy.

⁵Yì‑iì dzə̀ fó mbìy, a vèsən kù yii a dzə̀ mo mensə́ mèsən mè limè, a bó mè yòʼ‑oò koŋ, a yu fo nsər ye yì‑iì kér vèsən. Yì din jay, yì nèn màysì, e ŋàʼár mensə́ mèsən, vèsən wàa yiì vinyo ve ví wáa way vèsən wáyín é kpu yee ŋkuuŋkùŋ.

⁶Yii bèy, vèsən bòy ne lèn fo nsər ye yì‑iì kúr vèsən moo vé sháŋé rə̀n, bìʼ fo vèsən kpuun ne fo fo. A bó vèsən yòʼ dzəə́ yú a dzə̀ fó nsər ye á saŋen a dzə̀ é ŋwàʼ ji á fíʼ a yiì kinyo ke kí gheenen Nyùy. Vèsən sí kér dzəʼə̀m a dzə́ ye fíyi, yú a dzə̀ fo Kiyoy ke Ranén kí.

⁷ Mo nsər sí ŋáʼar mensə́, a mè yii vinyo ve bi ví, a dzə̀ vèsən sùúy ji ka lèn? Dzə̀ ji nsər se Nyùy‑iì foon sí dzə̀ kinyo ke bi kí a? Bó yòʼ dzə̀ bey gheéy. Ke kí dzəə̀n kí dzə̀ jii, yiì nsər, é bo m kiíy kinyo ke dzəə̀n ke bi kí. A là fo nsər wáa shaʼnín jii, «Lá wìr yòʼ a siimé kifá ke dzəə̀n ké wìr wùmòʼ», bo bó m yòʼ‑oò ló a gwàrìr ji m yii siíme bèy, a dzə̀ á jay.

⁸Mo nsər sí sháʼnin kinsiimè kìn, mensə́ mem me mè koŋ a dzə̀ vinyo ve bi ví mè nén a ŋaʼár shilív shém, m wáa siimé vifá vinín. Kí nén a dzə jii, bó yòʼ dzə̀ mensə́ mem mè ŋàʼár shilív shém ji shí yii kinyo, a bó mè yén fó nsər ji dzə̀ á kinyo ke bi kí.

⁹Yì‑iì dzə̀, a bó m yóʼ ne kìíy nsər, kinyo kímóʼ kí yòʼ‑oò ŋáʼar shilív shém gheéy. Mo m kiiyin, shí nen ŋàʼáy, m kéʼ, e lòo yiì vinyo ve bi ví, ví nén yùyrí mo yúyrín.

¹⁰Kí nén a dzə jii, nsər ye Nyùy foon ji m wáa lèm, e bóo fíʼ lùŋ rə̀n, lò ne, e wày á mo wáyín é kpu.

¹¹A mensə́ mem mè kù kòóy kintóʼ a dzə̀ fó nsər, e bóo boʼtí mo ji lá m yòʼ a yiì a mo yì suuyì. Vinyo ve bi ví nen kùʼ e mǒ wùn, e yùyrí mo yúyrín.

¹²Mo kí fə̀m dzəə̀n bey, bó yòʼ dzə̀ ji nsər Nyùy sì á kinyo ke bi kí. Vinyo ve nsər suuy vidzə̀m vi lo a dzə̀ fo Nyùy, a dzə̀ vinyo ve ru ví, e kfə̀n a dzə vijuŋ fo wíri.

¹³Kí wáa dzə bèy, bo dzə̀ ji nsər ye yì dzəə̀n e juŋ rə̀n kfə̀n yúyri mo yúyrín á? Àáy, bó yòʼ dzə̀ bey, kù yúyri jay wom mo. A mensə́ mem mè kù li a dzə̀ nsər ye yì dzəə̀n e juŋ rə̀n, ŋáʼar shilív shém shó ji shí wáa yiì kinyo ke nsər shemè. Mo vinyo ve m yii vìn vi kù wáy mo wáyín é kpu, kí nén a dìn kiránén jii, vinyo vee shoon vi yòʼ dzə̀ á ve juŋ vi gheéy. Nsər nén a dìn kfə́ ji vinyo vìn vi dzə̀ á jay, é ví fíʼ màysì, a yensín rú féyì ji kinyo ke bi kí.

¹⁴Vèsən kì jii, yii fó Nyùy nsər a ji yì wáa dànèr shilív shé wìr. A m dzə̀ kém ji wír wo mensə́ mè lim e wùn wó, ŋáʼar shilív sə́, a wù reŋ vikwàn fó vinyò ve bi ví.

¹⁵Ke kí kooy mo kí nén a dzə jii, m lóo yiì kinyo, la m yòʼ kìíy a mo kí dzəə̀n. A kí dzə̀ jii, bó m yòʼ yii kinyo, a dzə̀ á ke shilív shém shí koŋ ji m yii. M lo fo fo, m nèn yiì a dzə̀ ke shilív shém shí banè.

¹⁶Mo m yii bèy, kiiy ji dzə̀ jay, kí nén a dìn ji shilív shém shí bínsi a ji kinyo ke nsər suuy ki dzə̀ ke ru kí.

¹⁷A bó yòʼ yii mo vinyo vìn fo mǒ shiliv, yú. Yii mensə́ mem me mè koŋ kfə́ a dzə̀ vinyo ve bi ví, ŋáʼar shilív shém.

¹⁸A m kì ji mensə́ me mè lim e mǒ wùn mèn mè yòʼ dzə̀ mè wàa kòŋ kinyo ke ru kí gheéy. Shilív shém shí bínsi kinyo ji dzə̀ ke ru kí, m lo ji m yii, mensə́ mem mè shàʼnín.

¹⁹A kù dzə̀ mo m kì suuyin ne jii, m yòʼ yii a vinyo ve juŋ vi ve m koŋ ji m wáa yiì. M ku nèn a yiì vinyo a dzə̀ ve bi ví, a bó m yòʼ koŋ, a yiì vee shooy.

²⁰Mo m yii vinyo, a dzə̀ ve bó m yòʼ koŋè, bo bó yòʼ yii mo, yú. Kù yii mensə́ me mè lim e mǒ wùn, ŋáʼar shilív shém.

²¹M nén a yen vinyo vìn vidzə̀m ji kù sì nsər yem á jii, m lo ji m yii kinyo ke dzəə̀n ke juŋ ki, kù nèn fəə̀ ke bi kí.

²²A shilív shém shí kù yòʼ koŋ nsər ye foon Nyùy, bínsi feyì.

²³Mensə́ mem mè nén a dzə kfə́, a mè yú a dzə̀ fo rə́ə yee nsər, a yì funèn ye shilív shí bínsi rə̀n. Vinyo ve bi ví ku nèn a lìm e mǒ wùn, a kur mo ji wir sháŋ.

²⁴Bo wìr woo là ke juŋ ki moo mo ben dzə̀ woó le? Wìr wo dzə̀ wù sə̀ mo fo mensə́ mèn me mè lim e mǒ wùn, dom mo é kpu dzə̀ la?

²⁵Kinyo ke dzə̀ m yiì fo mǒ vitaaví kí kù dzə̀ cáʼ jii, m wáa binsí a nsər Nyùy fo mǒ shiliv, a bó yòʼ dzə̀ m wàa yiì mo yì suuyì. Mensə́ mem mè sí tíy a dzə̀ é nsər yee ji m wáa yiì a vinyo ve bi ví. A m kì ji Nyùy sə̀ ne a mo, Tàr wòsən Jesus Kristu fəə́r mo fó lòn fen. M nén a beèrì Nyùy fo kee shooy ki féyì.