Read Lamnso Rom 8 Bible Online

Rom 8 - Lamnso bible

Rom 8

¹Kí nén a dzə jii, wìr wo wù tatin wùn Jesus Kristu bòy ne a fo lǒn vinyò ve bi ví.

²Mo m tatin vèr Jesus Kristu, Kiyoy ke kí fó dzəʼə̀m yee là may ki sí lim e mǒ wùn, a m sí yú lèn a dzə̀ fo rə́ə yee nsər. M bòy ne fo nsər ye yì‑iì lim e mǒ mensə, ŋáʼar vinyo ve bi ví, wáy mo wáyín é kpu.

³Nyùy yiì ne kinyo e mǒ wùn, a bó m yoʼ lò, a tùr a dzə̀ fó nsər, m yiì, bìʼ fo mensə́ mem mè yòʼ koŋ kinyo ke nsər suuyì. A kí dzə̀ jii, Nyùy‑iì tùm Wán wo dzəə̀n və́ə, wù wìy, e lì mbom a dzə̀ ye wìr wo wù yii vinyo ve bi ví. Wù‑uù kpù fo wírí ajay, nèn ndzəə̀r vitaáví vé vinyò ve ví lim aáwuné wùn vee shooy.

⁴Vèsən nén a dzə lèn, a dzə̀ vèsən wàa yiì vinyo ve nsər Nyùy suuy vidzə̀m, a vèsən fèn yú a dzə̀ fo Kiyoy ke Nyùy ki, e làa yòʼ a yu a dzə̀ mo mensə́ mè lim e vèsə́n wùn.

⁵Wìr wo wù yú a dzə̀ mo mensə́ mè lim e wun wùn, kù yii wáy vifií a dzə̀ é vinyò ve mensə́ mè taʼ ji wù wáa yiì. A wìr wo wù yú kfə́ a dzə̀ fo Kiyoy ke Nyùy ki, nèn tiir vifií və́ a dzə̀ é kinyò ke koŋ wun woo Kiyoy ke Nyùy.

⁶Wìr wo wù tiir vifií é kinyò ke koŋ mensə́ dzə̀ ji ŋgaàŋ kpù ne fo Nyùy mbìv. Yii bèy, wìr wo wù tiir kfə́ vifií é kinyò ke koŋ Kiyoy ke Nyùy nén a dzə e tin fo Nyùy mbìv, wùn Nyùy wáa dzə ji nyaáŋ.

⁷A dzə̀ mo dzə̀ kí kù a dzə, bìʼ fo wìr lóo tiír vifií a dzə̀ é vinyò ve koŋ mensə́ mvə, bo wù sí tún ké Nyùy. A bó yòʼ dzə̀ wù kfə̀n a kòŋ ji wun yú nsər Nyùy. A wù fə̀m kì koŋ fó yu, bo dzə̀ la wù yòʼ yù.

⁸A bó yòʼ dzə̀ wír ve á yú a dzə̀ mo mensə́ mev mè limè, á kfə̀n a yiì kinyo ke kí wáa bòŋ Nyùy gheéy.

⁹Yii bèy, kén kí yòʼ dzə̀ bey. Vèn yòʼ dzəə́ dzə́, yú a dzə̀ mo mensə́ mè lim e věn wùn. Vèn sí yú a dzə̀ fo Kiyoy ke Nyùy ki, a kí bèn dzə̀ rú e věn meliv mo m kiìn. Vèn wáa kuumé jii, a Kiyoy ke Kristu kìn ki bùŋ fo wìr shiliv, bo bó ŋgaàŋ yòʼ dzə̀ wir Kristu gheéy.

¹⁰A Jesus Kristu sì e věn meliv, bo bó vèn yòʼ dzəə́ wìy nəə́ e kpu, bìʼ fo Nyùy liìn ne ven ji wír vee là jay. Kifá ke kí wíy kpu ki kù mày wún wo vinyo ve bi ví tarin shó.

¹¹Kí nen kfə̀n a dzə jii, a Kiyoy ke Nyùy wo wù‑uù fəərin Jesus Kristu fo kpu ki dzə̀ e věn meliv, bo Nyùy wíy yiì sa, é wún wón wo wú wíy kpu və̀ne kfən fəə̀ fó kpu a dzə̀ bìʼ Kiyoy ke kí siìn shó.

¹²Á bèy lèn afə̀r vem, a dzə̀ lèn vèsən wàa yu fo Kiyoy kee shoon ki, e làa yòʼ dzə́ə a yu a dzə̀ mo mensə́ mè lim e vèsə́n wùn.

¹³A vèn yú a dzə̀ mo mensə́ mè lim e wùn, bo vèn kù wíy nəə́ a dzə̀ é kpu. Vèn lo, a yu a dzə̀ fo Kiyoy ke Nyùy ki, e laàr vinyo ve mensə́ mè yuŋrì e věn wùn, bo vèn wíy lùŋ.

¹⁴Wír ve dzəə̀n rú wón Nyùyi nén a dzə ve á yú a dzə̀ fo Kiyoy ke Nyùy ki, a kí danèr áwune.

¹⁵Nyùy yòʼ‑oò lo fò ven shilív a dzə̀ shé kwàn ji á wáa fàn wun fánen. Wù‑uù fò ven shilív, a dzə̀ shé won. Vèsən nén a yòŋrì Nyùy woo Tàr wòsən yóŋrin ji Taàtá, Taàtá.

¹⁶A yii Kiyoy ke wun woo Nyùy ke kí bánri melív mèsən, aá kiiy rú ji vèsən sì á wón və́.

¹⁷Mo vèsən siìn wón və́, bo vèsən wíy nəə́ sa e vijùŋ ve wù lèmèn e wír vəə́ adzə̀m, a kù dzə̀ víwun ve Kristu‑uù nəən shó. Vèsən kù wíy nəə́ sho, a vèsən fen biìmé sa ŋgeʼ ye Kristu‑uù biimen.

¹⁸A m kì féyì jii, bó yòʼ dzə̀ á fìʼsìn ŋgeʼ ye vèsən yén fo shintàm fèn wùn à vijuŋ ve vèsən wíy a ker e yuv ghán sidzə̀m vi gheéy.

¹⁹Vifá ve Nyùy bomen vidzə̀m vi sí shiy, njeʼ feyì jii, á yén á mo Nyùy wíy yiì e wón vəə́ e ghan foo fèy.

²⁰A ví njeʼ bèy, bìʼ fo Nyùy kàʼàn ne ji wón vəə́ wíy bòy fo ŋgeʼ ye wun màʼàn e vifá veé ndzə fèn vi vidzə̀m, lóo nəə́ e wùn mvə̀m vijùŋ é vifá ve wù‑uù bomen vidzə̀m vi boy sá fo ŋgeʼ ye ví yén lèn, a bó á yòʼ kì fó fo rə̀n, e nə̀ə́ aáwuné bàm. Ndzə rə̀n dzə̀ lèn, a vifá vi shaa shaàn vimòʼón vimòʼón, ŋeéme, layì. A yiì Nyùy, e kfə̀n kàʼ ji wíy lòo dzə e ghan see shó, é wun fəə́r ndzə rə̀n fo vikwàn fóo fèn, e shèŋrì, é la kifá kímóʼ kí yòʼ kfə̀n dzə́ə a bivír kímóʼ kí, é la kifá ki yòʼ dzə́ə a kpu, a fòy.

²¹

²²Vèsən yén sa mo vifá ve Nyùy bomen vidzə̀m vi kù yén ŋgeʼ e meé lèn, dzəm moo wiíy wo wù lúm wán.

²³A bó yòʼ dzəm vifá vee shooy cáʼcáʼ gheéy. Dzə̀ mo vèsən kù dzəm sa, vèsən vin ve á sí kér Kiyoy ke Nyùy ji sàʼ vijùŋ ve Nyùy lèmèn e wón vəə́, a vèsən kù shiy, njeʼ feyì ji Nyùy maysi, e fèr vèsən ji wón və́, aá koóy wún wo fíyi.

²⁴Vèsən kì jii, Nyùy lì vèsən líin lèn ji wón və́, e kàʼ ji á wáa shìy, ghán sí wíy gheenè, é wun maysi kifá ke wun‑eè lèmèn ji ké won və́. A vèsən kì sí kérí, bo bó á yòʼ kfə̀n kì wáy vifií, shiy a dzə̀ Nyùy, bìʼ fo bó yòʼ dzə̀ wìr wàa shìy kifá, a wù sí kér e kiwo.

²⁵Yii bèy, mo vèsən kù shiy kifá, a bó á yóʼ ne yèn, vèsən ku nèn a yu a dzə̀ fo ŋgaà kàʼ, a leéy fó mbìy, a shìy, là dór.

²⁶Kiyoy ke Nyùy ki nen kfə̀n a sə vèsən, á wáa bùnrì Nyùy, a kiíy kinyo ke dzə̀ á sùúy. A bó yòʼ dzə̀ vèsən kìíy fo vèsə́n vifii, bìʼ fo melív mèsən mè yòʼ kiìn kinyo ke Nyùy koŋ kijuŋ. Kiyoy ke Nyùy ki lo, kí nèn lì kirə́ʼ késən, a toŋ fo Nyùy, a fèr kinyo ke kí dzəə̀n e vèsə́n meliv e dzəə ye bó yòʼ jòʼsì wír, wù kìíy móo fèr.

²⁷Nyùy wo wù yén vinyo ve ví dzəə̀n e wìr shiliv vidzə̀m, nen kìíy kíwun ke Kiyoy ki tóŋ fo fo. A Kiyoy ki kù yii tóŋ a dzə̀ fo wìr kinyò ke wù kiìn ji Nyùy koŋè.

²⁸A vèsən kì jii, Nyùy yii sə́ vèsən ve á koŋ wun, yii, a vinyo ve ví kooy vèsən vidzə̀m vi binkìr fo vèsən ji ve juŋ vi. Dzə̀ vèsən vin ve Nyùy liìn ji wír və́, á wáa yiì vinyo ve wù‑uù sìysìn vidzə̀m.

²⁹Wù‑uù sìysì jii, wír ve wù‑uù yiìn ne kìíy ji wun wíy lì adzə̀me wíy a bìnkìr, a dzə moo Wán və, é wun woo Kristu nèn kòóy afə́r anín, a dzə ji wo mbìy.

³⁰Mo Nyùy shoʼon áwune bey, e nèn lì ji wír və́, e nàŋsín ji wír vee là jay, e kàʼ ji áwune wíy nəə́ sa e wùn mvə̀m vijùŋ.

³¹Mo Nyùy yii vinyo vìn e vèsən ben, bo vèsən dzə̀ é le lèn? Wìr wo dzə̀ wù kfə̀n yiì vèsən e kinyo ki dzə̀ la?

³²Wun woo Nyùy kù wíy màysì, a yiì vinyo vìn e vèsən. Mo wù‑uù foon Wán və, wù kpú fo vèsən, e làa yòʼ a bavtí, bo vèsən kì ji wù yòʼ wíy kìm kifá kímóʼ kí fo vèsən gheéy.

³³Wù‑uù lì ne vèsən, e nàŋsín ji wír vee là jay. A dzə̀ wìr wùmòʼ kfə̀n dìn jay wìr ve Nyùy liìn ne vìn, á nə̀ə́ é nsaʼ a?

³⁴Wìr dzə̀ shó wo dzə̀ wù wày vèsən é ŋgeʼ ji nsaʼ koò vèsən á? Jesus Kristu‑uù kpù ne fo vèsə́n ajay, e kfə̀n fəə̀ fó kpu, a wù dzə́ lèn e Nyùy ghaŋ, tóm vinyo vesən.

³⁵Mo kí dzəə̀n ben, bo kinyo ke dzə̀ wìr yiì kí dzə̀ ka? A dzə̀ wìr tìnér dzə́ə fo Kristu wáa kòŋ vèsən á? A vèsən fə̀m yén a dzə̀ ŋgeʼ, kìn gháʼ ka vèsən, aá fə̀m ban vèsən bánen, kìn koó jíŋ, kìn gháʼ kitan, kìn wíri bémer vèsən, aá fə̀m yúyri vèsən yúyrín, bo dzə̀ ji Kristu yòʼ dzəə́ koŋ vèsən a?

³⁶ A dzə̀ ke vé‑eè saŋen ji wír ámóʼó bí Nyùy a jii: «Éè Nyùy wor, kpúu siʼìr ver vishiíy vidzə̀m bìʼ wò, a vèr sì moo njiì wo á sí du, e see.»

³⁷Vinyo vìn vi kooy vèsən ben, a Kristu wo wù‑uù kòŋèn vèsən, kù dzəə́ leey fo vèsən, yii, a vèsən só vinyo vee shooy soón, la ví yòʼ a sə̀ʼ vèsən gheéy.

³⁸A m kì kijuŋ feyì jii, bó yòʼ dzə̀ kifá kímóʼ kí kfə̀n shèm fo Nyùy wáa kòŋ vèsən, a sə vèsən. Kìn vèsən dzə̀ shó, kìn á kpùkír ne, bo bó yòʼ dzə̀ kifá ki shèm. Kìn dzə̀ nshèelav se Nyùy, kìn dzə̀ sé Satan, a fə̀m dzə̀ vinyo veé ndzə yee lèn, kìn ye yì dzəə́ wìy a wìy, bo bó yòʼ dzə̀ kifá ki shèm gheéy.

³⁹Kìn wìr dzə̀ feé, kìn wù dzə̀ é ntoò yùv, kìn wù nə̀ə́ e loònsay, bo bó kifá ki yòʼ dzə̀ shó ndzə e dzə̀m ke dzə̀ kí shèm fo Nyùy wáa kòŋ vèsən. Vèsən vin ve á tatin vèsən à Taàtá wòsən Jesus Kristu.