Read Lamnso 1 Korin 10 Bible Online

1 Korin 10 - Lamnso bible

1 Korin 10

¹Afə̀r vem, m nén a tàʼ ji vèn səəm á kinyo ke kí‑iì kooyin atǎr ram yesən ve vé‑eè ghán wùn à Mooser. Áwune‑eè ghán adzə̀m e sar mbàʼ, a yì danèr áwune. Á kfən dù, e nə̀ə́ e ndzəv ye kuʼùné, e tùmsín e nsay.

²Mo áwune‑eè yú a dzə̀ fo Mooser, e bó a ghan e sar mbàʼ, e kfə̀n dù, e nə̀ə́ e ndzəv fey, kí nèn a dìn jii, áwune dzə̀ á moo wír ve á wayin é ndzəv ji və́ vee wír.

³Wír vìn adzə̀me kfə́n a yi vifá ve yi ve ví‑iì lo a dzə̀ fo Nyùy,

⁴a no sa mendzə́v me mè‑eè lo fo Nyùy. A wù‑uù yii, a mè fəə́ a dzə̀ fó kilan. A kilán kee shooy ki dzə̀ Kristu wo wù‑uù ghán wùn áwune.

⁵Mo áwune fə̀m‑eè rə́si yén vinyo vìn vidzə̀m bèn, kùʼùn wìr yòʼ‑oò ló a yiì kinyo ke kí wáa bòŋ Nyùy gheéy. Wù nèn yùyrí vee shooy, e màʼrì dzə́n sév é woʼ fóo fèy.

⁶Kinyo ke kí‑iì kooyin áwune vee fó ŋgùʼ kin ki nén a dzə ntir fo vèsən vee lène ji lá vèsən yòʼ a yaŋrí a ji á wáa yiì vinyo ve dzəə̀n ve bi ví moo vee shooy vee wír.

⁷ Lá vèsən yòʼ a ghvəm kifá kímóʼ kí ji Nyùy mo wír vìne‑eè ghvə́mé. Vé‑eè sàŋ é Ŋwàʼ Nyùy jii, «Wír vìne dzəʼə̀m, yí vitú vév, nó meluʼ, á nèn tsə̀ə́m a dzə̀ ceŋ, a sheʼrí shibvə̀m.»

⁸Lá vèsən yòʼ a jàŋ kinjàŋ mo wír vìn ámóʼó‑oò jaŋè, Nyùy nèn wìy lò e kishiíy kímóʼ kí, e yùyrí wír vee shooy nsə̀kì nshòv taár e mbaà.

⁹Lá vèsən yòʼ a ghiʼ sa Nyùy ji wù ku yiì kinyo mo wír vìn ámóʼó‑oò ghíʼí, Nyùy nèn tsə̀nsí yó, sí térí wír vee shooy, e laàr.

¹⁰Lá vèsən yòʼ a sày Nyùy mo wír vìn ámóʼó‑oò yii, wù tsə́nsí nshìylav rə, yì laàr áwune.

¹¹Vinyo ve ví‑iì kooyin wír vìn vidzə̀m vi dzə̀ kisəəm ke kí din mo kí wíy koóy wír ve á yii sa vinyo vee ben. A vé‑eè sàŋ é ŋwàʼ bèn ji ví fíʼ a tir vèsən vee lán ve á sí méʼ ghán se ndzə wíy mày.

¹²Kí nén a dzə jii, vèsən kiíy á mo á tiimen, é wìr wo wù kwaʼtì ji wun tíy kitávín wáa yen a ji tàm wù gbù.

¹³Vèn wáa kiíy ji vinyo ve ví mumrì ven ví kù dzə̀ sáa ve ví yii mum wír ámóʼó. A Nyùy kù dzə̀ vèsən áwune, mo wù‑uù kàʼàn, a bó yòʼ dzə̀ wù biìmé ji vinyo vee shoon vi shaa vitaáví vesən. Mum yee shooyi lóo koóy ven, é wù kú a dìn dzə́ə ye dzə̀ vèn sò shó, e tòsín e mvəm wó, e làa yòʼ gbù.

¹⁴Ŋkar sem, m nén a tir ven ji vèn wáa nyeŋ a vinyo vee kùm anyùy vidzə̀m.

¹⁵A m suuy e vèn ben moo wír ve á kér sa vifií. A dzə̀ kù kìíy ven ji kinyo ke m suuy kìn ki sà dzə̀ rú á.

¹⁶Mo vèsən lo, á lì bàr melùʼ, e beèrì Nyùy, a no fo fo, bo bó vèsən yòʼ tàtí, a tinnín a dzə̀ bàr mensə me Kristu à? Vèsən kfə́n lóo beʼtí kibán keé ghan see shooy, lóo yi, bo bó vèsən yòʼ tàtí a dzə̀ é kitu ke njinìn kikoŋ wo dzəə̀n wún Kristu à?

¹⁷Mo vèsən ve á yí kibán kìne fə̀m dzəə̀n wír anín, a kibán ki dzə̀ ntuʼ e mòʼón, kí nén a dìn ji vèsən sì á wír amòʼón.

¹⁸Vèn li mfìʼ fo kinyò ke wír veé Israyi yii. Áwune lì kév ji wìr dzə̀m wo wù kfə́r nyám ye á cuùn Nyùy sho kù tàtí ne a wùn Nyùy wo á kì cu.

¹⁹A dzə̀ vèn kìíy kinyo ke m fiʼsìn kìn a? Dzə̀ ji m suuy ji vifá ve wíri cu anyùy vév shó vi kér kinyo kímóʼ kí a? Kìn ji anyùy vee shooyi dzə̀ Nyùy rú à?

²⁰Àáy, bó yòʼ dzə̀ bey. Ke m suuy ki dzə̀ jii, wír ve bó á yòʼ kiìn Nyùy wo ruú kwaʼ ji á cu a dzə̀ anyùy vév, aá cu a dzə̀ nshèelav se Satan, a bó á yòʼ cu Nyùy wo ru gheéy. A bó m yòʼ koŋ ji vèn wáa yi vifá vee shooy, a tatí a vèn à nshèelav se Satan si.

²¹Bó yòʼ dzə̀ vèn wàa no fo Tàr wòsən Jesus Kristu bàr, e kfə̀n a no fo wo dzəə̀n wo Satan. Bó yòʼ dzə̀ vèn wàa yi vifá ve yi ve Tàr wòsən, e kfə̀n a yi ve dzəə̀n vé Satan.

²²Bó kí yoʼ ghèén ji vèsən wáa yiì kinyo, a tinsín Nyùy. Vèn kì sá ji wù tàv féyì, e shaà vèsən.

²³Mo vèsən siìn wír Kristu, wír ámóʼó lo, á nèn a suúy ji bó kinyo kímóʼ kí yòʼ dzəə́ kér a nsər fo áwune. Yii bèy, a bó yòʼ dzə̀ vinyo vidzə̀m ve dzə̀ ví sə̀ wír, a bó yòʼ dzə̀ vinyo vidzə̀m ve dzə̀ ví nàŋsín liì wìr.

²⁴Lá wìr yòʼ a dìy a dzə̀ kitú kfə́. Wù wáa dìy ji wun sə́ sáa fə́r və.

²⁵Kee kùm vifá ve yi ki nén a dzə jii, a dzə̀ vèn wàa yi a vifá ve á fiinè e way vidzə̀m, é la wìr yòʼ a sòv, fo shilív shí wáa saʼ wun.

²⁶ A dzə̀ vèn wàa yiì bèy, bìʼ fo Ŋwàʼ Nyùyi suuy jii, «Kitú ke nsay ki dzə̀ ké Nyùy Tàr, à kifá kidzə̀m ke kí dzəə̀n shó ki.»

²⁷Wír wo bó yòʼ dzəə̀n wir Kristu jaŋ wír fo vèn é vifa ve yi, wù biìmé, e dù. Wù du, wù kù a yi vifá vidzə̀m ve á foon e wun, e làa yòʼ a sòv, fo kitú kfə́ kí wáa saʼ wun.

²⁸Yii bèy, a wìr tòʼ ji dzə̀ vifá ve á cuùn anyùy sho, la vèn yòʼ dzəə yì, fo wìr wo wù kì toʼon woo shooy yén, a kwàʼ ji vèn dzə̀ é ŋgoo wìr ve á cu anyùy, e làa yòʼ kfə̀n yi sa bìʼ shilív she bvəərín shí.

²⁹A m yoŋ shilív shin a dzə̀ shé ŋgaà toʼ, bìʼ fo wù yén ji dzə̀ á kinyo ke bi kí, a vèn fə̀m yén kén ji bó kí yòʼ kér kinyo. Yii bèy, a dzə̀ wìr wùmòʼ wàa suúy ji sà dzə̀ wun wàa leéy kinyo ke wìr wo sən kwaʼtì, e bó a yiì kinyo ke kiìn wun bìʼ ka á?

³⁰Mo wun yí vifá vee shooy, beerì Nyùy, a sà dzə̀ á kfə̀n a sày wun fo gha á?

³¹M nén a suúy kém jii, a wìr fə̀m yí kifá ke yiín kí, kìn wù nó a dzə̀ ke noón kí, vèn kù a yiì vinyo vee shoon vidzə̀m ji wíri wáa yen, a burí a dzə̀ á Nyùy.

³²Lá vèn yòʼ a yiì kinyo ke kí wáa jivír wír ámóʼó, kìn dzə̀ veé Juda, kìn veé vitum vímóʼ ví, kìn wír ve dzəə̀n vé kintatì ke Nyùy.

³³Vèn wáa yiì réŋréŋ mo m yii. M yii vinyo vém vidzə̀m ji ví wáa bòŋ a wir dzə̀m. A bó m yòʼ diy a dzə̀ kém kee kitú, m diy fo wìr dzə̀m ji m fiʼ yiì, aáwune wìy lùŋ.