Read Lamnso 1 Korin 13 Bible Online

1 Korin 13 - Lamnso bible

1 Korin 13

¹A m fə̀m lò, a suŋnín lám sé vitum sidzə̀m, e kfə̀n a suŋnín wó nshèelav se Nyùy, a bó m yòʼ kér koŋ fo wíri, bo m yii a dzə̀ njèʼèr moo ŋgèm ye yì ráʼkir ràʼkín, kìn kisha ke á kwáʼá.

²A Nyùy fə̀m bùʼ mo ji m wáa yu kinyo fo wùn shuù, a tiisí e wíri, a kiíy vinyo vidzə̀m, e kfə̀n a kiíy ve ví‑iì dzəə̀n é kilìr, a way shilív ji dzə̀ Nyùy yiì, m wàa shàʼàr agwan, a bó m yòʼ koŋ wíri, bo m lày kisáŋ.

³A fə̀m dzə̀ ji m javti kéŋ yém e dzə̀m e vé ŋgeʼe, e kfə̀n fò kitú kém ji á ton bìʼ kinyo ke Nyùy, a bó m yòʼ koŋ wíri, bo kù dzə̀ kisáŋ, a bó yòʼ dzə̀ kí sə̀ mo gheéy.

⁴A wìr koŋ wíri, wù nèn a ker áwune ji weè, a geʼ sho. A bó yòʼ dzə̀ wù kfə̀n a ghèʼ wír, a bó yòʼ dzə̀ wù wàa ràʼsì wún,

⁵a koʼnín, e kfə̀n a ŋar. A wìr koŋ wíri, la wù yòʼ a tav, a nyar shilív, e kfə̀n a lèm jay wìr e shiliv.

⁶A bó yòʼ dzə̀ wù kfə̀n a sheʼrí kinyo ke dzəə̀n ké kisaŋ ki. Wù kù yii shéʼri a dzə̀ ke ru kí.

⁷Wìr wo wù koŋ wíri yòʼ yén ajay wìr. Wù kù wáy kfə́ shilív wáyín e wìr wùn, leey fó mbìy ji wù kù wíy yiì a kijuŋ, kfə́men vinyo vidzə̀m.

⁸Ghán sí wíy gheén, é wíri maʼti ambùʼmé ve Nyùy‑iì bùʼùn áwune shó adzə̀m. Yii bèy, a koŋ ye wìr koŋ wírií kù wíy a tiy fo. A bó wìr yòʼ dzəə́ wìy a tiisí kinyo ji wun yú a fo Nyùy shuù, a bó wùmòʼ yòʼ dzəə́ wìy a suŋnin e làm se bó wù yòʼ kiìn, é wùmòʼ wáa kiíy vinyo, a shaà wùmòʼ.

⁹Vèsən dzə́ lèn, a bó á yóʼ ne kìíy vinyo vidzə̀m, Nyùy kù dìn vèsən a dzə̀ kimbéʼ ke kinyò ke kí dzəə̀n.

¹⁰Yii bèy, wíy lòo dzə e ghan se wù wíy dìn vidzə̀m, aá nèn màʼtì menyorìn me á kiìn lèn mèn.

¹¹Yì‑iì dzə̀ é ghan se mò‑oò dzəə̀n wánlè, a m súŋnin moo wánlè, kwàʼtì kinyo moo wánlè, yén vinyo moo wánlè. Yii bèy, m kúy, e nèn màʼtì liì wónlè woo shooy.

¹²Vèsən dzəə́ yén vinyo lèn ji làʼrì làʼrì mo wìr yèn sí rə́ é mendzə̀v. Yii bèy, wíy lòo dzə e ghan see shooy, é vinyo vidzə̀m vi nèn ràn e vèsə́n si. Lèn və̀n, m kìíy vinyo kimbéʼ, a wíy lòo dzə e ghan see shooy, é m nèn màysì, e kìíy vinyo vidzə̀m réŋréŋ mo Nyùy kiiyin ne vém vee vinyo lèn.

¹³Fo vinyò fèn vidzə̀m, ve ví wíy a tiy fo vi nén a dzə vitaár. A dzə̀ jii, wìr wáy á shilív e Nyùy wùn, a shìy ŋkàʼme Nyùy, a kòŋ wíri. A ke kí tíy vitú ki dzə̀ koŋ ye wìr koŋ wíri.