Read Lamnso 1 Korin 15 Bible Online

1 Korin 15 - Lamnso bible

1 Korin 15

¹Afə̀r vem, m nen kfə̀n a tàʼ lèn, a remrí sáʼka Nyùy wo juŋ wo mò‑oò fìʼtìn e vèn, a dzə̀ kinyo ke vèn‑eè biimen, e wày shilív, a tiy sho lèn kitávín.

²A Nyùy sí luŋèr ven a dzə̀ bìʼ kinyo ke mò‑oò fìʼtìn e vèn kin, a vèn fèn tíy sho shilív shimòʼón, e dù, e jòʼsì, a bó dzə̀ ji vèn yòʼ‑oò lo biìmé rú kinyo kee shoon.

³A kinyo ke mò‑oò fìʼtìn e vèn kin ki dzə̀ tím kinyò feyì feyì, a mò‑oò fiʼtì réŋréŋ mo mò‑oò yuun sá. A kí dzə̀ jii, Kristu‑uù kpù ji wun mán á vinyo vesən ve bi ví, a dzə̀ kíwun ke Ŋwàʼ Nyùyi‑iì suuyin ji kí waà wíy koóy.

⁴Mo wù kpuun, á dzəə̀mè, vishiíy ví meé vitaár, Nyùy fəə́r wun fo kpu, a Ŋwàʼ Nyùyi‑iì yiì ne sùúy kee shooy.

⁵Mo wù fəən fó kpu, e nèn dìn kitú kfə́ e Pita, e bóo kfə̀n dìn e ŋgaà və ŋgoo woo nshòv sibaà e ghvə̀m.

⁶Wáa dzə e kishiíy kímóʼ kí, aàŋgaà və́ ŋgoo kì bàʼtí, e shaà wír ghií tàn, wù nèn wìy fo, áwune yén wun adzə̀m. A kùʼùn wìr vìn dzə̀ə́ sho, e shem lèn, yii bèy, aámóʼó kpùkír ne.

⁷Wù kfən dìn sa kitú kfə́ e Jeem, e kfə̀n wìy lò, e dìn aàŋgaà və́ ntume, aá báʼtí ne adzə̀m.

⁸Wìy lòo dzə fo bàm, wù nèn dìn sa kitú kfə́ e mò, m wáa fònèr ji ŋgaà ntum və, a ghán sí báŋrín ne.

⁹A m dzə̀ kém aáwuné mvəm ji kinjòʼsìbàm ké wìr. A bó m yoʼ fə̀m ghèén ji á wáa yòŋ mo ji ŋgaà ntum Jesus Kristu, bìʼ fo mò‑oò nyavrì e kintatì ke Nyùy ki.

¹⁰Yii bèy, Nyùy kú a kòŋ mo, a sham mo, bo m wáa dzə mo m dzəə̀n lèn bèn. A bó nshámmé və woo shooy yòʼ‑oò lo lày kisáŋ. M lò kém fó fo, e nèn lìm, e shaà aŋgàa ntum Kristu ámóʼó adzə̀m. A bó yòʼ dzə̀ ji mò‑oò yii lim rə̀n a dzə̀ fo mǒ vitaaví. Mò‑oò lim a dzə̀ mo Nyùy‑iì buʼ mo, a m limè.

¹¹Vèr áwune nen tàtí adzə̀m, a fìʼtì kinyo ke Kristu, vèn wàa yu sa, a biimé. A bó kí yòʼ kér kinyo kímóʼ kí, kìn vèn‑eè yù a dzə̀ fo mò, kìn fo áwune.

¹²Mo vèr áwune fiʼtì ji Kristu‑uù fəə̀ fó kpu, kí ghán é le, bo wìr kfən lò fo věn mvəm, a kìnèn ji wíri yòʼ wíy fəə fo kpu?

¹³A bèn dzə̀ rú ji wíri yòʼ wíy fəə fo kpu, bo dzə̀ ji Nyùy yòʼ‑oò lo fə̀ə́r saa Kristu fo kpu.

¹⁴Kí wáa dzə ji Nyùy yòʼ‑oò lo fə̀ə́r Kristu rú fó kpu, bo kinyo ke vèr rə́si fiʼtì ki dzə̀ kisáŋ, biímé ye vèn biimen kinyo kee shoone láy sá kisáŋ.

¹⁵A kí dzə̀ rú bey, bo vèr sí bóʼti kinyo e Nyùy bàm kisáŋ, bìʼ fo vèr rə́si fiʼtì ji wù‑uù lo fə̀ə́r a Kristu fo kpu. A dzə̀ ji kinèn ye vèn kinèn ji bó wíri yòʼ wíy fəə fo kpuu bèn dzə̀ rú, bo bó yòʼ‑oò dzə̀ Nyùy fə̀ə́r Kristu fo kpu.

¹⁶A kí bèn dzə̀ rú mo vèn kinènè, bo bó Kristu yòʼ‑oò lo fəə̀ fó kpu gheéy.

¹⁷Kí nen kfə̀n a dzə sa jii, a bèn dzə̀ rú ji Nyùy yòʼ‑oò lo fə̀ə́r Kristu fo kpu, bo biímé ye vèn biimen kinyo kfəə́ lày kisáŋ, a njò vinyò ve bi ví kù dzə̀ə́ e věn kitu,

¹⁸é wír ve vé‑eè kpúkir, aá wáy ne shilív e Kristu wùné lay kév láyin.

¹⁹A kí bèn dzə̀ ji vèsən wáa leéy Kristu ji wù wáa sə vèsən a dzə̀ é dzə̀ʼə̀m yeé nsay fèn cáʼ, bo késən kí màysì ne, e fòy, e shaà ké wìr ve bó á yòʼ tíy e wùn kinyò.

²⁰Yii bèy, ke kí dzəə̀n rú kí dzə̀ jii, Nyùy‑iì lo fə̀ə́r a Kristu fo kpu ji wir mbìy wo wù ghém dzə́ə fo ve vé‑eè kpukin nee.

²¹Mo wíri kpú, a kpúu kù‑uù lò fo wìr mòʼón, kù dzə̀ sá mo wíri wíy fəə fo kpu, bìʼ wir mòʼón.

²²A kí dzə̀ ji wìr dzə̀m kpú, bìʼ á fo dzəə̀n rám Adam, a kù dzə̀ sá mo Nyùy wíy fəə́r wír wo wù tatin wùn Kristu e dzə̀m fo kpu,

²³aá wíy a fəə e ghan sí ghan sí, mo Nyùy sìysìn. Wo wù‑uù ghemen dzə́ə wáa dzə Kristu, é bo wír ve dzəə̀n vəə́ wìy a fəə sa, a sì é ghan se wù kfə̀n wíy wìy.

²⁴Wù wíy wìy, bo sì ghán se ndzə rə̀n mayì, é wù nèn màʼ sáʼ yeé ndzə fèn, e bàʼtí vé saʼa, e laàr vitaáví vév vidzə̀m, e siìr sáʼ e dzə̀m a dzə̀ e Nyùy wo dzəə̀n Tàr wov.

²⁵A wun woo Kristu kù wíy tòmbìy a saʼ, e dù, e meé e ghan se Nyùy wíy màʼrì aŋgaà və́ vibàn adzə̀m, é wù tiír wuú rə́ é kitu wo.

²⁶A ŋgaà vibàn wo wù wíy màysì, e laàr dzə̀ kpú.

²⁷ Kinyo kìn ki dzə̀ kíwun ke vé‑eè saŋen é Ŋwàʼ Nyùy jii, «Nyùy Tàr fò ne wun vitaáví, vifá vidzə̀m vi wáa dzə e wùn sar saʼ.» Yii bèy, mo kí fə̀m dzəə̀n ji vifá vi sì e wùn sar saʼ, aá kì ji bó yòʼ dzə̀ Nyùy wo wù foon sáʼ yee shoon kfə̀n a dzə saa e sar saʼ foo fèy.

²⁸Wíy lòo dzə, a sí sáʼ Kristu vifá vidzə̀m, é wun woo Wan Nyùy nèn siìr sáʼ yee shooy e Nyùy wo wù‑uù foon e wun, a yu lèn a dzə̀ fó fo ji Nyùy wáa tiy vitú fo vifa vidzə̀m, é ví wáa yu a dzə̀ fó fo.

²⁹Vèn kì sá ji wír ámóʼó lo, á wàa taŋ ji á wáy áwune é ndzəv e ŋkfə wo bó á yòʼ‑oò lo wǎy kiliŋ. A dzə̀ rú ji bó wíri yòʼ wíy fəə fo kpu, kfən yiì ka, bo á wáa yiì bèy?

³⁰Kfə̀n yiì ka sá, bo vèr biímé kfə́ə lìm yee ben, aá kì ji á du a dzə̀ é sày e kiwuú kí?

³¹Afə̀r vem, m tíy kém é shùu kpu vishiíy vidzə̀m. A m suuy bèn, kan a dzə̀ ven ve m rə́si sévti ji vèsən dzə̀ rú wír Tàr wòsən Jesus Kristu.

³² Vèn yén kinyo ke kí‑iì kooyin mo é Efesor ki. Wíri‑iì lò, e bìnkìr, e ŋàʼáy e mǒ wùn, a yiì moo nyám se kwaʼ, a tàʼ sàtì mo sátin, vèr áwune wáa fùnèn. A dzə̀ ji bó wíri yòʼ wíy fəə fo kpu, bo m biìmé ŋgeʼ see ben ji séʼ dzə̀ ka? Bo kì bòŋ ji vèsən wáa yiì mo á yii suuy jii, «Á kú a yi yiín, a no noón, bìʼ fo, a tàm kibvəə́shí, á kpùkír.»

³³Lá vèn yòʼ a yuurí kinyo ke wìr vee bey. Vèn wáa kiíy ji wìr yii shém ŋgoo ye bi, wù bìvír á liì və.

³⁴Vèn maʼti kiyúŋsì ki, e lèʼ fó bǎm vinyò ve bi ví. M yén ji wír vén ámóʼó yòʼ kì á Nyùy gheéy. A m suuy bèn, é vèn fíʼ a woomé.

³⁵Yii bèy, mo wíri fə̀m wíy fəə fo kpu, a tàm wìr wùmòʼ lo, wù wàa kìnèn jii, á sà wíy fəə, aá wáa ker wún, a wú dzə̀ é le á?

³⁶Wìr wo wù kinèn bèy dzə̀ kfə́ kiyúŋ. Wù kì sá ji á yii wáy ŋgoòy kifa e nsay, la yì yòʼ fəə̀, a bó kiwuv ki fóy.

³⁷A bó kifá ke á wáy e nsay kìy ki yòʼ dzə̀ kitiír ke kí wíy a dzə. Kù dzə̀ shisí she ŋgoòy là rooné, a tàm wàa dzə ye saàr, kìn ye kifa kímóʼ kí.

³⁸Nèn yiì Nyùy, bo kitiír kí fəə́ fó ŋgoòy foo fèy. A wù‑uù fò ne kitiír jeéy jeéy mo ŋgoòy yee shó dzəə̀n.

³⁹Vifá ve ví ŋeʼ vidzə̀m vi nén a dzə sa, a wún wóví dzə̀ jeéy jeéy. Wó wìri dzə̀ e wùn dzəə, wó nyàm se kwaʼ e wùn dzəə, wó menə̀n e wùn dzəə, bo wó səə wáa dzə sa e rə́ə yee dzə́ə.

⁴⁰Vifá veé wòŋ woó yuv ví nén a dzə kév é dzəə yìmòʼ. Ve ví dzəə̀n é nsay vi wáa dzə sa e yéev yee dzə́ə. Vijuŋ ve vifa ve ví dzəə̀n é yuv ví dzə̀ jeéy, a vé vifa veé nsay vi dzə̀ sá jeéy.

⁴¹Shùy njaʼkìr e wùn dzəə, a ŋwee njaʼkìr e rə́ə, bo mejiy mè wáa njàʼkìr sa e yéev yee dzə́ə. A bó shímóʼ shí yòʼ fə̀m njaʼkìr wùn à shímóʼ shí réŋréŋ gheéy.

⁴²Vinyo vìn vi nén a fìʼsìn mo wún wìri wíy a dzə sa jeéy, é ghan se wù fəən ne fo kpu. Wún wìri dzə̀ lèn moo ŋgoòy kifa. Wìr yii kpú, á dzəəmè, wúné nèn fòy. Yii bèy, Nyùy wíy fəərì, la wú yòʼ dzəə ghàn fòy.

⁴³Wúné dzə̀ é nsay fèn, a wú yénsin fo tèr, a bó wú yòʼ kér kitar. Nyùy wíy fəə́r fo kpu, é wú nèn a bòŋkìr, e kfə̀n a ker vitaáví.

⁴⁴Wíri kér wún lèn, a dzə̀ kifá ke kí loòn a dzə̀ fó nsay. Nyùy wíy fəə́r fo kpu, é wú nèn bìnkìr, a dzə kifá ke kí loòn a dzə̀ fo wun woo Nyùy. Vèn wáa kiíy jii, mo wún wo wú loòn fó nsay fène dzəə̀n shó, bo wo wú wíy lò a dzə̀ fo Nyùyi kù dzə̀ sá.

⁴⁵ Vé‑eè sàŋ é Ŋwàʼ Nyùy jii, «Nyùy‑iì bòm Adam, wo dzəə̀n wir mbìy, e fò kiyoy sho, wù wáa yòy, a dzə e tin.» Yii bèy, ké Jesus Kristu wo dzəə̀n Adam wo wù jòʼsìn bám kí nén a dzə jii, wù dzə̀ kfə́ Kiyoy ke kí yii, bo wíri wáa lùŋ.

⁴⁶A bó wíri yòʼ yii tómbìy kér wún a dzə̀ wo foon Kiyoy kee shooy. Á kù yii tómbìy kér a dzə̀ wún wo wú loòn fó nsay fèn, e bóo wìy a ker wo wú loòn fo Kiyoy ke Nyùy ki.

⁴⁷Adam woo wir mbìy‑iì lò kfə́ fó nsay fèn, a Nyùy‑iì bòm a dzə̀ e kibvər ki. Kristu wo wù wìyìn fó bàm nèn lò kfə́ a dzə̀ fó wòŋ woó yuv.

⁴⁸Kí nén a dzə jii, wíri lóo dzə e nsay fèn, á nèn a ker wún a dzə̀ wó wìr wo vé‑eè bomen e kibvər ki. Yii bèy, á lóo dzə e yuv, á nèn a ker wún a dzə̀ á wó wìr wo wù‑uù loòn fó yuv.

⁴⁹Mo vèsən kér mbom lèn a dzə̀ ye Adam wo wù‑uù loòn fó kibvə̀r, vèsən kù wíy a ker sa mbom Kristu wo wù‑uù loòn kfə́ a dzə̀ fó yuv.

⁵⁰Afə̀r vem, é vèn ku nèn a kiíy ji bó yòʼ dzə̀ wún wósən vən, wo dzəə̀n ji jáv wùn à mensə́ mè, wú wìy dù, e yèn sáʼ Nyùy. Bó yòʼ dzə̀ kifá ke kí wíy fòy ki nə̀ə́ é kirə̀ʼ ke bó yòʼ dzə̀ kí mày.

⁵¹Vèn yuúrí, é m shóŋ kilìtì ke kinyò kímóʼ kí, e sùúy e vèn. A kí dzə̀ jii, bó vèsən yòʼ waà wíy kpukír adzə̀m, e mày. Yii bèy, wún wósən e dzə̀me wíy sàsìn, e kuvsín ji ghàár, mo wìr bvə̀rbvə̀r sí. Wíy lóo dzə e ghan sé kinjòʼsì sí, sóŋ Nyùyi sasìn, súŋninè, é Nyùy ku nèn fə̀ə́r wír ve vé‑eè kpukin, aá sí kér a dzə̀ wún wo fíyi wo bó yòʼ dzə̀ wú dzəə fòy, é vèsən ve á dzə̀ə́ atin adzə̀me wáa ker sa wún woo shooy.

⁵²

⁵³Vèn wáa kiíy ji wún wósən wo dzə̀ wú kpù, e fòy və̀ne kér fó wìy bìnkìr, a dzə ji kifá ke bó yòʼ dzə̀ kí dzəə kpù, e fòy.

⁵⁴ Wíy lòo dzə e ghan see shooy, a wún wósən və́ne bínkír ne ji kifá ke bó yòʼ dzə̀ kí dzəə kpù, e fòy, é kí nèn ghèén mo vé‑eè saŋen é Ŋwàʼ Nyùy jii: «Nyùy ghàʼ ne kpú, e laàr vitaáví və́.

⁵⁵ Éè kpu, nsiì yè dzə̀ ka? Nsəə̀ ye dzə̀ à tè wír sho bèé lèn?»

⁵⁶A nsəə̀ ye dzə̀ kpúu kù tè wír sho rə̀n dzə̀ kinyo ke bi kí ke ŋgaàŋ yiìn. Wù yii bèy, nsər ye Nyùy‑iì foon nèn dìn ji wù gbù ne a njò.

⁵⁷Vèsən ku nèn a beèrì Nyùy wo wù tatin vèsən à Jesus Kristu, vèsən só vinyo ve bi ví wùn à kpúu.

⁵⁸Á bèy lèn, ŋkar sém sé sày, vèn wáy ri shilív, a tiy kitávín, a yu kinyo kimòʼón cáʼ ji kinyo ke Tàr wòsən Jesus Kristu, a kiíy ji kinyo kidzə̀m ke wìr yii bìʼ wun woo Kristu ki yòʼ dzə̀ á kí lày kisáŋ.