Read Lamnso 1 Korin 16 Bible Online

1 Korin 16 - Lamnso bible

1 Korin 16

¹M nén a tàʼ, e naàrì lèn a dzə̀ kinyo ke mbàm se vèn fə́ti ji vèn sə́ wír Nyùy ve á dzəə̀n é wòŋ woo Juda sho. Vèn kú a yiì a dzə̀ kinyo ke mò‑oò suuyin ji vintatì veé wòŋ woo Galatia vi wáa yiì.

²A kí dzə̀ jii, lóo dzə e kishiíy ké Nyùy kidzə̀m, wìr mòʼón mòʼón kù bàr mbàm símóʼ sí, aá lem jeéy. Wìr lóo bàr, é wù ku bàr a dzə̀ mo mentàsìn mvə mè dzəə̀n. M wíy wiyì, é la vèn yòʼ kfə̀n rə̀sí, a sùʼ mbàm súʼun,

³é m ku nèn sə̀ mbàm see shooy, e wày e wír ve vèn shoʼoné kiwo, e sàŋ ŋwàʼ fo ghaŋ, aá li, e dù sho e Jerusalem.

⁴A bèn wìy lòo dzə e ghan see shooy, m yén ji mo‑óò du é Jerusalem, é vèr áwune nèn a dù.

⁵A ghán yém ye m sìysìné dzə̀ jii, m wíy dù e wòŋ Masedonia e ghan fó, lóo shaà, é m nèn ghàn á ven.

⁶A m koŋ ji vèsən dzəʼti á shintàm shida. A tàm e ghanmóʼ, bo vèsən wíy dzə̀ʼə̀m, é ŋwee se kintòn si shaa, m wíy lóo lò, vèn koŋ, é vèn sə́ mo, é m fiʼ shaà fo mbìy, a dù fomóʼó.

⁷A m siysì bèy, bìʼ fo m yòʼ taʼ, e wìy, e yen ven, e kù nèn tumnín, a shaà shaàn. M koŋ kém jii, a Nyùy biìmé, é vèsən bónén, e dzə̀ʼə̀m kijuŋ.

⁸A m kù wíy a dzə e Efesor fèn, e meé e ghan sé kiŋkàʼ ke *Pentikor.

⁹M kòóy ne kintóʼ ke kuʼùn kí fen ke dzə̀ m wàa lìm lim Nyùy sho. Mo wír ámóʼó fə̀m ban mo fen anín, m kì ji lim rə̀ne wíy a ker a séʼ wo kuʼùn.

¹⁰Timoti wíy wìy sa, e ghan ven. Kii vèn, vèn ku keèrí wun kijuŋ. Wù lim sa lim a dzə̀ yé Tàr wòsən Jesus réŋréŋ mo m limè.

¹¹Lá vèn yòʼ a kay wun. Vèn ku sə̀ wun, é wù ghán ji nyaáŋ, e tàv kfə̀n, e yèn mo. Vèr aàfə́r vesən ámóʼó ve á dzəə̀n féne sí shiy wun.

¹²Ké fər wòsən Apolor ki dzə̀, a mò‑oò sí boorì ji wù ku fəə̀ wùn aàfə́r vesən ámóʼó, e wìy, e ghàn á ven. Wù nèn yèn kfə́ ji bó yòʼ sì á ghán se dzə̀ wun wìy. A kintóʼ ki yíi fəə̀sín, é wun ku nèn a wìy a lèn lèn.

¹³Kén kí nén a dzə jii, vèn ku wày a dzə̀ á vifií, a tiy kitávín é kinyò ke Jesus Kristu ke vèn biimen. Vèn ghár melív men, é mè táv.

¹⁴Vèn lóo yiì vinyo ve á yii vidzə̀m, vèn kù a yiì, a kòŋnìn.

¹⁵Afə̀r vem, vèn kì sá ji Tefanar wùn à kfə́ə rəə́ dzə̀ wír mbìyi ve vé‑eè wayin shilív e Kristu wùn fo wír vee věn wòŋ woo Akayàa. Áwune fò ne vitú vév cáʼcáʼ ji á wáa sə a kintatì ke wìr Nyùy.

¹⁶M nén a lon ji vèn kú a yu a dzə̀ á fo wír vee béne, e kfə̀n a yu a fo wír ve á lim wùn áwuneé adzə̀m.

¹⁷A m shéʼri mo wun woo Tefanar wùn à Fortunaatur, à Akaykur wìyìn, e yèn mo fen. Mo áwune wìyìn, kí nén a dzə mo m yèn a dzə̀ ven.

¹⁸Shilív shém shí nen rə̀sìn, réŋréŋ mo wír vìne lo, á wàa rəə̀r méen mee melív. A kí bòŋ ji vèn wáa ghvəm a wír vee ben.

¹⁹Vintatì ve Nyùy veé wòŋ Asia fèn vi shaʼtì ven. Akwila wùn à Piisila, à kintatì ke kí dzəʼə̀m aáwuné lav ki shaʼtì ven sá feyì e yír Tàr wòsən Jesus.

²⁰Afə́r vesən vee fen adzə̀me shaʼtì sa ven. Vèn ku nèn a shàʼnìn sa bèy, a baamé wún moo wír Nyùy.

²¹Mo woo Por, m nén a saŋ yém yee shaʼtì lèn a dzə̀ e kiwó kém kí,

²²a tir ven jii, a wìr dzə̀ làa yòʼ a kòŋ Tàr wòsən Jesus, bo lǒn Nyùyi dzə̀ á e ŋgaàŋ kitu. M nén a lon ji Tàr wòsən Jesus ku kfə̀n á cér.

²³A m kfə̀n lón jii, Tàr wòsən Jesus kú a kòŋ ven, a leéy a fo vèn ghán sidzə̀m.

²⁴Vèn wáa kiíy ji m kér ven e mǒ shiliv ghán sidzə̀m, ven ve vèsən tatin bìʼ Jesus Kristu. Amen.