Read Lamnso 1 Korin 8 Bible Online

1 Korin 8 - Lamnso bible

1 Korin 8

¹M nén a bìnèr lèn a dzə̀ ke vèn‑eè dzə́ti kùm vifá ve yi ve á cuùn anyùy sho. Vèsən kì ji wìr mòʼón mòʼón fo vèsən kìíy ne a kfə́ kee kinyo ke wù tíy sho e kinyò fèn. Yii bèy, kee shooy ki lo, kí nèn a yiì, wìr wàa sùmrì a dzə̀ wún. A ke dzə̀ kí sə̀ wír ki kù dzə̀ ji wìr wáa kòŋ fə́r və, a ghvəm sa kfə́ kee kinyo ke wù tíy sho.

²A wìr lò, a dìn a dzə̀ vifií ji kù kì wun mo vinyo vidzə̀m vi dzəə̀n, bo bó wù yóʼ ne kìíy mo kì dzə̀ wù kìíy gheéy.

³Wìr wo Nyùy kiìn ji dzə̀ wír dzə̀ wo wù koŋ a dzə̀ wun woo Nyùy.

⁴Kee kùm yí ye wìr wáa yi nyám ye á cuùn anyùy sho ki dzə̀, a vèsən kì kijuŋ ji kifá ke á cu kìn ki yòʼ dzə̀ nyùy wùmòʼ gheéy. Nyùy kù mày e mòʼón, a bó wùmòʼ yòʼ dzə̀ shó.

⁵Mo wíri fə̀m ghvə́m vifá vímóʼ ví vinín ji anyùy, kìn dzə̀ ve ví yénsin e yuv, kìn veé nsay fèn, kfə̀n ghvə́m vímóʼ ví ji atǎr wíri,

⁶késən kí dzə̀ jii, Nyùy kù mày e mòʼón, a dzə̀ á wun wo dzəə̀n Tàr wòsən, a bòm wun vifá vidzə̀m, ví wáa yu a dzə̀ fo wun. Taà Ndzə kù mày sa e mòʼón, a dzə̀ Jesus Kristu. Vifá ve Nyùy‑iì bomen vidzə̀m vi‑iì shaà a dzə̀ e wun woo Kristu kiwo, a kù yii wun, bo vèsən wáa dzə sho.

⁷Mo vèsən fə̀m kiìn ben, wír ámóʼó kù dzə̀ə́ e vèsə́n mvəm, a bó á yóʼ ne kìíy. Mo vé‑eè rə́si kù cu anyùy vee shooy, á kù dzəə́ kwaʼtì ji anyùy vee shooyi dzə̀ rú á sho. Áwune lóo yi vifá ve cù vee shooy lèn, melív mev mè nèn a saʼ áwune, bìʼ fo bó á yóʼ ne kìíy vinyo vidzə̀m.

⁸Vèn wáa kiíy ji bó yòʼ dzə̀ vifá ve wìr yí vi yiì, ŋgaàŋ kòóy kilíŋ wùn Nyùy. A wìr fə̀m kì ji dzə̀ wun yì, wù yí, la wù yòʼ a kwàʼ ji wun bòŋ ne fo Nyùy, e shaà wír ámóʼó. A wìr tèn fó yi, la ŋgaàŋ yòʼ bìr fo Nyùy bìʼ kee shooy. A bó wìr wo wù yí yòʼ fə̀m kooy kilíŋ kímóʼ kí bìʼ kee shooy.

⁹Ke kí dzəə̀n kí dzə̀ jii, ven ve vèn kiiyin ne vinyo, vèn wáa yen fó a sèmèr a melív me wìr ve bó á yóʼ ne kìíy.

¹⁰A wìr woo ben yèn, a wò wo à kiiyin ne vinyo yíkir e kirə̀ʼ ké anyùy, wù kù nèn a kòŋ sa fó yi, a shilív shí fə̀m sháʼnin fo wù yí kifá ke á cuùn anyùy sho.

¹¹Wù biʼnìn wò wo à kiìn ké kee kinyo, yí vifá vee shooy, bo shilív sə́ shí bvəə̀rí ne. A kù yiì wò e fər wò wo Jesus Kristu‑uù kpuun sá fo fo ji shilív sə́ shí fíʼ a dzə nyaáŋ.

¹²Mo à yiìn bey, à nèn a kiíy ji dzə̀ á kinyo ke bi kí mo à yiìn e fər wò wo bó wù yóʼ ne kìíy vinyo, a dzə̀ jay mo à jayin fo Jesus Kristu bèy.

¹³Kí nén a dzə jii, a sì ji m yí kifá, e bìvír fə́r wom, bòŋ a ji la m yòʼ kùm, fó bvəə́r shilív shé fər wom.