Read Lamnso 2 Korin 2 Bible Online

2 Korin 2 - Lamnso bible

2 Korin 2

¹A mò‑oò lo tàr kinyo kìn feyì, e nèn yèn ji bó kí yoʼ ghèén a ji m kfən wìy, e yiì, é vèn wáa yu nyár.

²Dzə̀ ven vin ve dzə̀ á shèʼér mo. A m kfə̀n lò, e yiì, vèn wáa yu nyár, kfə̀n a sheʼér la mo?

³Á kinyo ke kí‑iì yiìn, bo m wáa saŋ a dzə̀ ŋwàʼ wo mò‑oò saŋen, ji m wíy wiyì, é la m yòʼ dzə́ə a sòv a kitú bìʼ ven. A dzə̀ ven vin ve mò‑oò yíi wìy, é vèn yii, é m wáa sheʼrí. Mò‑oò yèn jii, a m wìy, a sòv kitú, é la vèn yòʼ a yu saa vijuŋ. A m kì ji ven adzə̀m kù kooy vijuŋ a dzə̀ fo vém ví.

⁴M nèn sàŋ vinyo vee shooy a dzə̀ é ŋwàʼ, a mò‑oò sáŋ, sə́ʼər mensíy, a shilív shém shí dzərì, la wúné yòʼ a càʼ mo gheéy. A bó m yòʼ‑oò sáŋ ji m yii, é vèn wáa yu a nyár. Mò‑oò sáŋ, é vèn fíʼ kiíy mo m koŋ ven é ŋàŋ.

⁵Yii bèy, wìr wùmòʼ‑oò lo yiì, wíri wáa sòv kitú. A bó wù yòʼ‑oò yiì kinyo kee shooy e mò, wù‑uù yiì a dzə̀ e vèn. A dzə̀ m wàa suúy ji kinyo kee shooy ki‑iì lo sə̀ʼsì ven adzə̀m e dzəə sí dzəə sí.

⁶Mo kintatì ki tàrìn ne jay ŋgaàŋ, e sàʼ wun fo fo, bo sì rə́ə yee ŋgeʼ, a yì ghèén ne bèy.

⁷A dzə̀ lèn, vèn làysìn kinyo kee shooy fo wù wáa màysì, a rə̀m ntéŋ, é shilív sə́ shí wáa weèy.

⁸Kii vèn, vèn kú a yiì, é wìr woo shooy wáa yen ji vèn kù dzəə́ koŋ a wun.

⁹Mò‑oò sàŋ ŋwàʼ və̀y cáʼ ji m yén á mo kintatì ki yíi shù kinyo kee shooy, e kfə̀n yèn ji sà dzə̀ vèn yiì kinyo kidzə̀m ke m suuyì a.

¹⁰Vèn wáa kiíy jii, a vèn làysìn kinyo ke wìr jayin, bo m làysìn ne sa. Fo kém kí, mo jay woo shooy ghanen, e kùm sa mo, m làysìn ne. A m yii bèy, a dzə̀ e Jesus Kristu yir ji m fíʼ sə ven,

¹¹fo Satan nəə́ é mvəm wó, e yiì, é vèn rə́sí, a shwiíy kilòŋ mo vèsən kiìn mo wù yii laay e bǎm kinyò, yii.

¹²Fo ghan ye mò‑oò duùn rəy, mò‑oò mèé é Towar ji m fiʼti á sáʼka woo kùm Kristu fo, e yèn ji wù mvə̀ʼ dzə́ə rú á ji m wáa dzə fo, a fìʼtì kinyo kfə́.

¹³Yii bèy, mo bó m yòʼ‑oò lo yèn fər wòsən Titur fo, m ku nèn a dzə, a yaŋyáŋ yaŋyáŋ, e nèn lò, e shàʼtì wír vee fó, e tòsín, a dù e wòŋ Masedonia, a tàʼ wun fo fo.

¹⁴A m kù yòʼ beerì Nyùy feyì, bìʼ fo mò‑oò yenen jii, a vèr fə̀m du fèé, wù kù a dànèr a ver. Vèr nén a ghan moo wír ve á ghán e Kristu ŋgoo, a wù du fo mbìy, bínsi mbeeteé, Nyùy wáa yiì, kinyo ke Kristu ki wáa sàmèr virə́ʼ vidzə̀m moo kiláy ke á ton, a kí rəm, rəʼtìnè.

¹⁵A kù dzə̀ ver ve dzəə̀n kiláy kee shoon ke Kristu ghán, ton fo Nyùy, a kí kóʼ e wìr dzə̀m wùn, kìn dzə̀ ve á wíy lùŋ, kìn ve á wíy lày.

¹⁶Kí lóo rə̀m wír wo wù wíy lày, kí wàa koo moo kirəm ke ŋkfə, a dzə̀ kisəəm ké kpu yee là may. Lóo dzə wír wo wù wíy lùŋ, kí nèn a shàŋ shàŋèn, a dzə̀ kisəəm ké dzə̀ʼə̀m yee là may. Mo wíri kù yii kiiy Kristu a dzə̀ fo wír ve á shaŋ moo kiláy víne, bo wìr wo wù gheenen é lìm fèn dzə̀ la?

¹⁷Kù mày wír ve tumen Nyùy moo ver ve á fiʼtì kinyo kfə́ là melarìwo. Vèr nén a yu a dzə̀ fo wun, a fìʼtì, là kiloʼ, a suúy kinyo a dzə̀ e Jesus Kristu yir.