Read Lamnso 2 Korin 4 Bible Online

2 Korin 4 - Lamnso bible

2 Korin 4

¹Mo ver vee aŋgàa ntume lim e dzəə̀ Nyùy ye fíy rə̀n, kiiy ji lì wun woo Nyùy ver, a wù shàm ver shámén, vèr ku nèn a lìm, e làa yòʼ a dor gheéy,

²e shàʼnín dzə́ə sé kisaŋ si sidzə̀m. A bó vèr yòʼ lévti wíri lévtín, a bó yòʼ dzə̀ sá vèr tòyír ntum Nyùy rə̀n. Vèr kù rə́si fiʼtì a dzə̀ kíwun kee kinyo kimòʼón, kiiy ji dzə̀ á vèr à Nyùy, a wìr dzə̀m yú, bínsi ji dzə̀ á kinyo ke ru kí.

³Kí nén a dzə jii, a wíri kfə̀n méŋ sáʼka Nyùy wo vèr fiʼtì və̀n, bo kù dzə̀ vee shooy ve á sí du, e nəə́ e kpu yee là may.

⁴Ké wír vìn ki dzə̀, a sə̀tí Satan woo nyùy wo wù kér ndzə rə̀n lèn vifií vév fo á biíme sáʼka Nyùy wo juŋ. A bó yòʼ dzə̀ áwune yèn rán ye sáʼka Nyùy wìyìn shó, a kiíy mo Kristu dzəə̀n. Kristu, wo wùn Nyùy dzəə̀n kikúv kimòʼón.

⁵Vèr kù fiʼtì kér jii, á wáa ghvəm a Jesus Kristu ji Taà Vitu, a bó yòʼ dzə̀ vèr wàa suúy a dzə̀ vitú vér. Vèr li vitú vér cáʼ ji aŋgàa lìm vén bìʼ wun woo Jesus.

⁶Yì‑iì mvə̀ʼ Nyùy vifií vér, é bo vèr yén rán, a kiíy Jesus. A kù dzə̀ wun woo Nyùy wo wù‑uù suuyin fó shuù ji ndzə rán, yì nèn ràn. Vèr nén a yen mo vitaáví vé Nyùy vi lim e Kristu wùn, a kiíy mo wun woo Nyùy ghaʼan.

⁷Mo vèr fə̀m kér fùʼ woo ji á wáa fìʼtì kinyo kee shoon, wún wórí kù dzə̀ moo kifá ke á bomen, a bòmrì bòmrìn, fó dìn kiránén ji vitaáví ve ví dzəə̀n é kinyò fèn vi yòʼ dzə̀ á vér. Dzə̀ á vé Nyùy.

⁸Mo vinyo vi fə̀m rə́ʼəy ver mbìv sidzə̀m, bó yòʼ dzə̀ ví nèn ghàʼ ver gháʼán. Vinyo vi lo, ví wàa tarír ver vinín, a bó yòʼ dzə̀ ve dzə̀ ví yiì, vèr shwèy lim rə̀n.

⁹Wíri ron wúu yér, a Nyùy kù leey fo vèr. Á lo, á wàa nyàvrì e vèr, a lemér, la vèr yòʼ kpù.

¹⁰Vèr ku nèn a ghan, a lì vitú vér ji á kpú á kpú ye Jesus‑eè kpuun, wíri wáa leéy ver, a yen dzəʼə̀m a dzə̀ yé wun woo Jesus mo yí yénsin e věr wùn.

¹¹Mo vèr kù dzə́ e shùu kpu bìʼ kinyo ke Jesus ghán sidzə̀m, kù tíy a dzə̀ vèr áwune, kí nen dìn mo vitaáví vé wun woo Jesus vi lim e věr vimkpú ve wùn fen, aá yén dzəʼə̀m a dzə̀ rə́.

¹²Á mo vèr biimen kér a dzə̀ kpú ji vèn fíʼ a ker dzəʼə̀m yee là may.

¹³ Vèr ku nèn a suŋnín e kinyò ke Nyùy, a way shilív e wun wùn réŋréŋ mo wìr wùmòʼ‑oò saŋen é Ŋwàʼ Nyùy jii, «M kù‑uù wáy shilív a dzə̀ e Nyùy wùn, e bó a suŋnín.» Vèr ku nèn a suŋnín bèy,

¹⁴a kiíy ji wun woo Nyùy wo wù‑uù fəərin Tàr wòsən Jesus fo kpu kù wíy fəə́r saa vèsən vee wír Jesus adzə̀m, e way e wun woo Jesus kiwo, é vèsən áwune wáa dzə.

¹⁵Vèr ku nèn biìmé ŋgeʼ sidzə̀m ji vèn fíʼ a yu kinyo ke Nyùy, é wíri kú a kiíy a Jesus, a dù duùn fó mbìy, é Nyùy wáa bùʼ áwune, a lì ji wír və́, aá wáa beèrì wun aneénín, a koʼór yír rə́.

¹⁶Kinyo ke kí yii, la vèr yòʼ a weèy fo Nyùy kinyò ki dzə̀ jii, mo wún wórí fə̀m sí kee keèn ben, Nyùy kù sheŋrì melív mer vishiíy vidzə̀m.

¹⁷A ŋgeʼ se vèr yén fo shintàm fèn sìn si náŋsin ver náŋsín, é vèr wìy nə̀ə́ e Nyùy mvə̀m vijùŋ ve ghaʼán ví, ve bó yòʼ dzə̀ ví mày, a bó yòʼ dzə̀ wìr kìíy móo fìʼ.

¹⁸Vèr kù tiir vifíi vér a dzə̀ é vifa ve bó á yòʼ sí yén vìn, a dzə̀ vee shooy ve ví wíy shaàrì, a bó vèr yòʼ wáy vifií é vifa ve á yén e si, bìʼ fo vee shooy vi shaa shaàn.