Read Lamnso 2 Korin 5 Bible Online

2 Korin 5 - Lamnso bible

2 Korin 5

¹A bó yòʼ dzə̀ vèr wàa dor fo Nyùy lìm, bìʼ fo vèr kiìn jii, a fə̀m dzə̀ ji yúyrí, á yúyrí wún vən, bo á sàʼ a dzə̀ á táv wo vèr bee sho e ndzə fèn, é vèr wáa ker a dzə̀ lav e yuv. Lèm Nyùy yee shooy, a bó yòʼ dzə̀ moo ye bàʼrìn wír. Yì wíy a tiy fo ghán sidzə̀m, a bó yòʼ dzə̀ yì sàʼkìr.

²A kù dzə̀ kinyo ke kí tíy e věr shiliv, a vèr ghán lèn, dzəm a dzə̀ ndzə, shiy feyì ji á koóy wún woó yuv vən, e màʼ moo ndzə̀y se fíy si.

³A dzə̀ mo vèr kiìn ji bó vèr yòʼ wíy a dzə e yuv kilor, là wún.

⁴Vən woo wúné dzə̀, a vèr ghán sho, yén ŋgeʼ sinín, shwémkirì. A bó yòʼ dzə̀ ji vèr tén a wún vən ténén, taʼ ji á maʼti. Vèr koŋ fó a màʼ a dzə̀ wo wú bòŋèn, e shaà vən, é woo shoon wo bó wú yòʼ dzəə́ wìy kpuu sum woo kimkpú və̀n, é wú nyoóy, e lày.

⁵A Nyùy‑iì lo lì ver, e nàŋsín ji á wìy nə̀ə́ a dzə̀ é kinyò foo fèn, e fò ver sàʼ kinyò kee shooy a dzə̀ Kiyoy ke Ranén kí.

⁶Vèr ku nèn a leéy a dzə̀ fó mbìy ghán sidzə̀m, a way gháŋ. A vèr kì ji mo vèr dzəə́ ghán e vən woo wúné lèn, vèr yòʼ sì á fo vèr à Tàr wòsən Jesus Kristu wíy a dzə.

⁷Vèr ghán lèn, wáy shilív a dzə̀ e Nyùy wùn, kiiy jii, mo bó vèr yòʼ fə̀m sí yén fó, vèr kù wíy meé fo.

⁸Mo vèr kù sí leey a dzə̀ fó mbìy, vèr lo, á nèn a yen ji bo á kì kpù á lèn, e màʼtì vən woo wún, e dù, a dzə vèr à Kristu e wùn laʼ yeé yuv.

⁹Vèr nén a way kér ghán sidzə̀m ji vèr kú a yiì kinyo, a dzə̀ á ke wún Kristùu wáa bòŋ, kìn vèr dzə̀ə́ a dzə̀ fen, kìn dzə̀ vèr áwune é yuv.

¹⁰A vèr kì jii, vèsən adzə̀m kér fó wìy tiím e Kristu si, é wù tar vinyo vesən, é wìr wáa kav kifá a dzə̀ ke wù‑uù lim e nsay fèn, kìn dzə̀ vijuŋ, kìn dzə̀ vibí.

¹¹Mo vèr sí rə́si fan fó jay kinyo e Tàr wòsən Kristu bèy, vèr ku nèn a bìnèr wíri ji á wáy shilív e wun wùn. A Nyùy kì kinyo ke vèr yii kìn feyì, a m kwaʼtì ji dzə̀ vèn kù kìíy saa bèy.

¹²Vèr suuy bèn, a bó yòʼ dzə̀ ji vèr suuy a dzə̀ á kitú. Vèr suuy cáʼ ji vèn wáa nyàvnìn bìʼ ver, a ker a kinyo ke dzə̀ vèn bìnèr e wír ve á yén wír a dzə̀ fó ntaʼ, e làa yòʼ a kiíy mo shilív shé ŋgaàŋ shi tíy e Nyùy wùn.

¹³A wìr lò, a yen kfə́ ji vèr suuy a dzə̀ kitú, aá baá baán, bo vèr baá a dzə̀ bìʼ Nyùy. Aá yén ji vèr suuy a dzə̀ mo wíri yii suuy kinyo, bo kí yíi sə ven səə́n.

¹⁴Kér kí kù dzə̀ jii, mo Jesus Kristu koŋ ver, vèr kú a yu a dzə̀ á fo fo. A vèr kì ji mo wù‑uù kpuun fo wíri, wù tàtí ne áwune adzə̀m e mvə̀m kpu yee shooy, e tìn fó ŋgeʼ.

¹⁵A wù‑uù kpù bey ji wír ve á lùŋèn víne wáa dzə lèn, e làa yòʼ dzə́ə a dzə, a yiì a mo koŋ áwune. Aá wáa dzə, a yu a dzə̀ fo wun wo wù‑uù kpuun fo áwuné ajay, bo Nyùy fəə́r wun fo fo.

¹⁶Kí nén a dzə jii, kèʼ fo lèn, vèr yòʼ dzəə́ leey kinyo ke wìr e vifií ve dzəə̀n vé wìr vi. Vèr sí leey a dzə̀ e vé Nyùy vi réŋréŋ mo Kristu‑uù dzə́ e nsay fèn, a vèr leey kinyo kfə́ mo wíri yii leeyì, a bó vèr yòʼ dzəə́ leey bèy.

¹⁷Ke kí dzəə̀n kí dzə̀ jii, wìr táti wùn Jesus Kristu, bo ŋgaàŋ sì wír wo fíy. Dzəʼə̀m ye mvəə́ shaà ne, a wù sí kér lèn a dzə̀ ye fíyi.

¹⁸A kù yii Nyùy vinyo vìn vidzə̀m. Yì‑iì tùm wun Kristu, wù wìy, e màn vinyo ve vèsən‑eè jayin fo wun woo Nyùy. Kfən tùm wun ver ji á wáa fìʼtì e wíri á ji dzə̀ Kristu màn sá vév vee ajay.

¹⁹A kí dzə̀ jii, Nyùy‑iì tùm á Kristu, wù mán ajay wìr veé ndzə adzə̀m, aá fíʼ a dzə ŋkar se wun woo Nyùy, a bó wù yòʼ dzəə́ kív njò yev gheéy. Wù kfən wày sáʼka wo juŋ və̀n e věr kiwo.

²⁰Vèr nén a ghan ji ŋkùvtu wun woo Kristu, wáa dzə mo jaŋ Nyùy ven. A vèr boorì ven e Kristu yir jii, vèn ku wìy, é Nyùy mán á ajay vén, é vèn áwune kfə́n kijuŋ.

²¹Mo vèsən‑eè kér lòn, Nyùy nèn bàʼtí vinyo vesən ve bi ví, e siìr a dzə̀ e Kristu kitu. Kristu, a bó wù yòʼ kér jay wo dzəə̀n və́ə gheéy. A wù‑uù yii bèy, ji vèsən táti vèsən à Kristu, é vèsən wáa dzə sa là jay moo wun woo Nyùy.