Read Lamnso 2 Korin 6 Bible Online

2 Korin 6 - Lamnso bible

2 Korin 6

¹Vèr nén a boòrì ven moo wír ve vèr à Nyùy tatin wó, a lìm lim rə́ jii, lá vèn yòʼ màʼày kilíŋ ke wù bùʼùn ven shó kìn, é kí lay á kisáŋ.

² Vèn kuúmé kinyo ke vé‑eè saŋen ji Nyùy suuy a jii: «Mò‑oò ji ji m wáa sə wíri, a m kì yù ne tóŋ yé, e shàm wò. Mò‑oò lóo lùŋèr wíri, e nèn kù sə̀ wò.» Vèn wáa kiíy ji ghán se dzə̀ Nyùy yù sin si dzə̀ lèn. Á lèn wo dzə̀ wù lùŋèr wíri.

³Ver vee aŋgàa ntume nén a tiír kiwúu kér, a fìʼ, fo lim yérí bír, a baàmè, fó teʼtín dzə́ə wìr wùmòʼ, é wù rán mbùʼme Nyùy və̀n.

⁴Vèr ku nèn a yiì vinyo vér vidzə̀m, a dìn ji á lim a dzə̀ á fo Nyùy. Vèr kúr shilív, li vinyo vidzə̀m ji weè, kìn dzə̀ ŋgeʼ, kìn dzə̀ kitan, kìn gháʼ ka.

⁵Vé‑eè ndzə́n ver, wáy ver é sháŋ, lo, á bòm e věr kitu. Vèr lo, á gìsín é lìm, e shìíy e jìŋ, là mbuùné.

⁶A liì wor din sa ji vèr dzə̀ rú á aŋgàa lìm Nyùy. Vèr baamè vinyo ve kisaŋ vi vidzə̀m, lóo fìʼtì kinyo kee kùm Nyùy, á wàa kiíy mo kí dzəə̀n. Vèr yú kér a dzə̀ fo Kiyoy ke Ranén kí, kér wir dzə̀m ji weè, géʼ aáwune, koŋ shilív shidzə̀m, là kiloʼ.

⁷Lóo suúy kinyo, á kù a suúy a dzə̀ ke ru kí. Lo, e ghan símóʼ sí, vèr wàa yiì vinyo ve ví din vitaáví vé Nyùy. Mo liì wor yénsin tìítiy, nén a dzə moo kòŋ ye vèr maʼ rə́r sé Nyùy sho, e kfə̀n a dzə moo ŋkeè wo vèr kiŋ vitú vér shó.

⁸Á lo, á wàa ghvəm ver ji *aŋgàa ntum Nyùy, kfə́n lo, á wàa shoór ver. Lo, e ghan símóʼ sí, á lòr ver, lo, á wàa burí ver. Wír aníne yoŋ ver ji asə́ŋgúm, a kinyo ke vèr fiʼtì ki kù dzə̀ kíwun ke dzəə̀n ke ru kí.

⁹Á yén ver ji wír vee fó tèr. Yii bèy, a leŋ wórí dú ne virə́ʼ vidzə̀m. Vèr lo, e ghan símóʼ sí, á bèr gheéy fó kpu, e kù a tàŋèn. Mo á fə̀m nyavrì e vèr bey, bó vèr yoʼ kpù.

¹⁰A vinyo vi fə̀m kooy ver, a vèr sov kitú, vèr kù yòʼ a sheʼrí Nyùy ghán sidzə̀m. Vèr dzə̀ aŋgàa kitàn, yii bèy, a wír aníne kooy fo vèr. Kifá ke dzə̀ wìr yèn ji kér kí yòʼ dzə̀, yii bèy, a vèr kì kijuŋ ji Nyùy fò ne vifá vidzə̀m ji vér.

¹¹Ŋkar sér seé Korin, vèr sùúy ne vinyo vinín, e mvə̀ʼ sár wór vito.

¹²Bó yòʼ dzə̀ vèr yàr fó dìn ji vèr koŋ ven. A kinyo ki bèn dzə̀ə́ sho ke kí shem fo vèn wáa kòŋ ver, bo kí kù dzə̀ a dzə̀ e vèn.

¹³M nén a boòrì ven moo wón vém ji vèn ku bìʼnìn mo, e mvə̀ʼ saa wón woo sár vito e vèr.

¹⁴M nén a tàʼ, e tir ven vee wír Nyùy jii, lá wìr yòʼ a tatí wùn wìr woo və̀y, é wùn wun wáa yiì a kinyo amòʼón. Vèn kì sá ji bó yòʼ dzə̀ kinyo ke ru kí wùn à ké kisaŋ ki shèm ŋgoo. A bó yòʼ dzə̀ ndzə ye ranén wùn à ye sənér làŋsìn sá, e kfə̀n ji kifá kimòʼón.

¹⁵A bó kinyo ke dzə̀ Kristu wùn Satan wàa tiy sho kimòʼón ki yòʼ dzə̀, a bó yòʼ dzə̀ wìr Nyùy tìír sá kinyo wùn wìr wo bó yòʼ dzəə̀n wo Nyùy.

¹⁶ A bó yòʼ dzə̀ sá, á lì lav Nyùy, e bìnèr ji ye anyùy kisaŋe. A dzə̀ vèsən vin ve dzəə̀n lav wun woo Nyùy réŋréŋ mo wù‑uù suuyin jii: «M wíy a dzə e wír vémé mvəm, a ghan vèr áwune. M wíy a dzə Nyùy wov, aáwune wáa dzə wír vém.»

¹⁷ Nyùy Tàr nén a suúy jii: «Vèn fəə́ fo wír ve bó yòʼ dzəə̀n vémé mvəm, a dzə kén jeéy. Lá vèn yòʼ kùm kifá ke *kifàn kí, é vèsən fíʼ a dzə kijuŋ,

¹⁸ é m wáa dzə Tàr won, é vèn wáa dzə wón vém vee vilum wùn à vee vikìyí. Suuy mo woo Nyùy Tàr woo Ŋgaà Vitaàví Vidzə̀m.»