Read Lamnso Galatia 2 Bible Online

Galatia 2 - Lamnso bible

Galatia 2

¹Kiyá ki nèn wìy shaà nshòv sikweè e ghvə̀m, m kfə́n a koʼ e Jerusalem. A mò‑oò du vèr Banabar, e bóo kfə̀n lì sa Titur.

²Mò‑oò du e ghan sin, a suúy Nyùy ji m wàá du. M nèn dù, e yèn vilìmbìy ve kintatì ke wìr Kristu, vèr áwune bàr wún, m neèr kinyo ke m fiʼtì e wír ve bó yòʼ dzəə̀n veé Judàa aáwuné si ji á tar, e bìnsí, bìʼ fo m yòʼ‑oò taʼ ji lim ye mò‑oò rə́si lim, kìn ye m dzəə́ wìy a lìme lay kisáŋ.

³Mo mò‑oò dzəə̀n fó vèr Titur woo wir Grik, bó á yòʼ‑oò ló a kàn ji á sáŋ *mbèʼ sə́, é bo wù fíʼ a dzə wir Nyùy.

⁴A là fo wír ámóʼó ve vé‑eè wóvri ji á tíy e kinyò ke Jesus Kristùu woóné, e nə̀ə́ fo věr dzə̀ʼə̀m foo fèy, bo bó á yòʼ fə̀m‑eè ló a gwàrìr kinyo kee bey. A vé‑eè nəə cáʼ ji á shwéʼ á jii, mo vèsən tíy e kinyò ke Jesus Kristu, vèsən sà bòy fo liì woó Juda moó le á, aá fíʼ kiíy mo dzə̀ á rə̀ʼə́y vèsən e liì woo shooy.

⁵Á nəə́, la vèr yòʼ fò kilíŋ aáwune gheéy shishàr, bìʼ fo vèr‑iì taʼ, e tuúy sáʼka Nyùy wo juŋ fo vèn réŋréŋ mo wù dzəə̀n.

⁶Ké wìr ve vé‑eè yoŋ ji vilìmbìy ki nén a dzə jii, bó á yòʼ‑oò lo dzə̀sì a kinyo e kitu ke kinyò ke m fiʼtì. A bó m yòʼ‑oò ló a ker shií fó kiíy mo vilíŋ vév ví dzəə̀n, bìʼ fo Nyùy yòʼ yii yén wír wùmòʼ ji woo jeéy.

⁷Ke kí dzəə̀n kí dzə̀ jii, áwune‑eè yèn á ji tùm Nyùy mo ji m wáa fìʼtì sáʼka woo kùm Jesus Kristu e wír ve bó yòʼ dzəə̀n veé Judàa, réŋréŋ mo wù‑uù tumen sá Pita fo wír veé Judàa, á nèn a tomrí mo tómrín,

⁸bìʼ fo Nyùy wo wù‑uù tumen Pita fo wír veé Judàa, kù dzəə̀n wun woo Nyùy wo wù‑uù tumen mo fo wír ve bó yòʼ dzəə̀n veé Judàa.

⁹Áwune kfən lòo yen mo Nyùy rə́si sə́ mo, a kinyo kfə́ kí du fo mbìy, Jeem wùn à Pita, à Joon ve vé‑eè yoŋ ji ntom se kintatìi nèn fò kiwó e vèr Banabar ji vèr áwune lim a lim e mòʼón, e bìnsí ji vèr wáa dù rì fo wír ve bó yòʼ dzəə̀n veé Judàa, aáwune wáa dù kév á fo wír veé Judàa.

¹⁰Á kfən tìr ver kinyo kimòʼón cáʼcáʼ jii, vèr lóo ghan fo wír ve bó yòʼ dzəə̀n veé Judàa, á kù a kuumé a wír veé Juda ve á yén ŋgeʼ bìʼ kinyo ke Jesus Kristu, a sə áwune. M nèn biìmé kee shooy. A dzə̀ kíwun ke m rə́si yii.

¹¹Mo vèr áwune jàvsìn, Pita wìy sìíy, e wìy e Antiyok, m wìy lò, a saʼ wun e wírí si, bìʼ fo wù‑uù jayin kinyo kímóʼ kí féyì.

¹²A kí‑iì dzə̀ jii, Pita kì tòmbìy, e wìy, a ghan, a yikír wùn à wír ve bó yòʼ dzəə̀n veé Judàa, e làa yòʼ a nyàʼ. Wír ve Jeem‑eè tumen ámóʼó siíy, e wìy, wù nèn tsə̀ʼ wún é bàm, e jàv ŋgoo, bìʼ fo wù‑uù fan áwune ve vé‑eè tíy kév ji á kù kér fó a saŋ mbèʼ se wír Kristu adzə̀m mo liì woó Juda dzəə̀n.

¹³Wù yiì bèy, kibér ke aŋgàa biimé ve dzəə̀n sá wír veé Judàa nèn bìʼnìn kinyàʼ kfə́ kiy. Kí màysì, e fòy, Banabar bìʼnìn sa.

¹⁴Mo m yenen, aáwune sí yii kinyo, a bó kí yòʼ dzə̀ réŋ mo sáʼka woo kùm Kristu dzəə̀n, m nèn yòŋ Pita e wìr dzə̀m si, a saʼ jii, wù sà dzə́ wír woó Juda, a bó wù yòʼ lo, wù wàa jùmrì liì woó Juda, kfə̀n dzə́ lèn ji wír ve bó yòʼ dzəə̀n veé Judàa kér fó a jùmrì liì woo shooy, é bo wùn áwune wáa dzə moó le á?

¹⁵Mò‑oò suuy e Pita bèy, a kí dzə̀ rú. Vèr áwune dzə̀ wón ve á dzəən dzəə́n ji wír veé Juda, a bó á yòʼ‑oò dzə̀ə́ ver ji vé lòné moo vitúm ve ví yòʼ kér nsər se Nyùy.

¹⁶Yii bèy, a vèr kì sá jii, bó wìr yòʼ dzə̀ shó wo dzə̀ wù ghèén fo Nyùy ji bìʼ fo wun kì yii mo nsər suuyì. A dzə̀ wù kù ghèén cáʼcáʼ bìʼ fo wù wayin shilív e Jesus Kristu wùn. A dzə̀ mo ver vee wír veé Judàa wáy shilív lèn e Jesus Kristu wùn ji vèr fíʼ gheén fo Nyùy. Aá kù gheen a dzə̀ bìʼ shilív she á wáy e Kristu wùn, a bó yòʼ dzə̀ bìʼ lim yímóʼó ye vèr lim ji á mo nsər suuyì. Bó yòʼ dzə̀ wìr ghèén fo Nyùy bìʼ lim yímóʼó ye wù lìmèn ji á mo nsər suuyì gheéy.

¹⁷Mo vèr wáy shilív e Jesus Kristu wùn, e bó a gheén fo Nyùy, a fèn dzə̀ ji kí din ji vèr dzə̀ sá vé lòné, bo dzə̀ ji Kristu wáy wíri wáyín é lòn a? Bó yòʼ dzə̀ bey gheéy.

¹⁸Yii bèy, a m kfə̀n lò, a tiy e kinyò ke mò‑oò sháʼnin ji bó yòʼ dzə̀ wìr ghèén fo Nyùy ji bìʼ fo ŋgaàŋ kì lem nsər, bo m sí jáyí, e lì lòn.

¹⁹Ke kí dzəə̀n kí dzə̀ jii, a m lò, a nəə́ e Nyùy mvə̀m nsər, m nèn yèn ji m kpù ne fo dzəə yee ji m wáa lèm nsər, e bóo fíʼ gheén fo Nyùy, a m dzə̀ kém lèn vèr Nyùy wo wù rə́r mendzən mem.

²⁰Mo Kristu‑uù kpuun é kintam, sì yém yee kpú. M dzə́ lèn bèn, a bó yòʼ dzəə́ dzə́ mo gheéy, sí dzə́ Kristu e mǒ wùn. A dzə́ ye m dzə́ rə̀n, m dzə́ a dzə̀ bìʼ fo m wáy shilív e wun woo Wan Nyùy wùn, wo wù kòŋèn mo, e lì kitú kfə́, e tàŋrí mo shó.

²¹A dzə̀ la m yòʼ màʼày kilíŋ ke Nyùy bùʼùn mo shó ji və́ə woo wír. A bèn dzə̀ rú ji dzə̀ wìr ghèén fo Nyùy ji bìʼ fo wù kì lem nsər, bo Kristu‑uù kpù kisáŋ.