Read Lamnso Galatia 3 Bible Online

Galatia 3 - Lamnso bible

Galatia 3

¹M nén a suúy e vèn vee wír veé Galatia ji vèn yùŋsí a feyì. Vèn yii mo á ròʼ ven róʼon. Bó á yòʼ‑oò lo a rəsí, a fìʼtì e vèn mo Kristu‑uù kpuun, a naàrì, kí wáa dzə mo vèn yén e sí yéné a?

²M taʼ, e dzər ven kinyo kimòʼón. Vèn kuúmé mo Kiyoy ke Ranén kí‑iì wìyìn fo vèn. Kí‑iì wìy bìʼ fo vèn‑eè lìmèn mo nsər suuyì moo bìʼ fo vèn‑eè yuun kinyo ke Jesus Kristu, e wày shilív e wun wùn á?

³Vèn yúŋsi ka ben? Vèn‑eè kèʼ kinyo vèn à Kiyoy ke Ranén kí ji á wáa dzə wír Nyùy, e lò, e bìnkìr ji vèn maysi fo věn vitu à?

⁴Dzə̀ ji vinyo ve Kiyoy ke Ranén kí‑iì dìnèn e vèn ví lày ne kisáŋ à? Bó m yoʼ yèn bey.

⁵Dzə̀ ji Nyùy géŋsin e vèn, fó ven Kiyoy kfə́, a kí yii vinyo ve ghaʼtín ví e věn mvəm, bìʼ fo vèn lem nsər sə́, mo dzə̀ bìʼ fo vèn yú kinyo ke Jesus, wáy shilív é wùn wó a?

⁶ Vèn li mfìʼ fo Abraham. Vé‑eè sàŋ jii, «Wù‑uù biìmé kinyo ke Nyùy, Nyùy nèn lì wun ji wír woo là jay bìʼ shilív she wù‑uù wayin e wun wùn.»

⁷Vèn yén ri sa lèn ji dzə̀ wír ve á wáy shilív e Nyùy wùn ve dzəə̀n rú rám Abraham.

⁸ A Ŋwàʼ Nyùyi‑iì ló a dìn fo ghan ji wír ve bó yòʼ dzəə̀n veé Judàa wíy way sa shilív e Nyùy wùn, é wù li áwune ji wír vee là jay. Á kinyo ke kí‑iì yiìn, bo Nyùy fiʼti sáʼka və wo juŋ və̀n e Abraham fo ghan. Wù‑uù sùúy shó jii, «M wíy shaà fo wò, e səə̀vì vitúm veé kitu ke nsay vidzə̀m.»

⁹Kí nén a dzə jii, wír adzə̀m ve á wáy shilív e Nyùy wùn mo Abraham‑eè wayiné dzə̀ á ve Nyùy buʼ mo wù‑uù bùʼùn Abraham.

¹⁰ Vèn wáa kiíy ji wìr dzə̀m wo wù leey ji dzə̀ wun ghèén fo Nyùy ji bìʼ fo wù lem nsər kù li a dzə̀ á lòn. A kí dzə̀ bey, bìʼ fo kí dzəə̀n é Ŋwàʼ Nyùy jii, «Lòné dzə̀ wó wìr wo bó wù yòʼ ŋeevì vinyo vidzə̀m ve vé‑eè saŋen é Ŋwàʼ Nsər, yii mo ví dzəə̀n.»

¹¹ Kí kfə́n a dìn sa fo Ŋwàʼ Nyùy kiránén jii, bó yòʼ dzə̀ wìr ghèén fo Nyùy ji bìʼ fo wù lem a nsər se Nyùy, bìʼ fo vé‑eè saŋen jii, «Wìr wo wù wayin shilív e Nyùy wùn, wù lí ŋgaàŋ ji wír woo là jay, dzə̀ wo wù wíy lùŋ.»

¹² A bó wìr wo wù jumrì kfə́ dzə́ə a dzə̀ fó nsər ji wun fiʼ wìy lùŋ, yòʼ wáy shilív e Nyùy wùn gheéy. Wù tíy kfə́ a dzə̀ é kinyò ke vé‑eè saŋen jii, «Wìr wo wù ŋeevì nsər sidzə̀m, yii mo sí dzəə̀n, wíy lùŋ.»

¹³ Yii bèy, mo nsər yiìn, vèsən nəə́ é lòn, vèsən wàa kiíy jii, Jesus Kristu fə̀ə́r ne vèsən fó lòn fóo fèy. Wù‑uù lì lòn wósən woo shooy, e siìr e wùn kitu. A dzə̀ mo vé‑eè saŋen é Ŋwàʼ Nyùy jii, «Á keerì wír e kici, bo lǒn Nyùyi sì é kitu wo.»

¹⁴A Nyùy‑iì sìysì vinyo vìn bèy ji wun fiʼ bùʼ sa wír ve bó yòʼ dzəə̀n veé Juda e mbùʼmé wo wù‑uù bùʼùn Abraham sho, e fò Kiyoy kfə́ ke Ranén kí e vèsən ve á wáy shilív e Jesus Kristu wùn adzə̀m mo wù‑uù kàʼàn.

¹⁵Afə̀r vem, vèsən fiʼsin kinyo kìn e kímóʼ kí ke wíri yii yii. Vèn kì sá jii, wìr yii siysì kinyo, tá mban sho, bo bó yòʼ dzə̀ wìr wùmòʼ kfə̀n wìy, e kòr kinyo kee shooy, a bó yòʼ dzə̀ wù kfə̀n dzə̀sì sa kinyo sho.

¹⁶Fo kàʼ ye Nyùy‑iì kàʼàn Abraham, kí nén a dzə jii, wù‑uù kàʼ a dzə̀ wùn wan wo wù‑uù wíy fəə fo Abraham ram. A bó á yòʼ‑oò lo sàŋ ji Nyùy‑iì kàʼ Abraham wùn à wón vee wùn ramé adzə̀m. Vé‑eè sàŋ ji wù‑uù kàʼ a dzə̀ Abraham wùn wan woo wùn ram e mòʼón,[2] a wan woo shooy dzə̀ *Mfə̀ə́r wo dzəə̀n Kristu.

¹⁷M nén a tàʼ ji vèn kiíy á jii, mo Nyùy‑iì kàʼàn Abraham e kinyò fèn, kiyá ki siíy, e shaà kishóv mtaár e ghiì kweè, bo wù wáa fo nsər, bo bó yòʼ dzə̀ nsər yee shooy kfə̀n kòr mensaŋ me Nyùy‑iì gwàrìn fó mbìy, é kinyo ke wù‑uù kàʼàn kí lay kisáŋ.

¹⁸A bèn dzə̀ rú ji dzə̀ Nyùy bùʼ wír bìʼ fo wù lem nsər, bo bó wù yòʼ dzəə́ buʼ a dzə̀ ji bìʼ fo wù‑uù kàʼàn bey. A ké Abraham ki dzə̀ ji Nyùy‑iì kàʼ wun káʼan.

¹⁹Mo kí‑iì siìn bey, bo Nyùy‑iì dzəsì nsər bìʼ ka lèn? Wù‑uù fó ji wìr jáy kinyo, é wù fiʼ kìíy a ji wun jày ne, é nsər yee shooy wáa dànèr wíri, e meé e ghan se wan woo Abraham ram və̀y wíy wìy. A dzə̀ wun wo Nyùy‑iì wayin ŋkàʼmé woo shooy e wùn kiwo. Nyùy nèn lòo dzə̀sì nsər, e tùm a dzə̀ nshèelav sə́ shó, sí wìy, e wày e taà dzəə̀ wùmǒʼ kiwo.

²⁰Vèn kì sá jii, a wíri siysì kinyo, a wìr tíy fo ntìntìn, bo dzə̀ á ji wù náŋsin vinyo vee mbìv sibaà vin ji ví fiʼ tàrnín. A bó ŋkàʼme Nyùy yòʼ‑oò ló a dzə bèy. Kù‑uù kàʼ wun fo wùn kitu wùn mòʼón, mo wù‑uù kòŋèn.

²¹Mo kí dzəə̀n bey, bo dzə̀ nsər se Nyùy si kfə̀n kòr kinyo ke wù‑uù kàʼàn á? Àáy. Bó yòʼ dzə̀ kí wàa dzə bèy, bìʼ fo bó nsər yòʼ dzəə̀n shó ye dzə̀ yì yiì, wìr lùŋ. A yì bèn‑eè dzə̀, bo dzə̀ wìr lèm, e ghèén fo Nyùy ji wír woo là jay.

²²Yii bèy, ke Ŋwàʼ Nyùyi din ki dzə̀ jii, wìr dzə̀m sí reŋ a vikwàn fó vinyò ve bi ví. A wú din bèy ji wíri fiʼ kìíy a ji kù mày wír ve á wáy shilív e Jesus Kristu wùn ve á wíy a ker ŋkàʼmé wo Nyùy‑iì kàʼàn, bìʼ fo wù‑uù kàʼàn a dzə̀ wír vee bey sho.

²³Yì‑iì dzə̀ fó mbìy, a bó Kristu yóʼ ne wìy ye dzə̀ wíri wàa way shilív é wùn wó, aá kù yú a dzə̀ fó nsər, a yì kúr áwune moo vé sháŋé, e meé e ghan se Nyùy‑iì wíy yiì, aáwune kiíy Kristu, e wày shilív é wùn wó.

²⁴A nsər rə̀n‑eè kér áwune mo wìr yii kér wán wo á foon shó ji wù wáa lìy, lóo lìy, wù wàa sə̀r a kijuŋ. A yì kér áwune bey ji Kristu wíy wiyì, aá nèn wày shilív é wùn wó, é yii wun, é bo á gheén á fo Nyùy.

²⁵Á bèy lèn, mo Kristu wìyìn ne ye dzə̀ wìr wày shilív é wùn wó, bó nsər yòʼ dzəə́ kér vèsən mo wìr yii kér wan wìr.

²⁶Sí kér Nyùy, bìʼ fo ven ve á wayin shilív e Jesus Kristu wùn adzə̀me siìn wón Nyùy.

²⁷A dzə̀ vèn wàa kiíy bèy, bìʼ fo wìr dzə̀m wo á wayin é ndzəv ji wù tàtí ne wùn Jesus Kristu siìn wùn Kristu kifá kimòʼón.

²⁸A bó wìr wùmòʼ yòʼ dzə̀ə́ jeéy ji woó Juda kìn wir kitum. A bó wùmòʼ yòʼ dzə̀ə́ ji kwàn, bo wùmòʼ wáa dzə ji wan wòŋ. A bó á yòʼ fə̀m dzəə́ leey wùmòʼ ji lumèn kìn wiíy. Áwune tàtí ne adzə̀m wùn à Jesus Kristu, e nèn a dzə kifá kimòʼón.

²⁹Mo vèn siìn wír Kristu wo dzəə̀n rám Abraham yee rú, bo vèn sì sá rám yee shooy, a mbùʼmé wo Nyùy‑iì kàʼàn Abraham sho sì wóon.