Read Lamnso Galatia 4 Bible Online

Galatia 4 - Lamnso bible

Galatia 4

¹Kinyo ke m suuy kìn ki dzə̀ jii, mo á fə̀m kiìn ji wan wo tàr wov tiirin láʼ sho, sí kér wun láʼ yee shooy, yii bèy, wù lóo kuy kuyín, la wù yòʼ a dzə jeéy fo kwǎn tàr woví.

²Wù kù kér fó a yu ntir se wìr ve á leey fo wun, é wír ve səné wáa leéy fo tàr wóv keŋ, e meé e ghan se tàr wov‑iì sìysìn ji wù wíy dù e kitu wo.

³Dzə̀ sá réŋréŋ mo vèsən‑eè dzəə̀n wón, a bó á yòʼ sí kér kifá ke Nyùy‑iì kàʼàn vèsən shó. Vèsən‑eè dzə̀ moo akwàn, yii vinyo ve nsər suuyì, yúv yúv, a bó á yòʼ kì sár.

⁴Ghán sí nèn wìy ghèén se Nyùy‑iì sìysìn ji wun wíy yiì kinyo ke wù‑uù kàʼàn. Wù túm Wán və é ndzə fèn, wù wìy, wiíy wùmòʼ dzəə́ wun, wù wáa dzə sa, a yu a dzə̀ fó nsər réŋréŋ mo vèsən‑eè yú.

⁵A wù‑uù yú bèy ji wun fíʼ fəə́r vèsən fó sar nsər fèy, é Nyùy li vèsən ji wón vee wón.

⁶Mo wù liìn vèsən ji wón və́, e nèn tùm Kiyoy ke Wan və və̀n, kí wíy, e nə̀ə́ e vèsə́n meliv, a yiì, vèsən wáa yòŋrì Nyùy ji Tàr, Tàr.

⁷Kí nén a dzə jii, wun woo Nyùy yiì ne a ji lá vèn yòʼ dzə́ə a dzə akwàn. Vèn sì wón vee wón. Mo Nyùy liìn ne ven ji wón və́, bo vèn wíy a ker sa mbùʼmé wo wù‑uù tirin e wón vəə́.

⁸Vèn wáa kuumé mo vèn‑eè dzəə̀n fó mbìy, a bó vèn yóʼ ne kìíy Nyùy və̀n. Vèn‑eè dzə̀ akwǎn anyùy kisaŋe, a bó vee shooyi yòʼ dzə̀ anyùy gheéy.

⁹Á bèy, vèn kìíy ne Nyùy wo rù lèn. Yii bèy, a ke m kì yíi a suúy ki dzə̀ jii, kù kìíy Nyùy ven. Mo kí dzəə̀n ben, yií ka lèn, bo vèn kfə́n a tàʼ ji á kfə́n é bàm, a yu a dzə̀ fó vinyò ve bó ví yòʼ kér ndzə̀n fo Nyùy, a bó yòʼ dzə̀ ví fò ven vitaáví, vèn wàa yiì vinyo ve ru ví? A dzə̀ ví kù kùr ven kúrín, e siìr ji akwǎn vinyò veé ndzə.

¹⁰Vèn wày vifií ji á wáa bam vishiíy vímóʼ ví ji ve kuʼkìn ví, a lèm ŋwee símóʼ sí, e kfə̀n a lèm sa ghán símóʼ sí é kiya, a lèm viyá vímóʼ ví.

¹¹Vèn yii bèy, a m fan ji ghanmóʼ bo kinyo ke mò‑oò katìr, yéʼey ven shó ki lày ne a kisáŋ.

¹²Afə̀r vem, kii vèn, vèn ku bìʼnìn a dzə̀ mo, e yiì mo mò‑oò yiìn, e kfə̀n mo vèn‑eè dzə́ fo mbìy, a bó vèn yòʼ sí tíy e nsər ji á fíʼ gheén fo Nyùy. Bó vèn yòʼ‑oò yiì ne yiì kinyo ke kí nyár mo moo kin gheéy.

¹³Vèn kuúmé mo mò‑oò wìyìn, a jòy e věn wòŋ, vèsən wáa dzə, m wáa fìʼtì kinyo kee kùm Jesus Kristu e vèn.

¹⁴Mò‑oò joy, dzəsì a dzə̀ kibeʼèy kén, a bó vèn yòʼ‑oò ló a kìnsì wún, a leʼ mo. Vèn‑eè kér mo mo m dzə̀ nshìylav Nyùy, kìn wúnwun woo Jesus Kristu.

¹⁵Vèn‑eè shéʼri mo é ŋàŋ bey, koóy ka lèn, bo vèn yii kin? Aá dzə̀r e mò dzə́rín, m kù a suúy jii, a yì‑iì dzə̀ é ghan see shooy, vèn fə̀tí sí yén, e kùvsín a yém shó.

¹⁶M kfə̀n ne lèn ji ŋgaà won vibàn, bìʼ fo m suuy a dzə̀ kinyo ke ru kí e vèn a?

¹⁷Vèn wáa kiíy ji wír ve á leerì ven víyi yòʼ taʼ a dzə̀ á kinyo ke ru kí. Áwune səŋrì ven sə́ŋrin, é vèsən fiʼ jàvsìn, é vèn wáa yu a dzə̀ fo áwune.

¹⁸A bó m yòʼ suuy bèn ji mo bó m yòʼ dzəə̀n vèsən, kí bìr á fo wìr koó ven é viŋkar. A dzə̀ kí wàa dzə kijuŋ, a kinyo ke wù taʼ ki bèn dzə̀ ke ru kí.

¹⁹Wòn vem, vèn yii kinyo kìn bèn, a kí dzə́ mo m kfə̀n wíy a rəsí, a lum ven lúmén mo wiíy lùm wán, e meé e ghan se vèn wíy a ker liì wo dzəə̀n wo Kristu.

²⁰Fo mò, m koŋ kém ji bo vèsən kì dzə̀ á fo si lèn, é m fíʼ kiíy moo tir ven ji weè. Kinyo kìn ki tàrír mo féyì.

²¹M nén a tàʼ, e dìn kinyo kímóʼ kí e wìr wo wù tíy kfə́ ji dzə̀ wìr kù lèm nsər, e bóo fíʼ gheén fo Nyùy. Wìr woo bey yuúrí ri kinyo kímóʼ kí ke vé‑eè saŋen é Ŋwàʼ Nsər foo fèy.

²²Vé‑eè sàŋ fó jii, Abraham‑eè kér a wón abaà, vilum vilum. A wù‑uù dzə̀ə́ wùmòʼ wùn wiíy wo nəə́n, e dzə̀ə́ wùmòʼ á wùn wiíy woo kwàn.

²³Wiíy wo yì‑iì dzəə̀n kwàn və̀y bóŋ bvəm réŋréŋ á mo wiíy yii bóŋ bvəm, e dzə̀ə́. Yii bèy, mo wo nəə́n‑eè dzəə̀n kár, wù nèn bòŋ kfə́, e dzə̀ə́, a dzə̀ bìʼ fo Nyùy‑iì kàʼàn.

²⁴Kinyo kìn ki nén a dzə mfìʼ vinyò vímóʼ ví. Vikìy vee abaà víne tíy fo *mensàŋ mee mebaà. Hagar woo kwàn tíy fo mensàŋ me Nyùy‑iì gwàrìn é Gwan Sinay, a wír ve vé‑eè dzəən é mvə̀m mensàŋ foo fèyi dzə̀ akwǎn mensàŋ mee shooy réŋréŋ mo Hagar‑iì dzəə wón e vikwàn ví.

²⁵Mo Hagar tíy fo mensàŋ meé Gwan Sinay wo wù dzəə̀n é wòŋ woo Arabia, wù kfə́n a tiy sa fo Jerusalem woo lèn, bìʼ fo wír veé Jerusalem wùn à wón vév adzə̀me kù dzəə́ reŋ vikwàn vé mensàŋ mee shooy.

²⁶Yii bèy, a yìy wòsən dzə̀ Jerusalem wo wù dzəə̀n a dzə̀ é yuv. A bó woo shooy yòʼ reŋ vikwàn vé vinyò vímóʼ ví gheéy.

²⁷ A vinyo vìn vi dzə̀ ve vé‑eè saŋen é Ŋwàʼ Nyùy jii: «Wò woo wiíy woo kár, wo bó à yòʼ dzəə wón, kú a sheʼrí. Wò, wo bó à yòʼ kiìn mo nyár wané koó, á sheʼ, a kwakír. Kú a kiíy jii, wón wiíy woo là lúme wíy kùʼ, e shaà vé wiíy wo wù dzə́ e wun nsaàlav.»

²⁸Á bèy lèn, afə̀r vem, vèn dzə̀ wón Nyùy lèn, a dzə̀ mo Nyùy‑iì kàʼàn réŋréŋ mo Abraham‑eè dzəən Aysi sa mo Nyùy‑iì kàʼàn.

²⁹A kinyo ke kí‑iì kooyin é ghan see shooy ki dzə̀ kíwun ke kí kooy lèn. Wan wo vé‑eè dzəən mo á yii dzəə wán‑eè lò, a bàn wo yì‑iì foon Kiyoy ke Nyùy vitaáví, é bo á dzəə́.

³⁰ Kí‑iì kòóy bey, á sáŋ ji Nyùy‑iì tìr Abraham ji ka? Wù‑uù sùúy jii, «Jùm wiíy woo kwàn və̀y wùn wan və. Bó yòʼ dzə̀ wàn wiíy woo kwàn wìy jàv vitsə́ʼ vé tàr wov wùn wàn wiíy wo nəə́n.»

³¹Afə̀r vem, kidzə̀m ki wáa dzə jii, vèsən yòʼ dzə̀ á wón wiíy woo kwàn, reŋ vikwàn fo nsər. Vèsən dzə̀ wón wiíy wo nəə́n, yú a dzə̀ fo Kiyòy ke Nyùy ki.