Read Lamnso Galatia 5 Bible Online

Galatia 5 - Lamnso bible

Galatia 5

¹Vèn wáa kiíy jii, Kristu‑uù fə̀ə́r ne vèsən fó vikwàn vee bìʼ nsər ji lá vèsən yòʼ dzə́ə a rèŋ vikwàn. Vèn ku nèn a tiy rì ji wír ve á bòyìn ne, e làa yòʼ biimé ji vèn kfən kfə̀n ji akwàn.

²Vèn yuúrí ke mo woo Por suuy lèn ki. A vèn biìmé ji á kér fó a saŋ *mbèʼ sén, é bo vèn fíʼ a gheén fo Nyùy, bo dzə̀ ji kinyo ke Kristu‑uù yiìn kí lày ne a kisáŋ fo vèn.

³M nen kfə̀n a feesí vituʼùr vé wìr ve á biíme ji vé‑éè wáa yiì bèy jii, a wìr lò, a yiì bèy, bo wù kér a fó wìy a ŋeèvì nsər se Nyùy‑iì foon e wír veé Judàa sidzə̀m, a lèm.

⁴Ven ve vèn katìr ji vèn wáa lèm nsər sìn, e bóo fíʼ gheén fo Nyùy, vèn wáa kiíy jii, vèn à Kristu jàvsìn ne, vèn rán mbùʼmé wo wù bùʼùn ven shó kisáŋ.

⁵Késən vee wír Kristu ki dzə̀ jii, vèsən wáy shilív a dzə̀ e Kristu wùn, a yu a dzə̀ fo Kiyoy ke Nyùy ki, é kí wáa yiì, é vèsən wáa leéy fó mbìy, a kiíy ji Nyùy kù wíy lì vèsən ji wír vee là jay.

⁶A wíri tàtí ne wùn à Jesus Kristu, la wùmòʼ yòʼ dzə́ə a dzə jeéy ji wír wo á saŋen mbèʼ sə́ é liì wìr veé Juda, kìn wo bó á yoʼ sàŋ. Ke kuʼùn kí dzə̀ jii, wíri wáy á shilív e Kristu wùn, a kòŋnìn.

⁷Yì‑iì dzə̀ fó mbìy, a vèn yii kijuŋ feyì. Kfən kòóy ka lèn, bo vèn maʼti kinyo ke dzəə̀n ke ru kí?

⁸Bó yòʼ dzə̀ ji kfə̀n yiì a Nyùy wo wù‑uù liìn ne ven ji wír və́.

⁹Vèn kuúmé ŋgàn ye á yii maʼ jii, shinyaà[3] shí‑iì lò là rooné, e yiì, meŋkfəŋ mè kóʼ medzə̀m.

¹⁰Yii bèy, mo vèsən tíy e kinyò kee shó kimòʼón, a dzə̀ ké Taàtá wòsən Jesus Kristu, m kì kijuŋ jii, vèn kù wíy a tiy a dzə̀ é kinyò ke m suuy e vèn. A Nyùy wíy màʼ ŋgeʼ e wìr woo shooy wo wù bvəər vifií vén, kìn ŋgaàŋ dzə̀ la.

¹¹Afə̀r vem, a dzə̀ ji mò‑oò dzəə́ tíy e kinyò kee ji á kér fó saŋ mbèʼ se wìr, é bo wù gheén Nyùy, bo wír ve á suuy bèyi kù rə́si ron wúu yém lèn fo gha? Bo bó kinyo ke m fiʼtì ji vé‑eè yùyrí Kristu e kintam bìʼ ajay wíri kí yòʼ kfə̀n kì nyár wír.

¹²Fo áwune vin ve á jívir ven ji á wáa saŋ mbèʼ sén, m nén a kòŋ kém jii, bo áwune kì shaà fó mbìy, e màysì, a sòŋrì a dzə̀ á vitú vév.

¹³Afə̀r vem, Nyùy fə̀ə́r ne ven fó vikwàn ve vèn‑eè reŋ fo nsər. Yii bèy, mo vèn bòyìn, lá vèn yòʼ kù nèn a yiì a dzə̀ mo mensə́ men mè taʼà. Vèn bòy, a kí dzə̀ ji vèn wáa kòŋnìn, e nèn a sənín vitú vén,

¹⁴ bìʼ fo nsər se Nyùy‑iì foon sidzə̀m si tàtí a dzə̀ é kitu ke kinyò kee jii, «Wìr wáa kòŋ fə́r və mo wù koŋ kitú kfə́.»

¹⁵Yii bèy, a vèn lò, e kù a nyàmnìn, a lumnín moo jwí si, vèn kù yòʼ a kiíy ji vèn sí bívir a vitú vén.

¹⁶M nén a tir ven jii, vèn wáa tiír kiwuú kén, a yu a dzə̀ á fo Kiyoy ke Ranén kí, é la wìr yòʼ dzə́ə a yu a dzə̀ fó mensə, a yiì mo mè limè.

¹⁷Kinyo ke mensə́ mè koŋ ki yòʼ dzə̀ ke Kiyoy ke Ranén kí tíy sho. Ke Kiyoy ke Ranén kí tíy sho ki nén a dzə ke bó mensə́ mè yòʼ koŋè. Mo bó yòʼ dzə̀ vinyo vìn vi shèmsín, bo bó yòʼ dzə̀ vèn wàa yiì vinyo ve vèn koŋ a yiì.

¹⁸Yii bèy, a vèn bèn yú a dzə̀ fo Kiyoy ke Ranén kí, bo bó vèn yòʼ dzəə́ kér fó a kàtìr fo věn vitaaví ji á wáa yiì mo nsər suuyì.

¹⁹A wìr dzə̀m kì mo vinyo ve mensə́ mè bánri wír, a wù yii vìn vi dzəə̀n. Ví dzə̀ jii, wíri koŋ fó a jàŋ kinjàŋ, a kwàʼtì a dzə̀ vinyo vee bey, a kòŋ ji á wáa nyòmèr a dzə̀ wún.

²⁰Aá kfə̀n ghvə́m anyùy kisaŋe, wáy vifií vév a dzə̀ é səm. Á lo, á wàa bànnìn, a taŋnín, a ghèʼ kighèʼ, a shwiíy kilòŋ. Wìr kù a dìy a dzə̀ shuu və́. Wìr lo, wù jàvsìn wíri ji wun fiʼ kòóy rə́ə yee mbìv.

²¹Aá kfə̀n siíme kinsiimè, rə́si nó a dzə̀ meluʼ, ghán bvəər virə́ʼ. M nen kfə̀n a tir ven mo mò‑oò sí tír fo mbìy, jii, vèn wáa yen a fó a yiì vinyo vìn, bìʼ fo bó yòʼ dzə̀ wír ve á yii kfəə́ se vinyò vìne wìy shòv sáʼ Nyùy e si.

²²Á bèy, a vinyo ve Kiyoy ke Ranén kí bánri wíri, aá yii vi dzə̀ jii, á koŋ Nyùy, kfə̀n koŋnìnè, kér kishéʼrì aáwuné meliv, dzə́ dzəʼə̀m yee nyaáŋ, kér wir dzə̀m ji weè, shám wíri, yii a dzə̀ kinyo ke dzəə̀n ke ru kí, lóo suúy kinyo, á wàa yiì a dzə̀ kíwun.

²³Aá yii bèy, e làa yòʼ a yen vitú vév gheéy, kinyo ki kooyì, á kù kfə̀mén. A wìr yii a dzə̀ vinyo vìn, bo bó nsər yìmòʼ yòʼ dzə̀ shó ye dzə̀ wù wàa fàn.

²⁴Vèn wáa kiíy jii, wír ve dzəə̀n vé Jesus Kristùu kì kév á ji á kpù ne fo vinyò ve mensə́ mev mè kér shií shó ji áwune wáa yiì réŋréŋ mo Kristu‑uù kpuun é kintam.

²⁵Mo vèsən sí dzə́ lèn a dzə̀ bìʼ Kiyoy ke Ranén kí, vèsən ku nèn a tiír kiwúu késən a dzə̀ mo wù suuyì.

²⁶Kí nén a dzə jii, lá wìr yòʼ dzə́ə a ràʼsì wún á ji yiì wun, e bóo gheén Nyùy, fó a tinsín fə́r və, é wù wáa siimé.