Read Lamnso Galatia 6 Bible Online

Galatia 6 - Lamnso bible

Galatia 6

¹Afə̀r vem, kinyo kímóʼ kí nén a dzə jii, a vèn yèn, a fər won wùmòʼ jáy kinyo, wìr fo vèn wo wù yú a dzə̀ fo Kiyoy ke Ranén kí kù a mùm a fó tir ŋgaàŋ, é wù maʼti kinyo kee shooy. Yii bèy, wù lóo tir, wù kù yòʼ a tir ji weè, a yen fó to sa e kinyò.

²Wìr kú a sə fə́r və kibeʼèy ke kí gháʼ wun. Vèn lóo yiì bèy, bo vèn sí lem nsər ye yì lo a dzə̀ fo Kristu.

³A dzə̀ vèn kù a sənín vitú, bìʼ fo, a wìr lò, a ràʼsì wún ji wun yii vinyo shaa wùmòʼ, a bó wù yòʼ yii, bo wù bóʼti a dzə̀ á kitú kfə́.

⁴A dzə̀ wìr kù a sayrí a dzə̀ rə́ yee lim, yén, a yí dzə̀ e juŋ ye dzə̀ wù wàa binsí, wù nèn a binsí, e làa yòʼ a binsí ji bìʼ fo wun fiʼsìn wùn à yé fər vəə́.

⁵Vèn wáa kiíy ji wìr dzə̀m kér fó a yiì a dzə̀ á rə́ yee lim.

⁶Kímóʼ kí nén a dzə jii, wír ve á yéʼey kinyo ke Nyùy yéʼéyíné wáa jàv a vifá ve Nyùy foon aáwune vidzə̀m, a fo wír ve á yéʼey áwune.

⁷Vèn wáa yen fo wìr wáa boʼtí kitú kfə́, a kwàʼ ji bó Nyùy yòʼ yén kinyo ke wù yii. Wìr yii káv kifá a dzə̀ ke wù‑uù wayin.

⁸A wìr wày a dzə̀ ŋgoòy kinyò ke mensə́ mè taʼà, bo wù wíy kav a dzə̀ kinyo ke mensə́ mè tíy sho, a kee shooy ki kù wáy wun a dzə̀ é lòn woo là mày. Wìr wáy kfə́ ŋgoòy kinyò ke wù yú fo Kiyoy ke Ranén kí, bo wù wíy kav a dzə̀ kinyo ke kí lo fo Kiyoy ke Ranén kí, a dzə̀ dzəʼə̀m yee là may.

⁹Lá vèsən yòʼ a dor fó a yiì vinyo ve ru ví, bìʼ fo, a vèsən yii bèy, e làa yòʼ a weèy, bo ghán sí wíy gheén, é vèsən wáa ker dzəʼə̀m yee là may rə̀n.

¹⁰Vèsən ku nèn a yiì a dzə̀ vinyo ve juŋ vi e wìr dzə̀m mo Nyùy fó kintóʼ, bo taaka wír ve vèsən áwune tatin, e wày shilív e Kristu wùn.

¹¹Vèn yén ri mo sí se ŋwàʼ sìn si kùʼkìn. Sàŋ mo lèn e kiwó kém kí.

¹²M nen kfə̀n a suúy jii, wír ve á kan ven ji bo á kì sàŋ mbèʼ sén mo liì woó Juda dzəə̀né yii bèy, bìʼ fo á wáy kév vifií a dzə̀ é vinyò ve á yii ji wíri fíʼ a yen. Aá fan fo wír veé Judàa wáa bàn áwune ji á kù tíy kév kinyo kimòʼón á ji Jesus Kristu‑uù kpù ne e kintam.

¹³A bó wír ve á biíme ji á wáa naŋsín áwune víne yòʼ fə̀m lem sa nsər se wìr veé Juda sidzə̀m. Áwune səŋrì ven cáʼcáʼ ji vèn biímé, aá náŋsín sá ven, aá fíʼ a sùmrì wún ji vèn kfə̀n ne aáwuné mbìv.

¹⁴A kém kí dzə̀, a bó m yòʼ taʼ, a sùmrì wún, e shaà kinyo kimòʼón ke m tíy sho ji Tàr wòsən Jesus Kristu‑uù lo kpù é kintam. Mo wù‑uù kpuun a dzə̀ bìʼ vinyo veé ndzə fèn vidzə̀m, vinyo vee shooy vi kpù ne fo mò, m kpú saa fo fo.

¹⁵A bó Nyùy yòʼ dzəə́ leey kee ji á sà nàŋsín wír ji woó Juda, mo bó á yoʼ nàŋsín a. Ke wù leey ki dzə̀ ji wìr kfə̀n ne ji wír wo fíy.

¹⁶Wír ve á tíy e kinyò fèn adzə̀me dzə̀ ve Nyùy yén ji wír veé Isray vee rú. A m lón ji wù kú a sham áwune, a yiì, é melív mev mè wáa neŋ ji nyaáŋ.

¹⁷M lóo màysì, e nèn a suúy jii, lá wìr yòʼ kfə̀n dzə́ə a jivír a mo é kinyò fèn. Vilur vee mǒ wùn ví din kijuŋ ji m dzə̀ kwàn a dzə̀ wó Kristu.

¹⁸Afə̀r vem, Tàr wòsən Jesus Kristu kú a kòŋ ven, a leéy fo vèn. Amen.