Read Lamnso Efesor 5 Bible Online

Efesor 5 - Lamnso bible

Efesor 5

¹Vèn wáa kuumé ji vèn dzə̀ wón Nyùy, a wù koŋ ven é ŋàŋ. Vèn ku nèn a yiì mo dzə̀ wóné wàa yiì, a bìʼnìn liì a dzə̀ wo Tàr wov.

²Vèn lóo yiì vinyo vidzə̀m, á kù a tiír a dzə̀ koŋ fo mbìy réŋréŋ mo Kristu‑uù kòŋèn vèsən, e fò kitú kfə́ ji wun fíʼ taŋrí vèsən, Nyùy biímé ntàŋrí woo shooy.

³Mo vèn siìn ji wír wun woo Nyùy, kí yoʼ fə̀m ghèén ji vèn wáa ker kwaʼtì yímóʼó shishàr ji tàm wìr fo vèn wù lò a yiì kinyo ke kisaŋ ki. Kìn dzə̀ ji wìr jaŋ kinjàŋ, kìn wù ghán a dzə̀ viŋkar, kìn wù yii liì kisaŋ woo ka, kìn wù taʼ a dzə̀ kifàʼ.

⁴A bó kí yoʼ ghèén sa ji wìr wáa fèr kimfèr ke kisaŋ ki, a mèn jí se bi sí, kìn wù fer a dzə̀ kimfèr ke kiyuŋ kí. Vèn wáa fèr a dzə̀ vinyo ve dzə̀ ví wàa sùyrì Nyùy.

⁵Vèn wáa kiíy kijuŋ ji wìr wo wù jaŋ kinjàŋ, yii liì kisaŋ, kìn wù taʼ a dzə̀ kifàʼ yòʼ dzə̀ wù wìy shòv sáʼ ye dzəə̀n yé Nyùy wùn Kristu e wùn si gheéy. A wìr taʼ kifàʼ, bo wù lì ne vifá ve wù koŋ vee shooy ji Nyùy və.

⁶Vèn wáa yen fo wìr wiy, a kìnèn ji vinyo vìn vi yòʼ dzə̀ ve bi ví, e boʼtí ven. Dzə̀ kfə́ə vinyò vìn ve ví yii, a Nyùy shwiiy kilòŋ fo wír ve á méŋ wune, a wù wíy màʼ ŋgeʼ sho.

⁷Kí nén a dzə ji lá vèn yòʼ a shem a ŋgoo yev.

⁸Vèn yòʼ dzəə́ ghán e ndzə ye sənér moo vee shooy vee wír. Vèn sì kén wír Nyùy, a vèn sí kér rán. Vèn ku nèn a ghan moo wír ve á sí yén rán.

⁹A kí dzə̀ jii, vèn lóo ghan e mvə̀m ran ye Nyùy fó e vèn rən, é vèn nèn a yiì a dzə̀ vinyo ve ru ví ve ví wáa dzə kijuŋ, là kiloʼ.

¹⁰Vèn kú a way vifií ji á wáa yiì a dzə̀ vinyo ve ví wáa bòŋ Nyùy.

¹¹Lá vèn yòʼ wày kiwó e vinyò ve wír ve á ghán e ndzə vitsə̀ʼə́ yii. Vèn wáa fo áwune a dzə̀ rán, aá wáa yen ji vinyo vee shooy vi dzə̀ á joonè.

¹²A dzə̀ woómé feyì fo wìr fə́m a fèr vinyo ve wíri yii e kilìtì vìn.

¹³Vèn lóo dìn áwune a dzə̀ rán bèy, aá nèn yèn kfə́ə kinyò ke á yii e ndzə vitsə̀ʼ kin. Á lóo yen, aá nèn màʼtì, a ghan a dzə̀ é mvə̀m ran.

¹⁴Á kinyo ke kí‑iì yiìn, é bo á yoŋ kinyo kímóʼ kí jii: «Wò woo ŋgaà mbuùné, yìmène. Fəə́ fó sày ye à néŋ sho, é Kristu fó wò rán.»

¹⁵Vèn ku nèn a tiír rì kiwuú kén, a fìʼ, a ghan moo wír ve á kér vifií, e làa yòʼ a ghan moo viyúŋ.

¹⁶Vèn li kilíŋ ke Nyùy foon e vèn, a yiì a dzə̀ vinyo ve juŋ vi, bìʼ fo vinyo ve bi ví kùʼùn é ghan sin e ŋàŋ.

¹⁷Kí nén a dzə jii, lá vèn yòʼ a yiì kinyo a là vifií. Vèn wáy a dzə̀ vifií ví ji vèn kiíy á kinyo ke Nyùy taʼ ji vèn wáa yiì.

¹⁸Lá vèn yòʼ a yu a dzə̀ fó melùʼ me noón mè, bìʼ fo dzə̀ mè kù wày ven a dzə̀ é kinyò ke bi kí. Vèn kú a yu kén a dzə̀ fo Kiyoy ke Ranén kí, é kí rún e věn meliv.

¹⁹Wìr wùn wìr kú a fèr kimfèr a dzə̀ kee kùm Nyùy, a yòv luŋ se sí fəə́ fo wùn ŋwàʼ, kìn dzə̀ se Kiyoy kfə́ kí fó e ŋgaàŋ, e kfə̀n a yòv símóʼ sí, a sùyrì wun sho. Vèn kú a yòv, a sùyrì Nyùy shilív shén shidzə̀m,

²⁰a beèrì wun woo Tàr wòsən fó vinyò ve wù yii e vèsən vidzə̀m, a beèrì ghán sidzə̀m, a beè a dzə̀ Taàtá wòsən Jesus Kristu.

²¹Kímóʼ kí nén a dzə jii, ven vee wír Kristùu wáa fonín a vitú vén. Vèn lóo yiì bèy, bo á ghvə́m a dzə̀ wun woo Kristu.

²²Ven vee vikìy, vèn ku nèn a fo vitú vén áàlúm véné moo wír ve á yú fo Tàr wov wo dzəə̀n Jesus Kristu.

²³Vèn wáa kiíy ji wiíy dzə̀ e lùmèn sar mo kintatì ke wìr Nyùy ki dzəə̀n e Kristu sar. A kintatì kìn ki dzə̀ wún və́, a kù‑uù fò wun kitú kfə́, e lùŋèr kintatì kee shoon.

²⁴Vikìy ku nèn tàtí vitú vév, e fò áàlúm véví, a yu kinyo kidzə̀m fo áwune réŋréŋ mo kintatì ki fó e Jesus Kristu, yú fo fo.

²⁵Ven vee vilum, vèn kú a kòŋ vikìy vén réŋréŋ mo Kristu‑uù kòŋèn kintatì ke wìr və́, e kpù fó fo.

²⁶Wù‑uù kpù ji áwune fíʼ a dzə wír ve á gheenen fo Nyùy. Wù‑uù fìʼtì kinyo ke Nyùy aáwune, á wáy áwune é ndzəv ji wír ve Nyùy suùn ne njò yev.

²⁷A Kristu‑uù nàŋsín áwune bey ji wáa dzə ji kfə́ kee kintatì, a bòŋkìr, a njàʼkìr mo kifá ke Nyùy ki yii dzə́. A dzə̀ jii, kí wáa dzə a là shilóm, e làa yòʼ a ker nsem yìmòʼ gheéy, a dzə bèn là jay.

²⁸Kù dzə̀ réŋréŋ sá mo lùmèn wáa kòŋ wiíy və, a leéy fo fo, a kiíy ji wùn wun dzə̀ á kitú kimòʼón. A lùmèn koŋ wiíy və, géʼ sho, bo wù géʼ a dzə̀ e kfə́ kee kitú ki.

²⁹Bó wìr yòʼ yii nyavrì e kitú kfə́ kí. Wù kù yii náŋsin, géʼ sho géʼén. A dzə̀ réŋréŋ mo Kristu yii géʼ e vèsən ve dzəə̀n kintatì kfə́ kí,

³⁰bìʼ fo kintatì kìn ki dzəə̀n wún və́, a vèsən dzə̀ vibar ve wùn woo shooy.

³¹ Vé‑eè sàŋ kímóʼ kí jii, «Á kinyo ke kí yiìn, é bo lùmèn maʼti tàr wov wùn yè wov, e tàtí wùn wiiy və, áwune vee wír abàá nén a dzə wún e mòʼón.»

³²Vé‑eè sáŋ bèy, a kinyo ki dzə̀ é bàm wó ke bó á yòʼ‑oò kiìn, a m yén ji kí fiʼsìn kinyo ke Kristu wùn à kintatì kfə́ kí.

³³Mo kí fiʼsìn bèy, vèn ku nèn a yiì réŋréŋ, é lùmèn wáa kòŋ wiíy və, a geʼ sho moo kitú kfə́, é wiíy wáa yu a dzə̀ fo lum və.