Read Lamnso Kolosia 1 Bible Online

Kolosia 1 - Lamnso bible

Kolosia 1

¹Sàŋ mo woo Por vèr fər wòsən Timoti ŋwàʼ və̀n. A dzə̀ mo wo dzəə̀n ŋgaà ntum Jesus Kristu mo Nyùy sìysìn ji m wáa yiì lim rə̀n.

²A vèr sàŋ a dzə̀ fo vèn vee wír Nyùy ve á dzəə̀n é ntèʼ yee Kolosia. Dzə̀ ven ve vèsən tatin ji afə́r é kinyò ke Jesus Kristu, vèn wáa tiy sho kitávín. A m lón ji Nyùy woo Tàr wòsən kú a kòŋ ven, a leéy fo vèn, a yiì, é meliv men mè wáa dzə nyaáŋ.

³Vèr yii lóo bùnrì fo vèn, vèr kù a beèrì Nyùy béerin. A vèr beerì wun woo Tàr à Taàtá wòsən Jesus Kristu bèy,

⁴bìʼ fo vèr yén ji vèn wày shilív e Jesus Kristu wùn kitávín, kfə̀n yú sa mo vèn koŋ wír ve dzəə̀n vé Nyùy adzə̀m.

⁵Vèr kì ji vèn yii vinyo vìn bèn, bìʼ fo vèn tiirin ne vifií a dzə̀ fó mbìy, a shìy vijuŋ ve Nyùy kàʼàn ven shó e yuv. A dzə̀ vijuŋ ve vèn‑eè yuun é ghan se vé‑eè wìyìn, a fìʼtì ven kinyo ke dzəə̀n ke ru kí, ke dzəə̀n sáʼka wo juŋ wo wù lo a dzə̀ fo Nyùy.

⁶Sáʼka və̀n sí ghán lèn virə́ʼ vidzə̀m, du duùn fó mbìy, yii, a wíri yú vijuŋ anín. A kù dzə̀ mo sáʼka woo shooy yii e věn mvəm, e kèʼ fo kishiíy ké mbìy ki ke vé‑eè wìyìn, e fìʼtì e vèn. Vèn‑eè yù mo Nyùy koŋ ven, shám ven, vèn nèn kìíy ji dzə̀ á kinyo ke ru kí.

⁷A wìr wo wù‑uù tòmbìy fèr kinyo kee shooy e vèn dzə̀ Epafar wo vèr áwune lim kinyo ke Jesus Kristu wír amòʼón, a vèr koŋ wun feyì. Wù nèn lì kirə́ʼ kér, e wìy, a fìʼtì kinyo ke Jesus Kristu e vèn shilív shimòʼón.

⁸Yì‑iì fèr wun e vèr mo Kiyoy ke Ranén kí yiìn, vèn wáa kòŋ wír ve dzəə̀n vé Nyùy adzə̀m.

⁹Kèʼ fo kishiíy ke vèr‑iì yuun mo vèn wayin shilív e Jesus Kristu wùn, vèr ku nèn a bùnrì fo vèn ghán sidzə̀m. A vèr lón ji Nyùy ku yiì, é vèn kiíy vinyo ve ví dzəə̀n e wùn shiliv, a kiíy ghán sidzə̀m mo wù koŋ ji vèn wáa yiì, é vèn nèn a kiíy rú vinyo.

¹⁰Vèn kiiyì, é vèn nèn a dzə mo dzə̀ wír Nyùyi wàa dzə, a yiì kinyo a dzə̀ ke kí wáa bòŋ wún Nyùy. Vèn yíi a yiì vinyo ve juŋ vi vidzə̀m, e kfə̀n màysì a kiíy mo wun woo Nyùy dzəə̀n, a dù duùn fó mbìy.

¹¹Vèr kfə́n a lon jii, Nyùy wo vitaáví vidzə̀m vi dzəə̀n və́ kú a tavír ven, é vèn wáa shaà e mvə̀m ŋgeʼ sidzə̀m, a lì vinyo vidzə̀m ji weè, a sheʼrí,

¹²a beèrì wun woo Tàr wòsən. Yì‑iì lì wun ven, e nàŋsín ji wír və́ ji vèn fiʼ wìy a dzə e wùn mvə̀m ran, e nəə́ e vijùŋ ve wù lèmèn e wír vəə́ adzə̀m.

¹³Wù‑uù fə̀ə́r ne vèsən fó saʼ yeé ndzə vitsə̀ʼ, e wày a dzə̀ é saʼ ye kér Wán və wo wù koŋ e ŋàŋ.

¹⁴A yiì wun, bo Nyùy laysin ajay vesən, é vèsən boy fó ŋgeʼ.

¹⁵Kristu woo Wan Nyùy dzə̀ wúntí Nyùy wo bó wìr yòʼ yii shóv e si. Wù kfə́n a dzə ji kitú fo vifa ve vé‑eè bomen vidzə̀m.

¹⁶A kí dzə̀ jii, Nyùy‑iì wày á vitaáví vidzə̀m a dzə̀ e wùn kiwo, wù bóm vifá vidzə̀m. Wù bóm veé yuv, e bòm veé nsay, kìn dzə̀ vifá ve á yéné, kìn dzə̀ ve bó á yòʼ yéné. Ku kfə̀n bòm wun vifá ve ví kér vitaáví é ndzə vidzə̀m, kìn dzə̀ nshèelav se Nyùy, kìn dzə̀ *anyùy ve á ghán e shwer. A Nyùy‑iì fò vitaáví, wù bóm vifá vidzə̀m bèy ji ví wáa yu a dzə̀ á fo fo.

¹⁷Wù nèn a dzə, é bo vifá vìn vi wìy a kèʼ, a tátí wun vifá vìn vidzə̀m, a yiì, bo ví wáa lìm, a shemsín.

¹⁸A kfə̀n dzə̀ wun kitú ke kintatì ke wìr Nyùy ke dzəə̀n ji wún və́. Kù‑uù yiì wun, bo kintatì kìn ki keʼ a dzə, bìʼ fo dzəə̀n wun wir mbìy wo Nyùy‑iì fəərin fó kpu, nén a dzə wun wo wù tíy mbìy vinyò vidzə̀m.

¹⁹A yì‑iì sìysì Nyùy bèy, bìʼ fo wù‑uù taʼ ji Wan və kú a dzə réŋréŋ vinyo vidzə̀m ji wun,

²⁰e fíʼ lì vifá veé ndzə vidzə̀m, é ví kfə́n fo wun woo Nyùy, kìn dzə̀ veé yuv, kìn veé nsay. Wù nèn yiì, Wan və wìy, e cùtì mensə́ mvə, e kpù é kintam, wù mán vinyo veé ndzə, wùn à vifá vidzə̀m vi kfən bòŋnìn.

²¹A kù dzə̀ mo kén kí dzəə̀n. Vèn à Nyùy‑iì jàvsìn, bìʼ fo vèn‑eè méŋ wun méŋén, yii a dzə̀ vinyo ve bi ví.

²²A wù lì ne ven lèn ji ŋkar sə́ bìʼ Wán və wo wù‑uù wìyìn, e lì mbom wìr, e kpù fo věn vinyò ve bi ví. Vèn nén a tiy e wun woo Nyùy si lèn ji wír və́ aránén, là njò.

²³A dzə̀ mo vèn à Nyùy kù wíy a dzə bèy, a vèn fen ghàr kinyo kfə́, a tiy sho kitávín, a leéy a dzə̀ fó mbìy ji vèn ku wìy nə̀ə́ e vijùŋ ve wù kàʼàn wír və́ shó. A dzə̀ víwun ve vèn‑eè yuun é ghan se vé‑eè wìyìn, a fìʼtì sáʼka Nyùy wo juŋ e vèn réŋréŋ mo á sí fiʼtì lèn virə́ʼ vidzə̀m, a dzə̀ yíwun yee lim ye Nyùy wayin e mo woo Por kiwo.

²⁴Yii bèy, á wày ne mo é ŋgeʼ lèn, bìʼ fo m fiʼtì kinyo kee shooy e vèn. A m shéʼri kee shooy shéʼrín, bìʼ fo m yén ŋgeʼ a dzə̀ fo kintatì ke dzəə̀n wún Kristu ki. Wù‑uù yèn ŋgeʼ sigháʼán, e bóo kèʼ kintatì kìn. M nén a yen kém ŋgeʼ lèn ji m maysi kinyo ke wù‑uù kèʼèn, é kintatì ki fíʼ tuúy.

²⁵Nyùy‑iì lo lì mo ji m wáa lìm a dzə̀ á fo kintatì kìn ki, é ven vee wír vəə́ wáa yu vijuŋ. A lim yémé dzə̀ ji m wáa fìʼtì kinyo kfə́, a sanrí, aá kiíy mo kí dzəə̀n.

²⁶Yì‑iì dzə̀ fó mbìy, a kinyo ke m fiʼtì kìn ki dzə̀ é kilìr, la wìr yòʼ a kiíy, e shem lèn, a Nyùy yiì ne, vèsən vee wír vəə́ kiíy lèn.

²⁷A kù dzə̀ mo wù‑uù sìysìn ji wun wíy yiì, é wír vəə́ kiíy á kinyo ke wù‑uù lìtìn kin, kee ji wun wíy bùʼ vitúm vidzə̀m e vijuŋ ve ghaʼán ví. Mo Jesus Kristu siìn e věn meliv, a dzə̀ vèn kìíy ji vèn wíy nəə́ e wun woo Nyùy mvə̀m vijùŋ veé yuv.

²⁸Vèr ku nèn a fìʼtì wun woo Kristu e wìr dzə̀m, a tir áwune, fo á rán vijuŋ vee shooy, a lì vifií vér, a yeʼéy wir mòʼón mòʼón, aá maysi, e tàtí wùn à Kristu, e ghèén mo dzə̀ wír Nyùyi wàa dzə.

²⁹M ku nèn wày ŋàŋ, a ghìtìr e kinyò foo fèy. A m yii a dzə̀ mo Jesus Kristu fó mo vitaáví və́ ve ghaʼán ví, a ví lim e mǒ wùn.