Read Lamnso Kolosia 4 Bible Online

Kolosia 4 - Lamnso bible

Kolosia 4

¹Ven ve vèn kér akwàn, vèn wáa ker akwàn vén é dzəə yee réŋ, a leéy fo fo kijuŋ, a kuumé ji vèn kér wóon woo Tàr, a wù dzə̀ a dzə̀ é yuv, yén vinyo ve vèn yii vidzə̀m.

²M nén a tir ven adzə̀m ji vèn ku ghàr kinyo a ji bunrì, e làa yòʼ a dor. Lóo bùnrì, á wàa way vifií, e kfə̀n a beèrì Nyùy.

³Vèn kfə́n a bùnrì sa fo vèr, a lon ji Nyùy ku fò ver kintóʼ ke juŋ ki, é vèr wáa fìʼtì a kinyo kee kùm Jesus Kristu ke kí‑iì dzəə̀n é kilìr. A m dzə̀ é sháŋ lèn bèn a dzə̀ bìʼ sáʼka woo shooy.

⁴Vèn ku nèn a bùnrì ji m wáa fìʼtì a tèéter, là fan mo dzə̀ m kù a fìʼtì.

⁵Vèn lóo ghan vèn à wír ve bó yòʼ siìn vé Nyùyi, vèn kù a way vifií, a tàʼ a dzə̀ kintóʼ ke dzə̀ vèn dìn áwune kinyo ke ru kí.

⁶Vèn áwune lóo fèr kimfèr, vèn kù a səʼə́m ji nyaáŋ, a suŋnín ji weè, é vèn nèn a kiíy mo dzə̀ á bìnèr kinyo e wìr, wù yù.

⁷Kee kùm dzəʼə̀m yém yee fen lèn ki nén a dzə jii, fər wòsən Ticikur wíy wìy, é wù fer ven vinyo ve ví kooy mo vidzə̀m. Dzə̀ wír, a wù lim e kinyò ke Tàr wòsən Jesus Kristu feyì, a vèr koŋ wun e ŋàŋ.

⁸M nén a tsənsí wun fo vèn lèn ji wù wiy, e fèr, é vèn yú mo m dzəə̀n, é melív men mè fiʼ rə̀sìn.

⁹Wù wiy wùn Onesimur woo wír woo věn kintatì, a kfə̀n dzə̀ sá fə́r wor féyì, a wù tíy e kinyò ke Kristu bèn kitávín. Áwune wíy wìy, aá fer ven vinyo ve ví kooy mo vidzə̀m.

¹⁰Aritakur wo vèr wun lim sháŋ fen, shaʼtì ven, a Maak shaʼtì sa. Dzə̀ wun wo dzəə̀n wan jèmèr Banabar wo mò‑oò saŋen fo vèn ji a wù fen wìy, vèn kù keèrì a kijuŋ.

¹¹Joshua wo á kfə̀n yoŋ sa ji Justur shaʼtì sa ven. Fo wír veé Juda ve á tíy wùn à Jesus Kristùu kù mày vee ataár vìn ve á tatin ŋgoo yem, vèr áwune wáa fìʼtì kinyo kee kum sáʼ Nyùy. Aáwune sə́ mo féyì.

¹²Epafar wo dzəə̀n wír woo věn kintatì, shaʼtì sa ven. Wù lim sa kitávín fo Jesus Kristu. A wù yii kuúme ven ghán sidzə̀m, bunrì ji Nyùy ku yiì, é vèn wáa tiy kitávín vèn à Nyùy, e màysì a dzə ji wír və́, a kiíy kinyo ke wù taʼ ji vèn wáa yiì, a tiy a dzə̀ shó.

¹³A m yén e sí yémé ji wù kér shií fo vèn féyì, kfə̀n kér fo wír veé Ladisiàa wùn à veé Hirapoliri.

¹⁴Luk woo ŋgaà shìv wo vèsən koŋ adzə̀m wùn Demar shaʼtì sa ven.

¹⁵Vèn shaʼti afə́r vesən veé Ladisiàa e fò e mò, e kfə̀n shàʼtì sa Nimfa wùn à kintatì ke kí tár e wùn lav ki.

¹⁶Vèn yoŋ ŋwàʼ və̀n, maysì, á tsə̀nsí, aá yoŋ sá e kintatì keé Ladisia. Áwune wíy tsə́nsi wóv woo ŋwàʼ wo vé‑eè foon aáwune, vèn kù yèn ji á yoŋ sáa woo shooy.

¹⁷Vèn tiísí e Akipur jii, wù ku wày á ji wun yii lim ye Tàr wòsən Jesus Kristu wayin e wùn kiwo, e yiì feyì a mo dzə̀ wù yiì.

¹⁸Mo woo Por nén a saŋ lèn e kiwó kém kí, a shàʼtì ven, a suúy ji la vèn yòʼ a làysìn a ji m dzə̀ é sháŋ. M ku nèn a way ven a dzə̀ e Nyùy kiwo ji wù kú a kòŋ ven, a leéy a fo vèn.