Read Lamnso 1 Tesalonika 1 Bible Online

1 Tesalonika 1 - Lamnso bible

1 Tesalonika 1

¹Ŋwàʼ və̀ne sàŋ mo woo Por, vèr à Silar, à Timoti fo kintatì keé Tesalonika ke dzəə̀n ké Nyùy woo Tàr wòsən wùn Taàtá wòsən Jesus Kristu. A vèr lón jii, Nyùy kú a kòŋ ven, a leéy fo vèn, a yiì, é melív men mè wáa dzə nyaáŋ.

²Vèr yii lóo bùnrì, vèr kù a kuumé ven, a beèrì Nyùy woo Tàr wòsən bìʼ ven wír adzə̀m.

³A vèr kuúme a dzə̀ mo vèn yii. Vèn wày shilív e Nyùy wùn, a lìm fo wun, e kfə̀n suùsín, a kòŋ wun, e nèn a lìm, a shaàsìn. A vèn kfə̀n leey sa fó mbìy, shiy ji Tàr wòsən Jesus Kristu wàá wiy, nèn tíy kitávín, la kinyo kímóʼ kí yòʼ dzə́ə a sə̀ʼ ven gheéy.

⁴Afə̀r ver, vèr kì sá ji Nyùy‑iì kòŋ ne ven, e shàv ven ji və́ vee wír,

⁵bìʼ fo vèr kuúme mo vèr‑iì fiʼtì sáʼka Nyùy wo juŋ e vèn. Vèr‑iì fiʼtì, a báyri Kiyoy ke Ranén kí melív men, a vèn biíme, bìʼ fo vèr yòʼ‑oò fiʼtì a dzə̀ e shúu cáʼcáʼ. Vèn‑eè ló a yen e sí yéné mo vèr‑iì dzə́ e věn mvəm ji kinyo ke Nyùy ki fiʼ tùúy.

⁶Vèr kfə́n a kuumé sa mo vèn bìʼnìn ver, a dzə̀ ji vèn bìʼnìn a dzə̀ Tàr wòsən Jesus Kristu. Vèn‑eè biìmé kinyo ke Nyùy, á nèn a rəsí, a nyàvrì e vèn, vèn kú a way shilív, Kiyoy ke Ranén kí wáa yiì, vèn wáa ker kishéʼrì e věn meliv.

⁷Vèn nén a dzə sa mfìʼ fo aŋgàa biimé ve á dzəə̀n é wòŋ Masedoniàa, e kfə̀n a dzə fo veé wòŋ woo Akayàa adzə̀m, a dìn mo dzə̀ á wàa yiì sa.

⁸A sáʼka woo kùm Jesus Kristu və̀n‑eè lò a dzə̀ fo vèn, e bóo sàmèr e věn wòŋ woo Masedonia, e kfə̀n sàmèr woo Akaya e dzə̀m. Yii bèy, sáʼka woo mo vèn wayin shilív e Nyùy wùn yòʼ‑oò lo gòʼ a dzə̀ é Masedonia wùn ǎ Akaya cáʼcáʼ gheéy. Wù‑uù ghànén virə́ʼ vidzə̀m, la vèr yòʼ dzə́ə a ker shií wóo a fìʼtì e wíri fíʼtin.

⁹Wìr dzə̀m kù‑uù sí fer mo vèn‑eè keerin ver é ghan se vèr‑iì wìyìn, e ghàn ven, kfə̀n fer mo vèn‑eè màʼtìn anyùy kisaŋe, e bìnkìr, e kfə̀n fo Nyùy wo wù dzəə̀n rú e tin, a yu a dzə̀ fo wun.

¹⁰Á kfə́n a fèr sa mo vèn leey fó mbìy, shiy Wán və woo Jesus wo wù‑uù fəərin fó kpu, é wù wiy fó yuv, e tìn vèsən fó ŋgeʼ ye yì wiyì.