Read Lamnso 1 Tesalonika 2 Bible Online

1 Tesalonika 2 - Lamnso bible

1 Tesalonika 2

¹Afə̀r ver, vèn kì kijuŋ ji bó kiŋgàn ke vèr‑iì wìyìn fo vèn kí yòʼ‑oò lo lày a kisáŋ.

²Vèn kì sá mo wíri‑iì nəʼsì ver, kfə̀n shoor ver é Filipi, a Nyùy kù távir melív mer, vèr ku yòʼ wìy, a fìʼtì sáʼka və wo juŋ e vèn, a wíri fə̀m‑eè kinèn e le.

³A vinyo ve vèr rə́si fiʼtì, boorì ven shó vìn vi yòʼ dzə̀ kimboʼtì. Vèr yòʼ fiʼtì bèn ji á fiʼ yiì liì kisaŋ e wìr, a bó vèr yòʼ kfə̀n taʼ, e levtí wír levtín gheéy.

⁴Vèr ku nèn a suŋnín a dzə̀ mo Nyùy taʼà, bìʼ fo yì‑iì shavin wun ver, e bóo way sáʼka və wo juŋ e věr kiwo. Vèr ku nèn a fìʼtì, a bó á yòʼ fiʼtì ji kí wáa gheén wír. Vèr fiʼtì ji wáa binsí Nyùy wo wù sáyri melív mer.

⁵Vèn kì kijuŋ, a Nyùy kì sá bèy, ji bó vèr yòʼ‑oò lo wìy, a leèrì wíri léerin, a bó vèr yòʼ‑oò lo bòm sá kinyo ji á fíʼ koóy kifá.

⁶Vèr yòʼ‑oò ló a tàʼ ghvə́m yímóʼó gheéy, kìn fo vèn, kìn fo wír ámóʼó.

⁷A yì‑iì dzə̀ kilíŋ kér fo vèn wáa ghvəm ver, bìʼ fo vèr dzəə̀n aŋgàa ntum Kristu. Yii bèy, vèr nèn a ker ven ji nyaáŋ mo yeè wàn yii géʼ e wón vəə́.

⁸Mo vèr‑iì sí báŋri ven bey, la vèr yòʼ a tàʼ, e fo ven a dzə̀ sáʼka Nyùy wo juŋ cáʼcáʼ. Vèr nèn fò sá vitú vér e vèn, bìʼ fo vèr kòŋèn ven é ŋàŋ.

⁹Afə̀r ver, vèn kfə́n a kuumé sa mo vèr‑iì lim, túŋ akwiiròn e ghan se vèr‑iì fiʼtì sáʼka Nyùy wo juŋ e vèn. Vèr‑iì lim e shùy, lim vitsə́ʼ ji á fíʼ koóy a kifá ké a yi. Bó vèr yòʼ‑oò ló a leéy vifá ve yi fo vèn, bìʼ fo bó vèr yòʼ‑oò taʼ, e way ven é kibèʼèy.

¹⁰Vèn‑eè ló a yen, Nyùy wáa yen sa, mo liì wor‑iì dzəə̀n e ven vee aŋgàa biimée mvəm. Bó vèr yòʼ‑oò ló a shwìv wír wùmòʼ gheéy. Vèr‑iì yii vinyo réŋréŋ là kiloʼ.

¹¹Vèn wáa kuumé sa ji vèr‑iì ló a leéy a fo vèn mo taà wàn lèéy fo wóné, boorì ven, lóʼti ven, kfə̀n tír ven ji

¹²vèn wáa ker a liì wo wù gheenen Nyùy. A dzə̀ wun woo Nyùy wo wù liìn ven ji vèn wáa dzə e wùn mvə̀m saʼ, e nəə́ sa e wùn mvə̀m vijùŋ.

¹³Kinyo kímóʼ kí ke vèr rə́si beerì Nyùy fo fo ki dzə̀ jii, vèr‑iì fìʼtì kinyo kfə́ e vèn, vèn ku nèn biìmé ji dzə̀ rú á ntum Nyùy, a bó yòʼ dzə̀ ye wìr. Mo vèn biimen, yì nèn a lùm e věn meliv kitávín.

¹⁴Kinyo ki nén a koóy ven, afə̀r vem, réŋréŋ mo kí‑iì kooy wír veé Juda ve vé‑eè wayin shilív e Jesus Kristu wùn, e tàtí, a dzə ji wír Nyùy. Wír vee věn wòŋe nén a fo sa ven ŋgeʼ mo wír veé Judàa‑aà fó e vee shooyi.

¹⁵A dzə̀ áwune vee wír veé Juda vìn ve vé‑eè yúyri *aŋgàa ntum Nyùy, e kfə̀n yùyrí sa Tàr wòsən Jesus. Ku kfə̀n a dzə sa áwune ve á ron wúu yér lèn. Mo áwune yii bèy, á tínsin a dzə̀ Nyùy, kfə̀n téʼtin wíri,

¹⁶bìʼ fo áwune sháʼnin fo vèr wáa ghan fo vèn vee wír ve bó yòʼ dzəə̀n veé Juda, a fìʼtì ji dzə̀ Nyùy lùŋèr sáa ven. Aá yiì ne bèy, vinyo vév ve bi ví máysí, e kùʼ, lǒn Nyùyi koó áwune.

¹⁷Afə̀r ver, ntàm yóʼ ne dàr mo vèsən‑eè jàvsìn, a vèr kù kér shií fo vèn é ŋàŋ, mum feyì fó kfə̀n wìy, e yen ven. Yii bèy, a bó vèsən yòʼ‑oò lo jàvsìn fo meliv gheéy. Vèsən‑eè jàvsìn a dzə̀ fó wùn.

¹⁸Vèr ku nèn a tàʼ fó kfə̀n wìy, e ghan ven. Mo woo Por mùm akàŋ anín, bo Satan jívír.

¹⁹A vèr kér shií fo vèn ben, bìʼ fo dzəə̀n ven ve dzəə̀n viwìr vér, e kfə̀n a dzə kishéʼrì kér. Kí búŋ fó bey, bo Tàr wòsən Jesus wíy wìy, vèsən lóo tiy e wùn si, é vèr wáa kàn a dzə̀ ala, é vèr wáa sheʼrí a dzə̀ bìʼ ala, é vèr wáa binsí nsiì a dzə̀ bìʼ ala? Kù wíy a dzə bìʼ ven vin ve vèr kooyin ji wír və́.